KAPIT, 2 Jun — Operasyen ngiga enggau nyelamat (SAR) siku orang ti dikeirauka lemas pengudah perau karam di Sungai Selentang, Gaat mujur tembu sehari tu pengudah tudah ditemu peranak rumah panjai urung satu kilometer ari endur penusah nyadi.
Nitihka penerang ari Opis Bomba enggau Penyah Penusah Malaysia (JBPM) Balai Bomba enggau Penyah Penusah (BBP) Kapit, raban penyelamat nerima penerang pasal tudah ari Rumah Nading, Selentang, Gaat urung pukul 7.30 pagi tadi.
Berindik ari nya, raban bomba begulai enggau Polis DiRaja Malaysia (PDRM) sereta peranak rumah panjai terus mindah ngagai endur nya ngena perau dikena ngesah penemu nya.
Lebuh datai ba endur nya, tudah ditemu melepu ba sungai sebedau tim bomba bejalaika pengawa ngangkat tudah ungkup tuju ngelala.
Tubuh niang udah nya diengkah dalam ‘beg mayat’ lalu diserah ngagai polis ngambi atur nangkanka nya dipejalaika.
Sebedau nya, ba hari keterubah operasyen ti dipejalaika kemari, tim SAR bejalaika pengawa nyidi dalam kandang radius enam kilometer ari palan bot karam ngena chara ngiga atas ai ngena chara ‘zig-zag’.
Operasyen nya mega nerima kerejasama ari peranak rumah panjai ti besaup bejalaika pengawa nyidi sepanjai tebing kiba enggau kanan sungai nya.
Operasyen nya betuaika PBK II (TBBK I) Sairol ari baruh kemata Pemesai Operasyen Stesyen, PBK I Norman.
Sama bisi nyereta operasyen nya kaban BBP Kapit begulai enggau lima iku kaban PDRM.
Pengudah tudah mujur ditemu sereta diserah ngagai polis, operasyen SAR diketuka enggau penuh lalu raban bomba mulaika diri ngagai balai nya.
Pemujur operasyen tu ngayanka kerejasama rat entara ejensi penyelamat enggau komuniti setempat napi penusah ngenyit, lalu enggau nya mantu ngenyampatka pengawa ngiga orang lemas. — RBI
#Beritalban | Ruai Berita Iban
Rinduka | Titihka | Kunsika
