LUBOK ANTU, 2 Jun — Siku lelaki beumur 31 taun dikeirauka lemas pengudah diripotka lenyau maya mandi ba kandang Tekat Hidro Batang Ai, lemai tu tadi.
Nitihka penerang ari Opis Bomba enggau Penyah Penusah Malaysia (JBPM), Balai Bomba enggau Penyah Penusah (BBP) Betong nerima kangau ngenyit bekaul enggau penusah nya urung pukul 6.06 lemai.
Tudah udah dikelala enggau nama Rudie anak Langup. Berindik ari ripot ke diterima, tim penyelamat terus dianjung ngagai endur nya bejalaika operasyen ngiga enggau nyelamat (SAR).
“Tim operasyen nya betuaika Ketuai Pemesai Bomba Muhammad Badrulamin Mohamad Fodzi begulai enggau Pemesai Operasyen Balai, PBK I TBK II Abang Muhammad Fhazl Abang Abdul Manaf, lima iku raban ari Tim Penyelamat Ai (PPDA) enggau empat iku ari raban Pasukan Bomba Sukarela (PBS) Lubok Antu,” ku penerang nya.
JBPM madah, raban penyelamat ngena sebuah van Urvan, sebuah kerita pacuan empat roda Hilux enggau sebuah bot SDMC bejalaika operasyen SAR ba palan penusah nyadi.
Nitihka penerang keterubah ke diterima, tudah dipelabaka nurun ngagai kandang tekat ai nya laban deka mandi sebedau diripotka lenyau ari peda mata.
“Operasyen ngiga diatu benung dipejalaika raban penyelamat ngelingi palan penusah ke nyadi dikena ngiga tudah,” ku penerang nya.
“Naka berita tu ditulis, mansa bedau ditemu lalu operasyen SAR agi dipejalaika” ku penerang.
Opis bomba madahka, pemansang ke silik agi bekaul enggau operasyen nya deka dipadah ari sesiti maya ngagai sesiti maya bepelasarka gaya ke diatu ba palan penusah nyadi. — RBI
#Beritalban | Ruai Berita Iban
Rinduka | Titihka | Kunsika
Sumber, photo — BetongXcess
