KABONG, 23 Mac — Opis Betanam Betupi Sarawak majak chakah agi ngenegapka sektor pemansut padi nengeri tu nengah pengawa bejalaika pansik padi hibrid ba Stesyen Pansik Betanam Betupi Sessang, Kabong.

Direktor Betanam Betupi Sarawak, Dominic Anak Chunggat, kena Hari Lima nyin tadi udah bejalaika pengawa nemuai ngagai stesyen nya dikena beratika pemansang pemadu baru dalam projek tanam padi hibrid ti benung dipejalaika kompeni Green World Genetics (GWG).

Penemuai nya ngembuan tuju deka beratika pejalai asil pansik enggau komprehensif, kelimpah ari nentuka pengawa bejalaika inisiatif tu setipak enggau juluk deka nambahka produktiviti pemansut beras sereta ngenegapka pengelikun pemakai nengeri tu, kelebih agi dalam nyapai tagit ‘Tahap Sara Diri’ (SSR) beras Sarawak.

Rambau penemuai nya, iya mega bisi beinteraksyen enggau pemesai ti bejalaika GWG ngulihka timbal pasal pejalai projek nya, kelimpah ari betukar penemu pasal chara pemadu manah dalam ngenegapka pengawa ngatur utai tanam enggau ngena teknologi ti engkeman enggau rampa menua.

Inisiatif tu ngayanka komitmen perintah nengeri ti terus ngenegapka sektor agro-pemakai nengah chara bepelasarka pansik enggau inovasyen, lalu enggau nya ulih nambahka daya besemekih enggau pengelantang industri beras di Sarawak.

Sama bisi datai Menijar GWG Debak, Mr Low Kok Leong; Penulung Pemesai Betanam Betupi, Encik Bidat Kasi; enggau pengereja pengawa Opis Betanam Betupi Pelilih Saratok. — RBI

Dikena ngamatka komitmen nya, KPM bekerejasama enggau Opis Menteri Pengerai Malaysia (KKM) enggau Opis Menteri Pelajar Tinggi (KPM) udah bejalaika inisiatif Program Sekolah Dalam Sepital (SDH).

Inisiatif tu ngembuan tuju deka nyendiaka akses pelajar ti terus ngagai nembiak ngambika sida ulih nitihka pelajar sida ba kandang endur ti engkeman sepemanjai timpuh sida berubat.

Naka ke diatu, 20 program SDH udah beoperasyen di serata menua, meri penguntung ngagai lebih 400,000 iku nembiak kenyau ari pengawa bejalaika iya diberi kelala.

Program tu ukai semina nentuka penerus pelajar, tang mega nyukung pengelantang emosyen enggau motivasyen nembiak.

Pengawa ngerembaika program SDH majak chakah dipejalaika, enggau pengawa bejalaika pemadu baru di Sepital Seberang Jaya, lalu enggau nya nyadi program SDH keterubah di nengeri Pulau Pinang.

Komitmen Opis Menteri Pelajar ti deka terus ngerembaika akses ngagai pelajar ti bekualiti disalin nengah pengawa bejalaika Pelin Pelajar Malaysia (MPM) 2026–2035 ti ngemeratka pelajar ti inklusif sereta sama rata ungkup semua.

Nitih ku Menteri Pelajar, Fadhlina Sidek, inisiatif baka SDH mandangka pengibuh perintah dalam nentuka tetiap iku nembiak bisi akses ngagai peluang pelajar enda ngira gaya sida. — RBI

KAPIT, 23 Mac — Menteri Kereja Raya, Dato Sri Alexander Nanta Linggi ngemeratka komitmen perintah ti terus dalam nentuka pengelantang enggau pemansang rayat terus dikemeratka, kelebih agi ba kandang menua pesisir baka ba Kapit.

Iya ke mega Kaban Parlimen Kapit madah munyi nya lebuh bejadika Aum Ketuai Begulai Enggau Rayat ke diatur ba Rumah Josceline Lia Endau, Emperan Pedalai Mansau, Mumu, ditu, sehari tu tadi.

Nitih ku iya, taja pan tanggungpengawa nyadi Menteri Kereja Raya begunaka komitmen ke tinggi di serata menua, tang iya tetap bebendar ngena awak ba palan nyapai sereta mendingka diri empu peminta rayat ba sitak Parlimen Kapit.

“Ukai muntang ba aku suah di Kapit, tang sitak tu seruran semak ba ati aku lalu aku deka terus bebendar begulai enggau rayat,” ku iya.

Dalam jaku dipansutka iya, iya nyemetak madahka perintah bebendar deka nentuka pemansang inklusif, nadai ngelimpangka sebarang piak, setipak enggau penuduk wang Sarawak ti majak tegap.

Iya mega nerangka penumbuh Ejensi Pemansang Ulu Rajang (URDA) siti singkang strategik dalam ngenyampatka pemansang pelilih menua Kapit enggau kandang menua ngelingi nya.

“Enggau penegap ke dikembuan kitai, kitai diatu ulih minta hak Sarawak enggau efektif agi ari Perintah Besai,” ku iya nambah.

Berebak enggau nya, iya madahka Perintah Besai ari baruh iring Menteri Besai Datuk Seri Anwar Ibrahim nengah penemu Malaysia MADANI terus ngemeratka pemansang ti sebela, enggau agih belanja lebih RM1 bilion diungkup projek pemansang di Kapit.

Entara projek besai ti dipejalaika nyengkaum ngaga jalai ba sepiak kiba mudik Batang Rajang kelimpah ari projek ngaga jematan meraka sungai ti beungkus lebih RM300 juta.

Kelimpah ari nya, asil ari randau enggau Menteri Besai ba taun 2024, perintah mega ngemendarka pengawa ngaga jalai alun terus ngagai Nanga Seranau enggau ungkus anggar urung RM400 juta.

Projek bukai ke bela dipejalaika iya nya projek ngaga jematan ba Sungai Kapit ke beungkus lebih RM100 juta enggau ngaga Indu Opis Polis Pelilih Menua (IPD) baru ke beungkus lebih RM132 juta.

Dalam pengawa ngenegapka pelajar enggau pemansang modal mensia, pengawa ngaga Kolej Profesional MARA di Kapit mega bisi diperambu, lalu ngujungka penyampau semua rega projek pemansang di sitak nya manggai lebih RM1 bilion.

Ngenang silik agi, Nanta madahka semua inisiatif tu asil ari kerejasama rat entara Perintah Besai enggau Perintah Nengeri, pia mega komitmen pengari rayat ke terus bebendar dalam nentuka pengelantang pendiau rayat terus dijaga.

Ba pengerami ke sama, pengawa masang perengka guna internet satelit Starlink mega dipejalaika dikena nambahka akses internet ba kandang rumah panjai, lalu enggau nya ngerapitka seraka digital menua pesisir.

Kelai sukung ngagai komuniti menua nya, iya mega bisi madahka agih belanja penyampau RM30,000 dikena ngaga stor enggau dapur, lalu pia mega RM15,000 ungkup Komiti Pemansang enggau Pengelikun Genturung Pendiau (JKKK).

Iya mega ngingatka rayat ngambika seruran nyikap diri napi sebarang pekara ti deka nyadi nyengkaum pengawa bepilih nengeri, seraya ngemeratka pemesai guna penyerakup enggau kerejasama dalam nentuka pemansang Kapit terus maju sereta lantang.

Sama bisi datai Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat. — RBI

KUCHING, 23 Mac – Nyadi Kaban Parlimen Kapit sereta mega Menteri Kereja Raya, Dato Sri Alexander Nanta Linggi seruran pechaya tanggungpengawa nyadi siku ketuai ukai semina fokus ngagai pemansang kediatu, tang mega merambu ungkup jemah ila.

Ku iya, tu kelebih agi ba pengawa nempa sereta nerenakka rebak dudi.
“Nembiak rebak baru dalam Parti Pesaka Bumiputera Bersatu (PBB) begunaka diembing ti terus sereta diberi peluang ngambika penerus pengawa ngetanka parti kelebih agi di Kapit seruran dijamin.

“Kitai deka nentuka ukai semina penerus dalam politik, tang mega penerus pemansang ungkup rayat ba Parlimen P215 Kapit,” ku iya.
Tandu Nanta, siti ari chunto iya nya Sekretari Politik iya, Datuk Alvin Runggah Jimbun ke udah lama dilatih sereta mayuh peneleba dalam PBB enggau Gempung Parti Sarawak (GPS).

Terang Nanta, Alvin ukai semina meretika chara pentadbiran, tang mega udah ngayanka komitmen ke besai dalam gawa ke rayat.
“Berindik enggau nya, aku bepenemu enti datai ba maya aku ngelengka pangku pengawa, Datuk Alvin Runggah Jimbun entara individu ke patut diperunding nyadi chalun nyilih aku ba Parlimen Kapit.

“Iya ngembuan penau enggau pematut megai tanggungpengawa nya ngambika ulih neruska agenda pemansang enggau pengelantang rayat,” ku iya nerang.
Nanta mansutka jaku tu dikena nimbal ripot ti ngerekai ba media rama ti berambaika leka jaku “Datuk Alvin Runggah nyadi chalun nganti Nanta ba Parlimen P215 Kapit”.

Terang Nanta, pekara ti beguna iya nya pengawa ungkup rayat, lalu kuing Kapit jemah ila meseti terus diiring sida ti tau dikarapka, bepeneleba sereta komited. -RBI

KUCHING, 23 Mac – Sarawak agi nganti timbal ari Komiti Pengawa Bepilih Malaysia (SPR) enggau Perintah Besai bekaul enggau perambu nambahka 17 sitak Kunsil Nengeri (DUN) ke baru.

Speaker DUN Sarawak, Tan Sri Datuk Amar Mohamad Asfia Awang Nasar madah, taja pan perambu nya udah dikemendarka ba renggat DUN tang SPR begunaka pengawa nyendiaka ripot bepelasarka pansik sebedau proses netapka baru garis entara sitak ulih diteruska ngagai renggat ke nangkanka nya.

Nitih ku iya, naka ke diatu bedau bisi penetap rasmi sekalika 17 penuduk baru nya udah dikemendarka SPR. Proses ke nangkanka nya iya nya mantaika ripot nya ngambika bisi dibantah sebedau dibantaika ba Parlimen.

“Ba renggat DUN, pemendar udah digaga. Diatu nyadi tanggungpengawa SPR bejalaika pansik enggau proses ngaga baru garis entara sitak ba renggat baruh,” ku iya.

Kena bulan Julai taun nyin kemari, Dewan Undangan Negeri Sarawak udah ngemendarka rang undang-undang nambahka penyampau kerusi ari 82 ngagai 99 kerusi.

Berebak enggau nya, Menteri ba Opis Menteri Besai (Pekara Sabah enggau Sarawak), Datuk Mustapha Sakmud mega ngarapka SPR ulih ngenyampatka pengawa mansik nya, laban proses ngaga baru garis entara sitak meseti tembu sebedau 14 Julai 2027.

Nerang enggau silik agi, Asfia nyemetak madahka guna penuduk tambah nya ngambi kira pemesai kandang endur nya enggau pemar geografi di Sarawak.

Ku iya, ambika chunto, sitak Bintulu ti mungkur empat buah DUN ke ngembuan urung 120,000 iku pengundi patut dibagi ngambika ulih ngangkatka pemanah servis ke diberi pengari rayat.

Iya mega nerangka pemar logistik ba kandang endur ke jauh baka Ba’kelalan ti begunaka pejalai nengah transit menua luar, pia mega kandang menua Hulu Rajang ti begunaka beberapa kali ngisi minyak bilun engkabang dikena matau.

“Enda ulih nyadi pengari rayat enggau efektif nyaga kandang endur ke kelalu besai,” ku iya nyemetak seraya madahka pengawa ngaga baru garis entara menua nya mesti ngambi kira faktor geografi enggau pemesai kandang endur nya dikena nentuka servis ke lebih efektif ngagai rayat. -RBI

Info kredit MalaysiaKini

Gambar kredit UKAS

SEPANG, 23 Mac – Penyarut ke nuntung pejalai antarabansa diatu muka peluang baru ngagai Malaysia matak temuai ke udah nangguhka pejalai jauh nengah chara milih palan ke semak sereta entap agi.

Sapit Sekretari Besai (Dagang Temuai) Opis Menteri Dagang Temuai, Seni enggau Main Asal Malaysia (MOTAC), Chua Choon Hwa madah, gaya nya ulih meri pengelebih ngagai Malaysia, kelebih agi dalam pengawa nyapai tagit Taun Nemuai Ke Malaysia 2026 (TMM 2026).

“Kekadang lebuh palan ke jauh enda entap, bala temuai deka ngiga pilih ke semak agi.Tu ulih nyadi peluang ungkup Malaysia enti strategi nya dipejalaika enggau betul,” ku iya.

Ku iya, ubah baru ba strategi kimpin dagang temuai menua tu deka ditumbuh ngambika ulih nyaup penatai temuai antarabansa.

Nitih ku iya, pengawa beratika baru strategi nya deka dipejalaika berindik ari penanggul penerebai bilun ke kena empas ketegal penyarut ba sekeda menua.

“Transit di Asia Barat diatu chukup tejanggal, nya alai kami benung berundingka chara dikena mutarka gaya nya, nyengkaum ngena sekeda padang bilun transit dikena nyeliahka kandang endur ke kena empas lalu deka fokus ngagai pelilih menua ke likun agi,” ku iya lebuh bejaku beserimbai enggau pengerami Aidilfitri di Padang Bilun Antarabansa Kuala Lumpur (KLIA), sehari tu tadi.

Berindik enggau nya, iya madahka strategi dagang temuai deka ‘diselaraska’, nyengkaum mutarka penanggul transit, kelebih agi ngaul penerebai bilun di Asia Barat ke sebedau tu nyadi jalai ke beguna ngagai temuai pejalai jauh ke rantau Asia. – RBI

KUCHING, 23 Mac — Perintah Sarawak majak ngenegapka pemansang infrastruktur nengeri tu nengah pengawa bejalaika projek Ngaga enggau Nembuka Jalai Penyambung Ulu Paku – Ulu Kota (Design and Build Negotiation Contract) ke diatu benung chakah dipejalaika.

Pengawa ngaga jematan ba Sungai Ng. Alum udah dikelala nyadi siti ari komponen kritikal dalam projek nya.

Sebarang pengelaun nembuka iya bisi potensi ngeruga kesemua jadual pejalai pengawa, lalu enggau nya bisi implikasyen ngagai haribulan nembuka projek ti ditetapka kena 12 November 2027.

Nengah penerang Facebook, Pauline Bret mega nyemetak madahka pemesai guna bejalaika projek nitihka timpuh ke udah ditetapka.

Iya madahka, enti enda nembuka jematan nya nitihka timpuh, nya tau ngasuh pejalai projek nya laun.

Berebak enggau nya, iya mantaika pengarap ngambika kunteriktor enggau konsultan ke udah dipadu nya ngembuan penau bejalaika sereta nembuka projek nya enggau manah.

Kebendar iya, enti projek tu ulih ditembuka tumu ari timpuh ke udah ditetapka, nya deka dianggap pemujur ke chukup positif.

Berindik ari pekara tu, perati ti berat mesti diberi dikena nentuka tiap renggat pengawa bejalaika pengawa bejalai enggau lanchar nitihka perambu.

Pengelandik teknikal enggau ngatur piak ke bisi kaul nyadi faktor ke beguna dalam nentuka projek tu ulih ditembuka enggau sempurna, nitihka spesifikasyen enggau timpuh ke udah ditetapka.

Projek tu mandangka komitmen Perintah Sarawak ti seruran bejalaika pengawa nyendiaka infrastruktur ti bekualiti dikena ngemanahka akses komunikasyen, lalu ari nya ulih meransang pemansang ekonomi enggau pengelantang rayat ba kandang endur ti bekaul. — RBI

LONDON, 21 Mac — Menijar Manchester City, Pep Guardiola ngayanka diri agi nyadi kuasa ke patut dikearapka lebuh iya ngiring tim iya menang 2-0 ngelaban Arsenal ba final Piala Liga di Wembley.

Dua gol ari pemain biak Nico O’Reilly ngujungka City menang, lalu meri Guardiola trofi besai ke-16 kenyau ari iya megai pengawa nya ba taun 2016.

Pengudah setengah main keterubah nadai gol, City ngayanka pengering bemain ba setengah main kedua lalu O’Reilly ngena peluang ari pengilap penyaga gol Arsenal Kepa Arrizabalaga ngambika ulih ngemasukka gol pemuka ba minit ke-60.

Empat minit udah nya, O’Reilly nambahka gol pengudah nanduk masuk bol anjung ari Matheus Nunes.

Pemenang nya mega nyadi trofi Piala Liga kelima Guardiola enggau City.

Taja pan iya ngaku pekit nya enda sebaka enggau Liga Premier tauka Liga Champions, Guardiola terang gagit ati enggau pemenang nya, kelebih agi ngelaban anak ‘murid’ iya, Mikel Arteta.

“Pemenang tu ngemegahka kami laban kami udah napi dua minggu ke tusah,” ku Guardiola.

City tinggal semilan puin ari Arsenal ba liga nya lalu enda mujur ba Liga Champions ketegal alah ngelaban Real Madrid.

Taja pia, pemenang ba Wembley mandangka City agi ulih enchabar, enggau pemain biak baka Rayan Cherki, James Trafford enggau Antoine Semenyo berengkah mandangka potensial ke besai.

Guardiola mega muji tim Arsenal ke dipegai Arteta ke dianggap nyadi siti ari tim ke pemadu manah di Eropah maya ke diatu.

“Liga tu agi ba jari sida. Aku deka agi ba penuduk sida enggau pemujur semilan puin,” ku iya.

Pemenang nya meri pengering ngagai City ungkup musim ke bukai lebuh sida nguji ngulihka Piala FA sereta nguji mekit Arsenal ba pengawa berebutka gelar liga. — RBI

SELANGAU, 21 Mac — Woksyop Tenun Kain Karap, K.A.R.A.P (Program Artisan Karap) Siri 2 udah mujur diatur, ti mungkur 17 iku penyereta ari komuniti menua nya.

Program tu diatur Kelab Nembiak Proaktif Lubuk Bukut ari baruh iring Dr.Jawing Chunggat, nengah kerejasama The Iban Women Charitable Trust (IWCT) enggau JKKK Rumah Suli, enggau tuju ngetan sereta ngenegapka seni asal nenun kain karap ba raban nembiak rebak baru.

Woksyop tu dipejalaika siku pengajar ti bepeneleba iya nya Albert Intih anak Lembang, ti ngiring bala penyereta sepemanjai program nya, meri iring praktikal enggau teknik ti maju dalam seni betenun.

Bisi datai ngarika IWCT iya nya Puan Linda Nanang enggau Puan Cecilia Lintong anak Vincent Entering, meri sukung enggau matau penyereta.

Pengawa nutup pengerami nya dipenyadika Menteri ba Opis Premier Sarawak Dato Sri John Sikie Tayai, ke mega Kaban Kunsil Nengeri ( ADUN) N.60 Kakus, ti ngemeratka pemesai guna program baka K.A.R.A.P nya dalam negika pesaka asal enggau muka peluang ekonomi ngagai komuniti menua nya.

Sama bisi datai Kaban Parlimen P214 Selangau YB Tuan Edwin Banta.

Dikearapka program tu ulih nyadi pelasar ti terus dikena ngemansangka pengelandik, ngenegapka ekonomi komuniti, sereta pengawa ngetanka main asal enggau main asal Sarawak ungkup rebak dudi hari.

SERIAN, 23 Mac – Diatu urung 50 peratus ari 113 buah genturung pendiau di Pelilih Serian udah nengah proses dokumentasyen lalu bisi mega udah nerima geran ari baruh Seksyen 18 Kanun Tanah Negeri (KTN), lalu ke bukai nya benung dipejalaika berenggat.

Taja pia, ku Sapit Menteri Industri Pemakai, Komoditi enggau Pemansang Kandang Menua, Datuk Martin Ben, gaya di Pelilih Tebedu bisi kurang ngelantangka ati.

Ku iya, semina urung 30 peratus aja peranak menua nya udah nganjung peminta sereta minta Gerempung Dayak Bidayuh Nasional (DBNA) bejalaika proses dokumentasyen ungkup tanah sida, ti mungkur dua renggat iya nya renggat keterubah dokumentasyen enggau nyukat ngulihka geran lalu renggat kedua ngaul tanah endur betanam betupi.

Taja pia ku iya, proses dokumentasyen enggau nyukat tu dipejalaika enggau enda ngetu sereta berenggat.

Iya madah munyi nya pengudah tembu Pengerami Penerang enggau Randau Projek Dokumentasyen Tanah Adat Bidayuh (Pelilih Serian, Tebedu enggau Siburan) ke diatur Kaunsil Tuai Raban Bansa enggau DBNA di Palan Komuniti DBNA Serian, ditu sehari tu.

“Dikena nerangka enggau silik agi, program dokumentasyen tanah tu udah berengkah kenyau ari taun 2007. Iya juluk Datuk Amar Michael Manyin enggau sukung ari perintah nengeri maya nya nengah Kepala Menteri.Nyadi enti dikira, nyauka 20 taun, lebih agi ari nya.

“Berenggat-renggat, kami ngarapka semua tanah komuniti Bidayuh deka disukat, tauka ambis nadai didokumentasyen sebedau pengujung iya disukat penuh.Nya meh juluk DBNA enggau semua kitai ke nyadi ketuai ba kandang menua Bidayuh,” ku iya.

Kebendar, iya mega meri langgur penemu ngambika dalam program meri penerang ti deka datai, pengempu tanah ti bisi geran Seksyen 18 KTN dibai bekunsi peneleba enggau sida ti bedau nengah proses dokumentasyen enggau nyukat tanah.

“Sekurang-kurang iya ulih meri pengarap ati,” ku iya.

Kelimpah ari nya, iya mega madahka penanggul ngaga garis entara tanah entara peranak menua nya di Bagi Menua Serian nyadi siti ari batang penanggul dalam proses dokumentasyen enggau nyukat tanah adat ungkup Seksyen 18 KTN ngeluarka surat pala tanah Hak Adat Bumiputera (NCR).

Ku Datuk Martin nerang, penyarut ti ngaul diri sebilik, suah agi bekaul enggau adan semeter tauka dua meter, suah nyadi ti meri pemar ngagai DBNA mantu dalam proses dokumentasyen.

Kebendar ku iya, bisi mega peranak ba menua nya enda datai maya proses ngelala adan tanah laban sida enda setuju enggau perambu adan, lalu enggau nya nempa pemar nyukat selampur kandang menua nya.

“Isu tu agi ba renggat baruh.Bisi sekeda nyangka bedau mereti enggau silik proses tu.Bisi mega sida agi ngumbai tanah sida agi diempu sida, sekalika bisi geran tauka nadai.

“Kitai enda ingatka hari siti kitai deka nadai agi, lalu enti nadai tuntut, orang bukai ulih ngambi iya.Tang enggau geran, kitai nemu hak nya mengkang.Nyadi tu kebendar pekara ke manah,” ku iya.

Penerang nya mega digulu penghulu, ketuai komuniti enggau ketuai raban bansa ari Bagi Menua Serian.

Sama bisi datai ADUN Tebedu, Dr Simon Sinang Bada, ADUN Bukit Semuja, John Ilus, Presiden enggau Sapit Presiden DBNA, Datuk Ik Pahon Joyik enggau Dr Charlie Ungang enggau Temenggong Bidayuh Bagi Menua Serian, Henry Bujang Sendeng. – RBI

Kapayen : Martin (empat ari kiba) begambar kenang ba pengerami nya