SONG, 5 Julai — Pengudah dua hari operasyen ngiga enggau nyelamat, siku lelaki beumur 56 taun ti dikeirauka lemas pengudah labuh ari perau pengujung iya ditemu midang di Sungai Bangkit, Katibas, lemai tu tadi.
Tudah ke benama Sumok anak Jugah ditemu peranak rumah panjai urung pukul 2.55 lemai, urung 100 meter ari endur perau iya ditemu.
Raban operasyen udah nya mai tubuh tudah pansut ari palan nya urung pukul 3.10 lemai ngena perau panjai begulai enggau raban polis sebedau datai ba Jelatung Pasar Song urung pukul 5 lemai.
Nangkanka nya, tubuh tudah udah nya diserahka ngagai polis ngambika ulih bejalaika atur ke silik agi.
Operasyen SAR hari kedua betuaika Ketuai Balai Bomba enggau Penyah Penusah (BBP) Song, PPgB Azman bin Haji Hanapis, begulai enggau kaban BBP Song enggau Unit Penyidi K9 Opis Bomba enggau bantu ukui penyidi, Bella.
Pengawa nyidi nya dipejalaika ngena chara ngoga atas ai dalam kandang radius urung tiga kilometer ari Nanga Sungai Bangkit ngagai endur perau iya ditemu, lalu dipanjai satu kilometer ke ulu sungai.
Operasyen besai nya mega ngaul tujuh iku raban Polis Diraja Malaysia (PDRM), lima iku raban Penyaga Orang Periman Malaysia (APM), tiga iku raban Opis Bomba Volunteer (PBS) enggau 27 iku peranak rumah panjai ngena 18 buah perau panjai.
Ba hari keterubah, operasyen ngiga dipejalai dalam radius urung 30 kilometer ngena perau panjai enggi polis, APM enggau peranak rumah panjai berindik ari gaya sungai ti enda dalam ti enda ulih ditengah perau bomba.
Endur penusah nya nyadi jauh ke dalam menua enggau pejalai 27 kilometer nengah jalai alun ari BBP Song ngagai Nanga Banjor sebedau nampung urung 30 kilometer nengah sungai ngagai Nanga Sungai Bangkit.
Operasyen SAR tembu abis pukul 5 lemai pengudah tudah mujur ditemu. – RBI
#ruaiberitaiban#newsiban#beritaiban
Rindu | Titih | Kunsika
