LUBOK ANTU, 2 Jun — Siku lelaki diripotka lenyau sereta dipelabaka lemas maya mandi ba kandang Tekat Ai Hidro Batang Ai lemai tu tadi ditemu lesi ba operasyen ngiga enggau nyelamat (SAR) ti dipejalaika Opis Bomba enggau Penyah Penusah (JBPM) Sarawak malam tu tadi.
Tudah dikelala enggau nama Rudie Anak Lan, 31, ditemu raban Raban Penyah Penusah Ai (PPDA) ari Balai Bomba enggau Penyah Penusah (BBP) Betong urung pukul 9.41 malam ba penalam urung lima meter, besemak enggau endur kepenudi iya diripotka lenyau.
Nitihka penerang ari Opis Bomba enggau Penyah Penusah Sarawak, sida nerima kangau ngenyit bekaul enggau penusah nya urung pukul 6.05 lemai sebedau tim kaban ari BBP Betong dianjung ngelawa endur penusah nya nyadi, ke bepalan urung 70 kilometer ari balai nya.
Penerang keterubah tetemuka tudah benung belelak enggau sida sebilik ba kandang tekat nya sebedau dipelabaka iya terejun ke ai deka mandi.
Taja pia, tudah enda ayan baru, lalu ngujungka sida sebilik irau ati.
Pengawa ngiga keterubah ari sida sebilik enda mujur tetemuka tudah sebedau bantu ari piak bekuasa dipinta.
Raban penyelamat betuaika Pemesai Bomba Kanan I, Abang Mohd Fadzil Abang Abdul Manaf begulai enggau Panglima Operasyen, PPgB Muhammad Badrulamin Mohammad Fodzi, datai ba endur nya urung pukul 7.18 malam lalu ngatur pengawa meri penerang operasyen begulai enggau Polis Diraja Malaysia (PDRM) sebedau pengawa nyidi nya dipejalaika.
Pengawa nyelam keterubah dua iku kaban PPDA pukul 8.25 malam enda mujur.
Operasyen udah nya ditampung enggau nyelam kedua kali urung pukul 9.40 malam ba kandang endur ke sama sebedau mansa ditemu seminit udah nya.
Tubuh niang udah dibai ngagai ngagai atas au, udag nya lalu diserah ngagai polis urung pukul 9.55 malam ngambika atur enggau pansik silik agi dipejalaika.
Operasyen SAR nya mungkur enam iku kaban BBP Betong enggau bantu sebuah van Urvan, sebuah entukar Hilux enggau sebuah bot fiber.
Sama bela mantu dalam operasyen nya, tujuh iku kaban PDRM, empat iku raban Angkatan Pertahanan Awam Malaysia (APM) enggau empat iku raban Bomba Sukarela (PBS).
Operasyen nya diketuka pengudah mansa mujur ditemu lalu kes nya diserah ngagai polis ngambika atur nangkanka nya dipejalaika. — RBI
#Beritalban | Ruai Berita Iban
Rinduka | Titihka | Kunsika
Sumber — BetongXcess
Photo — JBPM Sarawak
