Pemajik, pengandal ati enggau pengerindu ke dalam ngagai budaya Iban mantaika pemanah sereta penau Vanessa Serawa Anak Suel lebuh iya dipadu nyadi champion Pekit Kumang Iban Renggat Bagi Menua Miri 2026 beserimbai enggau Pengerami Gawai Dayak Bagi Menua Miri ke udah diatur empai lama tu tadi.

Pemenang indu ke beumur 24 taun nya ukai semina meri hak ngagai iya mai pulai perais mata duit RM5,000, tang mega nerima sekulasip beungkus RM20,000 ke dipelanja Kolej Antarabansa Fajar dikena ngaku penau enggau penyulut iya.

Penuduk lumur dua ba pekit nya Sylviana Rinya Galing, 22, ari Kuala Serupai nerima perais mata duit RM3,000, lalu lumur tiga diempu Michelle Allison Omban Eddy, 20, ari Nanga Salu, Sibuti enggau perais mata duit RM2,500. Pemenang perais sagu ati nerima perais mata duit RM1,500 seiku.

Taja pan tuchum iya lantang sereta gamal iya bajik ba panggau pekit, Vanessa ngaku iya kebendar enda nyangka nama iya dipadah nyadi pemenang laban tu keterubah iya nyereta pekit pemajik gamal ngagai Ruai Berita Iban.

“Aku tekenyit amat lebuh dipadahka nyadi pemenang laban tu keterubah aku nyereta pekit baka tu.

“Aku enda kelalu tinggi ngarapka diri, tang semina deka meri pemadu manah sepemanjai pekit tu,” ku iya lebuh dirandau Ruai Berita Iban.

Diada di Miri sereta datai ari ruang bilik tulin Iban ari Mukah, Vanessa madahka diri sebilik nyadi batang tiang ti meri pengering ngagai iya sepemanjai pengawa nyendiaka diri bepekit.

Iya nerangka indai iya orang ke pemadu meri peransang enggau pengeransing lebuh iya napi pemar ngatur jam entara latih pekit enggau pelajar.

Diatu benung ngambi pelajar Diploma Pelajar Tumu Nembiak Mit ba Universiti Tebuka Malaysia, Vanessa ukai semina chakah dalam bidang akademik, tang mega ngembuan pengerindu ke dalam ba pelajar nembiak khas, kelebih agi autisme.

Inspirasyen nya datai ari peneleba diri enggau menyadi iya ke biak, ke nyadi nembiak autistik.

Nitihku iya, pengurang palan belajar khas ungkup nembiak autisme di Miri ngujungka iya bemimpi deka numbuhka palan pelajar khas jemah ila.

“Nembiak mit ke bisi autisme sama baka orang bukai, sida semina ngembuan chara proses enggau komunikasyen ke bebida.

Aku ngarapka bisi hari ila aku ulih ngemansangka palan belajar ti ulih mantu sida ngulihka pelajar sereta peluang mujur dalam pengidup,” ku iya.

Kelimpah ari nemu bejaku Melayu, English enggau Iban, Vanessa mega ngembuan setipikit Jaku Jipun N4 asil ari pengerindu iya ke dalam belajarka jaku bansa bukai.

Iya mega mai basa ngagai menua lebuh iya ngarika Malaysia di Taiwan ba pekit inovasyen ITEX 2019 lalu mujur mai pulai midul emas begulai enggau tim ari SMK Merbau.

Kenu ku Vanessa, pejalai ngulihka gelar Kumang ukai pejalai ti muntang laban iya patut ngaga penyikap enggau silik ari sukut runding, emosi enggau fizikal.

Entara pemar ke besai ditapi iya iya nya ngatur jam enggau manah nyadi nembiak seraya ngasaika latih pekit intensif.

Iya mega belajarka chara mantaika ngepan asal berat, ngemanahka agi teknik komunikasyen, ekspresyen panggau sereta ngenalamka penemu pasal adat enggau budaya Iban.

“Siku Kumang kemaya hari tu ukai semina begunaka pemajik gamal aja, tang mega ngembuan pemintar enggau budi basa ke tinggi laban dua bengkah perangai tu beguna dikena mai diri ngagai dunya luar ke mayuh agi pemar,” ku iya.

Ba Vanessa, gelar Kumang mai reti ke besai laban ngelaika pemanah, pemintar enggau tanggungpengawa dalam ngetanka pesaka asal komuniti Iban.

Iya pechaya jaku, adat enggau seni asal nyadi batang identiti bansa Dayak ti enda tau enda terus ditanka raban nembiak rebak baru ngambika sida enda ditelan pasang moden.

Ngenang pesan niang aki iya, Dunya Anak Enchana, Vanessa madahka jaku “bejalai betungkat ke adat, tinduk bepanggal ke pengingat” endang seruran nyadi rambai jaku pengidup iya enda ngira dini alai iya diau.

“Taja pan aku nembiak rebak baru jeman moden, tang aku seruran diiri ngambika enda ngelengkaka main asal diri empu.Pekit baka Pekit Kumang tu ukai semina dikemata aja, tang diteladan sereta nyadika pelasar ngenalamka budaya bansa diri empu,” ku iya nerang.

Nyadi Kumang Iban Bagi Menua Miri 2026, Vanessa ngarapka iya ulih nyadi peransang ngagai raban indu biak Dayak ngambika terus ngiga penemu, ngemanahka budi basa sereta ngena teknologi moden enggau pintar ungkup pemansang diri enggau mensia mayuh.

Iya mega minta raban nembiak rebak baru anang sesekali putus pengarap neruska mimpi laban pemuntan semina singkang sementara nuju pemujur.

“Aku ngarapka rayat Sarawak terus ngetanka main asal bansa kitai begulai ngambika enda lenyau dibai jeman,” ku iya.

Pekit Kumang Iban Bagi Menua Miri 2026 siti ari pengerami Pengerami Gawai Dayak Bagi Menua Miri ti ngembuan juluk deka mantaika pemanah budaya, elegan enggau personaliti indu Iban di Sarawak, lalu enggau nya ngenegapka agi pengawa negika pesaka budaya Dayak ungkup rebak dudi hari. — RBI

#ruaiberitaiban#newsiban#beritaiban

Rindu | Titih | Kunsika

KUCHING, 19 Mei – Pengerami Mantar Gawai Dayak 2026 ke diatur Kelab Sosial & Rekreasyen Saribas (SSRC), Kuching diatur enggau chukup pengeransing sereta semengat beserakup dalam pengawa ngerapitka kaul komuniti Saribas ke diau di Kuching, kena Hari Enam tu tadi.

Nitihka penerang ti dikunsi nengah ‘Facebook’ ari Datuk Gerald Rentap Jabu, program nya bela dirichah enggau penatai Sapit Premier Sarawak Datuk Amar Douglas Uggah Embas ti nyadi Kaban Kunsil Nengeri (ADUN) Bukit Saban begulai enggau bini iya YBhg. Datin Amar Dato Doreen Mayang.

Sama bisi datai Dato Dr. Richard Rapu Kaban Parlimen P.204 Betong ti mega nyadi Chairman SSRC Kuching begulai enggau YBhg. Datin Lucy Maria Johnson.

Pengerami nya ukai semina nyadi pelasar dikena ngintu pengerami Gawai Dayak, tang mega nyadi pelasar ngerapitka kaul kaban belayan entara komuniti Saribas di menua luar kelimpah nerenakka semengat begulai sereta angkunka pesaka asal Dayak.

Berebak enggau nya, pengerami nya mega nyadi saksi pengawa nyuaka insentif pelajar ngagai nembiak Saribas ke mujur bulih pemutus nyulut dalam peresa Sijil Pelajaran Malaysia (SPM), kelimpah ari meri puji ngagai sida ke nampung pelajar ngagai tikas Diploma, Sarjana Muda, Sarjana enggau Doktor Falsafah (PhD).

Pengawa ngaku mega diberi ngagai penerima Pingat Kebesaran dikena meri basa ngagai jasa enggau pemeri sida ngagai komuniti.

Ngatur program baka tu dipeda ulih ngenegapka kaul komuniti Saribas di Kuching kelimpah nyadi pemangkin ngagai rebak baru ngambika terus nampung penyulut dalam akademik enggau pengidup.

CYBERJAYA, 19 Mei – Malaysia komited deka ngenegapka agenda pemintar tiru (AI) menua enggau tagit deka mansutka diri nyadi “AI Nation” manggai ba taun 2030 nengah pemansang infrastruktur AI ti bedaulat, ngenegapka bakat digital menua tu enggau kerejasama strategik entara mayuh bengkah piak.

Sapit Menteri Digital, Datuk Wilson Ugak Kumbong madah, pengawa nya disalin ngagai mayuh macham inisiatif nyengkaum “Made by Malaysia” dikena ngenegapka penuduk menua nyadi hab teknologi enggau inovasyen serantau.

Iya madah munyi nya lebuh ngenataika jaku ba program Next Big Tech Asia 2026 ke diatur ba Cyberview Resort & Spa, apin lama ke udah.

Nitih ku iya, aum besai nya ngempuruka bala ketuai perintah, pemain industri enggau pakar teknologi ari serata rantau tu berandauka pemansang pemintar tiru, pengelikun siber enggau transformasyen digital nuju jemah ila ti lebih pintar, likun sereta inklusif.

“Kerejasama rat entara perintah, industri enggau bakih antarabansa beguna amat dikena nentuka pemansang teknologi dipejalaika enggau tanggungpengawa sereta meri penguntung ke besai reti ngagai rayat,” ku iya.

Ku iya nambah, pengawa terus beranakka puku ba pemansang bakat digital menua tu mega deka nyadi pemangkin kunsi penumbuh ekonomi digital menua jemah ila. – RBI

SPAOH, Mei 19 — Projek pemansang Padang Bilun Bebuling (STOLport) ke beungkus RM248.03 juta diatu udah nyapai penyulut fizikal 100 peratus lalu dikearapka nyadi pematak baru pemansang sistem pengangkut langit di kandang menua pesisir Sarawak.

Pemansang nya dikunsi Sapit Premier Sarawak ke mega Menteri Infrastruktur enggau Pemansang Palan Penyangkai Kapal, Datuk Amar Douglas Uggah Embas nengah tulis ba ‘Facebook’ rasmi iya pengudah bejalaika penemuai kereja ngagai palan projek nya kena 10 Mei tu tadi.

Nitih ku iya, projek infrastruktur strategik nya mujur dipejalaika nitihka timpuh ke udah ditetapka lalu deka meri penguntung ke besai ngagai komuniti menua pesisir, kelebih agi di kandang menua pesisir nengeri tu.

Ku iya, STOLport Bebuling ukai semina deka ngenegapka rentayan pengangkut langit Sarawak, tang mega muka mayuh agi peluang pemansang ekonomi sereta ngemanahka akses komunikasyen ungkup rayat.

Iya mega nerangka pemujur bejalaika projek nya nyadika bukti komitmen perintah Gempung Parti Sarawak (GPS) dalam nentuka genap perambu pemansang ulih nyadi nyata ungkup pengelantang rayat.

“Tu nyadika bukti perintah GPS ngamatka semaya.Nama utai ke udah diperambu, kami deka bejalaika ungkup pemaik rayat,” ku iya dalam tulis nya.

Entara batang komponen ke dikemansang nengah projek tu nyengkaum jalai bilun, jalai teksi bilun, apron endur ngengkahka bilun, begunan terminal, sistem parit, perengka guna enggau kereja mekanikal enggau karan ke bekaul.

STOLport Bebuling dikearap ulih bejalaika tanggungpengawa ti beguna dalam ngemanahka akses perengka pengangkut langit, meransang penumbuh sosio-ekonomi lokal sereta ngenegapka kaul entara menua pesisir enggau mengeri di serata Sarawak setipak enggau agenda pemansang kandang menua ti meruan.

Sama bisi datai rambau penemuai kereja nya, Kaban Parlimen P.204 Betong, Dato Dr.Richard Rapu enggau Injinir Opis Kereja Raya (JKR) Bagi Menua Betong, Jason Ng. – RBI

Ba bakat, pengelembut bejaku enggau pengalus pekayan asal ti digaya ba atas panggau Kumang, bisi pejalai ti penuh enggau pengeliat ati, pengepuh enggau pengerindu ti dalam ngagai pesaka budaya Iban.

Nya meh cherita peranak asal Bintulu, Praty Sofia Ak Bantin, ke mujur nempa nama lebuh iya dipadu nyadi Kumang Bintulu 2026 ba Pekit Kumang Bagi Menua Bintulu 2026 ke diatur Gerempung Main Asal Dayak Sarawak (SDCA) kena 8 Mei tu tadi.

Pemenang nya ukai semina ngelala pemajik enggau gamal iya ba atas panggau, tang mega kelai pengeran siku indu biak Dayak dalam ngetanka identiti, adat enggau budaya komuniti Iban nyerumba pemansang dunya moden.

Ba Praty Sofia, maya nama iya dipadah nyadi pemenang nya siti peneleba ti tusah deka digambarka ngena leka jaku pengudah dua taun enda enggau sebarang pekit.

“Asai ati aku bechampur. Aku amat gaga, teperansang sereta beterima kasih. Pengudah dua taun ngatika diri, aku ngasaika semua pengawa enggau pengorbanan tu amat berega,” ku iya lebuh dirandau Ruai Berita Iban.

Taja pemujur baka tu, pejalai iya ba dunya pekit budaya kebendar iya bepun ari taun 2019 lebuh iya nyereta Kumang RPJ ari peransang sida sebilik, taja pan maya nya iya agi bedau meretika adat enggau budaya Iban enggau dalam.

Taja pia, nyereta Kumang Gawai PPB NGO Kakus 2019 nyadi ubah besai dalam pengidup iya lebuh iya berengkah ngelala reti ke bendar dunya Kumang, ke ukai semina bepelasarka gamal aja, tang mega bepelasarka reti budaya enggau tanggungpengawa nyadika budaya tradisional.

“Berengkah ari nya, aku belajar ari pelasar lalu berengkah labuh pengerindu ngagai budaya Iban, aku sedarka pengawa nyadi Kumang ukai semina ba atas panggau aja, tang mega mai tanggungpengawa meretika sereta negika budaya,” ku Praty.

Kenyau ari nya, iya udah chakah nyereta mayuh bengkah pekit lalu udah nyapai sekeda penyulut ti ngemegahka ati nyengkaum Penuduk Lumur Dua Kumang PBB NGO Kakus 2019, Penuduk Lumur Dua Miss Grand Sarawak 2020, Penuduk Lumur Dua Kumang Gawai2022, Ratu Sarawak Ngepan Kumang Iban Renggat Negeri Sarawak 2020. Penuduk Lumur 5 Ratu Pesta Tuai 2023, Karnival Kumang Selangau 2023 enggau Lumur 3 Kumang RNI 2024.

Ari semua peneleba tu, nyereta Kumang RNI 2024 nyadi pengingat ke pemadu meri empas ngagai iya.

Nitih ku iya, pengudah nguji nasit ba pekit ke sama ba taun 2022, iya bepekit baru ba taun 2024 enggau pengeransing baru lalu pengujung iya mujur bulih penuduk nyadi ‘3rd Runner-Up’

“Pejalai nya ngajar aku reti pengeliat ati sereta pemesai guna enda mudah putus pengarap. Uji kedua pengujung iya bebuah lebat. Peneleba tu ngingatka aku proses enggau pengawa beguna agi ari asil aja,” ku iya.

Taja pia, pejalai nuju pemujur ukai senang. Praty Sofia ngaku pemar ke pemadu besai ditapi iya nya nyeimbai awak entara latih, komitmen kereja enggau tanggungpengawa diri sebilik.

Bisi maya iya berasai lelak ba tubuh enggau runding nyentukka iya nyau deka putus pengarap.

Taja pia, enggau disiplin sereta ngatur jam enggau manah, iya mujur mutarka penanggul nya.

“Aku nemu pengering indu Iban ukai bepanggai ba pengawa ngereja semua pengawa kediri, tang ba pemerani minta sukung sereta meruan disiplin dalam tetiap pengawa,” ku iya nerang.

Kenu ku Praty Sofia nerang ngagai Ruai Berita Iban, batang penegap ti mantu iya teulihka gelar Kumang Bintulu 2026 iya nya pengeliat ati enggau semengat deka terus belajar sereta ngemanahka diri.

Iya pechaya gelar Kumang ukai datai sekelip mata, tang lebih agi datai ari proses ti panjai ti penuh enggau pengorbanan, peneleba sereta belajar.

Kelimpah ari nya, pengerindu iya ngagai budaya Iban nyadi batang motivasi ti seruran dibai iya ngagai tetiap pekit ke dipasuk iya.

“Aku seruran nguji belajarka adat, jaku enggau pengangkun budaya ari apai indai enggau komuniti aku. Lebuh kitai rinduka budaya diri empu, pengarap ati nya deka semula jadi manchar nengah panggau,” ku iya.

Nyadi siku pesereta ke udah nyereta pekit moden baka Miss Grand Sarawak 2020, Praty Sofia meda kededua pelasar nya ngembuan penyelai kediri empu dalam nempa personaliti siku indu.

Nitih ku iya, pekit moden ngemeratka pengarap diri, komunikasyen enggau isu kemaya hari, lalu pekit Kumang ngemeratka nilai basa, adat enggau identiti budaya.

“Pekit moden ngajar aku berani bejaku, lalu pekit Kumang ngajar aku ngemaruhka diri sereta temegah ati enggau urat budaya aku empu.Kededua pekara tu nambah aku nyadi siku indu peranak Sarawak ti andal sereta ngembuan identiti,” ku iya.

Ba pengeransing iya nyikap diri napi pekit Kumang, iya bulih mayuh penemu ari raban ke lebih teleba nyengkaum diri sebilik enggau orang siku-siku ti seruran ngiring iya sepemanjai latih.

Iya mega nyadika pengawa bekenaka jaku Iban dalam pengidup besehari-sehari nyadi siti ari pengawa dikena nentuka identiti budaya nya terus ditanka raban nembiak rebak baru.

“Nyadi Kumang ukai semina ngena pekayan asal aja, tang kitai patut mereti sereta beratika reti nya laban kitai megai tanggungpengawa nyaga maruah budaya Iban,” ku iya.

Berebak enggau nya, iya nyemetak madahka pemujur ke dijapai sehari tu enda ulih nyadi enti nadai sukung ari diri sebilik, bala bakih enggau komuniti ke seruran bediri ba belakang iya.

Kenu ku iya, diri sebilik nyadi pengering ke pemadu besai, seraya bala bakih mayuh mantu ari sukut jam, pengering enggau pengeransing nyengkaum nyempulang iya belatih nyentuk ke jauh malam sereta mantu ngatur pengawa nyendiaka diri bepekit.

“Ba aku, pejalai Kumang tu ukai pejalai kediri. Pejalai begulai enggau diri sebilik, bala bakih sereta komuniti. Nya ke ngasuh peneleba tu lebih besai reti,” ku iya.

Nyadi tokoh biak Dayak, Praty Sofia mega ngembuan pengingin ke besai deka nyaup ngangkatka main asal Iban ngagai nembiak rebak baru nengah media rama, program komuniti sereta ngaul diri enggau raban nembiak.

Iya pechaya, pengerindu rebak baru ba pesaka main asal baka Ngepan Iban enggau pekit Kumang agi bisi, iya semina patut diterenak enggau chara ti semak agi enggau pemansang kemaya hari.

“Enti ukai kitai ti ngintu sereta ngangkatka budaya kitai, sapa agi?” ku iya enggau penuh pengeransing.

Pengudah pemenang tu, iya bisi ati deka nyingkang ngagai pekit renggat tinggi agi nyengkaum Kumang Sarawak, kelimpah ari deka ngena pelasar ke dikembuan iya terus ngangkatka maruah budaya Iban.

Lebuh nyimpul randau enggau Ruai Berita Iban, Praty Sofia ninggalka jaku pesan ngagai nembiak indu Dayak ngambika enda malu enggau identiti diri sereta berani neruska mimpi diri.

“Belajarka adat, jaku enggau budaya kitai mimit-mimit. Ke beguna kereja enggau ati ti temegah. Enti aku ulih, nuan mega ulih. Pugu kitai nyadi ke tegap kitai, nya alai bediri enggau pengandal,” ku iya seraya tuchum. — RBI

SERIAN, 19 Mei — Operasyen ngiga enggau nyelamat (SAR) siku orang tuai ke diripotka lenyau ba Kampung Koran Empaneg benung chakah dipejalaika Raban Penyaga Orang Periman Malaysia (APM) Pelilih Serian pengudah nerima kangau ngenyit ari polis urung pukul 10.42 pagi kemari.

Tudah dikelala enggau nama Baluk anak Dayu, 68 taun, bansa Bidayuh sereta ngembuan sejarah sakit darah tinggi.

Iya diripotka pansut ari rumah urung pukul 2 lemai kena 16 Mei pengudah ngulu pengawa nguburka siku ari sida sebilik di Kampung Koran Bari sebedau enda mujur pulai ke rumah.

Ripot polis bekaul enggau pengelenyau iya digaga sida sebilik urung pukul 9.23 pagi kemari pengudah pengawa ngiga sida empu enda mujur.

Operasyen SAR tu ngaul kerejasama mayuh bengkah ejensi nyengkaum APM, PDRM, JBPM enggau RELA ti ngembuan penyampau 21 iku kaban.

Pengawa ngiga nya dipejalaika ba sekeda sektor nyengkaum kandang genturung pendiau, kandang tebing sungai enggau pendam dikena nyidi penunga iya.

Taja pia, nyentuk operasyen diketuka pukul 5 lemai kemari, iya agi bedau ditemu lalu operasyen ngiga deka disambung seharitu. – RBI

JULAU, 18 Mei – Bala nembiak di menua pesisir enda ulih terus tinggal ari arus pemansang teknologi, tang lebih agi patut nyingkang setipak enggau mensia mayuh di mengeri dikena nentuka sida ulih besemekih jemah ila.

Nitih ku Chairman Industri Kayu Ramu Malaysia (MTIB) Datuk Larry Sng Wei Shien, komuniti menua pesisir mega ngembuan penau ti ngasuh mujur enti diberi peluang, sukung enggau perengka guna pelajar ke chukup.

“Kitai patut nitihka chara komuniti mengeri belajar sereta ngena teknologi. Aku pechaya nembiak di menua pesisir mega ulih nyapai pemujur enti diberi peluang ke sama,” ku iya.

Pekara nya dikemeratka iya ke mega Kaban Parlimen Julau rambau Pengerami Ngintu Hari Pengajar 2026 ba Sekula Primari (SK) Sungai Sugai, lebuh iya minta pengawa ngena teknologi dalam pelajar terus ditegapka, kelebih agi di menua pesisir.

Berebak enggau nya, iya nangkan ambika pelajar meseti seruran dikemeratka ba semua renggat laban nya nyadi pelasar ti beguna dalam ngadaka modal mensia ti bekualiti sereta nyadi ketuai jemah ila.

Ku iya nambah, pengajar bejalaika tanggungpengawa ke besai dalam nempa disiplin enggau narak bala anak ngambika nyadi orang ke beguna ngagai mensia mayuh enggau menua.

“Hari Pengajar beguna amat dikena ngingatka jasa enggau pengawa bala pengajar ti seruran bebendar ngadaka nembiak ti mujur sereta bekualiti,” ku iya.

Berebak enggau nya, iya mega meri jamin deka terus mantu guna sekula ungkup pengelantang raban pengajar enggau nembiak ba kandang menua nya.

Ku iya, SK Sungai Sugai sebengkah ari sekula ke pemadu besai di kandang menua Julau sereta begunaka sukung ti seruran dikena nentuka pemansang pelajar ulih ditegapka agi.

Beduduk ari nya mega, iya udah ngungkupka belanja sepenyampau RM17,000 dikena mantu guna sekula nya. -RBI

KUCHING, 18 Mei — Program Ngangkatka Pengelandik Nyumai Orang Indu Bukit Saban mujur dipejalaika nyadi inisiatif dikena ngenegapka orang indu menua pesisir nengah latih pengelandik nyumai ti praktikal, bekualiti sereta meri penatai pemisi.

Program nya asil runding Ketuai Indu Parti Pesaka Bumiputera Bersatu (PBB) Pampang Bukit Saban, Puan Natasha Nasa Uggah, nengah sukung ari Sapit Premier Sarawak Datuk Amar Douglas Uggah Embas ke mega Kaban Kunsil Nengeri (ADUN) N.37 Bukit Saban,

Bisi 33 iku penyereta ti ngarika zon Kubal Ulu, Kubal Tengah, Kubal Ili enggau Paku Ulu ngulu latih intensif ti diatur ba Sekula Pengelandik Yahos.

Sepemanjai program nya, bala pesereta dibantai enggau mayuh macham pengelandik nyediaka pemakai nyengkaum ngaga Mi Kuning sereta nyediaka pemakai popular baka Nasi Tomato, Manuk Masak Mirah enggau Dagin Masak Chelum.

Kelimpah ari nya, bala pesereta mega diberi kelala ngagai sukut pemeresi, ngurus enggau nyadung pemakai nitihka standard nyendiaka pemakai ke manah dikena nentuka kualiti enggau pengelikun pemakai seruran dijamin.

Nitih ku Natasha, program tu dikearap ulih meri pemaik ngagai orang indu menua pesisir ba pengawa nambahka pengangkun diri sereta ngerembaika peluang ngulihka penatai pemisi nengah pengelandik ke dipelajarka sida.

Ku iya, latih ke baka nya ukai semina muka peluang ngagai pesereta ngulihka penemu baru, tang mega ulih mantu komuniti setempat nyendiaka pemakai ungkup mayuh macham pengawa rama enggau aktiviti enggau chara ke lebih teratur sereta bekualiti.

Berebak enggau nya, iya mega ngarapka komuniti rumah panjai di kandang menua Bukit Saban deka terus diberi kuasa sereta ngatika diri ari sukut nyendiaka pemakai, lalu ari nya meri pangka ngagai pemansang sosioekonomi komuniti menua pesisir ti enda ngetu.

Program tu mega mandangka komitmen ketuai kandang menua Bukit Saban ti terus ngenegapka pemansang modal mensia enggau ngenegapka pangku pengawa orang indu nyadi penyungkak pemansang komuniti. — RBI

KUCHING, 18 Mei – Pengeran deka ngenyampatka pemansang sereta mai mayuh agi perengkaguna ngagai rayat ba sitak N.49 Ngemah nyadi batang fokus penemuai basa Kaban Kunsil Nengeri (ADUN) sitak nya, Anyi Jana ngagai Premier Sarawak Datuk Patinggi Tan Sri Abang Abdul Rahman Zohari Abang Openg.

Penemuai nya diatur dikena berundingka kuing pemansang di sitak nya, kelimpah ari ngenataika guna rayat maya ke diatu, kelebih agi bekaul enggau infrastruktur pemun, perengka guna mensia mayuh enggau projek pemansang ke ulih nyungkak tikas pengidup peranak di DUN Ngemah.

Anyi Jana empu betuaika deligit 10 iku ti mungkur Ketuai Komuniti enggau Ketuai Raban Bansa (KMKK) ari sitak Ngemah ba randau nya.

Rambau randau nya, iya mega ngenataika pengaga ati enggau terima kasih ngagai Premier Sarawak ti seruran nyukung sereta ti seruran meri pengarap ngagai iya ngempung rayat ba sitak Ngemah.

Kelimpah ari bejuraika isu pemansang kemaya hari, Anyi Jana mega mantaika sekeda perambu projek ti dianggap beguna sereta begunaka perati lengkas dikena nentuka rayat di menua pesisir terus ngasaika pemansang ti sebela sereta komprehensif.

Enggau nya penemuai basa nya ngayanka komitmen ke seruran dipejalaika ketuai kandang menua dalam nentuka sada enggau utai ke diguna rayat Ngemah seruran diberi perati perintah nengeri ungkup pengelantang komuniti menua nya.

Iya mega mantaika sukung penuh ngagai iring Premier Sarawak dalam neruska agenda pemansang nengeri enggau pengawa ngenegapka penegap politik enggau penyulut di Sarawak. -RBI

#ruaiberitaiban#newsiban#beritaiban

Rindu | Titih. | Kunsika

SINGAPURA, 18 Mei – Sarawak bejalaika transformasyen ekonomi ti lebih komprehensif ngelui ari sektor kuasa nengah chara ngerembaika ekonomi nengeri seraya berenggat ngurangka pemansut karbon.

Nitih ku Premier Sarawak Datuk Patinggi Tan Sri Abang Johari Tun Openg madah, Sarawak diatu benung mansang nyadi nengeri “net-negatif” nengah chara ngena kandang endur kampung enggau tanah dikena nyerap mayuh agi karbon ari penyampau ke dikeluarka ekonomi nengeri tu.

“Batang pemar ukai semina deka nyapai pemansut kusung, tang ngetanka status net-negatif laban ekonomi majak mansang sereta industri.

“Nya kebuah Sarawak Net Zero Strategy enggau Carbon Plan ngemeratka penumbuh ekonomi kurang karbon ti ulih nempa industri baru, ngadaka pengawa puang ti bekualiti, ngenegapka daya besemekih ekonomi sereta nyukung penumbuh ti meruan dalam timpuh panjai,” ku iya.

Premier mansutka jaku tu lebuh ngenataika jaku kunsi berambaika leka jaku Sarawak enggau Wilayah: Ekonomi Hijau Dibina dalam Masa Nyata beserimbai enggau Aum Besai Dermawan Asia 2026 di Marina Bay Sands, sehari tu.

Berebak enggau nya mega, Abang Johari madahka Transformasyen Kluster Industri Bintulu (TIC) ti deka dilanchar bulan baru mandangka komitmen Perintah Sarawak nyukung transformasyen industri kurang karbon.

Premier Sarawak Datuk Patinggi Tan Sri Abang Johari Tun Openg madah, inisiatif ti dipejalaika begulai enggau Forum Ekonomi Dunya (WEF) ukai semina pengawa “dekarbonisasi” sebuah kilang tauka fasiliti kediri, tang lebih agi ngaul chara strategik dikena ngubah kesemua sistem industri nuju jemah ila ti kurang karbon.

Nitih ku iya, Koridor Bintulu-Samalaju diatu nyadi palan endur bemacham industri besai nyengkaum gis, gis asli cecair (LNG), petrokimia, hidrogen, sum enggau kuasa tau dikena baru.

“Dalam pekara tu, TIC ngerintaika semua sektor tu ari baruh visyen industri karbon baruh ti mungkur pengawa ngasilka hidrogen, nangkap, ngena enggau nyimpan karbon (CCUS), ekonomi pelilih enggau pengawa ngaga digital ti beoperasyen nyadi sistem ti begempung.

“Chara tu ulih ngurangka risiko sereta ngenyampatka pengawa bejalaika,” ku iya.

Tampung iya, kerejasama entara Perintah Sarawak enggau WEF ungkup projek TIC Bintulu chukup besai reti laban iya ngempuruka rentayan pakar global mindahka penemu sereta muka peluang kerejasama baru.

“Tu nentuka kluster dikemansang bepelasarka tikas dunya ari sukut pemanah enggau atur pengawa.

“Berebak enggau nya, iya nambahka pengandal pemeranak puku, ngurangka risiko beranakka puku sereta ngenyampatka penyulut.Nya mega meri tanda Sarawak ukai semina ngemeranka ‘best practices’ aja, tang mega sama nempa iya,” ku iya.

Dulu ari nya, pengawa milih Bintulu nyadi TIC keterubah Malaysia ulih WEF udah dipadahka Abang Johari lebuh ngenataika jaku kunsi ba Aum Hidrogen Asia Sedunya di Tokyo taun siti nyin tadi.

Nerang enggau silik agi, iya madahka Sarawak udah mujur ngurangka intensiti pemansut grid kuasa karan sepenyampau 73 peratus ari taun 2010 ngagai 2022 nengah pelin transisyen ngagai kuasa hidro ke ulih dikena baru.

Ku iya, Sarawak mega udah ngelui tagit 60 peratus kuasa tau dikena baru dalam kapasiti dipasang manggai ba taun 2030.

“Projek Tekat Kuasa Karan Baleh ti bekuasa 1,285 megawatt dipelaba deka berengkah beoperasyen manggai ba taun 2030. Kitai diatu nambahka kapasiti pemansut ngagai 10 gigawatt manggai ba taun 2030 enggau 15 gigawatt manggai ba taun 2035,” ku iya. -RBI

Gambar UKAS

#ruaiberitaiban#newsiban#beritaiban

Rindu | Titih | Kunsika