GEORGE TOWN, 24 Mac — Polis udah mujur nangkap dua iku individu pengudah seduai iya dipelaba bisi kaul ngereja pengawa enda menuku ba sebuah pendam di Batu Gantung, Air Itam, apin lama ke udah.

Ketuai Polis Pelilih Timur Laut, ACP Abdul Rozak Muhammad madahka, piak iya nerima ripot ari siku lelaki peranak menua nya ke beumur 69 taun bekaul enggau video ke viral ba media rama ke ngayanka sepasang lelaki enggau indu ngereja pengawa ke enda menuku ba sebuah pendam Cina.

Ku iya, pansik tumu mandangka penusah nya nyadi kena 22 Mac, enggau kededua individu ke bisi kaul dipelaba peranak menua nya.

“Saspek keterubah iya nya siku indu beumur 37 taun ditangkap kemari urung pukul 8.35 malam ba sebuah flat semak Jalai Padang Tembak, ditu.

“Saspek kedua, siku lelaki beumur 58 taun, ditangkap ba hari ke sama urung pukul 11.10 malam ba mua sebuah begunan semak Jalai Paya Terubong, Bayan Lepas, semak ditu,” ku iya nengah sebengkah penerang sehari tu tadi.

Ku Abdul Rozak, kededua saspek ngaku bisi kaul enggau pengawa enda menuku nya lalu ditan riman pengelama tiga hari berengkah sehari tu nyentuk 26 Mac dikena mantu pansik ke silik ari baruh Seksyen 294(a) enggau Seksyen 509 Kanun Keseksaan sereta Seksyen 233 Akta Komunikasi enggau Multimedia 1998.

Sebedau tu, video pengelama 38 saat udah viral ngayanka sepasang lelaki enggau indu ngereja ulah ke enda menuku ba sebuah pendam, lalu nya dirikod siku indu ke mega ngerara seduai nya, ngelalau iya deka ngeripot ngagai polis. — RBI

Sumber, — Bernama

BETONG, 24 Mac – Sesi meri penerang pasal projek ngaga selepat tanah tusur pemanjai 150 meter di belakang Rumah Jilan, Kerapa Spak udah diatur sehari tu dikena mutarka isu tusur enggau pengelikun ba kandang rumah panjai nya.

Kelimpah ari pengawa ngaga selapat nya, projek tu mega mungkur pengawa ngaga parit semin pemanjai 150 meter enggau pelaman semin pemesai 10 kaki ba belakang rumah panjai dikena ngenegapka sistem parit enggau perengka guna peranak.

Projek tu dikearapka ulih ngangkatka pengelikun peranak Rumah Jilan, Kerapa Spak sereta ngurangka risiko tanah tusur ba kandang menua nya.

Injinir Bagi Menua Opis Kereja Raya (JKR) Betong, Jason Ng Boon Tuan madah, projek nya dipelaba deka ditinda dalam bulan April 2026 enggau timpuh dipejalaika empat bulan pengudah kereja berengkah.

Pekara tu dikenataika lebuh penemuai Sapit Menteri Pemansang Nembiak, Lumba enggau Orang Dagang Sarawak ke mega Kaban Kunsil Nengeri (ADUN) N.36 Layar, Dato Gerald Rentap Jabu, begulai enggau Kaban Parlimen P.204 Betong, Dato Dr Richard Rapu @ Aman Begri, ti udah ngabas endur nya sereta mendingka penerang.

Sama bisi datai Superintenden Morris Nayub ari Opis Tanah enggau Survei Bagi Menua Betong, Injinir JKR Steward Ludan, Pemesai Unit Komunikasyen Mensia Mayuh Sarawak (UKAS) Tony Malang, Pemanca Norman, Kaunsilor Horace Entoi sereta mega pemesai ari ejensi ke bekaul. – RBI

Kredit Betong Xcess

SIMANGGANG, 24 Mac – Kaban Kunsil Nengeri (ADUN) sitak Simanggang, Datuk Francis Harden Hollis ke mega Sapit Menteri Pemansang Bakat Sarawak udah bejalaika pengawa ngabas palan Projek Jematan Semin ti meraka Sungai Undop di Kampung Beleti, Sabu, pagi tadi.

Penemuai nya betuju beratika baru asil kereja projek sebedau proses nyerah ari kunteriktor ngagai Opis Kereja Raya (JKR) Bagi Menua Sri Aman, ke nyadi ejensi bejalaika pengawa, seraya Ejensi Pemansang Sri Aman (SADA) nyadi penerima.

Projek ke beungkus RM5 juta ti dipejalaika ROSBEN Holding Sdn Bhd udah tembu penuh lalu diatu udah dibuka ngagai mensia mayuh.

Jematan semin nya dipelaba meri penguntung ngagai 14 pintu ruang bilik ari baruh kandang endur Kampung Beleti, lalu enggau nya ulih ngemanahka akses enggau penyambung ungkup peranak menua nya.

Sama bisi datai rambau penemuai nya, pemesai ari mayuh bengkah ejensi nyengkaum Opis Tanah enggau Survei, JKR Sri Aman, SADA sereta mega pengari kunteriktor enggau konsultan projek. – RBI

LUNDU, 24 Mac — Tikas ai Sungai Batang Kayan di kandang menua ulu sungai diatu ba tikas ti balat endar ngeruga proses ngambi ai mata ba Loji Meresi Ai (Acute) Batang Kayan.

Nitihka penerang ba laman Facebook Kaban JBALB Pelilih Lundu, loji nya agi beoperasyen tang semina enggau penyampau urung 75 peratus ari kapasiti penuh iya, iya nya urung 4 juta liter sehari.

“Gaya tu udah meri penanggul ba proses ngambi ai mata ungkup tuju perubat, lalu enggau nya ngeruga pengawa ngasilka bekal ai,” ku penerang nya.

Berindik ari nya, penguna ba kandang endur ke tinggi baka Kampung Sebandi, Bukit Papan, Gerunggang, Sungai Langgir enggau Selenggok disadang napi peneras ai ke baruh tauka penanggul bekal ai.

“Gaya tu disadang ngasuh peneras ai baruh tauka bekal ai tejanggal, kelebih agi ba kandang endur ke tinggi,” ku penerang nya.

Dikena ngurangka empas ngagai peranak, piak ke bekaul udah nyendiaka tangki ai sereta udah sedia nganjung bekal ngagai kandang endur ke kena bungkur enti diguna.

“Berebak enggau nya, mensia mayuh dilalau ngena ai enggau bekelimat sereta ngemeranka pengawa ngintu ai sepemanjai timpuh musim panas” ku penerang nya.

Ungkup rikod, Loji Meresi Ai Batang Kayan (Acute) iya nya loji sementara ti beoperasyen nyentuk ke tembu Loji Meresi Ai Lundu Baru enggau kapasiti 20 juta liter sehari di Kampung Sedaing, Lundu, ti deka ngena ai mata ari Sungai Jangkar.

Pengawa ngaga loji tauka tekat ai tetap ba endur ke diatu mega ditemu enda engkeman ketegal bisi palan muai uras baru ke diempu kaunsil ke diatu benung digaga ba kandang ulu stesyen ‘muka sauk’ nya.

“Semua penusah ke udah nyadi amat dikesal lalu kerejasama semua piak dalam napi gaya tu amat diberi basa” ku penerang nya. — RBI

SERIAN, 24 Mac – Pekit main bol tebuka lelaki berebutka Trofi Datuk Sri Richard Riot Jaem deka sekali agi ngerichahka arena lumba enggau main menua tu lebuh iya diperambu diatur kena 26 April di Kampung Pichin.

Pekit ke diatur Kaban Parlimen P.199 Serian nya dibuka ngagai 32 tim keterubah, enggau bayar RM450 nyengkaum deposit RM300, seraya haribulan kepenudi ngerejista diri ditetapka kena 12 April.

Pengawa tu ukai semina nyadi pelasar dikena tetemuka penau baru dalam main bol, tang mega ngerapitka kaul komuniti lokal nengah pengawa lumba enggau main sereta pekit ti bepengerai.

Raban pengatur mega bisi meri perais ke besai ngagai pemenang, ke alai champion mai pulai perais mata duit RM4000, lumur dua RM2000 enggau lumur tiga RM1000, tiap iku disempulang enggau trofi enggau midul.

Mensia mayuh ti bisi ati deka nyereta tauka ngiga penerang silik tau betanya ngagai sekretariat ti udah disediaka, seraya proses nyabut undi deka diatur kena 19 April tu ila.

Pekit tu dikearapka ulih matak penyereta mayuh ari ngelingi Serian enggau kandang menua ke besemak, lalu enggau nya ulih meransang agi aktiviti lumba enggau main komuniti ba renggat baruh. – RBI

KUCHING, 24 Mac — Sepenyampau 29 projek ngaga jematan diatu benung chakah dipejalaika Opis Kereja Raya (JKR) Sarawak di serata nengeri, ti mungkur Bagi Menua Kuching, Serian, Sibu, Kapit enggau Miri, nyadi singkang strategik dikena ngenegapka pemansang menua pesisir.

Pengawa bejalaika inisiatif tu ngemeratka pengawa nambahka akses, pengelikun enggau penyambung entara komuniti.

Pengawa nya ukai semina ngemudahka pemindah peranak ninting hari, tang mega ngenyampatka akses ngagai perengka guna asas baka pelajar, servis pengerai enggau aktiviti ekonomi kandang menua.

JKR Sarawak ngemeratka komitmen ti seruran dikena nentuka tetiap projek dipejalaika nitihka stantard teknikal ti udah ditetapka, kelimpah ari dipatau enggau silik dikena nentuka kualiti enggau pengetan infrastruktur ungkup pengelantang rayat.

Setipak enggau aspirasyen pemansang nengeri tu, pengawa bejalaika projek tu dikearap ulih nyadi penyungkak ngagai penumbuh sosioekonomi ti lebih inklusif sereta meruan di menua pesisir Sarawak. — RBI

KUALA LUMPUR, 24 Mac — Opis Menteri Pengerai Malaysia (KKM) nyemetak madahka nadai dikelaung ba pengawa nagang nginsap ari baruh Akta Kawalan Produk Merokok Demi Kesihatan Awam 2024 (Akta 852), nyengkaum ngaul pengereja pengawa perintah.

Penerang nya berindik ari siti kes ke nyadi viral ba media rama ti madahka siku individu benung nginsap ba sebuah premis pemakai di Rawang kena 23 Mac tu tadi.

Nitihka KKM, pansik tetemuka individu ke bisi kaul nya siku pengereja pengawa perintah ti gawa ba Opis Pengerai Pelilih Menua (PKD) Gombak.

Berindik ari nya, kompaun dikeluarka ari baruh Seksyen 16(2) Akta 852 ketegal nginsap ba premis pemakai.

Kelimpah ari atur kompaun nya, KKM mega madahka atur disiplin deka diambi nitihka atur servis mensia mayuh dikena nentuka integriti staf seruran dijaga.

KKM nyemetak madahka premis pemakai entara 28 kandang endur ke ditagang endur nginsap ke udah digazet, lalu sebarang pengawa ngelanggar deka diambi atur enggau nadai belembut.

“Nyadi ejensi ke tebilang dalam pengerai mensia mayuh, Opis Menteri Pengerai komited bejalaika penerit atur ti terit, adil sereta konsisten dikena nyaga mensia mayuh ari kena pansa asap insap,” ku penerang nya.

Berebak enggau nya, Opis Menteri Pengerai minta mensia mayuh terus nitihka undang-undang sereta ngenataika penerang tauka sebana nengah jalai rasmi dikena ngenegapka pengawa neritka atur ungkup pengelantang begulai. – RBI

KUALA LUMPUR, 24 MAC — Opis Menteri Wang Malaysia (MOF) ngambi perati enggau berat bekaul enggau pengerembai video ba laman rama ti mandangka siku individu ngisi petrol RON95 ngagai tong puang ba sebuah stesyen minyak.

KUCHING, 23 Mac – Perambu penuduk tambah ari baruh pengawa ngemesaika Dewan Undangan Nengeri Sarawak apin lama ke udah, ari 82 ngagai 99 deka diputuska Komiti Pengawa Bepilih (SPR), ti ngembuan kuasa kepenudi nentuka adan pengudah bejalaika pansik ba renggat baruh enggau runding mensia mayuh.

Berebak enggau nya, Kaban Kunsil Nengeri (ADUN) Serembu, Datuk Miro Simuh madah, kelai tumu iya nya pengawa ngeluruska garis entara menua nya enti dipejalaika, nyangka agi ngaul kandang menua besemak baka Tasik Biru, Opar enggau Tanjung Datu ari Serembu.

Taja pia ku iya, sitak Kunsil Nengeri (DUN) Serembu enda disadang tekeruga ketegal proses ngaga garis entara ke benung dipejalai dikena nentuka sebarang perambu penuduk baru ba kandang menua Bau.

Miro mega nyemetak madahka sebarang perambu ubah deka nitihka proses ke patut sereta nyengkaum berunding enggau raban ke bekaul sereta mensia mayuh.

“Bepelasarka utai ke diperetika naka ke diatu, Serembu enda tentu deka kena pangka pengawa ngaga garis entara menua nya.Taja pia, kandang menua baka Tasik Biru, Opar enggau Tanjung Datu suah agi kena pangka nyema bisi ubah.

“Enti pekara nya nyadi, sebagi ari kandang menua Tanjung Datu nyangka deka diambi seraya sebagi ari kandang menua di Opar deka dipasukka ba penuduk baru nya,” ku iya.

Ku Miro nerang, sebarang pemutus bekaul enggau pengawa numbuhka penuduk baru di Bau bedau diputuska. Proses nya agi benung dipejalai, lalu nadai utai udah dientaska.

“Taja pia, ba selampur, fokus dipeda lebih agi ngagai kandang endur ke ngembuan penumbuh penyampau tubuh enggau peminta pemansang ke tinggi agi,” ku iya.

Ku iya, Tasik Biru nyadi kandang menua ke jampat mansang ba pelilih Bau nyangka deka meda adan pengawa bepilih iya diseririska dikena nentuka pengari ke lebih seimbang.

Pia mega, Opar mega engka diperatika dalam pengawa nya ketegal faktor demografi enggau geografi.

Serembu empu diseraraka ari Bengoh maya pengawa ngaga garis entara menua ba taun 2015, lalu gaya nusun baru ke sebaka, ke alai pengawa ngeluruska garis entara menua tauka pechah tau nyadi dikena nempa penuduk baru, enda tentu.

Pengawa ngaga garis entara menua ke selalu dipejalaika SPR dikearapka ulih nempa garis entara pengawa bepilih sebedau pengawa bepilih nengeri tu ila.

Seraya Serembu nyangka mengkang enda kena empas, sebarang ubah ti ngaul Tasik Biru enggau Opar tauka indah Tanjung Datu agi ulih ngeruga rampa politik ti lebih luas di Bau.

Penerang ke silik agi disadang lebuh proses meresa nya datai ba renggat ke lebih maju. – RBI

LUTONG, 23 Mac – Beserimbai enggau pengerami Hari Raya Aidilfitri, Ketuai Balai Bomba enggau Penyah Penusah Lutong, PBT II Henry Anak Jugah, ngelalau semua ketuai komuniti enggau ketuai raban bansa (KMKK) dalam kandang menua dipegai BBP Lutong madah ngagai peranak ngambika enda betunuka chara tebuka ungkup ke diatu.

Ku iya, gaya hari ke angat diatu nambahka risiko angus, lalu dalam kandang beberapa hari ke udah, stesyen nya udah nyereta operasyen madamka api ba sekeda kes angus babas enggau lalang.

“Minta KMKK matau kandang menua sida empu ngambika ulih mantu kami,” ku iya.

Henry nambah, Balai Bomba enggau Penyah Penusah Lutong seruran matau ninting hari, baik nya maya siang tauka malam, dikena nentuka pengelikun peranak sereta nyeliahka penusah angus nyadi. – RBI