KAPIT, 17 April — Kaban Kunsil Nengeri (ADUN) Pelagus, YB Wilson Nyabong Ijang nerima penemuai ari sida Asin anak Mambang sebilik ba opis iya di Kapit berandauka penusah ke ditapi pesakit nya, ditu kemari.

Asin, peranak Rumah Paul Kakek, Nanga Danau, Batang Rajang, Kapit diatu benung berubat ba Sepital Sibu pengudah ngasaika penanggul pengerai ti begunaka perati enggau lengkas.

Taja pia, iya betapi enggau pemar ketegal nadai dokumen pengelala diri ke lengkap.

Rambau penenuai nya, YB ADUN Pelagus ninga penerang enggau apil ari sida sebilik lalu beratika baru pekara ti diguna enggau lengkas dikena nentuka pengelanchar pengawa berubat pesakit.

Berindik enggau nya, iya udah ngeluarka surat sukung rasmi dikena mantu ngemuntangka pengawa sida sebilik enggau sepital sereta Opis Pengerejista Bansa (JPN), kelebih agi ba pengawa ngenyampatka proses bekaul enggau pengawa berubat sereta dokumentasyen ti diguna.

YB ADUN Pelagus mega ngenataika pengaga ati iya ngagai sida serumah enggau piak ti udah mai pekara tu ngagai iya.

Iya ngarapka nengah sukung ke udah diberi, semua pekara ke bekaul enggau pengawa berubat Asin ulih dimuntangka, lalu ari nya iya ulih nerima perubat ke patut enggau nadai sebarang penanggul.

Berebak enggau nya, iya minta sida pesakit sebilik terus diberi pengering sereta besampika Asin jampat gerai ari penyakit ke ditapi iya. — RBI

LIMBANG, 9 Mei – Pengerami Pra Nangguhka Bazaar Agro Gawai Medamit 2026 ngemeratka agenda penyerakup enggau pemansang ekonomi komuniti lebuh Sapit Chairman Komiti, Clarence Ringgit ngenataika jaku sebedau pengerami nutup rasmi.

Program ke diatur Komiti Temuai Medamit Limbang begulai enggau Kaunsil Pelilih Menua Limbang ngempuruka komuniti menua nya, orang dagang, ejensi perintah enggau temuai pupu bansa dalam gaya pengelantang enggau pemanah ati.

Dalam jaku dipansutka iya, Clarence Ringgit meri besai terima kasih ngagai semua piak ke bisi kaul nyengkaum bala temuai dipebasa, ejensi perintah, orang dagang enggau komuniti menua nya ke udah meri sukung tegap ngemujurka pengerami dua hari berunggu nya.

Iya mega meri besai terima kasih ngagai pengari Menteri Penyerakup Menua, YB Datuk Aaron Ago Dagang ti diarika Tuan Pandang Semat, Sekretari Politik Menteri Premier Sarawak, Datuk Patinggi Tan Sri Abang Johari Tun Openg, laban udah datai sereta nyukung program nya.

Nitih ku iya, pengawa ngatur Bazaar Gawai Agro Medamit 2026 ukai semina nyadi pelasar aktiviti ekonomi aja, tang mega bejalaika tanggungpengawa ke berat dalam ngenegapka kaul entara komuniti pupu bansa sereta nerenakka kerejasama entara Perintah Besai, Perintah Nengeri enggau autoriti lokal (PBT).

“Program baka tu nyadi pelasar ke beguna dalam ngenegapka penyerakup komuniti sereta nerenakka semengat bebatak asur enggau kerejasama setipak enggau aspirasyen Segulai Sejalai ti mai reti seriris sereta sejalai,” ku iya.

Clarence Ringgit mega ngemeratka komiti pengatur pengawa nyadi penyambung entara sada renggat baruh enggau perintah, kelebih agi ngenataika aspirasyen enggau utai ke diguna komuniti setempat enggau lebih efektif.

Ari sukut ekonomi, iya nyemetak madahka penyereta pedagang mit enggau orang dagang menua tu udah meri empas positif ngagai ekonomi menua tu, setipak enggau pengawa ngenegapka komuniti menua pesisir.

Iya mega ngelaluka kerejasama ti terus ari mayuh bengkah ejensi perintah nyengkaum Kaunsil Pelilih Limbang dalam nentuka program baka tu ulih diteruska enggau manah agi jemah ila.

Pengerami nya mega bisi negu aspirasyen penyerakup bansa ti ditegapka nengah mayuh bengkah inisiatif ari baruh Opis Menteri Penyerakup Menua ti betuaika Aaron Ago Dagang, setipak enggau agenda MADANI Malaysia.

Lebuh nyimpul jaku iya, Mr.Clarence minta semua piak terus ngemeranka semengat begulai sereta nyaga pemeresi sepemanjai pengawa nya nengah chara bejalaika kimpin “Pesta tanpa Sampah”

Pengerami nya udah nya ditampung enggau pengawa rasmi nangguh sereta mandangka main asal ti mandangka penyelai budaya komuniti di DUN Batu Danau, lalu enggau nya ngelaika pemujur Bazaar Gawai Agro Medamit 2026. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 15 Mei — Penyedar senentang sukut pengelikun ari penusah angus majak ditegapka lebuh Balai Bomba enggau Penyah Penusah (BBP) Kidurong ngatur program randau mindah ari begunan enggau demonstrasyen ngena perengka pengerara api ba premis Corewell, sehari tu.

Program ke diatur ari pukul 9.00 pagi nyentuk 11.00 pagi nya ngaul 22 iku penyereta ti mungkur 17 iku lelaki enggau lima iku indu.

Entara batang isi program nya iya nya randau mindah dalam begunan, penerang pengelikun penusah angus enggau latih praktikal ngena perengka pengerara api dikena nyendiaka diri napi penusah ngenyit.

Nengah sesi meri penerang nya, bala penyereta dipadahka enggau kebuah penusah angus nyadi, chara nagang tumu sereta pengawa ke patut dipejalaika enti sema penusah angus nyadi ba palan endur gawa tauka ba kandang endur ke ngelingi.

Demonstrasyen ngena perengka pengerara api mega meri awak ngagai penyereta meretika teknik ngena ti betul dikena nagang api mit sebedau nyadi balat agi.

Program nya dipejalaika Tim Bravo BBP Kidurong betuaika Team Supervisor, PBK I Fabian Andy Jesi begulai enggau kaban bukai nyengkaum PB Mohd Syahrul bin Rudin enggau beberapa iku kaban operasyen BBP Kidurong.

Sama bisi datai ngemujurka program nya Pemesai Kanan PBT II Rary Anak Binjie.

Pengawa ngatur program tu ukai semina nambahka tikas penyedar bala penyereta nuju penusah angus, tang mega ngenegapka agi pengawa nyikap diri sereta jampat bejalaika pengawa lebuh napi gaya penusah ngenyit.

Inisiatif ti benung dipejalai JBPM tu setipak enggau komitmen piak iya ti deka nanam chara pengelikun ari penusah angus ba komuniti nengah chara “Prestasi Tinggi, Cepat dan Mesra”. -RBI

KUCHING, 16 Mei — Projek Jalai Penyambung Sarawak Sabah Renggat 2 (SSLR2) entara inisiatif beguna perintah Sarawak dalam ngemanahka rentayan jalai alun menua pesisir sereta ngenegapka sambung darat entara Sarawak enggau Sabah ungkup pemaik rayat enggau pemansang ekonomi pelilih menua tu.

Beduduk ari nya, Opis Kereja Raya (JKR) Sarawak majak ngenegapka pengawa matau pengawa bejalaika projek infrastruktur strategik di nengeri tu nengah penemuai ngagai palan ungkup SSLR2 ba minggu tu tadi.

Nitihka penerang ti dikunsi nengah Facebook ari Maltimur Resources Sdn Bhd, tim projek SSLR2 nerima penemuai ari pengari JKR Sarawak beratika pemansang ke diatu dalam sekeda pakej kereja kunsi projek nya.

“Penemuai tu meri awak beratika pejalai pengawa ngaga ti benung dipejalaika, ngenukuka pemansang ba palan sereta nentuka pengawa bejalaika projek tetap nitihka spesifikasyen projek, standard kualiti enggau timpuh ti udah diperambu,” ku penerang nya.

Penerang ke sama mega madahka kerejasama rat enggau pengawa matau ti enda ngetu entara semua raban beguna amat dalam nentuka projek ti meri empas tinggi nya ulih dipejalaika enggau lanchar sereta efektif.

“Nengah kerejasama rat enggau pengawa matau ti enda ngetu, SSLR2 tetap komited nyendiaka infrastruktur ti ngenegapka sambung rentayan sereta nyukung pemansang kandang menua dalam timpuh panjai di Sarawak,” ku penerang nya nerang — RBI

#ruaiberitaiban#newsiban#beritaiban

Rindu | Titih | Kunsika

SIMANGGANG, 24 Mac – Kaban Kunsil Nengeri (ADUN) sitak Simanggang, Datuk Francis Harden Hollis ke mega Sapit Menteri Pemansang Bakat Sarawak udah bejalaika pengawa ngabas palan Projek Jematan Semin ti meraka Sungai Undop di Kampung Beleti, Sabu, pagi tadi.

Penemuai nya betuju beratika baru asil kereja projek sebedau proses nyerah ari kunteriktor ngagai Opis Kereja Raya (JKR) Bagi Menua Sri Aman, ke nyadi ejensi bejalaika pengawa, seraya Ejensi Pemansang Sri Aman (SADA) nyadi penerima.

Projek ke beungkus RM5 juta ti dipejalaika ROSBEN Holding Sdn Bhd udah tembu penuh lalu diatu udah dibuka ngagai mensia mayuh.

Jematan semin nya dipelaba meri penguntung ngagai 14 pintu ruang bilik ari baruh kandang endur Kampung Beleti, lalu enggau nya ulih ngemanahka akses enggau penyambung ungkup peranak menua nya.

Sama bisi datai rambau penemuai nya, pemesai ari mayuh bengkah ejensi nyengkaum Opis Tanah enggau Survei, JKR Sri Aman, SADA sereta mega pengari kunteriktor enggau konsultan projek. – RBI

LUBOK ANTU, 29 April — Sepenyampau 42 projek ari baruh Program Transformasyen Menua Pesisir (RTP) ungkup sitak Kunsil Nengeri (DUN) Batang Ai benung dikemata ngambika ulih dipejalai, lalu ngemeratka penyikar pengawa meri servis ngagai rayat.

Nitihka penerang ari Pemesai Tugas Khas Wat Jack Meredan, ti ngarika Kaban Kunsil Nengeri (ADUN) Batang Ai, Datuk Malcolm Mussen Lamoh madah, nyadi pekara nya udah dikerandauka ba Aum Focus Group (FG) ke diatur ba Opis Pelilih (DO) Lubok Antu.

Aum nya bechairmanka Pemesai Opis Pelilih Lubok Antu, Akoi Anak Ejau, lalu bela digulu kaban komiti ke bekaul enggau bala ketuai komuniti kandang menua nya.

Penerang nya madahka aum nya nyadi pelasar ke beguna dalam ngenegapka pengawa bejalaika pengelikun rayat, kelebih agi dikena nentuka tetiap servis ke dikenataika ngagai komuniti ulih dipejalaika enggau lebih efisyen, sistematik sereta ngasi.

Kelimpah ari nya, pengawa nya mega setipak enggau aspirasyen pemansang nengeri ari baruh Strategi Pemansang Pengudah COVID-19 2030 (PCDS 2030), ti ngemeratka pemansang inklusif enggau pengelantang rayat.

Tekala nya pengudah aum nya, sesi penemuai kereja udah diatur ngagai Opis Residen enggau Opis Opis Entali Ai enggau Parit (DID) Bagi Menua Simanggang beratika baru status pengawa bejalaika projek RTP ba kandang menua nya.

Ari penyampau 42 projek RTP ke benung dipejalaika ba taun 2026, tiga projek ari baruh kemata Opis Pengairan enggau Parit (DID), ti ngaul pengawa bekaul enggau infrastruktur parit enggau ngatur ai.

Inisiatif tu mandangka komitmen perintah ti terus ngenegapka pemansang menua pesisir kelebih agi ba kandang menua Batang Ai, dikena nentuka pengelantang pendiau rayat terus dijaga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Wat Jack Meredan

LUMUT, 1 Mei — Hari Tebuka Armada 2026 di Pengkalan Soldadu Tasik Diraja Malaysia (TLDM) Lumut richah enggau pengerami penuh istiadat ti dipenyadi Duli Yang Teramat Mulia Raja Muda Perak Darul Ridzuan, Raja Jaafar Ibni Almarhum Raja Muda Musa.

Pengawa ti beprestij nya nyadi momen ti besai reti dalam ngerichahka Pengerami Hari TLDM Ke-92, lalu enggau nya mandangka komitmen tim nya terus ngelawa komuniti sereta nambahka pemereti ati rayat senentang pangku pengawa enggau penau TLDM dalam ngetanka kedaulatan kandang tasik menua tu.

Pengawa ngatur Hari Tebuka Armada tu mega muka ruang ngagai mensia mayuh meda aset penyaga pengelikun menua ari semak, kelimpah ari ngasaika mayuh macham program nyengkaum pengawa pemandang, mandangka penau enggau interaksyen enggau raban TLDM.

Program tu ukai semina ngerapitka kaul entara raban TLDM enggau rayat, tang mega nyadi pelasar beguna dalam nerenakka semengat talukka menua sereta beterima kasih ngagai jasa enggau pengibuh raban pengelikun menua. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Kredit sumber, photo — Tentera Laut Diraja Malaysia

KUCHING, 12 Mac — Sepenyampau 64 iku peranak menua luar ditan dalam operasyen penerit adat besepadu ti dipejalaika Opis Imigresyen Malaysia (JIM) Sarawak ba sekeda endur ngelingi mengeri tu berengkah ari 11 ngagai 12 Mac tu tadi.

Nitihka penerang ari Opis Imigresen Sarawak sehari tu, operasyen ke berengkah tumu pagi nyentuk ke jauh malam nya ngaul 34 iku pemesai penerit adat.

Penerang nya madahka, pengawa nyerungkai maya siang hari nya ngemeratka sebuah palan endur ngaga projek di kandang menua Muara Tebas kelimpah ari sekeda premis kedai makai di Pending Heights ti dipelaba bejalaika aktiviti bejudi nengah ‘online’.

“Asil ari pengawa meresa ke dipejalaika ngagai individu ba endur ke bisi kaul tetemuka bisi sekeda peranak menua luar dipelaba ngereja penyalah ari baruh Akta Imigresen 1959/63, nyengkaum nadai dokumen pejalai ke entas sereta diau ngelui ari timpuh ke dikemendarka,” ku penerang nya.

Operasyen nya udah nya diteruska maya malam hari enggau nagit sebuah palan pemerindang ngelingi mengeri Kuching.

Dalam pengawa ngenyit nya, sepenyampau 22 iku peranak menua luar mujur ditangkap, ke mungkur peranak menua China, Vietnam, Laos, Filipina enggau Indonesia.

Semua individu ke ditangkap dibai ngagai Depot Imigresyen ngambika dipansik enggau silik agi sereta dipejalaika nitihka atur undang-undang imigresyen ke benung dikena. — RBI

KAPIT, 14 MAC – Pelajar nyadi pelasar ke pemadu tegap dalam nempa pengidup nembiak rebak baru dudi hari, pia ku Kaban Parlimen Hulu Rajang, Datuk Wilson Ugak Kumbong, ti mega ngemeratka pemesai guna penemu dalam nempa rebak dudi hari, kelebih agi ba raban nembiak Baleh.

Ku iya ke mega nyadi chairman Wang Turu Pelajar Baleh, batang pengarap iya ngambika bala anak Baleh terus maju, ngulihka penemu enggau naka ulih sereta dudi ila meri pangka ngagai pemansang komuniti jemah ila di Baleh.

Kena Hari Lima tu tadi, bala nembiak di Baleh nerima insentif pelajar nengah Wang Turu Pelajar Baleh 2025, inisiatif timpuh panjai ti ngembuan tuju nyukung pengawa belajar, ngelempungka tating ruang bilik sereta meransang raban nembiak nampung pelajar sida.

Wang turu tu disukung Sarawak Energy Berhad (SEB) nengah inisiatif Tanggungpengawa Rama Korporat (CSR) dikena meri bantu belanja ngagai nembiak, kelimpah ari ngangkatka pemansang pelajar sereta ngadaka ketuai jemah ila dalam ngiring komuniti.

Ku Ugak, bantu ke diberi nya ngembuan reti ke besai agi ari semina rega belanja laban nya kelai sukung enggau pengandal ngagai potensi anak Baleh.

Kenu ku iya, meda bala anak Baleh nyingkang ke mua nengah pelajar seruran nyadi pengandal enggau juluk iya.

Ugak mega meri pengaga ati ngagai semua penerima insentif sereta ngelalau sida ngambika terus bebendar nyapai penyulut dalam pelajar sereta mulaika diri gawa ke komuniti. -RBI

BETONG, 4 Julai – Dua bengkah projek pemansang pelajar di Bagi Menua Betong benung dipejalaika nitihka timpuh ke udah ditetapka lalu dipelaba tembu berenggat entara suku keempat taun tu enggau suku keterubah taun 2027.

Pemansang nya dikelala nengah penemuai matau projek pemansang Perintah Besai ari Opis Pemansang Nengeri Sarawak (ICU Sarawak) ngagai dua palan projek ke dikerandau nya.

Penemuai nya betuaika Sapit Direktor Pemansang Nengeri Sarawak I, Wan Fadillah Wan Ahmad begulai enggau pemesai ari Opis Pemansang Nengeri Sarawak, Opis Pelajar Nengeri Sarawak, Opis Pelajar Pelilih Betong enggau Opis Kereja Raya (JKR) Bagi Menua Betong.

Palan keterubah iya nya Projek Sekula Repuk Sarawak (2022) ti mungkur pengawa nganti 10 unit rumah pengajar di Sekula Primari (SK) Issu/Bangat.

Projek nya diatu benung dipejalaika nitihka timpuh ke udah ditetapka lalu dipelaba tembu ba suku keempat taun 2026.

Raban nya udah nya ngabas Projek Ngemansangka Baru Sekula Repuk Sarawak (Renggat 3) ke beungkus RM1 Bilion di SK Saka.

Skop projek nya nyengkaum ngaga blok pentadbiran empat ringkat, dua blok buding enggau bilik mandi seretw jamban, dewan makai, blok prasekula enggau blok kuarters.

Projek tu mega dipejalaika nitihka timpuh ke udah ditetapka lalu dipelaba tembu ba suku keterubah taun 2027.

Penemuai matau nya mandangka komitmen Perintah Sarawak enggau Perintah Besai ti seruran dipejalai dalam nentuka projek pelajar dipejalai nitihka perambu sereta dipatau enggau silik.

Enti udah tembu ila, kedua-dua projek nya dikearapka ulih nyendiaka perengkaguna ti bekualiti sereta likun agi ungkup bala pengajar enggau nembiak di Sarawak. – RBI

#ruaiberitaiban#newsiban#beritaiban

Rindu | Titih | Kunsika