KUALA LUMPUR, 4 Jun — Kaul rat entara Malaysia enggau Jipun ke udah lama ditempa meseti terus ditegap bepelasarka pengandal, integriti enggau bebasaka pangan diri dikena nentuka kerejasama strategik entara kededua menua tu terus ngerembai sereta meri pemaik ngagai rebak dudi hari.

Sapit Menteri Besai, Datuk Seri Fadillah Yusof madah, kaul ti meruan entara menua enda ulih semina bepanggai ba sempekat tauka kunterik aja, tang lebih agi meseti disukung enggau pengarap ti tegap entara semua piak.

Nitih ku iya, kunterik nyangka ulih ngetanka kerejasama, tang pengarap nyadi batang pekara ti nentuka kaul nya mengkang meruan sereta terus ngerembai dalam timpuh ke panjai.

Iya madah munyi nya lebuh ngenataika jaku kunsi lalu udah nya bejadika Forum Undang-undang enggau Dagang Malaysia–Jipun 2026 enggau pengawa ngelancharka kerejasama strategik entara RDS Advocates & Solicitors enggau Anderson Mori & Tomotsune ditu sehari tu.

Forum tu ngempuruka bala ketuai industri, komuniti dagang enggau pemekuh undang-undang ari Malaysia enggau Jipun berandauka bemacham peluang kerejasama ti bisi potensial ngenegapka kaul ekonomi, dagang enggau beranakka puku entara kededua menua.

Dalam jaku iya, Fadillah mega nyemetak madahka Jipun mengkang nyadi sebagi ari kaban strategik Malaysia ke pemadu beguna kenyau ari pengawa bejalaika Polisi Pandang Ke Timur, enggau pemeri ke besai ukai semina dalam tukuh beranakka puku enggau pemindah teknologi, tang mega nengah pengawa nanam nilai disiplin, inovasyen enggau komitmen timpuh panjai ke udah mantu pemansang menua nya.

Ku iya, dalam dunya ti betapi enggau geopolitik ti enda tentu, pemar rentayan bekal global, transisyen kuasa enggau transformasyen digital ti jampat, Malaysia tetap komited nyendiaka rampa dagang ti entap, terang sereta mesra pemeranak puku.

“Perintah MADANI deka terus ngenegapka daya besemekih menua nengah atur pengawa ti manah, pengelantang bejalaika pengawa dagang enggau pemansang ekonomi ti inklusif sereta meruan,” ku iya.

Berebak enggau nya, iya meda potensial besai dikena ngerembaika kerejasama Malaysia-Jepun dalam sektor strategik nyengkaum kuasa tau dikena baru, teknologi gadung, pemintar tiru (AI), infrastruktur digital enggau pengawa ngaga barang beteknologi tinggi.

Lebuh nyimpul jaku iya, Fadillah mantaika pengandal iya jemah ila deka lebih manah ngagai menua enggau gerempung ti berani nempa pengarap, ngenegapka kerejasama sereta nyingkang ke mua enggau chara kolektif ari ti semina meri reaksyen ngagai ubah.

Iya ngarapka kaul rat entara Malaysia enggau Jipun deka terus ditegapka agi dikena nempa pengelantang ti meruan agi, tan sereta meri penguntung ngagai rayat kededua menua ungkup rebak dudi. – RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 4 Jun – Dua bengkah tanah berenyang ti lemi diripotka nyadi di Sabah enggau Sarawak kena 2 Jun tu tadi, enggau getar diasai ba sekeda endur besemak enggau palan penusah nyadi, nitihka penerang ari Opis Meteorologi Malaysia (MET Malaysia).

Ketuai Direktor MET Malaysia, Dr Mohd Hisham Mohd Anip madah, tanah berenyang keterubah enggau magnitud 2.9 nyadi di Ranau, Sabah pukul 10.36 pagi enggau penalam 10 kilometer.

Nitihku iya, tanah berenyang nya bepalan ba latitud 6.07 darjah Utara enggau longitud 116.58 darjah Timur, seraya tanah berenyang mega diasaika ba sekeda kandang endur ngelingi Kundasang, Ranau enggau Kota Belud.

Ba hari ke sama, siti agi tanah berenyang lemi enggau magnitud 2.9 enggau penalam 10 kilometer dirikod ba kandang menua Mambong, Sarawak urung pukul 10.33 malam.

Tanah berenyang nya bepalan ba latitud 1.32 darjah Utara enggau longitud 110.39 darjah Timur, enggau getar mega diripotka diasaika ba sekeda kandang endur ngelingi Samarahan enggau Serian.

Taja pia, MET Malaysia nerangka mensia mayuh enda ibuh irau laban kededua tanah berenyang nya ngembuan magnitud ti lemi sereta enda ngeruga pengelikun mensia mayuh.

Ku iya, piak iya deka terus matau gaya menua tu lalu deka ngeluarka gerah ari setiap maya enti bisi pengerambai baru nyadi.

Mensia mayuh dilalau ngulihka penerang ke tulin pasal gaya hari enggau tanah berenyang nengah aplikasyen myCuaca, laman web rasmi enggau saluran media rama rasmi MET Malaysia, kelimpah ari betanya ngagai Talian Hotline 1300-22-1638 ungkup tanya ke silik agi. – RBI

#ruaiberitaiban#newsiban#beritaiban

Rindu | Titih | Kunsika

SIBU, 4 Jun – Pesaka main asal ti majak diintu sereta dikemeranka mayuh bengkah komuniti etnik di Sarawak nyadi aset ti berega tinggi ti ukai semina mandangka identiti rayat nengeri tu, tang mega bisi potensial nyadi pematak temuai besai ba renggat antarabansa.

Menteri Dagang Temuai, Seni enggau Main Asal, Dato Sri Tiong King Sing madah, penyelai budaya ke agi idup, dikerindu sereta diturun ari serak siti ngagai serak siti penegap penyelai menua Malaysia ti patut ditan sereta dikemeratka ngagai dunya.

Nitihku iya, pengerami ngintu Hari Gawai nyadi siti ari pelasar ke pemadu manah dikena meri kelala pengaya adat, main asal enggau jalai pengidup komuniti Dayak ngagai temuai menua tu enggau antarabansa nengah peneleba budaya ke tulin.

Iya madah munyi nya lebuh ngulu pengerami ngintu Hari Gawai begulai enggau komuniti di Rumah Panjai Esther Anak Patrick Jaya sebedau nampung penemuai ngagai Rumah Bolbo Kamat ak Ubong enggau Rumah Bunsie ak Tiboh.

Ku iya, taja genap rumah panjai ngembuan penyelai enggau gaya kediri empu, tang semengat ke dibantaika tetap sama iya nya begulai, angkunka pesaka budaya enggau beterima kasih ke nyadi tiang pemun pengerami Hari Gawai.

Penemuai nya mega disempulang Ouyang Yujing enggau Madam Song Xiao Mei, kelimpah ari temuai antarabansa, penyereta program pejalai media FAM Trip enggau bala ketuai komuniti menua nya.

Rambau penemuai nya, bala temuai bepeluang meda pengawa miring sereta ngasaika pengelantang komuniti rumah panjai ti nerima penatai sida enggau penuh adat sereta budaya, lalu enggau nya meri peneleba ke dalam senentang pengidup enggau pesaka asal komuniti Dayak.

Ku Tiong, penerang terus ngagai budaya menua tu ulih nyungkak pemereti ati temuai pasal penyelai Sarawak, kelimpah ari ngenegapka penuduk nengeri tu nyadi palan dagang temuai budaya ke tebilang di pelilih menua tu.

Iya mega nerangka Hari Gawai nyadi kelai penyerakup enggau pengelantang komuniti pupu bansa ti nyadi penegap menua Malaysia, kelimpah ari ti ngayanka pesaka main asal agi mengkang relevan dalam arus pemansang moden.

Lebuh nyimpul penemuai nya, iya bisi ngenataika jaku Hari Gawai ngagai selampur komuniti Dayak, ngarapka semengat beserakup, pengelantang terus ngerembai ba rayat.

“Gayu Guru Gerai Nyamai, Lantang Senang Nguan Menua.” ku iya. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 4 Jun – Pengerami Gawai Dayak 2026 di Annah Rais, Padawan ukai semina nyadi palan endur ngerami main asal komuniti Bidayuh Biannah, tang mega nyadi pelasar meri kelala pesaka asal menua tu ngagai temuai enggau komuniti luar.

Sapit Menteri Perengka Pengangkut Sarawak ke mega Kaban Kunsil Nengeri (ADUN) Mambong, Datuk Dr Jerip Susil madah, pengawa ngaul mayuh bengkah piak nyengkaum sektor korporat dalam program komuniti ulih ngenegapka kaul rama sereta muka peluang ke besai agi dikena ngelakuka Annah Rais nyadi palan dagang temuai budaya betikas antarabansa.

Iya madah munyi nya lebuh ngulu pengerami ngintu Gawai Dayak 2026 ti bela diintu enggau pengawa ngatur program Kampung Takeover ulih Coca-Cola di Annah Rais, empai lama.

Pengerami ti richah nya ngempuruka komuniti lokal begulai enggau bala temuai ari mayuh bengkah kandang menua dalam gaya ti penuh enggau semengat begulai enggau orang bukai, lalu enggau nya ngayanka penyelai budaya komuniti Bidayuh Biannah ti mengkang dijaga nyentuk ke sehari tu.

Bemacham aktiviti budaya enggau main asal udah diatur sepemanjai program nya nyengkaum pengawa mandangka seni pesaka, pemandang budaya enggau aktiviti komuniti ti mantaika identiti enggau penyelai komuniti menua nya.

Penatai mayuh temuai nyata ngayanka Annah Rais terus nyadi entara palan ti dikerindu endur ngintu pengerami Gawai ti bepelasarka budaya enggau pesaka asal.

Berebak enggau nya, Datuk Dr Jerip nyemetak madahka pengerami Gawai ukai semina nyadi pengerami ngetau aja, tang nyadi pelasar beguna dikena ngetan, ngenegap sereta ngelakuka adat enggau main asal komuniti ngagai rebak baru ngambika pesaka asal nya terus meruan relevan sereta dipebasaka.

Sama bisi datai Julius Scott Sapong enggau seraban ketuai komuniti enggau ketuai raban bansa ari kandang menua Biannah Biya.

Pengerami nya sekali agi ngayanka pesaka asal, penyerakup komuniti enggau kerejasama ari mayuh bengkah piak terus nyadi batang penegap dalam negika identiti penyelai Sarawak ba panggau ke besai agi. – RBI

#ruaiberitaiban#newsiban#beritaiban

Rindu | Titih | Kunsika

BETONG, 4 Jun — Sapit Premier Sarawak, Datuk Amar Douglas Uggah Embas begulai enggau bini iya, Datin Amar Dato Doreen Mayang ngatur penemuai Ngabang Gawai Dayak 2026 nengah ngulu pengerami rumah tebuka sereta ngabas sekeda rumah panjai ba kandang menua Betong enggau Ulu Paku.

Keterubah iya ngulu Pengerami Rumah Tebuka Gawai Dayak 2026 ke diatur Sapit Menteri Pemansang Nembiak, Lumba enggau Orang Dagang Sarawak Datuk Gerald Rentap Jabu ke mega Kaban Kunsil Nengeri ( ADUN) N.36 Layar,, begulai enggau Kaban Parlimen Betong, Dato Dr Richard Rapu ba Dewan Lumba Main SJK(C) Chung Hua Betong.

Pengerami ti richah nya ngempuruka mensia mayuh ari genap serak pengidup enggau pupu bansa ti bisi datai ngintu Hari Gawai Dayak ti penuh enggau pengerami, pengelantang sereta semengat beserakup.

Uggah udah nya ngepunka siri penemuai ngabang iya ngagai kandang menua Ulu Paku enggau ngulu pengerami rumah tebuka ba Rumah Panjai TR. Mendit Unsu, Penom.

Penatai iya begulai enggau raban iya disambut enggau manah peranak menua nya sereta temuai ke bisi datai, lalu enggau nya mandangka semengat diri sebilik ke nyadi teras pengerami Gawai Dayak.

Iya lalu neruska penemuai iya ngagai Rumah Panjai TR. Rumah Guang Sabai di Nanga Paun, Ulu Paku.

Program tu meri awak ngagai iya begulai sereta begulai terus enggau peranak menua nya dalam pengerami ti chukup richah.

Siri pengawa ngabang terus ngagai Rumah Panjai TR. Jame Ungot di Lubok Kelampu sebedau iya nemuai ngagai Rumah Panjai TR. Augustine Unjah di Jukun, Ulu Paku.

Penemuai nya ukai semina ngerichahka agi pengerami Gawai Dayak, tang mega nyadi pelasar beguna dalam ngerapitka kaul ketuai enggau rayat sereta ngerapitka semengat beserakup entara komuniti.

Tradisyen ngabang ti majak ditan ninting kali musim pengerami Gawai Dayak mandangka penyelai budaya komuniti Sarawak ti ngemeratka nilai pemanah ati, pemereti ati enggau begulai, setipak enggau aspirasyen perintah nengeri ngetanka pengelantang enggau penegap rama di Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BAU, 3 Jun — Polis ngetan dua iku lelaki peranak menua nya beumur 28 enggau 40 taun dalam operasyen ngelaban pengawa salah guna dadah ti dipejalaika ngelingi pelilih menua nya lemai tu tadi.

Ketuai Polis Pelilih Bau, Superintenden Mohd Haide A. Rahman madah, kededua saspek nya ditan urung pukul 3 lemai ari Bagi Tasat Jenayah Narkotik (BSJN) begulai enggau raban Bagi Nagang Penyalah enggau Pengelikun Komuniti (BPJKK) Indu Opis Polis (IPD) Bau ba jalai Simpang Tonga Krokong enggau ba Opis BSJN Bau.

Nitihku iya, asil peresa tisih ai kemi keterubah tetemuka kededua saspek positif dadah.

“Berindik ari nya, dua iku lelaki ke bisi kaul nya udah ditan lalu dipansik ari baruh Seksyen 15(1)(a) Akta Dadah Berbahaya 1952 laban dipelabaka bisi kaul enggau penyalah makai dadah,” ku iya nengah penerang media sehari tu tadi.

Iya nyemetak madahka Polis DiRaja Malaysia (PDRM) enda belembut ba sebarang aktiviti salah guna dadah lalu deka terus chakah agi bejalaika operasyen dikena ngelaban penyalah nya.

Berindik enggau nya, mensia mayuh ke bisi penerang bekaul enggau aktiviti dadah dipinta ngenataika penerang nya ngagai polis nengah Talipun Hotline Opis Siasatan Jenayah Narkotik (JSJN) Bukit Aman ba lumur 012-208 7222 tauka Talipun Hotline Indu Opis Polis Kontinjen (IPK) Sarawak ba lumur J729S J729S.

“Kerejasama komuniti beguna amat dalam mantu raban polis ngelaban pengawa salah guna enggau bedagangka dadah ungkup pengelikun enggau pengelantang komuniti,” ku iya. – RBI

#ruaiberitaiban#newsiban#beritaiban

Rindu | Titih | Kunsika

KANOWIT, 3 Jun — Semengat beserakup, diri sebilik enggau kerejasama ti nyadi tulang belakang pengidup komuniti rumah panjai majak ditegapka nengah pengerami Gawai Dayak ti diintu enggau naka pengerami ba Rumah Maling ak Nyapang, Sungai Maong, Jalai Kanowit-Durin.

Tuai Rumah, Maling ak Nyapang madah, pengerami Gawai tu ukai semina pengerami ninting taun ke tanda terima kasih pengudah tembu musin ngetau, tang mega nyadi pelasar beguna dikena nyerakupka komuniti, ngerapitka kaul diri sebilik sereta nentuka adat pesaka asal aki ini terus diintu.

Nitihku iya, semengat begulai ti dipandangka peranak sepemanjai pengawa ngatur pengerami taun tu nyata ngayanka nilai penyerakup enggau semengat kerejasama ti tegap dikemeranka dalam pengidup komuniti rumah panjai.

“Gawai nyadi maya ke pemadu manah ngagai semua diri sebilik ke bisi di luar begempuru enggau diri sebilik sereta komuniti.

“Nengah pengerami ke baka tu, kaul menyadi ulih ditegapka agi seraya adat enggau budaya komuniti Dayak ulih terus diturun ngagai rebak baru,” ku iya.

Iya mega meri besai terima kasih ngagai komitmen enggau kerejasama semua peranak ti ngemujurka pengerami nya ngambika bejalai enggau lanchar sereta richah.

Pengerami ke diatur Komiti Pemansang enggau Pengelikun Genturung Pendiau (JKKK) Rumah Maling nya mujur matak penyereta lebih 500 iku peranak menua nya sepemanjai tiga hari pengerami nya diatur.

Bemacham aktiviti bisi diatur dikena ngerichahka agi pengerami nya, nyengkaum pekit Engkeratong, bertaboh, Pekit Kumang enggau Keling, pekit belagu, pemerindang ke bukai enggau chabut tikit benasit ti diterima enggau manah peranak enggau temuai.

Muak ke tengahari, bemacham lumba enggau main asal baka batak tali, ngena basikal pemadu lubah, bejalai ngena batu bata enggau pekit makai mee, mega bisi diatur dikena meransang penyereta ari semua renggat mensia mayuh enda ngira tikas umur.

Pekara ti pemadu dikerinduka iya nya diteruska enggau pengawa Ngabang Gawai enggau Niti Daun ti nyadi kelai ti beguna dalam main asal komuniti Iban, lalu enggau nya nambahka pengerami pengerami.

Sama bisi datai ngerichahka agi pengerami nya, Henry ak Jugah, Ketuai Pemadah Parti Pesaka Bumiputera Bersatu (PBB) Pampang Machan, begulai enggau bala ketuai komuniti, ketuai raban bansa enggau peranak ari kandang menua ngelingi.

Pengerami ke diatur dalam gaya pengelantang enggau sepenemu nya terang mandangka penegap institusyen rumah panjai nyadi palan nyerakupka komuniti, kelimpah ari nyadi pelasar pemadu manah dikena ngetanka identiti enggau pesaka asal komuniti Dayak ungkup rebak dudi hari. -RBI

#ruaiberitaiban#newsiban#beritaiban

Rindu | Titih | Kunsika

KANOWIT, 3 Jun – Lebih 200 iku peranak ngulu Pengerami Rumah Panjai Baru Kaban Kunsil Nengeri (ADUN) Machan di Bukong.

Ex-Menteri Muda Pemansang Tanah Sarawak, Dato Sri Gramong Juna, dalam jaku dipansutka iya minta peranak di kandang menua Machan terus beserakup sereta bekerejasama nentuka pemansang ulih diasai belama tetiap rumah panjai enggau komuniti menua nya.

Nitihku iya, semengat beserakup enggau kerejasama entara peranak nyadi kunchi besai dalam ngenyampatka penyulut sereta ngangkatka tikas pengidup komuniti menua pesisir.

Iya mega ngingatka peranak ngambika seruran beterima kasih ngagai bemacham perengka guna enggau projek pemansang ke udah disalur pengari rayat sitak Machan.

Entara pemansang ke diasaika rayat nyengkaum bekal kuasa karan, ngaga enggau ngemanahka jalai alun, Projek Transformasyen Menua Pesisir (RTP) enggau agih belanja Projek Mit Menua Pesisir (MRP) ke besai meri penguntung ngagai peranak menua nya.

“Kerejasama enggau sukung rayat beguna amat dikena nentuka mayuh agi pemansang ulih dibai ngagai sitak Machan jemah ila,” ku iya.

Sama bisi datai Datin Sri Dato Catherine Gramong, ADUN Machan Allan Siden Gramong, Pemancha, Pengulu, kaban Kaunsil Pelilih Kanowit, bala ketuai opis perintah enggau peranak ari ngelingi kandang menua DUN Machan.

Pengerami nya ukai semina kelai pindah ngagai rumah panjai baru, tang mega mandangka komitmen perintah ti seruran bebendar mai pemansang enggau pengelantang ngagai rayat di menua pesisir. – RBI

#ruaiberitaiban#newsiban#beritaiban

Rindu | Titih | Kunsika

LINGGA, 3 Jun – Operasyen ngiga enggau nyelamat (SAR) siku lelaki ke lenyau pengudah perau ke ditepan iya karam di Sungai Banting tembu lemai tu tadi lebuh iya ditemu lesi.

Tudah tu iya nya, Gerald Lansam, 42, ditemu peranak rumah panjai urung pukul 4.10 lemai, urung 300 meter ari Pos Kawalan Bomba (PKB) ke ditumbuhka ba palan operasyen nya.

Penemu nya ngujungka pengawa ngiga ke udah masuk hari kedua kenyau ari iya diripotka lenyau ba penusah perau karam Sungai Banting kemari.

Nitihka penerang ari Palan Operasyen (PGO) Opis Bomba enggau Penyah Penusah Malaysia (JBPM) Sarawak, hari kedua operasyen SAR berengkah tumu pukul 7 pagi enggau tujuh iku kaban ari Balai Bomba enggau Penyah Penusah (BBP) Sri Aman betuaika Komander Operasyen, PBK I Mohd Fadhli Buyong, berumban ngagai palan deka bejalaika pengawa ngiga tudah.

Lebuh datai urung pukul 8.30 pagi, raban penyelamat numbuhka palan ngiga sebedau ngepunka operasyen ba kandang endur kepenudi iya dipeda enggau radius ngiga satu kilometer.

Operasyen nya udah nya dikerembaika ngagai kandang endur di ili sungai nyentuk lima kilometer ari kandang endur ngiga dikena nambahka peluang ngiga iya.

Pengawa ngiga nya mega nerima kerejasama ari mayuh bengkah ejensi nyengkaum Polis DiRaja Malaysia (PDRM), Raban Penyaga Orang Periman Malaysia (APM) enggau Unit K9 JBPM.

Kelimpah ari nya, bisi 25 iku peranak rumah panjai enggau tujuh buah perau mega begempung mantu bejalaika operasyen sepemanjai hari nya.

Ngalih hari, pengawa ngiga dipejalaika enggau chakah agi enggau bantu ukui ari Unit K9 ba kandang menua ili sebedau tudah pengujung iya ditemu peranak rumah panjai.

Tubuh tudah udah nya diserah ngagai polis ngambika atur ke bukai dipejalaika, seraya operasyen SAR tembu abis urung pukul 4.30 lemai atas perintah Ketuai Balai Polis Lingga.

Ba penusah ke nyadi kemari, perau ke ditepan semilan iku individu nya diripotka rusak injin sebedau melintang ba tiang jematan lalu tepawah ketegal arus sungai ke deras.

Lapan iku orang nepan ke bukai mujur diselamatka peranak rumah panjai ngena perau, lalu Gerald diripotka mujur bepaut ba tiang jematan sebedau tengelam lalu ditabanka arus ai. – RBI

#ruaiberitaiban#newsiban#beritaiban

Rindu | Titih | Kunsika

JOHOR BAHRU, 3 Jun — Siku indai ke agi biak umur ngaku salah ba Kort Sesyen ditu sehari tu ba dawa enda sengaja ngujungka pemidang siku ari anak sapit iya ke baru ada bulan nyin tadi.

Orang ke dituduh, Nuran Batrisya Jamaludin, 22, mansutka pengaku nya pengudah dawa dibacha ba mua Akim Mohd Zamir Suhaimee.

Bepelasarka dawa nya, indu nya didawa ngujungka pemidang anak mit indu enggau niat deka ngemediska tubuh ti nyangka tau ngujungka pemidang.

Penyalah nya dipelabaka dikereja ba palan entepan kerita Blok Rajawali, Program Flat Perumahan Rakyat (PPR) Melana Indah Fasa 2, Taman Sutera Utama, entara pukul 11 ​​pagi enggau 2.30 lemai kena 20 Mei tu tadi.

Orang ke dituduh nya didawa ari baruh Seksyen 304(a) Kanun Keseksaan ti nyendiaka ukum jil nyentuk 30 taun sereta ulih diukum mata duit enti dikenuku salah.

Dulu agi ari nya, Sapit Pendawa Raya R. Nevina nadai meri sebarang jamin ungkup orang ke dituduh. Taja pia, indu nya ke agi bujang sereta nadai kereja minta jamin enggau dalih iya begunaka pengawa ngintu anak besapit iya ke agi idup sereta bisi tanggungpengawa diri sebilik.

Kort udah nya ngemendarka orang ke dituduh nya diberi jamin RM20,000 enggau dua iku penyamin, kelimpah ari ngeletakka sekeda syarat tambah nyengkaum nyerahka pasport iya ngagai kort, ngeripot ngagai balai polis ke semak ninting bulan sereta enda ngachau sebarang saksi pendakwa.

Kot netapka 3 Julai nyadi haribulan kes nya disebut baru ungkup tuju nganjung dokumen sereta mutuska ukum.

Sebedau tu, media ngeripotka polis udah ngetan siku indu peranak menua nya ke dipelabaka nikauka anak mit indu ari ringkat 10 sebuah flat.

Pemangku Ketuai Polis Johor, Sapit Pesuruhjaya Hoo Chuan Huat madahka, piak iya nerima ripot bekaul enggau penemu tubuh anak mit nya ba palan entepan kerita flat nya urung pukul 2.40 lemai.

Nitihku iya, saspek ke nyadi indai kandung anak mit nya ditan urung pukul 12 tengah hari ba pelaman Sepital Sultanah Aminah (HSA), Johor Bahru, dikena mantu tasat. – RBI

Kredit TVS

#ruaiberitaiban#newsiban#beritaiban

Rindu | Titih | Kunsika