SONG, 3 Mei — Pengerami Ngiling Tikai di Rumah Limbi Jambar, Temalat, Song diatur enggau richah sereta penuh enggau penyerakup, lalu enggau nya ngelai pengujung pengerami Gawai Dayak taun tu.
Pengerami nya mega dirichah enggau penatai urung 50 iku pengabang ti datai ari mayuh bengkah kandang menua nyengkaum Musah, Sungai Maong, Bintulu enggau Sabah, lalu enggau nya mandangka kaul diri menyadi ti terit sereta semengat beserakup entara komuniti Dayak.
Ba jaku iya, Tuai Rumah Limbai ngenataika pengaga ati ngagai semua temuai ke bisi datai ngerichahka agi pengerami nya.
“Aku ngarika semua peranak Rumah Limbi Jambar meri besai terima kasih sereta besai terima kasih ngagai semua bala pengabang ari Musah, Sungai Maong, Bintulu enggau Sabah ti sanggup ngelimpangka diri ngintu Gawai ditu begulai enggau pangan diri.”
“Penatai urung 40 iku pengabang ba pengerami tu chukup besai reti sereta nambahka pengagit pengerami nya,” ku iya.
Iya mega meri besai terima kasih ngagai Komiti Pemansang enggau Pengelikun Genturung Pendiau (JKKK) Rumah Limbi Jambar enggau semua peranak rumah panjai nya ti udah meri komitmen enggau kerejasama sepemanjai pengawa ngatur pengerami Gawai nya.
Kenu ku iya, kerejasama rat ti dipandangka semua piak sepemanjai program ngabang enggau pengerami Gawai nyata ngayanka penegap semengat gotong-royong ti nyadi lalau pengidup komuniti rumah panjai.
“Ngarapka semengat begulai enggau beserakup tu ulih diterus sereta ditegapka agi jemah ila dikena nentuka pesaka budaya enggau adat dijaga,” ku iya nambah.
Berebak enggau nya, Ketuai Pengerami Gawai, Puan Helen Tanjung mega ngenataika pengaga ati ngagai semua peranak menua nya, bala temuai sereta komiti ti udah meri sukung ti tegap dalam ngemujurka bemacham aktiviti sepemanjai musim pengerami tu.
Ku iya, semua tanggungpengawa ke dilempaika ngagai sida dipejalaika enggau penuh pengelurus ati dikena nentuka pengelanchar program nya.
“Aku meri besai terima kasih ngagai semua ke udah meri sukung ngagai aku.Aku udah bejalaika semua pengawa enggau tanggungpengawa ke udah diberi ngagai aku enggau naka pemanah.
“Enti sema bisi pengurang ba selampur organisasyen tu, aku minta ampun lalu ngarapka semengat kerejasama ke udah ditempa terus ditegapka agi,” ku iya.
Pengerami Ngiling Tikai ukai semina nyadi pengawa nutup rasmi pengerami Hari Gawai, tang mega nyadi pelasar dikena ngenegapka kaul bakih, penyerakup enggau semengat bekerejasama entara komuniti setempat. — RBI
#Beritalban | Ruai Berita Iban
Rinduka | Titihka | Kunsika
