SRI AMAN, 2 Jun — Siku lelaki beumur urung 30 taun dikeirauka lemas pengudah perau ke ditepan iya diripotka pechah sebedau karam ba sungai semak Rumah Charang Banting, Lingga, sehari tu tadi.

Nitihka penerang ari Palan Operasyen (PGO) Opis Bomba enggau Penyah Penusah (JBPM) Sarawak, opis nya nerima kangau ngenyit bekaul enggau penusah nya urung pukul 1.15 lemai.

Bepelasarka penerang keterubah ke diterima, sebuah perau pechah lalu karam ba palan penusah ke nyadi, seraya siku dipelabaka lenyau sereta dikeirauka lemas.

Berindik ari nya, seraban raban ari Balai Bomba enggau Penyah Penusah (BBP) Sri Aman dianjung ngagai endur nya ngulihka penerang silik sereta bejalaika operasyen ngiga enggau nyelamat (SAR).

Operasyen nya betuaika Pemesai Kanan Bomba I (PBK I) Fadli Buyong lalu mungkur enam iku raban enggau pengering sebuah entukar Hilux enggau sebuah Unit Servis Penyelamat Perubat Ngenyit (EMRS).

Polis mega bisi ba endur nya mantu sereta ngatur operasyen nya.

Naka maya mansutka ripot tu, identiti penuh mansa bedau ditemu lalu operasyen SAR benung dipejalaika.

JBPM Sarawak madahka, pemansang ke bukai bekaul enggau penusah nya deka dipadah ari sesiti maya ngagai sesiti maya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Kredit Photo — Monica Midi

KUCHING, 2 Jun – Sapit Premier Sarawak, Datuk Amar Douglas Uggah Embas nerangka bantu ngagai komuniti Dayak beserimbai enggau pengerami Gawai udah lama diberi nengah bemacham inisiatif renggat baruh, nyengkaum nyendiaka babi ungkup tuju nupi jelu.

Nitih ku iya, bisi orang betanya nama kebuah pemeri chapi beserimbai enggau Hari Raya Aidiladha suah nerima perati, seraya bantu ngagai komuniti Dayak enda dikemeratka.

“Aku bisi ninga isu tu dibantaika. Bisi sekeda nanya nama kebuah aku bedau meri babi.

“Tang aku udah meri entara 200 ngagai 300 iku babi ba kandang menua aku ungkup ditupi,” ku iya.

Iya madah munyi nya lebuh dikerandau pengarang berita ba Pengerami Rumah Tebuka Gawai Dayak ba Kompleks Unit Pekara Jalai Pengarap Bukai (UNIFOR), ditu kemari.

Ku Uggah, banding entara pemeri chapi enggau bantu ngagai komuniti Dayak enda betul laban kededua ngembuan tuju enggau asal budaya ti bebida.

“Kitai nadai ngembuan pengawa baka ke dikemeranka orang Islam. Nya kebuah bisi sida ke enda nemu nama utai ke amat nyadi ba renggat baruh,” ku iya.

Penerang iya nya dipansutka berindik ari randau ke viral ba media rama pengudah ripot pasal pemeri 16 iku chapi ungkup pengerami Hari Raya Aidiladha.

Sekeda penguna media rama mandingka pemeri nya enggau bantu ke diberi ngagai komuniti Dayak sebedau pengerami Gawai.

Ngelansa pasal pekara nya, Uggah nyemetak madahka bemacham bansa bantu enggau program pemansang ungkup komuniti Dayak udah dipejalaika belama, nyengkaum sukung ngagai aktiviti ekonomi enggau betupi ti meri penguntung timpuh panjai ngagai peranak menua pesisir.

Iya mega ngingatka komuniti ngambika beratika sesebengkah isu bepelasarka fakta enggau gaya ke bendar ba palan nya, lalu ukai ngaga simpul penemu bepelasarka semina peragam ke dikerembaika ba media rama. – RBI

#ruaiberitaiban#newsiban#beritaiban

Rindu | Titih | Kunsika

Kenang pandak tu dikena ngading pengerami Hari Gawai Dayak ke diatur ba Rumah Kanyan anak Sudok di Nyalak Atas, Pakan nganyanka pengangkun ngetanka tradisi budaya enggau pesaka asal.

Pengerami nya dipunka ba pagi 31 Mei 2026 enggau pengawa beranchau tikai lalu ditangkanka betasak sereta beserumpu makai pagi ba ruai lima pintu, tuai gawai ke udah dichirika setiap taun pengerami.

Udah nya, ripih pengawa nangkan nya nyenupat enggau begendang rayah, sebagi ari pengawa madahka diri ngayan piring lalu nyampi Petara datai ngabang datai ngundang.

Bela didirika mega iya nya ranyai uti tauka ranyai Hari Gawai ba ruai ketuai pengerami ke bela diias enggau pua kumbu lalu bebuahka mayuh macham pemakai.

Ngilahka lemai, pengawa dua bengkah iya nya meri awak keterubah ngagai peranak ke ngemeranka pengarap Kristian besembiang Hari Gawai.

Udah tembu besembiang, nya baru awak peranak ke agi ngemeranka pengarap asal kitai berengkah miring ngayanka rengka.

Semua pengawa tu tadi endang iya bela digulu semua peranak rumah panjai ti ngayanka penyerakup.

Seraya nganti jam mangkung 12 tengah malam, peranak rumah panjai bisi ngantur pekit nampung pekit ke diatur maya siang hari sereta mega nyuaka perais enggau mega chabut tikit benasip.

Urung tengah malam, jam mangkung 12 pengawa nyeradakka ai pengayu diiring enggau timbak senapang enggau munyi gendang, ngerichahka pengerami tanda nyambut penatai 1 Jun hari besai ngagai komuniti Dayak.

Pengudah nyeradakka ai pengayu, peranak ke deka mandi ba sungai maya nya bisi nurun ke ai lalu ngemai piring dikena mandi lalu besampi minta bulih jereki, panjai umur, pengerai enggau betuah belimpah.

Udah nya pengawa ngabang niti ruai diatur nyentukka pagi dalam pengaga ati nyambut Hari Gawai Dayak.

Ba 1 Jun, endang tiap taun diatur iya nya pengawa nikika pengabang.Dia peranai ngeluluka diri nyadi pengabang lalu ditikika peranak ke nyambut temuai.

Chukup ngerinduka ati, maya tu mih semua ngepan asal Iban dibantai.

Pengawa bebuti mega siti ari chara ngenegapka penyerakup lalu diiri enggau penemu ambika semua pekara nyadi meruan.

Pengerami Gawai Dayak tu deka tembu diintu enggau pengawa ngiling tikai ti deka diatur nitihka perambu peranak menua nya. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 1 Jun — Pengerami Rumah Tebuka Gawai Dayak 2026 ke diatur ba Kompleks Unit Pekara Jalai Pengarap Bukai (UNIFOR) sehari tu mandangka semengat penyerakup enggau pengelantang ke nyadi tiang penegap komuniti pupu jalai pengarap di Sarawak.

Pengerami nya dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, begulai enggau Sapit Menteri Besai, Datuk Amar Fadillah Yusof, kelimpah ari digulu seraban ketuai perintah, ketuai raban bansa enggau raban bansa bukai.

Penatai Premier Sarawak disambut Sapit Premier Sarawak, Datuk Amar Douglas Uggah Embas nyadi Chairman Komiti Besai Gawai Dayak 2026 begulai enggau ketuai nengeri.

Nyadi simbolik pengawa bejadi rasmi pengerami Gawai Dayak 2026, pengerami nya dipunka enggau Pengerami Bejadi Kujuk Gawai, ti melambangka terima kasih ketegal pemayuh rezeki, kelimpah ari mantaika basa ngagai pesaka budaya enggau adat komuniti Dayak ti udah diteruska ari rebak turun menurun.

Sepemanjai program nya, bala temuai bepeluang meda bemacham pengawa mandangka main asal ti mandangka penyelai seni enggau main asal komuniti Dayak, nyengkaum main asal enggau pengawa belagu ari artis Iban enggau artis menua tu ti mandangka pengaya pesaka main asal Sarawak.

Pengawa ngatur rumah tebuka tu ukai semina ngembuan tuju deka ngerami pengerami Gawai Dayak aja, tang mega nyadi pelasar dikena ngenegapka integrasyen rama, nerenakka pemereti ati entara komuniti sereta ngerapitka kaul pangan diri entara rayat ti bemacham penatai asal.

Pengawa milih Kompleks UNIFOR nyadi palan endur ngatur pengawa tu mega mai reti kediri empu berindik ari kompleks nya ti dipenyadika kena 26 April tu tadi kelai komitmen Perintah Sarawak ti terus ngetanka pengelantang, bebatak asur enggau pemereti ati entara orang ti nitihka mayuh bengkah jalai pengarap enggau komuniti mayuh budaya di nengeri tu.

Sama bisi datai Speaker Dewan Undangan Negeri Sarawak, Datuk Amar Tan Sri Mohamad Asfia Awang Nassar; Sapit Premier Sarawak, Datuk Amar Profesor Dr. Sim Kui Hian, Menteri Kereja Raya Malaysia, Dato Sri Alexander Nanta Linggi; Sapit Menteri Nembiak enggau Lumba Malaysia, Mordi Bimol; bala menteri enggau menteri muda Kabinet Sarawak sereta bala pemesai ke bukai.

Pengerami nerima pengabang ti diatur dalam suasana ti penuh enggau pemanah ati sereta pengangat ati, sekali agi ngayanka penyerakup, bebasaka pangan diri enggau semengat begulai ti dikemeranka rayat Sarawak terus nyadi pelasar ti tegap ngagai penegap, penyulut enggau pengelantang nengeri tu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber — Japen Sarawak

SONG, 1 Jun — Tradisyen nemuai ngabang beserimbai enggau ngintu Hari Gawai Dayak terus nyadi platform ti beguna dalam ngerapitka kaul, nerenakka semengat kerejasama sereta ngenegapka penyerakup entara komuniti rumah panjai.

Program Penerima Pengabang ke diatur ba Rumah Limbi Jambar ba Temalat, enggau penatai deligit ari Rumah Tuai Rumah Sumbang Temalat mujur ngempuruka peranak ari kededua genturung pendiau dalam gaya ke penuh pengerichah enggau semengat diri sebilik.

Tuai Rumah Sumbang dalam jaku dipansutka iya nyemetak madahka pengawa nemuai nya siti pesaka budaya ti meseti terus dijaga sereta ditampung ngagai rebak dudi hari.

Kenu ku iya, main asal tu ukai semina nyadi kelai penyerakup entara komuniti Dayak, tang mega ngemeranka pengawa ngerapitka kaul entara peranak rumah panjai ke udah lama ditanggam.

“Tu meh utai ti deka dipeda aku, iya nya tradisyen nemuai terus dikemeranka. Kaul rat entara komuniti meseti seruran ditan sereta ditegapka laban tu penegap komuniti kitai,” ku iya.

Iya mega madahka tradisyen nya endang dikemeranka udah lama, tang pengawa ngidupka iya baru nyata ngayanka komitmen komuniti ngetanka adat enggau budaya ti nyadi kelai komuniti Dayak.

Berebak enggau nya, Ketuai Komiti Gawai Rumah Sumbang, Tuan Andrew madah, semengat kerejasama peranak menua nya meruan tegap taja udah bisi tiga buah rumah panjai ke diatu udah bisi pentadbiran enggau pengatur kediri empu.

Nitih ku iya, peranak menua nya agi bekerejasama dalam mayuh macham aktiviti komuniti, nyengkaum ngatur program budaya enggau ngintu pengerami.

“Taja tetiap rumah panjai bisi palan pengentap pendiau kediri empu, tang semengat kerejasama enggau besaup pangan diri tetap nyadi pengawa ke dikembuan kitai. Tu meh ke nentuka kaul entara komuniti meruan rat,” ku iya.

Iya mega madah, seraban ari Rumah Limbi udah nemuai ngagai Rumah Sumbang sehari sebedau nya, seraya bebalas ngabang ke nyadi sehari tu sebagi ari tradisyen pengabang ke dikemeranka ninting musin Gawai.

Urung 60 iku peranak ari Rumah Sumbang nyereta penemuai nya, ti mega muka ruang ngagai kededua piak besilih penemu, ngenegapka pemereti ati sereta ngenegapka agi kaul menyadi.

Program tu ngayanka komitmen komuniti setempat nyaga pesaka budaya, kelimpah ari nentuka nilai penyerakup, basa enggau kerejasama terus ngerembai dalam pengidup komuniti rumah panjai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUALA LUMPUR, 1 Jun – Ex-penyerang tebilang nasional, Safee Sali madahka diri sedia megai tanggungpengawa besai ngiring Gerempung Main Bol Malaysia (FAM) enti diberi peluang ari kaban gempung raban pengatur pengawa jemah ila.

Nampung Astro Arena, Safee nyemetak madahka pengawa nyadi ketuai main bol nasional begunaka individu ti ukai semina meretika sukut pentadbiran, tang mega ngembuan mayuh peneleba ba padang sereta meretika pemar ke bendar ditapi pemain enggau ekosistem main bol menua tu.

Nitih ku iya, model pemansang ti mujur di menua maju baka Jipun nyata ngayanka kaul bala ex-pemain dalam struktur ketuai ulih meri empas ke besai ngagai penyulut main bol sesebuah menua.

“Aku sedia napi pemar nya. Ngambi chunto baka Jipun, sida ngena struktur ngatur pengawa ti betuaika pemain ke suba,” ku iya.

Nama Safee chukup tebilang ba arena main bol nasional. Kelimpah ari nyadi pemain ke beguna dalam pemujur skuad nasional, iya mega udah chakah bejalaika tanggungpengawa pengudah pinchin nengah chara ngemeratka pemansang renggat baruh nengah Super Safee Soccer School.

Pengawa iya ti seruran ngelala sereta ngembing bakat biak dipeda nyadi bukti komitmen timpuh panjai iya ngagai main bol nasional jemah ila, lalu enggau nya ngenegapka kredibiliti iya nyadi chalun ti bisi potensial mai ubah dalam rampa pentadbiran lumba enggau main.

Nengah mayuh peneleba nyadi pemain, jurulatih pemansang enggau pengeransing renggat baruh, Safee dipeda ngembuan pemereti ati ke komprehensif ba guna pemansang main bol nasional, ari renggat nembiak nyentuk ke renggat entarabansa.

Enti diberi peluang ngiring FAM, iya bisi ati deka meda sistem pemansang ti lebih bestruktur, profesyenal sereta meruan dikena nentuka main bol Malaysia terus ngerembai sereta ulih besemekih enggau konsisten ba renggat serantau enggau Asia. – RBI

Berita asal Astro Arena

#ruaiberitaiban#newsiban#beritaiban

Rindu | Titih | Kunsika

BELAGA, 31 Mei 2026 – Peranak Punan Bah diatu ngasaika perengka guna ke lebih lantang sereta teratur pengudah tembu Projek Parit enggau Palan Entepan Baru, ti dipenyadika Sapit Menteri Utiliti enggau Telekomunikasyen Datuk Liwan Lagang.

Nitihku Liwan, projek tu sebagi ari pengawa perintah ti seruran dipejalaika dikena ngenegapka perengka guna pemun di menua pesisir, lalu ari nya ulih ngangkatka pengelikun, pengelantang enggau kualiti pengidup peranak menua nya.

“Perengka guna baru tu ukai semina mantu ngelengkaska sistem parit, tang mega nyendiaka palan entepan kerita ke lebih teratur ungkup guna komuniti,” ku iya ke mega Kaban Kunsil Nengeri (ADUN) Belaga.

Rambau pengerami nya, Datuk Liwan nyemetak madahka komitmen perintah deka terus mai pemansang ti inklusif sereta meruan ngagai menua pesisir ngambika rayat ulih ngasaika perengka guna ke manah agi sereta sebela enggau pemansang di kandang menua bukai.

Iya mega meri besai terima kasih ngagai Komiti Pemansang enggau Pengelikun Genturung Pendiau (JKKK) Punan Bah sereta semua peranak ke udah meri kerejasama enggau sukung ngemujurka projek nya.

Nitih ku iya, pemujur bejalaika projek nya ngayanka semangat konsensus enggau kerejasama rat entara ketuai enggau komuniti dalam meransang pemansang kandang menua.

Tekala nya pengudah pengerami bejadika pengerami nya, Datuk Liwan enggau bini iya, Datin Rosnie Bilang bela ngulu pengerami nyambut Elou Bungan 2026 begulai enggau peranak rumah panjai nya.

Penatai sida nambahka pengerami sereta mandangka kaul rat entara bala ketuai enggau rayat.

Sama bisi datai iya nya Pemanca Unak Akah, Jupitar ke nyadi pengari Pemesai Pelilih Belaga enggau peranak rumah panjai ke sama-sama ngerichahka pengerami nya.

Projek tu dikearap ulih nyadi pematak ngagai mayuh agi pemansang jemah ila, kelimpah ari terus ngenegapka pengelantang, penyerakup enggau penyulut komuniti di Punan Bah. -RBI

#ruaiberitaiban#newsiban#beritaiban

Rindu | Titih | Kunsika

BINTANGOR, 31 Mei – Siku lelaki peranak menua tu beumur 32 taun ditan Raban Petugas Indu Opis Polis Pelilih (IPD) Meradong maya operasyen Ops Tapis ti dipejalaika di pelilih Bintangor pagi tadi.

Ketuai Polis Pelilih Meradong, DSP Tansli Mering madah, saspek ditang urung pukul 10.50 pagi ketegal dipelabaka bisi kaul enggau aktiviti salah guna dadah sebedau dibai ngagai IPD Meradong ngambika atur silik agi dipejalaika.

Nitihku iya, asil peresa ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka saspek positif amphetamine enggau methamphetamine.

“Meresa baru rikod ke udah tetemuka saspek nadai ngembuan sebarang rikod jenayah tauka penyalah bekaul enggau dadah,” ku iya nengah sebengkah penerang sehari tu.

Kes tu dipansik ari baruh Seksyen 15(1)(a) Akta Dadah Berbahaya 1952, ti nyendiaka ukum mata duit enda ngelui ari RM5,000 tauka jil nyentuk dua taun enti dikenuku salah.

Berebak enggau nya, DSP Tansli nyemetak madahka polis ngemeratka atur nagang pengawa salah guna dadah ba genturung pendiau lalu enda belembut ba sebarang aktiviti bekaul enggau dadah.

Iya mega minta mensia mayuh terus meri penerang ngagai polis bekaul aktiviti dadah di pelilih Meradong dikena mantu pengawa ngelaban penanggul nya.

Sebarang penerang tau dikenataika ngagai Balai Polis Bintangor nengah lumur 084-693222. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 31 Mei – Raban Nembiak Parti Demokratik Progresif (PDP) nyemetak madahka penuduk Dewan Undangan Negeri (DUN) Engkilili meseti terus ditegapka bepelasarka servis ngagai rayat enggau semengat beserakup dalam Gempung Parti Sarawak (GPS), ari ke bepolitik tauka diiri enggau pemerat individu.

Sapit Chairman Nembiak PDP, Conrad Inti madah, parti iya udah beratika ripot nya bekaul enggau niat ex-Kaban Parlimen Lubok Antu, Jugah Muyang, deka minta nyadi chalun ba penuduk Engkilili nengah sebuah agi parti komponen GPS.

Kenu ku iya, tetiap individu bisi hak ba aspirasyen politik, tang semua parti komponen GPS meseti terus negika semengat bebasaka pangan diri, pechaya enggau disiplin gempung ti udah nyadi pelasar penegap enggau pengering GPS betaun ke udah.

“Engkilili diatu diarika PDP. Bebasaka penuduk ke dipegai parti komponen GPS ukai semina pekara budi basa politik aja, tang mandangka pengandal enggau kerejasama ke udah ditempa dalam gempung nya,” ku iya nengah penerang berita.

Ku iya, GPS naka ke diatu mujur midaka diri ari gempung politik ke bukai laban seruran ngengkahka penegap, penaluk enggau tanggungpengawa bekunsi ngelui ari pemerat individu.

Conrad mega betanya rasional pengawa nya berindik ari penama siku orang politik enda nambahka penuduk baru ngagai GPS tauka ngerembaika pengering gempung nya.

“Pekara ke nyadi tanya, nama utai ke amat dijapai nengah pengawa ke baka nya? Baka ni iya ulih ngenegapka GPS? Ke beguna agi, nama pesan ke dianjung ngagai rayat lebuh bisi peragam penuduk ke diarika parti komponen GPS empu nyadi tagit pekit dalam?” ku iya.

Kenu ku iya, enti semengat GPS seruran diambi nyadika lalau, dia disiplin gempung, basa enggau pengarap entara kaling komponen iya meseti disalin ngagai pengawa, ukai semina retorik aja.

Ku iya, sebarang peragam ti ngayanka pengawa berebutka penuduk ke udah bisi dalam GPS nadai nguntungka gempung sereta bisi potensial ngeruga imej penyerakup ke nyadi batang penegap GPS ngelama tu.

Iya nyemetak madahka politik patut diakim bepelasarka rikod servis, komitmen enggau asil ti dibai ngagai rayat, ukai semina berebutka pangku pengawa tauka penuduk aja.

“Rayat Engkilili enda nanya sapa ke deka nyadi chalun. Sida dekaka ketuai ti bepenau mai pemansang, mutarka penanggul sereta ngangkatka kualiti pengidup komuniti menua nya,” ku iya.

Conrad mega nyemetak madahka sebarang randau bekaul enggau pengawa magi penuduk enggau milih chalun patut diputarka nengah jalai rasmi GPS dikena nentuka tetiap pemutus digaga bepelasarka konsensus enggau pemerat begulai.

“PDP deka terus ngemeratka pengawa meri servis ngagai rayat Engkilili sereta nentuka pemansang terus dikembuan tetiap komuniti di kandang menua nya.

“Servis ngagai rayat meseti seruran dulu ari juluk ati politik,” ku iya. – RBI

#ruaiberitaiban#newsiban#beritaiban

Rindu | Titih | Kunsika

SRI AMAN, 31 Mei – Adat bebasaka pangan diri nyadi teras ke beguna dalam nyaga pengelantang komuniti pupu bansa enggau jalai pengarap ti bebida di Sarawak, pia ku Datuk Francis Harden Hollis.

Nitih ku iya, komuniti begunaka terus ngemeranka ulah bebasaka pangan diri sereta nerenakka ulah ti mulia ti nyadi peminta semua jalai pengarap dikena nentuka penyerakup ti tegap ulih terus dikemeran.

Iya mansutka jaku tu lebuh ngulu Pengerami Ngintu Hari Wesak ke diatur Serakup Buddha Sri Aman di Jalai Foochow.

Penatai iya ngulu pengawa nya mandangka sukung perintah ngagai pangku pengawa gerempung jalai pengarap dalam pemansang mensia kelimpah ari pengawa ngenegapka kaul ti likun entara komuniti pupu bansa enggau pengarap.

Dalam jaku dipansutka iya mega, Harden madahka mayuh macham budaya ti dikemeranka rayat Sarawak udah nyadi chunto penyerakup ti pemadu manah, lalu enggau nya meri pangka ngagai gaya ti likun sereta tegap ti nyukung agenda pemansang nengeri seriris enggau Strategi Pemansang Pengudah COVID-19 2030.

Iya mega meri besai terima kasih ngagai piak pengatur Gerempung Buddha Sri Aman laban udah mujur nembuka ruang tambah ungkup rumah sembiang ti dipelanja nengah agih belanja Unit Ungkup Jalai Pengarap Bukai ari baruh pegai perintah Gempung Parti Sarawak (GPS).

Ngelansa pasal pemansang di Sri Aman, Harden nyemetak madahka dawa ti ngumbai Sri Aman nyadi “bandaraya mati” nadai pengamat.

Nitih ku iya, pengawa bejalaika mayuh bengkah projek infrastruktur nyengkaum rentayan jalai alun enggau Jematan Batang Lupar 2 ti disadang tembu taun tu deka ngemanahka agi penyambung entara Bagi Menua Sri Aman enggau Betong sereta nyungkak penumbuh ekonomi kandang menua.

Ba pengawa nya mega, iya bisi nyuaka chek Projek Mit Menua Pesisir (MRP) sepenyampau RM5,000 ngagai Gerempung Buddha Sri Aman dikena mantu bejalaika aktiviti gerempung nya.

Sama bisi datai Chairman Gerempung, Foo Chin Shui, Temenggong Kueh Aik Seng, Pemanca Lee Siang Hua, sekeda kapitan komuniti China setempat enggau kaban kaunsil ari PBT.

Pengerami ngintu Hari Wesak diatur dalam gaya pengelantang enggau pemanah ati, mandangka semengat beserakup ti terus nyadi batang penegap komuniti Sarawak. – RBI

#ruaiberitaiban#newsiban#beritaiban

Rindu | Titih | Kunsika