KABONG, 3 Jun – Pengirau ati sebuah ruang bilik di Kampung Hulu Lintang lebuh siku lelaki beumur 56 taun ti diripotka lenyau pengudah pansut ke kebun iya kena Hari Dua tu tadi ditemu selamat pagi tadi.
Tudah ke sebedau tu enda mujur pulai ke rumah pengudah nurun ke kebun iya di kandang menua Empeyong ditemu peranak rumah panjai ke sama enggau ngiga tudah.
Ketuai Bomba enggau Penyah Penusah Zon Tiga (Sri Aman), Muhammad Rais Adham Rosalan madah, piak bomba bisi nerima ripot pengelenyau iya urung pukul 7.20 malam Hari Dua tu tadi sebedau operasyen ngiga enggau nyelamat (SAR) diperambu dipejalaika ba hari siti.
Nitihku iya, operasyen SAR hari keterubah ti betuaika Ketuai Balai Bomba enggau Penyah Penusah (BBP) Saratok, PPgB Putra Ila udah dilanchar urung pukul 8.35 pagi.
Taja pia, sebedau operasyen nya ulih dipejalaika enggau penuh, tudah udah mujur ditemu selamat ulih peranak rumah panjai ti enggau begiga.
“Iya ditemu peranak rumah panjai selamat sebedau operasyen SAR ulih dipejalaika penuh.”
“Peresa keterubah tetemuka tudah dalam gaya ke manah sereta likun. Berindik ari nya, operasyen SAR ditangguh pukul 9.30 pagi,” ku iya.
Dipelabaka iya pansut kediri ngagai kebun iya di kandang menua Empeyong, tang enda pulai ke rumah baka selama, ti meri pengirau ati ngagai sida sebilik.
Penemu tudah ukai semina ngelantangka ati sida sebilik, tang mega disambut enggau terima kasih ari peranak rumah panjai ke udah begempung mantu pengawa ngiga kenyau ari ripot orang ke lenyau nya digaga.
Penusah nya sekali agi ngayanka semengat kerejasama enggau pengibuh komuniti menua nya ti seruran besedia mantu lebuh betapi enggau penusah ngenyit. – RBI
#ruaiberitaiban#newsiban#beritaiban
Rindu | Titih | Kunsika
