MIRI, 25 Feb — Umur ukai nyadi siti penanggul ngagai penyanyi veteran Iban Urai Rosiana terus chakah nyadi siku pemerindang lalu iya deka datai baru enggau single pemadu baru iya ke diberi nama Dilah Tanah.

Iya madah Lagu berentak slow rock nya ti ditempa Versifier penuh enggau pesan daya pengidup mensia enggau penyedar diri, enggau nya ngingatka orang ngambika seruran ngereja pengawa ti manah enda ngira pangkat, pengaya tauka penuduk.

Ku Rosiana nerangka ngagai Ruai Berita Iban, pengawa nya amat semak ba ati iya laban mai pengingat ti madahka genap iku mensia pengujung iya deka pulai ngagai Tuhan.

“Lagu tu ngenang pasal pengidup lalu ngingatka kitai iya nya utai ke ditaburka kitai, nya meh utai ke diketau kitai, enda ngira ni naka peninggi pangkat tauka pemayuh reta tengkira kitai tetap sama ba mata Tuhan,” ku iya

Nitihku Rosiana Urai, Dilah Tanah mega mantaika pemar vokal iya empu, kelebih agi ba sada nyawa ti tinggi ti begunaka ‘voice control’ ti tegap, tang proses ngerikod bejalai enggau lanchar berindik ari peneleba penengkebang enggau penulis lagu ti meretika penegap vokal iya.

Ba pengerembai ke sebaka, peranak asal Long Pelutan, Baram ke ngepunka karier seni ba taun 1989 mega ngerikod lagu jaku Kayan enggau lagu duet jaku Iban begulai enggau penanyi baru, Mexuari Mullen.

Lagu duet ti diberi nama Maya Pengerindu Tua Ngua ti ditempa Dom Romeo dipelaba deka dikeluarka ba tengan bulan March tu ila.

Rosiana ngarapka lagu duet tu ulih narit ati bala peminat laban mantaika bida enggau gempung nyawa dua rebak ti bebida.

Iya ngarapka pengawa ti diasilka nya ukai semina ulih merindang, tang mega nyadi medium dikena ngenegapka pesaka jaku enggau budaya Iban ngambika seruran relevan sereta dikerinduka rebak dudi hari.

Single Dilah Tanah dipelaba deka dilanchar nengah pelasar media rama enda laun ari bulan Mac tu. — RBI

LUBOK ANTU, 25 Mei — Kaunsil Pansang Pekebun Mit Industri Getah (RISDA) tetap komited ngenegapka pemansang ekonomi enggau ngangkatka tikas pengidup lebih 25,000 iku pekebun mit di serata Sarawak nengah mayuh bengkah program pemansang komuniti menua pesisir.

Chairman RISDA, Manndzri Nasib madah, pangku pengawa ejensi nya ukai agi semina fokus ngagai sektor nanam getah aja, tang udah dikerembaika nengah pengawa bejalaika mayuh macham inisiatif bantu, iring enggau program pemansang sosio-ekonomi ke lebih komprehensif.

Nitih ku iya, individu ke ngembuan taja pan semina satu ekar kebun getah agi layak ngerejista diri nyadi pekebun mit RISDA lalu udah nya ngasaika pengelantang ke disediaka ejensi nya.

“RISDA seruran muka ruang enggau peluang ngagai pekebun mit ngangkatka tikas pengidup sida nengah program dagang, pemansang ekonomi enggau peluang pelajar dikena nentuka kuing pengidup dudi hari,” ku iya.

Iya madah munyi nya lebuh bejadi Program Pengelantang Pekebun Mit (PKPK) RISDA Renggat Nengeri Sarawak 2026 ti nyadi ba Rumah Panjai Budit sehari tu tadi.

Berebak enggau nya, iya mega madahka RISDA nyendiaka peluang pelajar nengah Kolej Universiti Agrosains Malaysia dikena ngemuntangka bala anak pekebun mit nampung pelajar tinggi lalu enggau nya mantu ngangkatka tikas pengidup sida sebilik.

Pengerami nya mega dirintai enggau pengawa nyuaka bakul pemakai ngagai pengari rumah panjai ngelingi Lubok Antu ke nyadi sebagi ari pengawa ngintu pengelantang enggau sukung RISDA ti seruran dipejalaika ungkup komuniti menua pesisir.

Sama bisi ngulu pengerami nya Kaban Parlimen Lubok Antu Roy Angau Gingkoi, Direktor RISDA Nengeri Sarawak Shaharuddin Saberi enggau Pemesai Pelilih Lubok Antu Akoi Ejau.

Kredit Gambar — BKK RISDA

SARIKEI, 17 April – Rayat mesti ngembuan runding kelas satu ke ulih mida entara utai ke betul enggau salah, berani megai tanggungpengawa sereta nyadika integriti nyadi pugu tetiap pengawa, pia ku Sapit Menteri Kebun Bedandang Besai enggau Komoditi, Dato’ Sri Huang Tiong Sii.

Nitihku iya ke mega Kaban Parlimen Sarikei enggau Kaban Kunsil Nengeri (ADUN) sitak N.45 Repok, rayat Sarawak dilalau nyadika integriti nyadi pelasar batang dalam tetiap pengawa enggau kaul rama dikena nentuka aspirasyen Sarawak Maju Makmur ulih diperambu nengah Pelin Strategi Pemansang Pengudah COVID-19 (PCDS) 2030.

Ku iya, penyulut nengeri tu enda patut disukat semina nengah pemansang fizikal enggau ekonomi aja, tang lebih agi begunaka penegap nengah penumbuh identiti rayat enggau integriti ke tinggi.

Ku iya nambah, ulah bebatak asur ngagai penyalah mit ulih nyadi pun pengerusak ke besai agi dalam raban bansa.

“Pekara ke mit ti enda dikeibuhka kemaya hari tu tau mai empas ti balat agi jemah ila.

“Pengurang integriti ukai semina ngerusak identiti, tang mega tau ngeruga institusyen ruang bilik sereta ngelemika penyerakup komuniti,” ku iya.

Berebak enggau nya, iya nyemetak madahka integriti nyadi batang penegap dalam nulak penyalah makai suap enggau salah guna kuasa, kelebih agi ba bala ketuai komuniti.

“Pengelurus nempa pengandal, tanggungpengawa ngetanka pengelantang lalu integriti ngenegapka penyerakup,” ku iya.

Iya madah munyi nya lebuh bejadika Jelajah Integriti Sarawak Siri 45 di Dewan Masyarakat Sarikei, sehari tu tadi.

Program Jelajah Integriti Sarawak ti diatur Unit Integriti enggau Ombudsman Sarawak (UNIONS), Opis Premier Sarawak enggau kerejasama Opis Sapit Menteri enggau Opis Residen enggau Pelilih Sarikei dianggap nyadi singkang proaktif dalam meri penyedar sereta nerenakka rega integriti ngagai komuniti. -RBI

BAU, 5 April — Siku lelaki peranak menua luar ke beumur urung 30 taun ditan Polis DiRaja Malaysia (PDRM) pengudah iya dipechayaka ngereja ulah agresif maya mabuk ti meri pengirau ati ngagai peranak ba kandang menua SALCRA, Kampung Opar, Bau, kemari.

Ketuai Polis Pelilih Bau, P/SUPT Mohd. Haide Bin A. Rahman, madahka saspek mujur ditan enggau bantu mensia mayuh ke bisi pengirau ati sebedau polis dikangau ngambika ulih bejalaika atur ke bukai.

Nitihku iya, pansik tumu tetemuka lelaki nya madahka diri peranak menua Indonesia tang enda ngayanka sebarang dokumen pejalai ke entas.

“Saspek udah nya ditan polis ngambika atur nangkanka nya dipejalaika ari baruh Seksyen 6(1)(c) Akta Imigresen 1959/63,” ku iya nengah penerang media sehari tu tadi.

Ku iya nambah, saspek mega udah dibai berubat ngagai Sepital Bau berindik ari bakal mimit ba mua iya ke dipelabaka nyadi maya orang nguji ngetanka iya.

Kes tu agi dipansik, lalu polis deka bejalaika atur ti nangkanka nya nyengkaum ngulihka penerang ari Opis Imigresen Malaysia sereta madah ngagai piak ti bekaul.

Berindik enggau nya, mensia mayuh dilalau ngambika enda ngambi sebarang atur kediri empu ti tau mai risiko pengelikun, tang nganti ngeripot sebarang penerang tauka penusah ti dipelabaka nyadi ngagai polis.

PDRM nandu baru komitmen sida ti seruran deka nentuka pengelikun enggau atur mensia mayuh seruran dijaga. – RBI

KUCHING, 12 Mac — Sepenyampau 64 iku peranak menua luar ditan dalam operasyen penerit adat besepadu ti dipejalaika Opis Imigresyen Malaysia (JIM) Sarawak ba sekeda endur ngelingi mengeri tu berengkah ari 11 ngagai 12 Mac tu tadi.

Nitihka penerang ari Opis Imigresen Sarawak sehari tu, operasyen ke berengkah tumu pagi nyentuk ke jauh malam nya ngaul 34 iku pemesai penerit adat.

Penerang nya madahka, pengawa nyerungkai maya siang hari nya ngemeratka sebuah palan endur ngaga projek di kandang menua Muara Tebas kelimpah ari sekeda premis kedai makai di Pending Heights ti dipelaba bejalaika aktiviti bejudi nengah ‘online’.

“Asil ari pengawa meresa ke dipejalaika ngagai individu ba endur ke bisi kaul tetemuka bisi sekeda peranak menua luar dipelaba ngereja penyalah ari baruh Akta Imigresen 1959/63, nyengkaum nadai dokumen pejalai ke entas sereta diau ngelui ari timpuh ke dikemendarka,” ku penerang nya.

Operasyen nya udah nya diteruska maya malam hari enggau nagit sebuah palan pemerindang ngelingi mengeri Kuching.

Dalam pengawa ngenyit nya, sepenyampau 22 iku peranak menua luar mujur ditangkap, ke mungkur peranak menua China, Vietnam, Laos, Filipina enggau Indonesia.

Semua individu ke ditangkap dibai ngagai Depot Imigresyen ngambika dipansik enggau silik agi sereta dipejalaika nitihka atur undang-undang imigresyen ke benung dikena. — RBI

SIBU, 14 Jun — Kaban Kunsil Nengeri ( ADUN) Tamin, Ir. Christopher Gira Sambang ngulu Program Ngabang Gawai Dayak 2026 ke diatur ba Rumah Panjai Chairman Opis Kaunsil Pelilih Menua Pesisir Sibu (MDLBS/SRDC), Kaunselor Sempurai Petrus Ngelai di Rh. Bunsie Anak Tiboh, Salim Belalang, Sibu, beserimbai enggau pengerami ngintu Hari Gawai Dayak.

Program tu sebengkah ari inisiatif dikena ngelawa komuniti ba renggat menua kelimpah ngerapitka kaul entara bala ketuai enggau komuniti lokal.

Rumah panjai ke bepalan urung 10 minit penyauh ari Sibu Jaya diani 17 ruang bilik lalu mega mandangka pemansang rumah panjai moden setipak enggau penyulut menua pesisir sereta semengat penyerakup komuniti.

Rambau penemuai nya, Ir. Christopher ngemeratka pemesai guna ngetanka rumah panjai nyadi pesaka asal komuniti Dayak, kelimpah ari meri perati ngagai isu Hak Tanah Adat Bansa Asal (NCR) ke nyadi aset beguna ngagai komuniti menua pesisir.

Ku iya, tanah NCR ukai semina ngembuan rega sejarah enggau pesaka asal, tang mega ngembuan potensial nyadi penyungkak pemansang ekonomi enti diperambu sereta diatur enggau sistematik sereta bejimat.

“Tanah adat endang reta ke chukup berega ngagai komuniti. Iya patut dijaga sereta dikena enggau pintar ngambika meri penguntung ngagai rebak diatu enggau jemah ila.

“Aku pechaya, tebal agi tanah ba kandang menua tu diempu komuniti ngelingi.”

“Enggau pemansang ti jampat nyadi kelebih agi ba kandang menua Sibu Jaya, tanah di Salim Belalang ngembuan potensial nyadi aset ti berega tinggi ari sukut rega dagang.

“Perambu ti manah deka mantu ngangkatka tikas pengidup komuniti sereta muka mayuh agi peluang pemansang ekonomi,” ku iya.

Iya mega nesau bala komuniti terus ngetanka semengat beserakup, kerejasama enggau ngemeranka pengawa gotong-royong ti nyadi pelasar penegap komuniti rumah panjai ngelama tu.

Kenu ku iya, pengerami Gawai ukai semina ngerami asil ngetau enggau pesaka asal komuniti Dayak, tang mega nyadi pelasar ngerapitka kaul kaban belayan enggau penyerakup entara rayat pupu bansa di Sarawak.

Lebuh nyimpul penemuai nya, iya meri besai terima kasih ngagai tuan rumah enggau semua peranak menua nya ketegal sambut ti chukup manah ti disediaka sida.

“Arapka semengat Segulai Sejalai terus nyadi pelasar penyerakup enggau penyulut komuniti, setipak enggau juluk deka ngemansangka Sarawak ti maju, lantang sereta inklusif,” ku iya.

Sama bisi datai ADUN Baleh Nicholas Kudi Jantai (ADUN), Sekretari SRDC, Ng Siang Wei, Injinir Kereja Raya Bagi Menua Sibu Ir. Ts. Gs. Br. Chieng Siong Ming, ex-Sekretari Politik Thomas Romeo Christopher Tegong, Nembiak PBB Bawang Assan, bala kaunselor enggau Kaunselor Sempurai Petrus Ngelai nyadi tuai rumah begulai enggau peranak Rumah Panjai Bunsie Anak Tiboh, Salim. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KOTA SAMARAHAN, 5 Mac — Dua buah ruang bilik nadai utai dikemisi pengudah rumah sida angus lengis ba penusah angus ke nyadi ba Kampung Bukit Berangan, tengahari kemari.

Nitihka penerang ari Opis Bomba enggau Penyah Penusah Malaysia (JBPM) Sarawak, sida nerima kangau ngenyit bekaul enggau penusah nya urung pukul 12.33 tengahari sebedau 15 iku kaban ari Balai Bomba enggau Penyah Penusah (BBP) Kota Samarahan, nengah bantu BBP Tabuan Jaya, dipindah ngagai palan penusah ke nyadi urung kilometers1.

“Lebuh datai ba endur nya, api ditemu benung mau lalu udah nganguska semua struktur dua buah rumah setingkat nya,” ku penerang nya.

Dua buah rumah struktur tetap ke ngembuan pemesai 30×50 kaki persegi enggau 30×40 kaki persegi nya diripotka udah angus 100 peratus.

Sebuah kerita Perodua Kancil ke paking semak endur nya mega kena empas enggau pengerusak dipelabaka 40 peratus.

Operasyen madamka api nya betuaika Komander Operasyen, Paul Senum begulai enggau Ketuai Zon 2, Gawai John, nengah chara ngena teknik madamka api serang enggau defensif dikena nagang api sereta nyeliahka api ari nyerarai ngagai rumah ke besemak.

Taja pan pengerugi reta tengkira dipelabaka besai, tang dua iku orang ke nguan rumah nya ke bisi ba endur nya maya penusah nyadi mujur ngelarika diri lalu diripotka nadai bakal.

Pansik silik benung dipejalaika unit forensik bomba JBPM dikena ngelala kebuah ke bendar penusah nya nyadi. — RBI

LIMBANG, 27 Mei — Sarawak Energy Berhad (SEB) deka mai tiga set pemansut kuasa mindah kin kitu ari Johor Bahru nyadi atur lengkas dikena mantu ngetanka bekal kuasa karan di Limbang ke diatu benung napi penanggul ketegal sekeda set pemansut kuasa menua tu rusak.

Nitihka ripot TVS, Sapit Menteri Perengka Pengangkut, Datuk Hasbi Habibollah madahka pengawa SEB ti jampat ngulihka sukung pemansut kuasa ari luar kandang menua nya ngayanka komitmen kompeni utiliti nya terus nentuka utai ti diguna rayat terus dikemeratka.

“Terima kasih ngagai SEB laban jampat bejalaika atur ngulihka bantu sukung ari luar Limbang.

Ketetiga injin pemansut kuasa mindah kin kitu ari Johor Bahru dipelaba datai Hari Lima tu lalu deka mantu mulaika pemansut kuasa baka selama di Limbang,” ku iya.

Iya madah munyi nya ba aum pengarang berita bekaul enggau isu bekal elekterik enggau ai di Opis Residen Limbang kemari.

Nitih ku iya, penusah putus kuasa karan ke diatu enggau bekal kuasa sementara bepun ari sekeda set kuasa karan di Limbang ke udah napi pengerusak enggau penanggul teknikal, lalu ngujungka ngeruga kapasiti pemansut kuasa karan di pelilih menua nya.

Ku iya nambah, penatai loji kuasa mindah kin kitu nya beguna amat, kelebih agi sebedau pengerami Hari Gawai dikena nentuka peranak ulih ngintu pengerami nya enggau lantang agi sereta dikuasa.

Ba pemansang ke sama, iya madahka kereja nyambung sistem grid nengeri ke benung dipejalaika diatu dipelabaka tembu pun bulan Julai tu lalu deka nyadi chara mutarka timpuh panjai isu penanggul bekal kuasa karan di Limbang.

Ku iya nerang, taja pan sistem grid nengeri udah tembu penuh tang palan kuasa ke bisi diatu tetap deka dijaga nyadi sukung alternatif dikena nentuka penegap bekal kuasa karan terus dijamin.

Iya mega nerangka SEB diatu benung bejalaika atur bekal kuasa karan sementara nengah chara ke dikuasa nyadi atur proaktif dikena nyeliahka semua bekal kuasa tejanggal (padam) seraya kereja ngintu enggau ngemanah benung dipejalaika.

Sama bisi ngulu aum pengarang berita nya, Sapit Menteri Industri Pemakai, Komoditi enggau Pemansang Kandang Menua, Datuk Dr Abdul Rahman Ismail, Kaban Kunsil Nengeri (ADUN) Batu Danau, Dato Paulus Palu Gumbang enggau Sapit Residen Limbang, Marie Rozita Kulai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LIMBANG, 7 Mac — Sarawak Water Sdn Bhd (Kandang Menua Utara) madahka bekal ai ba sekeda kandang endur bisi tejanggal ketegal paip HDPE 280mm runtuh entara Kampung Bukit Kota ngagai Kampung Pemukat, Jalai Buangsiol ketegal tanah tusur.

Pengawa ngemanahka udah dipejalaika berengkah pukul 4.00 lemai lalu dipelaba tembu pukul 8.00 malam kena 7 Mac 2026.

Dalam timpuh tu, bekal ai deka diketuka sementara dikena ngemuntangka pengawa ngemanah, bepanggai ba palan enggau gaya hari.

Kandang endur ke kena penusah tu nyengkaum Kampung Pemukat, Jalai Buangsiol; lot kedai sepemanjai Jalai Buangsiol (sebagi); Kampung Limpaong, Jalai Buangsiol (sebagi); Kampung Bukit Kota, Jalai Buangsiol (sebagi); enggau Kampung Buangsiol, Jalai Buangsiol (sebagi).

Penyampau mensia mayuh ke kena empas dipelabaka urung 30 buah rumah enggau 50 unit lot kedai.

Nitihka penerang ari Sarawak Water, pengudah nerima ripot nya, tim teknikal enggau operasyen dianjung ngagai endur nya bejalaika pengawa mindahka paip sereta berengkah ngemanahka enggau ngenyit dikena ngetanka gaya sereta mulaika bekal ai enggau naka pengelengkas.

Tangki ai deka disediaka nitihka peminta enggau pemerat ngagai servis ti beguna, bepanggai ba pemisi.

Mensia mayuh mega dilalau bejejimat lebuh nengah Jalai Buangsiol maya kereja ngemanah sereta nitihka atur ngatur trafik ba endur nya.

Sarawak Water minta ampun ketegal penusah ti nyadi sereta beterima kasih ngagai penyabar enggau kerejasama semua penguna sekumbang timpuh ngemanahka nya.

Sebarang tanya tauka penerang ti dilik tau dikenataika nengah ‘Sarawak Water Careline’ (Wilayah Utara – Limbang) ba lumur 085-215633 / 085-215644 / 085-211601 tauka nengah jalai komunikasyen rasmi Sarawak Water. — RBI

LIVERPOOL, 30 Mei — Liverpool FC udah ngentaska Arne Slot udah ninggalka pangku pengawa nyadi menijar kelab nya enggau tekala nya.

Dalam penerang rasmi platform media rama enggau saluran rasmi kelab nya, Liverpool FC madahka proses nyiri penganti Slot benung dipejalaika.

“Liverpool FC udah ngentaska Arne Slot deka ninggalka pangku pengawa nyadi menijar enggau tekala nya lalu proses nyiri orang ke nganti iya benung dipejalai.

“Iya ninggalka kelab enggau gelar Liga Premier sereta terima kasih enggau pengangkun kami ke pemadu dalam,” ku penerang nya.

Sekumbang ke megai pengawa nya, Slot meri empas ke besai lebuh ngiring Liverpool ngulihka gelar Liga Premier, ngeringka penuduk iya nyadi siku ari menijar ke ninggalka legasi ke besai reti ba Anfield.

Berebak enggau nya, pakar pemindah main bol entarabansa Fabrizio Romano udah ngeripotka, menijar AFC Bournemouth, Andoni Iraola diatu nyadi chalun keterubah ngisi ruang puang ke ditinggalka Slot.

Taja pia, Liverpool FC bedau madahka sebarang pemutus rasmi bekaul enggau pengawa nyiri menijar baru.

Pemansang nya dikearapka terus nyadi fokus bala peminat Reds di serata dunya lebuh kelab nya tama ngagai renggat baru napi pekit musim ti deka datai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika