KUALA LUMPUR, 15 Jun – Berengkah 1 Julai 2026, pengguna semua bank di Malaysia ulih ngasaika pengelantang ngemansutka duit tunai enggau enda bebayar ba sebarang bank nengah “automated teller machine” (ATM) enggau ‘smart recycling machine’ (SRM) di serata menua enggau nadai dichaj RM1 baka sebedau tu.

Pengawa nya dipadah nengah penerang begulai ari tiga gerempung industri servis wang besai menua tu, ti nerangka inisiatif nya nyadika pengawa dikena ngangkatka pengelantang bank enggau akses ngagai mensia mayuh.

Nengah pengawa bejalaika baru nya, pemegai kad debit ti dikeluarka bank di Malaysia ulih ngaga pengawa ngeluarka duit tunai nadai sekat ba lebih 14,000 ATM enggau SRM di serata menua, enda ngira bank ti ngeluarka kad nya.

Nitihka penerang nya, fasiliti nya disadang meri penguntung ngagai bejuta iku pengguna nengah chara ngemendarka sida ngena sebarang ATM tauka SRM bank ke semak enggau enda ibuh irau pasal chaj tambah ungkup transaksyen ngeluarka duit tunai.

Ketiga-tiga gerempung ti ngaul diri bejalaika inisiatif tu iya nya Gerempung Bank di Malaysia (ABM), Gerempung Perbankan Islam enggau Institusyen Pekara Wang Malaysia (AIBIM) enggau Gerempung Institusyen Pekara Wang Pemansang Malaysia (ADFIM).

Taja pia, pengelepas bayar nya semina dikena ba ATM enggau SRM ti dipejalaika institusyen bank di Malaysia.

Inisiatif tu dipeda nyadi singkang positif nuju ngenegapka mayuh agi perengka guna bank ti mesra pelanggan, kelimpah ari ngurangka ungkus transaksyen ninting hari ti ditanggung penguna. -RBI

Sumber BERNAMA

Gambar AI

#ruaiberitaiban#newsiban#beritaiban

Rindu | Titih | Kunsika

KANOWIT, 1 Mac – Dato’ Sri Gramong Juna, ex-Kaban Kunsil Nengeri (ADUN) Machan nyemetak madahka pengerami Taun Baru Cina ukai semina diempu komuniti Cina aja, tang nyadi pelasar ke beguna dikena ngerapitka kaul entara bansa di Kanowit.

Berebak enggau nya, iya nesau komuniti ngambika terus ngenegapka penyerakup enggau pemereti ati ke pemaik begulai.

Iya ngenataika pesan nya lebuh ngulu pengerami ngintu Taun Baru Cina ke diatur ba Dewan Opis Pelilih Menua Kanowit bedau lama ke udah, lalu nerangka penatai pemayuh raban nya kelai tegap semengat penyerakup komuniti.

“Kanowit dikelala enggau komuniti pupu bansa, lalu kitai patut ngetanka pengelantang ke udah lama bisi ba peranak menua nya,” ku iya.

Dato’ Sri Gramong Juna mega meri Selamat Taun Baru Cinangagai semua, kelebih agi bala bakih komuniti Cina di Kanowit, sekalika bisi datai ba dia tu tauka ba endur bukai, enggau pengarap taun tu deka mai pengelantang, pemujur enggau pengelikun ngagai semua.

Pengerami nya mega digulu bala ketuai komuniti, ketuai gerempung enggau peranak menua nya, ti besaup nentuka pemujur pengawa nya. -RBI

KUCHING, 22 April – Pemeri sepenyampau RM560,000 ngagai 24 gerempung ukai dikuasa perintah (NGO) mandangka penerus legasi pengasih niang Datuk Patinggi Puan Sri (Dr.) Hajjah Laila Taib dalam pengawa mantu komuniti ti begunaka bantu di Sarawak.

Pemeri nya disuaka Sapit Menteri Pengerai Malaysia, Dato Hajjah Hanifah Hajar Taib begulai enggau menyadi indu iya, Puan Jamilah Hamidah Taib enggau menyadi lelaki iya, Dato Sri Mahmud Abu Bekir Taib nengah Amanah Warisan Taib enggau Laila ba Pengerami Ngelancharka Bup Laila Taib: Her Journey of Love and Compassion ti udah nyadi ba Pustaka Negeri Sarawak kena Hari Minggu, 12 April tu tadi.

Inisiatif tu nyadi pengawa ari sida iya sebilik dalam neruska semengat enggau nilai mulia ti udah diterenak niang Datuk Patinggi, kelebih agi dalam ngetanka pengelantang enggau penyerakup rayat nengah sukung ngagai NGO ti chakah gawa ke komuniti, kelebih agi di Sarawak.

Tebal agi NGO ke nerima pemeri nya iya nya gerempung ke kala bekerejasama rat enggau niang Laila Taib sekumbang iya agi idup, lalu enggau nya nyadika bantu nya kelai meri terima kasih sereta ngaku pangku pengawa sida mantu sida ke begunaka bantu. -RBI

PADAWAN, 16 Mac — Penemuai Unit Pengatur Geopark, Opis Kampung Sarawak ngagai ladang lada Nang Ori di Padawan mantaika potensi besai produk geopark bepelasarka pengeraja asal ke ditanam komuniti menua nya.

Ladang lada nya dipejalaika orang dagang indu menua tu, Awaeang Anak Kwasin kenyau ari taun 2016, ukai semina ngetanka pesaka asal betanam betupi, tang mega mujur rembus ngagai makit entarabansa.

Nama “Nang Ori” ti mai reti “bendar tulin” dalam dialek Melayu Sarawak mega mandangka pengamat lada Sarawak ti diasilka ari tanah Borneo.

Sejarah pengawa betanamka lada ba kandang menua tu berengkah enggau pengawa ngaul seraban indu ti dikelala enggau nama “Ring Ladies”, lalu enggau nya mandangka pengawa indu menua pesisir ti beguna nyadi pengerembai ekonomi komuniti enggau pemansang kandang menua.

Diatu, Nang Ori ukai semina ngelakuka lada dalam tukuh benih enggau serbuk, tang mega udah ngasilka mayuh macham produk inovatif baka kopi putih lada chelum, teh susu lada chelum, minyak urut lada chelum enggau ‘lulur’ tubuh.

Pekara ti bebida tu nyadika bukti pengeraja asal menua tu ulih diubah nyadi produk ti bisi rega tambah ti tinggi enggau identiti kediri empu.

Kenyau ari taun 2019, produk Nang Ori udah rembus ngagai makit menua tasik nyengkaum Brunei enggau Singapura, kelimpah ari nempa kerejasama strategik enggau AEON ungkup makit Jepun.

Kebun komuniti tu mega suah nerima temuai antarabansa ari Jepun, Jerman enggau Mauritius, lalu enggau nya ngenegapka potensial iya nyadi palan agrodagang temuai bepelasarka komuniti.

Pemujur tu ngayanka pengulih komuniti setempat ngena pengeraja asal enggau penemu asal dikena ngasilka produk bekualiti tinggi, setipak enggau aspirasyen Sarawak Delta Geopark dalam meri kuasa ngagai pemansang ekonomi bepelasarka komuniti ti meruan. — RBI

KUALA LUMPUR, 29 Jun — Perintah nandu baru komitmen sida ti terus ngenegapka agenda integriti, reformasyen institusyen enggau transparen pengawa merintah menua nengah mayuh macham inisiatif komprehensif, seriris enggau pengawa ngangkatka penuduk Malaysia dalam Indeks Persepsyen Makai Suap (CPI).

Pekara nya dibantaika dalam aum Tanya Lisan Dewan Rakyat kena 22 Jun 2026 (Hari Satu) lebuh Kaban Parlimen Sri Aman, Dato’ Sri Doris Sophia Anak Brodie, mantaika tanya ngagai Menteri Besai bekaul enggau singkang tegap Perintah dalam ngenegapka pengawa ngaga baru integriti enggau undang-undang menua Malaysia berindik ari penuduk Indeks Persepsyen Makai Suap (CPI) ti mengkang nyadika pengirau, nyengkaum penambah fokus ngagai kes ti beprofil tinggi.

Nimbal tanya nya, Menteri ba Opis Menteri Besai (Undang-Undang enggau Reformasyen Institusyen), Dato Sri Azalina Othman Said madahka Perintah beratika penuduk Malaysia dalam CPI enggau berat laban nya ukai semina ngayanka tikas integriti pentadbiran mensia mayuh, tang mega nyadi referen ti beguna ngagai pemeranak puku antarabansa.

Perintah udah netapka tagit deka ngengkahka Malaysia ba 25 buah menua pemadu atas dalam CPI dalam timpuh 10 taun, nengah pengawa bejalaika reformasyen komprehensif nyengkaum ngenegapka atur neritka atur, ngatur wang mensia mayuh enggau ngemanahka sistem merintah.

Berindik enggau nya, Raban Petugas Khas CPI ti bechairmanka Ketuai Sekretari Perintah udah ditumbuhka dikena merambu strategi ngangkatka penuduk menua enggau chara ti lebih ditagit.

Entara batang fokus tim tu nyengkaum ngenegapka atur neritka undang-undang, ngubah baru pengawa ngatur wang turu mensia mayuh, ngurangka ulah birokrasi, reformasyen undang-undang enggau ngenegapka komunikasyen strategik dikena nambahka pengandal mensia mayuh enggau pemeranak puku.

Perintah mega udah bejalaika sekeda inisiatif kunsi nyengkaum bejalaika Strategi Nagang Penyalah Makai Suap Nasional (NACS), ngaga ‘Akta Perolehan Kerajaan’ 2026, ubah ba ‘Akta Perlindungan Pemberi Maklumat’ 2010 enggau perambu Rang Undang-undang Bebas Penerang.

Atur tu ngembuan tuju deka ngenegapka transparen, akauntabiliti enggau efisyen sistem meri servis mensia mayuh.

Berebak enggau nya, Perintah udah ngemeratka semua pengawa mansik enggau pengawa neritka atur ba kes ti beprofil tinggi deka terus dipejalaika enggau chara ngatika diri, profesyenal sereta bepelasarka undang-undang enggau nadai sebarang pengawa masuk champur ari sebarang piak.

Chara tu beguna dikena nentuka pengandal rayat enggau komuniti antarabansa ngagai institusyen penerit atur menua enggau sistem akim terus ditegapka.

Perintah mega madahka Malaysia ngerikod penambah ba penuduk iya dalam CPI, ari penuduk lumur 57 ba taun 2024 ngagai lumur 54 ba taun 2025, ti ngayanka pemanah pengawa ngemaru reformasyen enggau pengawa merintah ti benung dipejalaika.

Pengawa tu deka terus ditegapka nengah chara selampur perintah sereta mega kerejasama mayuh bengkah piak nyengkaum sektor peribit, NGO enggau CSO dikena nentuka agenda integriti menua terus ditegapka enggau komprehensif. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MIRI, 25 April — Premier Sarawak, Datuk Patinggi Tan Sri (Dr) Abang Abdul Rahman Zohari sehari tu nyereta program ‘Brisk Walk’ penyauh 2.5 kilometer ke diatur ba Taman Bulatan Miri ke nyadi sebagi ari pengawa ngangkatka gaya pengidup bepengerai ba raban bansa.

Program ke berengkah tumu pukul 6.30 pagi nya ditangkanka enggau sesi senamrobik sebedau disambung enggau bejalai ngelantangka ati ngelingi kandang taman nya.

Sepemanjai program nya, iya mega ngena awak begulai enggau mensia mayuh ke bisi datai, lalu enggau nya ngayanka komitmen ketuai nengeri nyapai rayat seraya mega nerenakka chara idup bepengerai.

Sebedau beserak, iya mega begulai enggau bala ke bisi datai ngelantangka ati makai pagi ba kandang endur ‘Lake Duck’ Taman Bulatan Miri. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Sarawakku

PAKAN, 14 Jun – Direktor Betanam Betupi Sarawak, Dominic anak Chunggat nyemetak madahka industri lada di Bagi Menua Sarikei bisi potensial ke besai terus ngerembai nyadi siti ari penyaup besai ngagai sektor betanam betupi nengeri tu, lalu enggau nya ngenegapka penuduk Sarawak ba makit eksport antarabansa.

Nitih ku iya, Bagi Menua Sarikei endang amat tebilang nyadi kandang endur ngeluarka lada bekualiti tinggi ti bisi peminta ukai semina ba makit menua tu aja, tang mega dieksport ngagai menua baka Jipun, Vietnam, Filipina enggau beberapa buah menua di Eropah. Dalam menua, makit besai nyengkaum Sabah enggau Semenanjung Malaysia.

Berindik enggau nya, iya meransang pekebun lada ba kandang menua nya minta Pensijilan Amalan Pertanian Baik Malaysia (MyGAP) dikena nambahka pengandal makit ngagai produk ke diasilka.

“Pensijilan MyGAP beguna amat laban nya nentuka produk betanam betupi nitihka standard pengelikun pemakai, ulih dipansik enggau meruan ti diaku ba renggat entarabansa.

“Nengah pensijilan tu, peluang rembus ngagai makit eksport ti lebih luas deka tebuka lalu udah nya nambahka rega komersial produk menua tu,” ku iya.

Iya madah munyi nya lebuh bejaku ba Program Nangguhka Agrofest Pakan 2026i ke diatur di Pakan seharitu tadi.

Dominic mega nesau pengemeran utai tanam bukai baka buah, sayur, nanas, rian, nyiur, jagung enggau utai tanam ngulihka setipikit MyGAP nyadi singkang dikena ngangkatka kualiti enggau daya besemekih produk betanam betupi sida empu.

Nitihku iya, pengawa meri setipikit nya ukai semina nyadika bukti pengawa betanam betupi ti manah sereta likun, tang mega ulih nambahka pengandal penguna ngagai produk betanam betupi menua tu.

“Ba jeman makit ke majak kompetitif, produk ke bisi setipikit baka MyGAP muntang agi diterima supermakit besai, kompeni pemeli, industri nginjin pemakai enggau makit eksport,” ku iya nerang.

Iya andal amat penambah penyampau ladang enggau operator ti bulih setipikit MyGAP deka mantu nempa sektor betanam betupi di Bagi Menua Sarikei lebih kompetitif, meruan sereta ulih meri pangka ke besai ngagai agenda pengelikun pemakai enggau pemansang ekonomi Sarawak.

Sama bisi datai iya nya Tan Sri William Mawan anak Ikom, Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ke mega ADUN Pakan, Datuk Larry Soon @ Larry Sng Wei Shien, Chairman Industri Kayu Ramu Malaysia ke mega Kaban Parlimen Julau, Sekretari Tetap Opis Menteri Industri Pemakai, Komoditi enggau Pemansang Kandang Menua, Datu Sirai anak Daha, Pemesai Pelilih Menua Pakan, Mohd Irwan bin Abdullah @ William Manggoi, Pemesai Opis Betanam Betupi Bagi Menua Sarikei, Jessyca anak Andrew Mujah, pengari ejensi perintah sereta selampur peranak Pakan. – RBI

#ruaiberitaiban#newsiban#beritaiban

Rindu | Titih | Kunsika

SELANGAU, 26 Mei – Karnival Nembiak Selangau 2026 deka ngempuruka raban nembiak nengah bemacham program pemansang diri, pelajar enggau pengelandik ti deka diatur ba Dewan Mayuh Guna Selangau berengkah ari pukul 7.30 pagi nyentuk 6 lemai kena 25 Julai tu ila.

Program ke diatur Serakup Intelektual Bansa Asal Sarawak (PERANTIS) enggau kerejasama Palan Servis DUN N.59 Tamin deka dipenyadika Kaban Kunsil Nengeri (ADUN) N.59 Tamin, Ir Christopher Gira Sambang.

Karnival tu ukai semina deka nyadi pelasar ngagai raban nembiak ngulihka penemu enggau pengelandik, tang mega meri peluang ngagai raban nembiak nyerungkai bidang baru ti ulih nyungkak potensial enggau pengidup sida jemah ila.

Entara batang aktiviti ke bisi disediaka nyengkaum pekit e-lumba PUBG enggau Mobile Legends 2026, Woksop Instrumen Pekara Wang nyengkaum pekit bedagang, kus kulinari enggau peluang nyereta program pelajar enda bebayar ari palan pelajar tinggi (IPTA) ke diempu Perintah Sarawak.

Bela deka diperambu iya nya aktiviti TVET baka Pemandang Dron, Pekit Dron ‘Berhalangan’, Pemandang simulasyen welding, Simulasyen sistem tali karan, Servis meresa sistem airkon entukar, Servis meresa sistem ECU entukar.

Kelimpah ari aktiviti pelajar enggau pengelandik, karnival nya mega dirichah enggau penatai khas penanyi tebilang Iban, Gwen, ti tebilang enggau lagu Sanggup Aku dikearapka nyadi pematak besai temuai kelebih agi raban nembiak.

Raban pengatur mega nesau raban nembiak Selangau ngambi awak nyereta program nya dikena nambahka penemu, pengelandik sereta ngenegapka kaul rama entara raban nembiak.

Karnival mai rambai jaku “Belia Berilmu, Belia Berdaya, Selangau Gemilang” setipak enggau pengawa deka ngenegapka nembiak rebak baru nuju pengidup ti lebih manah jemah ila. – RBI

#ruaiberitaiban#newsiban#beritaiban

Rindu | Titih | Kunsika

BETONG, 12 Jun – Pangku pengawa kaban kaunsil nyadi batang penyambung entara komuniti enggau Opis Perintah Lokal (PBT) terus dikemeratka dalam pengawa ngenegapka penyikar pentadbiran sereta nentuka pemansang kandang menua dipejalaika enggau lebih efektif sereta inklusif.

Kaban Parlimen Betong, Datuk Dr Richard Rapu madah, tetiap iku kaban Kaunsil Pelilih Betong (MDB) ke dilempaika pengarap dipinta bejalaika tanggungpengawa proaktif ukai semina dalam nentuka pengelanchar pengawa meri servis mensia mayuh, tang mega nyadi pengari sada nyawa rayat dalam mantaika isu, peneka enggau aspirasyen komuniti ngagai ejensi ke bekaul.

Nitih ku iya, kaban kaunsil nyadi baris mua ti megai tanggungpengawa mantu perintah ngelala pemar ba renggat baruh sereta ngenataika timbal komuniti ngambika pengawa ulih dipejalaika enggau jampat sereta efektif agi.

“Pangku pengawa kaban kaunsil beguna amat dalam nentuka genap polisi, program enggau inisiatif pemansang ulih meri penguntung terus ngagai rayat.

“Sida meseti seruran ngenyemakka diri enggau komuniti, meretika guna kandang menua sereta nyadi jematan ti nyambung rayat enggau PBT,” ku iya.

Iya madah munyi nya lebuh nyadi chairman Aum Penuh 2/2026 Kaunsil Pelilih Betong ti diatur ba Bilik Aum Heliconia, Opis Kaunsil Pelilih Betong, kena Hari Lima tu tadi.

Ku iya nambah, komitmen tinggi, integriti enggau semengat kereja beraban entara kaban kaunsil nyadi elemen beguna dikena nentuka Kaunsil Pelilih Betong terus mansang nyadi sebuah PBT ti progresif, responsif ti seruran ngemeratka pemerat rayat.

Berebak enggau nya, iya nyemetak madahka pengawa ngenegapka pengawa merintah, ngangkatka pemanah pengawa meri servis sereta meri kuasa ngagai guna kaban kaunsil deka terus nyadi pemerat dikena nentuka Kaunsil Pelilih Betong ulih nangkup pengarap komuniti sereta nyukung agenda pemansang kandang menua nya enggau meruan.

Ku iya, chara tu setipak enggau aspirasyen Sarawak ba pemansang ti inklusif sereta kompetitif, lalu enggau nya ulih nentuka pengelantang pendiau rayat enggau penyulut Betong ulih terus dikemanah ari setiap maya. — RBI

#ruaiberitaiban#newsiban#beritaiban

Rindu | Titih | Kunsika

LIMBANG, 12 April 2026 — Pemansang Rangau Valley dikearap nyadi pelasar besai penumbuh baru di Limbang nengah konsep pengawa berumah moden, palan pentadbiran enggau pemansang besepadu ti diperambu enggau strategik.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madahka projek nya ngembuan sejarah kediri empu lebuh asal iya dikemansangka ari baruh Perintah Besai, tang langkar iya enda mesra pemeli enggau orang ke nguan projek nya.

Ku iya, Perintah Sarawak udah nya ngambi alih projek nya lalu ngemansangka baru enggau chara ke lebih bekualiti sereta ngemeratka pengelantang rayat.

“Alhamdulillah, sehari tu kitai ulih meda rumah ganti rumah ke udah dikemansangka dulu agi ari tu enggau rampa menua ke manah agi sereta diperambu,” ku iya lebuh bejaku rambau nemuai ngagai palan projek Palan Pentadbiran Bersepadu (IAC) Limbang enggau pengawa mansik baru Projek Pengawa Berumah Lembah Rangau ditu, kemari.

Ku iya, entara batang komponen pemansang nya nyengkaum Palan Pentadbiran Bersepadu (IAC) Limbang, pemansang komersial nyengkaum hotel kelimpah ari rangkaian sambung terus ngagai mengeri Limbang nengah konsep tumpuk pendiau kurang karbon.

“Rangau Valley bepalan ba tengah-tengah entara Limbang lama, Limbang ke diatu enggau Limbang baru, nyadika iya palan penumbuh ke strategik,” ku iya.

Berebak enggau nya, Abang Johari meri jamin pemeli asal rumah ba kandang menua nya semina deka begunaka terus mayar duit injau ke udah bisi taja pan rega makit rumah diatu udah niki ngagai entara RM353,000 ngagai RM361,000.

Iya ngemeratka chara Sarawak ti ngemeratka pengawa berumah bekualiti ari pemansang pemayuh tubuh ti enda ngelantangka peranak.

Berebak enggau nya, iya madahka Padang Bilun Limbang deka dikemesai ngambika bilun ke besai agi baka Boeing ulih sangkai.

Ku iya, nengah inisiatif Air Borneo, tiga buah bilun jet Boeing dipelaba ulih beoperasyen manggai bulan Julai tu dikena nyambung Sarawak enggau Kuala Lumpur, Singapura, Kota Kinabalu enggau Jakarta.

Ku iya, atur nya mega nyukung pemansang sektor dagang temuai pengerai enggau penambah sepital moden ba kandang menua Batu Lintang enggau Terubun Jaya ti disikap enggau perengkaguna perubat pemadu baru sereta pengelandik.

Abang Johari mega meri besai terima kasih ngagai ‘Perbadanan Pembangunan Perumahan’ (HDC), piak pengatur enggau kunteriktor ti mujur nembuka pemar pemansang projek nya.

Sama bisi datai Sapit Premier Sarawak Datuk Amar Awang Tengah Ali Hasan, Sapit Premier Sarawak Datuk Amar Dr. Sim Kui Hian, Sekretari Perintah Nengeri Sarawak Datuk Amar Mohamad Abu Bakar Marzuki, Sapit Menteri Perengka Pengangkut Datuk Hasbi Habibollah, Sapit Menteri Industri Pemakai, Komoditi enggau Pemansang Wilayah Sarawak Datuk Dr Abdul Rahman Ismail enggau Chairmen HDC Abdul Yaakub Arbi. — RBI