SPAOH, 5 Julai – Projek ngaga Rumah Belelak Betong ke beungkus RM10 juta diatu udah nyapai penyulut 65 peratus lalu disadang tembu penuh taun baru, lalu enggau nya nyendiaka perengka guna endur diau rasmi ke lantang agi sereta nangkup guna Bagi Menua Betong.
Sapit Premier Sarawak, Datuk Amar Douglas Uggah Embas madah, projek nya dipejalaika nitihka timpuh ke udah ditetapka enggau pejalai kereja ba palan nya chukup ngemuaska ati bepelasarka penerang ke pemadu baru ke diterima.
Ku iya, sesi mega meri penerang ke nyengala senentang status bejalaika projek kelimpah ari sekeda sukut pengawa ngemanahka ti patut diperatika dikena nentuka perengka guna ke digaga nitihka standard ke udah ditetapka.
“Projek tu bejalai enggau lanchar. Sehari tu kami diberi penerang ke silik lalu pejalai pengawa ngaga nya udah manggai 65 peratus. Kami mega berandauka beberapa pekara ke patut dikemanahka agi lalu pelaba aku randau nya amat produktif,” ku iya.
Iya madah munyi nya lebuh dikerandau media pengudah ngulu Taklimat Projek Rumah Belelak Betong ba Bilik Aum Opis Pelilih Mit Spaoh, kena Hari Minggu.
Nitihku iya ke mega Kaban Kunsil Nengeri (ADUN) Bukit Saban, pengawa ngaga Rumah Belelak nya beguna amat laban Betong suah nyadi palan endur ngatur bemacham program rasmi perintah, tang agi kurang perengkaguna endur diau ke chukup.
Gaya tu ngujungka sekeda deligit enggau temuai rasmi patut ngiga endur diau ba Sri Aman tauka Kuching.
“Kitai ngarapka taun baru Betong bisi Rumah Belelak kediri empu.
“Mayuh program rasmi diatur ditu lalu perengkaguna endur bemalam ke bisi disediaka bisi tatak.Palan tu deka meri servis ke manah agi ngagai Betong,” ku iya.
Iya ngarapka projek nya ulih ditembuka nitihka timpuh dikena ngenegapka perengkaguna endur diau rasmi kelimpah nyukung pengawa ngatur program perintah enggau pemansang di Bagi Menua Betong. — RBI
#ruaiberitaiban#newsiban#beritaiban
Rindu | Titih | Kunsika
Sumber, photo — Opis Sapit Premier 1
