SPAOH, 5 Julai — Pengawa ngatur Borneo Street Gladion Brigade (BSGB) 2026 dipechaya nyadi pelasar ti efektif dalam ngelakuka Spaoh nyadi palan dagang temuai baru di Sarawak, kelimpah ari nyungkak aktiviti ekonomi komuniti lokal nengah pengawa ngaul komuniti bemotor ari serata nengeri.
Sapit Premier Sarawak, Datuk Amar Douglas Uggah Embas madah, perintah Sarawak seruran nyukung pengawa ngatur program ti meri empas tinggi baka BSGB laban ukai semina ngempuruka orang ti rinduka pengawa automotif, tang mega meri pemaik ngagai orang dagang mit enggau komuniti lokal di Spaoh.
Ku iya, penatai penyereta ari serata Sarawak nyata ngayanka program ke baka nya ulih nyadi pematak ngagai penumbuh ekonomi kandang menua kelimpah nyadi pelasar ngelakuka dagang temuai ke efektif.
“Penatai semua penyereta ari serata Sarawak ti sanggup datai ke Spaoh dikearapka ulih mantu meransang pengawa dagang menua tu.
“Program baka tu ukai semina deka matak penatai temuai ke mayuh, tang mega ngelakuka Spaoh nyadi palan dagang temuai di Sarawak,” ku iya lebuh bejaku ba Pengerami Nutup BSGB 2026 di Balai Mensia Mayuh Spaoh, kena Hari Enam tu tadi.
Nitih ku iya, pemansang infrastruktur nyengkaum rentayan jalai alun enggau jematan baru deka terus nambahka tikas penyambung ba kandang menua nya, lalu enggau nya ngenegapka potensial Spaoh nyadi palan dagang temuai enggau aktiviti ekonomi.
Ku iya, pengawa muka Jematan Batang Lupar 1 enggau Jematan Batang Lupar 2 sereta mega pengawa ngaga Jalai Besai Kedua deka ngemandakka timpuh pejalai ke Spaoh lalu dikearap ulih nambahka penyampau temuai jemah ila.
“Peluang tu patut diambi komuniti menua tu nengah chara meri kelala mayuh agi produk menua tu dikena nambahka penatai pemisi sereta ngenegapka ekonomi komuniti,” ku iya nerang.
Berebak enggau nya, Uggah nyemetak madahka pengawa ngatur autoshow baka BSGB mega bejalaika tanggungpengawa nempa budaya bemotor ti lebih positif, beradat sereta disiplin ba raban pengempu perengka pengangkut.
“Kelab automotif tu bejalaika tanggungpengawa ti beguna amat dalam nerenakka budaya deriba ti bisi lalau, disiplin sereta seruran ngasika undang-undang jalai alun.
Tu chara ke manah setipak enggau pemansang rentayan jalai alun ke majak moden,” ku iya.
Iya mega meri pengaga ati ngagai pengatur pengawa ketegal pemujur ngatur BSGB 2026 sereta madahka pengandal ati iya program tu deka terus dipejalai jemah ila enggau sukung ti terus ari perintah enggau komuniti menua nya.
Pengerami keterubah BSGB 2026 di Spaoh mujur ngempuruka urung 300 iku penyereta ari semilan buah kelab bemotor di serata Sarawak, nyengkaum Komuniti Legasi Borneo, Budaya Sri Aman (SAC), Kelab Pengempu Bezza Kenyalang (KBOC), Pelilih Menua 958 enggau Saratok Town Static Style.
Sama bisi datai Residen Bagi Menua Betong, Datu Richard Michael Abunawas, Pemesai Pelilih Menua Betong, Laga Kueh enggau Pemesai Pelilih Mit Spaoh, Deny Lim. — RBI
#ruaiberitaiban#newsiban#beritaiban
Rindu | Titih | Kunsika
Sumber, photo — Opis Sapit Premier 1
