KUCHING, 18 Mei – Polis DiRaja Malaysia (PDRM) Sarawak benung mansik siku Ketuai Polis Pelilih Menua di nengeri tu ke dituduh ngachau seksual siku pemesai polis indu ari baruh pegai iya.

Komisioner Polis Sarawak, Mohamad Zainal Abdullah ngenukuka piak iya bisi nerima ripot bekaul enggau kes nya lalu pansik benung dipejalai ari baruh Seksyen 354 Kanun Keseksaan.

Nitihku iya, pansik ke silik benung dipejalai dikena nembuka proses pansik kes nya.

Orang kena kachau seksual diripotka mansang ngaga ripot polis kemari, madahka diri nyadi ‘mansa’ pengawa ngachau seksual ari pemesai kanan ke bisi kaul.

Dipelabaka penusah nya nyadi bulan nyin tadi pengudah iya diasuh gawa ba Indu Opis Polis Pelilih (IPD).

#ruaiberitaiban#newsiban#beritaiban

Rindu | Titih | Kunsika

BINTANGOR, 18 Mei — Sepenyampau 47 iku nembiak Tabika Perpaduan Bintangor nyereta Program Penyedar Mensia Mayuh (KBoC) diatur Balai Bomba enggau Penyah Penusah (BBP) Bintangor ti nyadi pagi tu tadi dikena nambahka penyedar tumu ba sukut pengelikun enggau nyeliah penusah angus.

Program ti berengkah ari pukul 8.30 pagi nya mega ngaul 10 iku pengajar nyempulang enggau lima iku apai indai sereta diatur dalam konsep raun seraya belajar enggau bemacham aktiviti interaktif begulai enggau raban bomba.

Ketuai BBP Bintangor, PPgB Mahmudin Narudin madah, program baka tu beguna amat ba pengawa meri penerang tumu ngagai bala nembiak senentang atur pengelikun penusah angus enggau pengawa ke patut dipejalaika nyema bisi penusah ngenyit nyadi.

Nitih ku iya, entara aktiviti program nya nyengkaum meri penerang pandak pasal penyedar penusah angus ba premis sekula, video mandangka karier dalam pengawa bomba enggau video “Ready to Rescue”, kelimpah ari latih prosedur mindah, teknik “Stop, Drop and Roll” enggau latih ‘ngerayap nyelamatka diri.

Ku iya nambah, penyereta mega diberi awak nelebaka diri enggau perengka pengerara api, ngena pekayan bomba enggau jaket bomba anak mit, sereta nyereta simulasyen bomba ngena hos bantu tumu ari injin bomba.

“Latih bomba ungkup dapur mega digulu bala pengajar enggau apai indai dikena meri penerang praktikal ngagai pengawa keterubah lebuh penusah angus nyadi ba rumah,” ku iya.

Program nya mega dirichah enggau pengawa mandangka perengka dikena bomba, sesi nepan jentera bomba sereta nyuaka barang pengingat ngagai tadika nya. – RBI

#ruaiberitaiban#newsiban#beritaiban

Rindu | Titih | Kunsika

BINTULU, 18 Mei — Pekit Kumang Renggat Pelilih Menua Bintulu beserimbai enggau Pengerami Mantar Gawai Dayak 2026 ke diatur ba Dinner World Bintulu malam kemari mantaika elegan, pengandal enggau rega ti tinggi pesaka budaya komuniti Dayak nengah penyereta mandangka pekayan pesaka enggau identiti ti chukup ngemegahka.

Amyder Midey, anak Drake, dichiri nyadi Kumang Gawai Dayak Bintulu 2026 lalu enggau nya bulih Anugerah Ngepan Pemadu Manah, asil ari gamal iya ti ngerinduka ati sereta chukup manah meda adat enggau budaya ti benung dipekitka.

Berebak enggau nya, gelar Lulong Gawai Dayak Bintulu 2026 dipengi Emenlyen Laing, anak Clement ke bela nerima Anugerah Pengelandik Kumang ketegal penau mandangka pengangkun diri, penemu budaya enggau pemerindang ti ngasuh ati pechaya sepemanjai pekit nya.

Penuduk lumur tiga tauka Selingar Matahari Gawai Dayak Bintulu 2026 diempu Joyce Luna Kut ti bela mandangka pemerindang ti konsisten sereta apresiasyen ti manah ngagai elemen budaya ti dikemeratka.

Ungkup kategori sagu ati, bala penyereta iya nya Maria Makdalena anak Rhodi, Selena Prada Dandy, Esther Bajik anak Muli enggau Joeyna Ata anak Jesse bela nerima kelala ketegal penyereta sida, ti udah mandangka semengat enggau komitmen ti tinggi dalam negika budaya enggau pesaka asal komuniti Dayak.

Pengawa ngatur pekit tu terus nyadi pelasar ke beguna dalam ngenegapka penyerakup komuniti sereta ngerichahka pengerami Gawai Dayak ba renggat pelilih menua, kelimpah ari nentuka pesaka asal terus diintu, dikerindu sereta ditampung rebak dudi hari.

Meri pengaga ati ngagai semua pemenang enggau penyereta ketegal pemujur enggau dedikasyen ti dipandangka dalam ngemujurka pekit tu, ti udah nyadi kelai penyulut enggau temegah ati ngagai budaya komuniti Dayak di Bintulu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — BDA

SPAOH, 18 Mei – Pengerami Pekit Futsal Bukit Saban 2026 dipeda terus bejalaika tanggungpengawa ti beguna nyadi pelasar pemansang nembiak kelimpah nyungkak ekonomi komuniti setempat enggau ngenegapka penyerakup komuniti pupu bansa di kandang menua nya.

Nitihka penerang nengah Facebook DUN Bukit Saban, Kaban Parlimen Betong, Dato Dr. Richard Rapu madahka pengawa ngatur program lumba enggau main komuniti baka tu patut dipajakka ari sesiti maya ngagai sesiti maya dikena nentuka mayuh agi raban nembiak diberi awak nyereta aktiviti ti bepengerai sereta meri penguntung.

Iya ti ngarika Sapit Premier Sarawak, Datuk Douglas Uggah Embas ke mega Kaban Kunsil Nengeri (ADUN) Bukit Saban lebuh bejadika pengerami nangguhka karnival nya madahka pengawa ti chakah nyereta lumba enggau main ukai semina mantu nyerungkai penau, tang mega nempa disiplin diri enggau semengat beraban ba raban nembiak.

“Program baka tu manah amat ungkup raban nembiak laban ukai semina ulih nyerungkai penau, tang mega ulih nempa disiplin enggau semengat beraban,” ku iya.

Iya mega nyemetak madahka pengawa ngatur lumba enggau main komuniti meri empas ekonomi terus ngagai peranak menua nya, kelebih agi pedagang mit ti bulih penguntung ari penatai pesereta enggau temuai sepemanjai program nya.

Nitih ku iya, penambah aktiviti ekonomi di menua pesisir nengah pengawa ngatur program baka tu mandangka lumba enggau main mega ulih nyadi penyungkak ngagai pemansang sosioekonomi komuniti.

Berebak enggau nya, iya nesau semua pesereta ngambika ngetanka semengat lumba enggau main, beserakup sereta bebasaka pangan diri ba tetiap pekit ke dipasuk sida.

Ku iya, lumba enggau main nyadi medium ke pemadu manah dalam nyerakupka komuniti enda ngira bansa, jalai pengarap enggau penatai, ari nya ngenegapka agi pengelantang komuniti di pelilih Betong.

Karnival Futsal Bukit Saban 2026 diatur Kelab Anak Asal Bukit Saban nengah kerejasama Opis Pelilih Mit Spaoh, Pampang Nembiak Bukit Saban, Pampang Indu Bukit Saban, Pampang SABERKAS Bukit Saban enggau Palan Servis DUN Bukit Saban.

Sepenyampau 18 tim futsal lelaki enggau empat tim futsal indu bisi enggau bepekit ngerebut Trofi Datuk Amar Douglas Uggah Embas enggau Trofi Datin Amar Dato Doreen Mayang.

Ungkup kategori lelaki, tim Skywhite mansutka diri nyadi champian pengudah ngalahka Haqi Bangsawan 1-0 ba pekit final lalu mai pulai perais mata duit RM5,000 disempulang trofi enggau midul.

Tim Haqi Bangsawan mujur nyadi lumur dua enggau perais RM2,500 disempulang midul, lalu Loy’69 FT enggau Datus United bekunsi penuduk lumur tiga.

Berebak enggau nya, kategori indu mandangka tim Avengers Romanoff mansutka diri nyadi champion, mai pulai perais mata duit RM3,000 disempulang trofi enggau midul.

Sama bisi datai Penyanding Penemu Komiti Pengatur Karnival, Dr Louis Laja Uggah; Sapit Ketuai PBB Pampang Bukit Saban, Abang Madehi; Sapit Ketuai Raban Nembiak PBB Sarawak, Martin Ngindang sereta mega ketuai komuniti enggau ketuai kaum setempat. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 18 Mei — Perintah Sarawak majak ngenegapka pemansang perengka guna, bekal ai, kuasa karan enggau telekomunikasyen di nengeri tu nengah pengawa bejalaika mayuh bengkah projek strategik ti beungkus RM9.29 bilion ari baruh Langgur Pemansang Malaysia Lumpar Ke-13 (RMK13) enggau ‘Pembiayaan Alternatif’.

Menteri Perengka Guna enggau Telekomunikasyen Dato Sri Julaihi Narawi madah, agih belanja ke besai nya ngayanka komitmen perintah Sarawak nentuka rayat ngasaika perengka guna ke lebih efisyen, entap sereta komprehensif nyengkaum di menua pesisir.

Nitih ku iya, sektor bekal ai nerima agih belanja pemadu besai iya nya RM5.3 bilion ti mungkur 347 projek, enggau 289 projek tauka 83 peratus tembu.

“Perintah Sarawak mega udah melanja RM188.75 juta kenyau ari taun 2020 dikena neruska subsidi bil ai enda bebayar RM5 keterubah ti sama enggau 11,300 liter ai ungkup rayat Sarawak,” ku iya lebuh nyimpul jurai ba Aum Kunsil Nengeri (DUN) Sarawak sehari tu tadi.

Ku iya, peminta ai di Sarawak diatu manggai 2,300 juta liter sehari lalu dipelaba deka nambah ngagai 3,500 juta liter sehari manggai ba taun 2030 ila.

Iya nandu baru madahka bungkur bekal ai menua pesisir diatu udah nambah ngagai 71.9 peratus seraya kandang mengeri udah manggai 99 peratus, lalu ngujungka bungkur kesemua Sarawak manggai 86.1 peratus.

Dalam pengawa ngenegapka sistem bekal ai nengeri tu, perintah bejalaika Pelin Besai Bekal Ai enggau Grid Ai Sarawak ti nyambung kandang menua Selatan, Tengah enggau Utara nengah sistem grid ai.

Ba sektor kuasa, Julaihi madahka Sarawak diatu ngembuan sistem grid kuasa karan besai ti entap sereta ulih dikearap ari Bau ngagai Lawas.

Ku iya, kapasiti ngasilka kuasa karan nengeri tu diatu manggai 5,928 Megawatt (MW) lalu ditagit deka nambah ngagai 10,000 MW manggai ba taun 2030 enggau 15,000 MW manggai ba taun 2035 enggau pemadu mimit 60 peratus pun penatai kuasa tau dikena baru.

Entara projek besai ke benung digaga diatu iya nya Tekat Ai Kuasa Karan Baleh 1,285 MW ti dipelaba deka beoperasyen dalam taun 2029, pia mega Palan Kuasa Kitar Gabungan Samalaju enggau Miri ti dipelaba tembu dalam taun 2027.

Ba pengawa nentuka peranak menua pesisir terus ngasaika bekal kuasa karan ti bekualiti, perintah udah ngungkupka belanja sepenyampau RM2.7 bilion kenyau ari taun 2018 dikena bejalaika 216 projek Bekal Kuasa Karan Menua Pesisir (BELB).

Ari penyampau nya, bisi 184 projek tauka 85.2 peratus udah tembu lalu meri penguntung ngagai semak 60,000 ruang bilik di serata Sarawak.

Iya mega madahka Projek Skim Bekal Kuasa Karan Alternatif Menua Pesisir Sarawak (SARES) diatu benung mekal kuasa karan 24 jam ngena kuasa solar ngagai 553 buah genturung pendiau enggau rumah panjai ti ngaul lebih 15,000 ruang bilik.

Ba sektor telekomunikasyen ku iya, SACOFA benung bejalaika atur ngangkatmanah enggau ngemanahka rangkaian di serata Sarawak dikena nambahka penegap enggau pengandal servis telekomunikasyen.

Julaihi mega madah, perintah Sarawak ngarapka kuasa ngatur spektrum frekuensi ulih dilempaika ngagai nengeri tu jemah ila dikena ngenegapka pengawa ngatur servis komunikasyen, pengelikun enggau telekomunikasyen nitihka guna Sarawak.

“Sarawak diatu benung ngerembaika pemansang industri aeroangkasa nengah pengawa numbuhka Kaunsil Penyanding Penemu Aeroangkasa Sarawak (SAAC) sereta mega ejensi luar angkasa nengeri ti deka ngatur pemansang teknologi satelit, semikonduktor enggau pansik aeroangkasa,” ku iya.

Ngelansa pasal kemarau ke nuntung Sarawak diatu, iya madahka opis menteri begulai enggau ejensi ke bekaul seruran matau gaya nya sereta bejalaika atur mitigasi nyengkaum merambu ‘cloud seeding’ enggau nganjung bekal ai ngena 122 buah tangki di serata nengeri.

“Taja betapi enggau kemarau, bekal kuasa karan Sarawak agi tegap berindik ari sistem pemansut kuasa ti mayuh macham sereta begempung,” ku iya. – RBI

#ruaiberitaiban#newsiban#beritaiban

Rindu | Titih. | Kunsika

MIRI, 18 Mei — Tim ari Balai Bomba enggau Penyah Penusah (BBP) Lutong mujur nangkap siku iguana ti tama ngagai sebuah rumah ba Jalai Blasam 4, Tudan, dalam operasyen servis khas tengahari tu tadi.

Nitihka ripot operasyen, piak bomba nerima kangau ngenyit urung pukul 12.08 tengahari sebedau loceng ngenyit ditebah 30 sikin udah nya.

Sebuah injin Scania BGR 4022 FRT enggau lima iku raban betuaika PBK II (TBBK I) Awang Arizal dipindah ngagai endur ke bepalan urung tujuh kilometer ari stesyen nya.

Lebuh datai ba endur nya urung pukul 12.15 tengah hari, Raban Komander Operasyen (PKO) bisi tetemuka siku iguana dalam rumah baka ke diripotka orang ke ngaga sebana.

“Pengudah ngaga ‘size-up’ PKO bejalaika pengawa nangkap iguana nya ngena perengka khas nyentukka iya mujur,” ku penerang ari komander operasyen.

Operasyen nya mujur dijaga lalu tembu enggau penuh pukul 12.24 tengah hari sebedau tim nya mupuk ke stesyen nya pukul 12.25 tengah hari.

Nadai sebarang bakal diripotka nyadi lalu gaya nya disahka selamat pengudah diperesa piak bomba. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 18 Mei – Perambu numbuhka Kawasan Zon Bebas Chukai ba Palan Penyangkai Kapal Bintulu nerima pemendar ari Opis Menteri Wang Malaysia (MOF) pun taun tu tadi lalu dikearapka ulih matak mayuh agi pemeranak puku ngena palan penyangkai kapal ke bisi kaul nya.

Kelimpah ari nya, Sapit Menteri Infrastruktur enggau Pemansang Palan Penyangkai Kapal Sarawak, Datuk Majang Renggi madah, Perintah Sarawak deka bejalaika penuh semua palan penyangkai kapal besai di nengeri tu nengah Kaunsil Penyangkai Kapal Sarawak ti nyadi raban pengatur tunggal.

Iya madah munyi nya ba pengerami ngintu Gawai Dayak 2026 Renggat Pelilih Bintulu ba sebuah restoren tebilang ditu, malam kemari.

Ku iya, semua enam palan penyangkai kapal besai di Sarawak nyengkaum Palan Penyangkai Kapal Bintulu ditu deka dikorporat.

Iya mansutka jaku munyi nya nengah pengawa bejalaika Pansik Induk Palan Penyangkai Kapal Sarawak.

“Kitai deka ngaga korporat ngagai semua palan penyangkai kapal di Sarawak, nyengkaum Palan Penyangkai Kapal Bintulu, ngambika pengawa ngatur sida lebih efisyen sereta kompetitif,” ku iya.

Ku Majang, palan penyangkai kapal ti bisi kaul mega deka diatur nitihka pengelebih sida empu ngambika nadai betimpa guna sereta ulih ngangkatka prestasi. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 18 Mei – Pemansang sektor telekomunikasyen di Sarawak diatu masuk ngagai renggat baru nengah pengawa ngena teknologi ti engkeman agi enggau gaya kandang menua, nyengkaum pengawa ngaga menara monopol enggau ngena sistem satelit.

Menteri Perengka Guna enggau Telekomunikasyen Datuk Seri Julaihi Narawi madah, Perintah Sarawak mega beratka isu penyekut rangkaian ti nyadi ketegal penambah guna Internet enggau data.

“Sarawak diatu udah nyapai 94.5 peratus bungkur Internet bepelasarka kandang endur pengentap pendiau di serata nengeri pengudah semua menara telekomunikasyen ari baruh projek SMART enggau JENDELA Fasa 1 tembu sereta beoperasyen penuh,” ku iya,

“Pemujur nya nyata ngayanka komitmen perintah nengeri terus nentuka rayat nyengkaum di menua pesisir ngasaika akses komunikasyen ke manah agi sereta entap agi “ Ku iya, – RBI

#ruaiberitaiban#newsiban#beritaiban

Rindu | Titihka | Kunsika

KAPIT, 18 Mei — Projek ngaga baru Sekolah Menengah Kebangsaan (SMK) Bukit Goram dipeda nyadi pelasar beguna ba pengawa ngenegapka pemansang pelajar ba kandang menua ulu Sarawak kelebih agi di Kapit.

Kaban Parlimen Kapit, Dato Sri Alexander Nanta Linggi madah, projek tu nyadi puku besai dikena nentuka nembiak di menua pesisir mega ngasaika perengka guna pelajar ti lantang, likun sereta kondusif setanding enggau sekula di kandang mengeri.

Iya madah munyi nya pengudah ngulu sesi meri penerang sereta ngabas palan projek ngaga sekula baru sebedau bekejang ke Kuala Lumpur.

Nitihku iya, projek tu mungkur pengawa ngaga sekula sekondari baru ti disikap enggau 36 buah kelas sereta bemacham perengka guna nitihka standard ke diatu.

“Entara batang komponen projek tu nyengkaum blok pentadbiran, blok akademik, sekondari Integrasi Program Pendidikan Khas (PPKI), kantin, dewan sekula, surau, Palan Penganti perengka pengangkut, palan bejalai kaki ke bebungkur enggau perengka guna sukung ke bukai,” ku iya ba sebengkah penerang.

Ku iya nambah, projek nya deka dipejalaika nengah chara ‘Design and Build’ ba pemesai tanah urung 7.189 hektar.

Nyadi Kaban Parlimen Kapit, iya nyemetak madahka genap sukut pengawa bejalaika projek meseti dipatau enggau silik dikena nentuka jadual bejalaika projek, koordinasyen entara ejensi enggau proses ngaga bejalai enggau lanchar ungkup pemaik komuniti sekula enggau komuniti besemak.

“Institusyen belajar di menua pesisir mega meseti ulih bediri tinggi sereta duduk baruh baka sekula di mengeri,” ku iya.

Iya mega dipadahka projek ngaga SMK Bukit Goram nya sebagi ari pengawa bejalaika projek pelajar ari baruh Atur Pemansang Malaysia Lumpar Ke-12 (RMKe-12) nengah tender tebuka pra-kelayakan bepelasarka kluster.

Ku iya, chara tu beguna dikena nentuka proses ngulihka barang enggau bejalaika projek ulih diatur enggau sistematik agi sereta nitihka timpuh ke udah ditetapka.

Berebak enggau nya, iya nerangka pengawa ngaga sekula baru nya kelai pengarap baru ngagai komuniti Kapit, kelebih agi bala nembiak di menua pesisir ngasaika peluang pelajar ke lebih manah sereta bekualiti.

Iya mega komited deka terus nitihka pemansang projek nya sereta mai sada nyawa komuniti Kapit ngambika pengawa bejalaika iya bejalai enggau terang sereta meri empas ke nyata ngagai komuniti.

“Ungkup Kapit enggau semua menua pesisir ke bukai, kitai dekaka bala anak kitai belajar dalam kandang endur ti meri ruang ngagai sida bemimpi besai sereta peluang nyapai nya,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

DUNGUN, 18 Mei – Perintah majak ngenegapka penegap sistem kuasa menua nengah pemansang teknologi nyimpan kuasa moden lebuh Pengerami Bejadika Sistem Nyimpan Kuasa Bateri Santong (BESS) 100MW/400MWh dipenggi Tenaga Nasional Berhad di Dungun udah tembu dipenyadi seharitu.

Nitihku Sapit Menteri Besai, Datuk Seri Fadillah Yusof, projek ti dikemansangka ari baruh inisiatif strategik sektor kuasa menua nya ngayanka komitmen perintah dalam napi pemar bekal ti enda tentu sereta makit kuasa global, kelimpah ari nentuka pengelikun enggau pengandal bekal kuasa karan ngagai rayat terus dijamin enggau ungkus ti ulih dibeli.

“Santong BESS entara sistem nyimpan kuasa bateri utiliti skala besai pemadu tumu di Semenanjung Malaysia enggau kapasiti 100MW/400MWh.

“Pemansang projek tu dipeda nyadi siti singkang ti beguna dalam ngenegapka penegap grid kuasa karan menua sereta nyukung integrasyen kuasa tau dikena baru (RE), kelebih agi kuasa solar, enggau lebih luas sereta efisyen,” ku iya.

Teknologi BESS beguna nyadi “bank kuasa” ti besai ti ulih nyimpan kuasa karan ti lebih sebedau ngelepaska iya baru lebuh diguna.

Sistem nya mantu ngetanka frekuensi grid, ngurangka risiko putus bekal kuasa karan sereta nambahka fleksibiliti sistem kuasa menua.

Kelimpah ari nya, pemansang BESS mega setipak enggau aspirasyen menua ti deka nyapai tagit 70 peratus kapasiti dipasang kuasa tau dikena baru manggai ba taun 2050.

Teknologi nyimpan kuasa baka tu dianggap beguna dalam nyukung agenda transisyen kuasa menua nuju sistem ti meruan agi, tan sereta kurang karbon.

Berebak enggau nya, Tenaga Nasional Berhad mega dipuji ketegal komitmen ti terus ngemansangka infrastruktur kuasa strategik ti ukai semina nyukung penegap sistem grid menua, tang mega meri penguntung terus ngagai rayat enggau industri, nyengkaum ngenegapka pengandal pemeranak puku sereta meransang penumbuh ekonomi menua.

Perintah nengah Opis Menteri Transformasyen Kuasa enggau Transformasyen Ai deka terus bekerejasama rat enggau semua piak dikena nentuka pemansang teknologi kuasa baru baka BESS ulih dipejalaika enggau meruan, likun sereta meri penguntung timpuh panjai ngagai menua enggau rayat setipak enggau aspirasyen Malaysia MADANI. – RBI

#ruaiberitaiban#newsiban#beritaiban

Rindu | Titih | Kunsika