KANOWIT, 24 Mei – Inisiatif Program Genturung Pendiau Iru MADANI nyadi pengawa perintah ti begempung dikena ngerapitka seraka pemansang entara kandang mengeri enggau menua pesisir nengah pengawa ngemanahka infrastruktur pemun enggau meri kuasa ngagai komuniti lokal.

Menteri Penyerakup Menua, Datuk Aaron Ago Dagang madah, program nya ngemeratka pengawa nyendiaka ai beresi, kuasa karan, rentayan jalai alun, nambahka akses digital, ngenegapka sosio-ekonomi enggau pengelantang pendiau komuniti menua pesisir.

Iya madah munyi nya lebuh bejadika Pengerami Ngelancharka Projek Genturung Pendiau Irau MADANI di Batu Luking, Pelilih Kanowit, sehari tu tadi.

Nitih ku iya, pengawa bejalaika projek ngaga Tangki Ai Beresi di sitak nya beguna amat laban nya ngaul pekara ke diguna rayat dikena nentuka akses ngagai bekal ai beresi ke chukup, entap sereta likun.

“Ungkup Projek Genturung Pendiau Iru MADANI di Batu Luking, sepenyampau RM500,000 udah diungkupka dikena bejalaika sekeda komponen projek pemansang ti meri penguntung terus ngagai peranak menua nya.

“Projek tu mungkur tiga buah rumah panjai iya nya Rumah Bibi, Rumah Johnny enggau Rumah Morris ke nyadi entara batang fokus bejalaika inisiatif pemansang ba sitak tu,” ku iya.

Ku iya nambah, chara Program Genturung Pendiau Iru MADANI mandangka komitmen perintah dalam nentuka komuniti menua pesisir enda tinggal ari arus pemansang menua setipak enggau agenda Malaysia MADANI. -RBI

KANOWIT, 24 Mei — Semangat sepiak-sepiak ti tegap ulih nempa raban bansa ti bebasa, siru, bekerejasama sereta seruran beserakup dalam nyaga pengelantang enggau pemaik menua.

Menteri Penyerakup Menua, Datuk Aaron Ago Dagang madahka, nilai tu patut ditegapka agi ba rayat mayuh bansa nyadi pelasar ke beguna ungkup penyerakup enggau penegap menua.

Iya madah munyi nya lebuh nembuka Program Khas Satelit: Taun Kenduri Rakyat MADANI 2026 di Kanowit, sehari tu tadi.

Dalam jaku dipansutka iya mega, Aaron minta semua rayat Malaysia terus ngidupka baru pengawa ngatur rumah tebuka enggau budaya nemuai ngagai orang ke besemak enggau genturung pendiau enda ngira bansa, jalai pengarap enggau penatai.

Nitih ku iya, tradisyen tu ukai semina ngayanka nilai mulia mensia mayuh Malaysia, tang mega nyadi platform pemadu manah dalam ngenegapka semengat begulai, nerenakka pemereti ati sereta ngerapitka kaul entara mensia.

Iya nyemetak madahka pengawa ngatur program ke baka nya seriris enggau aspirasyen MADANI Malaysia dalam nerenakka semengat begulai, bebasa sereta bebaik dalam raban bansa menua tu ke mayuh macham.

Berebak enggau nya, iya madahka pengerami ngintu Hari Gawai ukai semina pengerami meri terima kasih pengudah musin ngetau, tang mega nyadi pelasar ti beguna dalam nyaga adat, seni budaya enggau main asal pesaka komuniti ngambika terus dikerindu sereta dipeturunka nembiak rebak baru.

Program tu ngempuruka komuniti setempat dalam suasana ti penuh enggau pemanah ati sereta penyerakup, lalu enggau nya mandangka komitmen perintah dalam ngenegapka integrasyen nasional nengah pengawa ngemeratka nilai MADANI. — RBI

KUCHING, 24 Mei – Sapit Premier Sarawak, Datuk Amar Douglas Uggah Embas muji pengawa ngintu pengelantang pendiau ke dipejalaika Sarawak Hun Nam Siang Tng dalam mantu raban orang ke kurang penatai pemisi beserimbai enggau pengerami ngintu Hari Gawai Dayak.

Ku iya, pengawa ngatur Pengerami Nyuaka Pemeri Hari Gawai mandangka semengat beserakup, pengibuh enggau gerah jari ti udah lama nyadi kelai komuniti Sarawak.

Nitih ku iya, Sarawak Hun Nam Siang Tng udah bejalaika tanggungpengawa ti beguna amat dalam servis pengelantang pendiau komuniti kenyau ditumbuh dalam taun 1956.

Tu nengah mayuh bengkah program komuniti nyengkaum pengawa ngatur Rumah Orang Tuai sereta meri bantu pemakai ninting bulan ngagai ruang bilik ti begunaka bantu enda ngira bansa enggau jalai pengarap.

“Pengawa nyuaka pemeri Hari Gawai ngagai ruang bilik Dayak ke kurang penatai pemisi sehari tu nyadi penerus tradisyen pengasih sereta ngayanka komitmen gerempung ti seruran mantu orang ti begunaka bantu,” ku iya lebuh bejaku ba Pengerami Nyuaka Pemeri Hari Gawai ti diatur Sarawak Hun Nam Siang Tng, sehari tu tadi.

Ba program nya, sepenyampau 90 ruang bilik bansa Dayak ari ngelingi Kuching nerima pemeri nengah Wang Turu Pengintu Pengelantang Persatuan Hun Nam Siang Tng Sarawak.

Tetiap penerima nerima pemeri mata duit RM50 ti disuaka Chairman Sarawak Hun Nam Siang Tng, Tay Boon Sin.

Kelimpah ari nya, bala penerima mega nerima bakul pemakai ke berega urung RM400 ti ngundan barang ke diguna baka beras, minyak makai, telu manuk, pemakai dalam tin enggau bemacham bansa pemakai rangkai.

Program ninting taun nya diatur nyadi pengawa ti enda ngetu dipejalaika gerempung dikena mantu ruang bilik ti begunaka bantu beserimbai enggau pengerami Hari Gawai.

Uggah mega meri besai terima kasih ngagai komiti pengatur, raban volunteer enggau orang pemelanja ti udah besaup ngemujurka program nya.

Ku iya, pemeri enggau pengawa semua piak ukai semina mantu ngelempungka tating rayat ti begunaka bantu, tang mega ngenegapka pengelantang dalam mayuh macham raban bansa di nengeri tu.

“Tu meh penegap komuniti Sarawak lebuh rayat bemacham pupu bansa diau dalam gaya semengat bebasaka pangan diri, bekerejasama sereta besaup enggau pangan diri, kelebih agi maya musin pengerami,” ku iya.

Berebak enggau nya, iya madahka Perintah Gempung Parti Sarawak (GPS) ari baruh iring Premier Sarawak tetap komited mantu rayat napi pemar ungkus pengidup, nyengkaum empas ari rega barang ti niki ketegal penyarut di Asia Barat.

Berindik enggau nya ku iya, Perintah Sarawak udah nambahka penyampau Bantu Barang Diguna Pemun Sarawak (SKAS) dikena nentuka pengelantang rayat terus dijaga.

Iya madahka tikas bayar SKAS ungkup taun 2026 udah ditiki ngagai RM1,100 setaun ungkup ruang bilik, RM600 ungkup orang tuai enggau RM375 ungkup individu bujang.

Nitih ku iya, bayar SKAS diberi dalam tiga renggat lalu bayar renggat kedua berengkah kena 15 Mei tu tadi.

Lebuh nyimpul jaku iya, iya minta rayat terus nerenakka ulah pengerindu, penyiru enggau semengat beserakup dikena nentuka pengelantang enggau pengelikun Sarawak terus meruan.

Iya mega ngena awak nya meri Selamat Hari Gawai Dayak ngagai semua peranak Sarawak ti benung ngintu pengerami nya. – RBI

KUALA LUMPUR, 24 Mei – Menteri Kereja Raya Dato Sri Alexander Nanta Linggi nerangka pekit main bol final Piala Malaysia 2025/2026 entara Johor Darul Ta’zim (JDT) enggau Kuching City FC di Stadium Nasional Bukit Jalil malam tadi nyadi kelai penyerakup enggau pemansang positif main bol menua.

Ku iya, main ke diatur dalam gaya ke richah ukai semina mandangka kualiti main bol menua tu, tang mega mandangka semengat besemekih lumba enggau main ke tinggi ti mujur nyerakupka rayat ari mayuh bengkah nengeri.

“Nyadi peranak Sarawak, aku amat temegah ati meda Kuching City FC mujur mansang ngagai renggat kepenudi.

“Pejalai sida ngelama tu ukai muntang, tang semengat belaban ke dipandangka The Cats patut dipuji,” ku iya nengah siti tulis ba media rama sehari tu.

Berebak enggau nya, iya mega meri pengaga ati ngagai JDT ba pemujur sida ngangkatka Piala Malaysia sekali agi, lalu nerangka tim Harimau Selatan terus ngayanka konsistensyen enggau standard ke tinggi ba arena main bol menua.

Pekit final ti beprestij nya mega bela dikemataka Premier Sarawak, Datuk Patinggi Tan Sri Abang Johari Tun Openg enggau Menteri Besai Johor, Dato’ Onn Hafiz Ghazi begulai enggau lebih 50,000 iku penyukung ti ngemenuhka Stadium Nasional Bukit Jalil.

Nanta mega madahka, main bol seruran nyadi medium pemadu manah dalam nyerakupka mensia mayuh enda ngira penatai enggau nengeri.

“Tabi puji ngagai kedua-dua tim, pemain, jurulatih, penyukung enggau semua piak ti udah ngemujurka final ti besejarah tu.

“Semengat lumba enggau main meseti terus ditegapka ungkup penyulut main bol menua,” ku iya. – RBI

KUALA LUMPUR, 24 Mei — Sapit Menteri Pengerai Malaysia ke mega Kaban Parlimen P213 Mukah, Dato Hanifah Hajar Taib nyemetak madahka pesaka asal Sabah enggau Sarawak meseti terus diintu sereta dipebasa ngambika identiti pengaya komuniti Borneo mengkang relevan sereta dikerinduka rebak dudi hari.

Nitih ku iya, ngatur program bepelasarka budaya baka Pesta Asal Borneo (BNF) 2026 ukai semina nyadi medium dikena meri kelala penyelai main asal komuniti Borneo ngagai rayat di Semenanjung Malaysia, tang mega bejalaika tanggungpengawa ngenegapka penyerakup, kaul pangan diri enggau semengat komuniti ti bebida.

“Pengerami baka tu mandangka penegap menua Malaysia nyadi sebuah menua ti kaya enggau penyelai budaya enggau main asal.

“Pia mega muka ruang ngagai komuniti Sabah enggau Sarawak ngambika terus mantaika identiti, seni enggau pesaka asal sida ngagai mensia mayuh,” ku iya.

Iya madah munyi nya lebuh bejadika Pengerami Pengerami Bansa Asal Borneo (BNF) 2026 ke diatur ba Pasar Seni sehari tu tadi.

Pengerami ninting taun ke diatur Gerempung Sukaseni Kuala Lumpur ngempuruka komuniti Sabah enggau Sarawak beserimbai enggau pengerami ngintu Hari Kaamatan enggau Hari Gawai Dayak, lalu enggau nya nyadi pelasar dikena ngelakuka main asal, adat asal enggau pesaka asal komuniti Borneo di indu nengeri.

Sebedau pengawa bejadika pengerami nya, Hanifah mega nguluka pengawa pejalai budaya “Borneotroops” ti berengkah ari Begunan Sultan Abdul Samad lalu tembu ba Pasar Seni.

Pengawa bejalai nya narit ati temuai lebuh mandangka bemacham pekayan asal etnik ari Sabah enggau Sarawak ti ngayanka identiti budaya enggau semengat penyerakup komuniti Borneo.

Sepemanjai pengawa ngatur BNF 2026, bala temuai dibantaika enggau mayuh macham aktiviti ti narit ati nyengkaum pengawa pemerindang budaya, pengawa mandangka tradisyen etnik, kelimpah ari bansal bejual ti bisi nyual asil pengelandik jari, pemakai asal enggau produk menua tu ari kedua-dua nengeri.

Berebak enggau nya, Hanifah mega madahka pengerami nya nyadi pelasar beguna ngagai bala artis, orang dagang menua tu enggau komuniti ngambika terus ngemansangka potensial ekonomi kreatif bepelasarka budaya enggau pesaka asal menua tu.

Kelai nyukung pengawa ngetan sereta ngangkatka budaya Borneo, iya mega bisi nyuaka pemeri RM50,000 ngagai Gerempung Sukaseni Kuala Lumpur dikena mantu ngemujurka BNF 2026. – RBI

BINTULU, 24 Mei — Direktor Opis Betanam Betupi Sarawak, Dominic Chunggat ngenataika pengaga ati ngagai Opis Betanam Betupi (DOA) Betong enggau semua staft laban udah mujur ngatur program beserimbai enggau Gawai Betong 2026.

Nitih ku iya, tanggungpengawa nyadi Chairman Komiti Besai ukai pekara ke muntang laban begunaka komitmen ke tinggi, koordinasyen ke efektif sereta kerejasama rat entara opis enggau ejensi perintah ba renggat Bagi Menua.

Ku iya, pemujur ke dipandangka Leo Toni nyadi DAO Betong nyata ngayanka ketuai ke chukup manah dalam nempa kaul kereja ke manah ukai semina enggau ketuai opis di Bagi Menua Betong, tang mega ngaul ketuai politik enggau komuniti setempat.

“Enggau semengat kereja beraban ti tegap sereta beserakup, pemujur tu mandangka dedikasyen enggau profesionalisme semua kaban DOA Betong,” ku iya nengah penerang berita ari Bintulu sehari tu.

Berebak enggau nya, iya andal amat DOA Betong deka terus ngenyampatka transformasyen sektor betanam betupi, kelebih agi pemansang industri utai tanam pemakai ba kandang menua Betong.

Ku iya, pemujur bejalaika program rama enggau komuniti baka pengerami Gawai Betong 2026 mega nyadi pekara ti beguna dalam ngenegapka rentayan kerejasama sereta nentuka projek pemansang betanam betupi di bagi menua nya ulih dipejalaika enggau lanchar sereta efektif.

Iya mega ngenataika pengaga ati ngagai semua peranak DOA Betong laban terus ngangkatka pemanah nama Opis Betanam Betupi Sarawak.

Ba pengujung penerang nya, iya mega ngena awak nya meri Selamat Hari Gawai Dayak 2026 ngagai semua pemesai enggau staf DOA ti ngintu nya, pia mega Selamat Hari Raya Aidiladha ngagai orang Islam enggau Selamat Hari Wesak ngagai sida ti ngintu pengerami nya. -RBI

MATU, Mei 24 — Opis Kereja Raya (JKR) Bagi Menua Mukah majak ngerapitka kaul enggau komuniti menua pesisir nengah pengawa nyereta enggau chakah ba Pengerami Mantar Gawai 2026 di Rh. Atoh, Sungai Passin, ditu kemari.

Pengerami nya mega dikena nyadi pelasar bekunsika pemansang kemaya hari sentang projek pemansang infrastruktur ti benung dipejalaika ba sitak nya, kelebih agi projek ngaga Jalai Sungai Passin/Matu di Bagi Menua Mukah.

Injinir JKR Bagi Menua Mukah, Awang Dasuki Awang Dol madah, projek “Construction and Completion of Remaining Works for Proposed Jalan Sungai Passin/Matu” diatu udah ngerikod penyulut fizikal 77.94 peratus, lalu enggau nya dulu ari taga asal dipejalaika.

Nitihku iya, projek nya dipelabaka tembu penuh kena 7 Mac 2027 lalu deka meri pemaik ke besai ngagai peranak menua nya ari sukut rentayan komunikasyen sereta mega akses ekonomi enggau rama.

Berebak enggau nya, JKR mega ngelalau peranak ngambika enda nengah jalai ti agi digaga enggau nadai pemendar dikena nyeliahka risiko pengelikun sereta nentuka pengelanchar kereja ngaga ba palan projek nya.

Sama bisi ngulu atur pengawa nya, Kaban Kunsil Nengeri (ADUN) Daro, Dr. Safiee Ahmad, Pemesai Opis Pelilih Matu Hamdiah Halpi, Menijar Kuasa Karan Menua Pesisir Sarawak Energy Susana Jiil, bala ketuai komuniti enggau peranak ngelingi Sungai Passin. – RBI

MIRI, 23 Mei — Sapit Menteri ba Opis Premier Sarawak (Buruh, Imigresen enggau Pematau Projek), Datuk Gerawat Gala ngenataika pengaga ati ngagai semua kaban Rurum Kelabit Sarawak Cultural & Line Dance Group beserimbai enggau Pengerami Ngintu Ulang Taun Ke-9 raban nya malam tu tadi.

Nitihku iya, pejalai pengelama semilan taun ti berengkah kena 8 Mei 2017 enggau semina tujuh iku kaban sereta belatih ba baris kedai di Seberkas diatu udah mansang nyadi raban budaya ti regas sereta dipebasa enggau 23 iku kaban ti regas.

Ku iya, pemansang nya ngayanka pengawa ti ditumbuhka enggau ati ti lurus sereta rinduka budaya ulih ngerembai sereta meri empas ke besai ngagai komuniti.

“Aku berasai temegah amat ati meda baka ni raban tu udah mujur negika maruah seni enggau identiti komuniti Kelabit nengah bemacham pemujur ti ngemegahka ati,” ku iya lebuh bejaku ba Pengerami Makai Lemai Ngintu Ulang Taun Ke-9 Rurum Kelabit Sarawak Pampang Sarawak Miri.

Ku iya, entara pemujur raban nya bulih penuduk lumur empat ba pekit Long Dance beserimbai enggau Bazaar Gawai & Festival Etnobudaya Sarawak 2026, mansutka diri nyadi champian Bejalai Niti Daun Bagi Menua Miri 2025 enggau menang ba Pekit Tarian Asal Ngajat Renggat Nengeri 2023.

Ku iya nambah, raban nya mega ngarika Arang Kadang ba Pengerami Makai Lemai Nengeri beserimbai enggau pengerami Gawai di Kuching taun 2025 kelimpah chakah meri kelala budaya Kelabit nengah program “The Kelabit Lives in Kuala Lumpur” ba taun 2022 enggau 2023.

Kenu ku iya, penyereta baka nya beguna amat dalam ngangkatka penyelai budaya Sarawak ba renggat nasional enggau antarabansa.

Berebak enggau nya, iya mega muji pengawa raban nya ti chakah ngaul diri dalam program pengelantang pendiau enggau tanda pengasih ba mayuh bengkah endur nyengkaum di Miri, Sibu, Kapit, Bintulu, Brunei, Sabah enggau Semenanjung Malaysia.

Ku iya, seni budaya ukai semina nyadi medium pemerindang aja, tang mega ulih ngenegapka penyerakup, bekaban enggau semengat volunteer entara komuniti pupu bansa.

Iya mega muji komitmen raban nya ti seruran ngatur latih ngajat dua kali seminggu kelimpah ari sukung sida ngagai Pesta Nukenan Bario dikena nentuka pesaka asal terus diintu sereta dipeturun ngagai nembiak rebak baru.

“Perintah Sarawak seruran nyukung pengawa ngetanka budaya enggau pemansang seni pesaka bemacham pupu raban bansa di nengeri tu.

“Aku pechaya raban baka tu bejalaika tanggungpengawa ke besai dalam nentuka budaya mengkang idup sereta relevan sepemanjai maya,” ku iya.

Iya ngarapka Kumpulan Rurum Kelabit Sarawak Cultural & Line Dance Group deka terus mansang, ngadaka mayuh agi penari biak ti landik sereta nyadi duta budaya ungkup komuniti Kelabit di Sarawak, Malaysia enggau antarabansa. – RBI

BINTULU, 23 Mei — Pengawa bejalaika mayuh bengkah projek pemansang strategik di Bintulu majak ngenegapka penuduk bagi menua nya nyadi hab industri besai Sarawak, lalu enggau nya nyadi pemansut ke beguna ngagai penumbuh ekonomi nengeri tu.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madah, pemansang ti jampat dipejalaika perintah Sarawak ukai semina ngubah rampa pemansang Bintulu, tang mega muka mayuh agi peluang gawa sereta ngangkatka pengelantang pendiau peranak menua nya.

Ku iya, entara batang projek ke nyadi penyungkak pemansang di kandang menua nya nyengkaum Taman Perindustrian Samalaju, Loji Methanol Petrokimia, pemansang Jepak, pemansang kandang menua pesisir, Jematan Tun Taib sereta mega pemansang di kandang menua Tatau enggau Sebauh.

“Operasyen Loji Methanol Petrokimia di Bintulu mega ngenegapka industri hiliran Sarawak enggau kapasiti eksport.

“Taman Perindustrian Samalaju ti diungkupka ngagai industri ti begunaka kuasa baka aluminium, ferroalloy enggau polycrystalline silicon udah meri pangka ke besai ngagai pemansang ekonomi Sarawak,” ku iya lebuh ngenataika jaku pengelalu ba Program Sarawakku Sayang (SKS) 2026 Bagi Menua Bintulu, sehari tu tadi.

Program Sarawakku Sayang (SKS) 2026 Bagi Menua Bintulu, sehari tu udah dipenyadika Premier Sarawak, Datuk Patinggi Tan Sri (Dr) Abang Abdul Rahman Johari Abang Openg.

Nitih ku Dr Stephen Rundi, nyentuk taun 2025, sitak industri Samalaju udah nyendiaka peluang gawa ngagai urung 9,200 iku pekereja ke alai 82 peratus ari penyampau nya peranak Sarawak.

Ku iya, kandang menua nya mega mayar urung RM700 juta gaji ninting taun kelimpah meri RM6.2 bilion ngagai ekonomi kandang menua nengah sektor logistik, perengka pengangkut, utiliti, katering enggau ngintu.

Ku iya nambah, sitak nya mega ngerikod eksport produk logam asas ti beungkus RM16.58 bilion, lalu enggau nya ngayanka Bintulu ngembuan tanggungpengawa ti besai reti dalam ngenegapka ekonomi enggau sektor industri nengeri tu.

Dalam enggau pemansang ke bekaul, iya madahka projek Skim Ngemesaika Genturung Pendiau (SPK) Jelutong mega mandangka penyulut ke chukup meransang lebuh Renggat I mujur tembu ti ngaul 97 unit genturung pendiau ke diatu udah sedia endur diau.

Ku iya, Fasa II ke diatu benung chakah dipejalaika ngaul 768 lot dikearap ulih muka mayuh agi peluang ngempu rumah enggau pemansang komuniti baru ba kandang menua nya.

Program siri ketiga SKS 2026 mega digulu Sapit Menteri Besai, Fadillah Yusof begulai enggau bini iya Datin Amar Ruziah Mohd Tahir, tiga iku Sapit Premier Sarawak iya nya Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof Dr Sim Kui Hian.

Sama bisi datai Sekretari Perintah Nengeri Sarawak, Datuk Amar Mohamad Abu Bakar Marzuki, Speaker Dewan Undangan Nengeri Sarawak, Tan Sri Datuk Amar Mohamad Asfia Awang Nassar kelimpah bala menteri enggau menteri muda Kabinet Sarawak ke bukai. — RBI

SEBUYAU, 23 Mei — Pengawa muka Jematan Batang Lupar No.1 digambarka nyadi siti pemujur ke besai reti dalam pemansang infrastruktur Sarawak, ti ​​ukai semina ngemanahka rentayan penyambung jalai, tang mega mantaika penau profesyenal injinir menua tu.

Sebedau tu, penguna jalai alun bepanggai ba servis feri ti ngambi timpuh urung 30 ngagai 45 minit, kelimpah ari napi penanggul ketegal gaya hari, penanggul teknikal enggau penyekut.

Diatu, enggau pemisi jematan nya, pejalai nengah kandang menua Batang Lupar ulih dipandakka ngagai urung lima minit aja.

Nengah pemanjai urung 4.844 kilometer, jematan tu diaku nyadi jematan meraka sungai pemadu panjai di Malaysia.

Iya digaga nitihka standard JKR R5, enggau jalai kerita tunggal dua lurung, struktur besai bansa kabel besapit pemanjai 598.8 meter enggau pemendar navigasyen 250 meter pemesai enggau 26 meter peninggi, nyadika iya siti ari tanda injinir moden di Sarawak.

Di belakang pemujur fizikal, perati mega diberi ngagai pemeri besai penyanding penemu injinir menua tu ti bisi kaul sepemanjai kesemua pengawa bejalaika projek.

Nitihka penerang ari injinir Hwang Hii, iya nyemetak madahka pemujur projek tu disukung pengawa teknikal ti nyengkaum pansik konsep, langkar tumu, langkar silik, pengawa matau pengawa ngaga, kelimpah ari pengawa bejalaika pengawa nyamin enggau nyaga kualiti (QA/QC) nyentuk ngagai “defect liability period”.

“Pengawa tu jarang dipeda mensia mayuh, tang iya beguna amat dikena nentuka pengelikun, pengelama enggau pemujur kesemua projek tu,” ku iya.

Iya mega nerangka konsultan injinir menua tu ngaul diri enggau komprehensif ari konsep, langkar, renggat ngaga nyentuk renggat kepenudi projek nyengkaum timpuh “defect liability period”.

“Tu ukai projek ti semina ngaul konsultan menua tu. Pemar ba langkar, ngaga, koordinasyen enggau peminta QA/QC udah diputarka sepenuh iya ulih raban profesyenal menua tu,” ku iya nerang.

Hwang mega ngemeratka injinir profesional ti ngembuan Setipikit ‘Amalan Professional’ megai tanggungpengawa ke besai nyengkaum tanggungpengawa timpuh panjai ungkup langkar enggau ‘pensijilan’ projek.

“Aku nemu pekara tu laban aku mega kala ngaul diri dalam tim perunding injinir. Siti pekara ti ngemegahka ati sereta basa meri bantu ngagai projek ke nyadi kelai tu,” ku iya.

Iya nerangka projek tu nyadi bukti ke nyata madahka pengelandik menua tu ulih bejalaika projek infrastruktur tikas dunya enggau enda bepanggai ba penyanding penemu ari menua luar ari sukut langkar enggau pengawa matau.

Projek tu mega ngaul mayuh bengkah piak nyengkaum Perintah Sarawak, Opis Kereja Raya Sarawak, kunteriktor, konsultan enggau tim kereja ba palan projek.

“Tabi puji ngagai semua piak ke bisi kaul. Sehari tu, aku kelebih agi deka ngaku tim ke suah enda dipeda, penyanding penemu injinir menua tu ke bejalaika tanggungpengawa ke beguna amat ngemujurka projek tu,” ku iya.

Iya nyemetak madahka projek tu ngayanka pengulih Sarawak ba pengawa merambu, ngelangkar, ngaga sereta nembuka projek infrastruktur besai enggau pengelandik menua tu.

“Perintah Sarawak ulih merambu, ngelangkar pelin, ngaga sereta bejalaika pengawa. Raban profesyenal injinir menua tu patut nerima aku ti patut,” ku iya. — RBI