KUCHING, 5 Julai — Raban Nembiak Parti Rakyat Sarawak (PRS) ngansak Perintah Besai nengah Parlimen Malaysia ngenyampatka pengawa ngemendarka perambu nambahka 17 penuduk baru Kunsil Nengeri (DUN) Sarawak ti udah dikemendarka Kunsil Nengeri (DUN) Sarawak ba taun 2025.

Ketuai Nembiak PRS, YB Ir. Christopher Gira Sambang, madahka pengelaun ngemendarka perambu nya tusah diperetika laban nya setipak enggau penetap Konstitusyen Perintah Besai ti ngemendarka pengawa meresa sitak ari sesiti maya ngagai sesiti maya.

Nitih ku iya, pengudah timpuh lapan taun nadai dipansik baru, penambah penuduk nya engkeman dikena beratika pemesai menua Sarawak, penambah penyampau tubuh sereta pematut ngenegapka pemanah pengawa meri servis ngagai rayat.

Berebak enggau nya, Raban Nembiak PRS mega nyemetak madahka pengawa mansik baru pengawa magi penuduk parlimen ungkup Sabah enggau Sarawak enda patut ditangguh dulu.

Ku iya, pengudah Singapura melekaka diri ari Malaysia dalam taun 1965, pengawa mansik baru pengawa magi penuduk parlimen patut udah dipejalaika dikena ngayanka semengat asal Sempekat Malaysia 1963 (MA63).

Pemuntan bejalaika pengawa nyerenih nya ku iya, udah ngasuh hak Sabah enggau Sarawak majak tejanggal.

“Pengawa bejalaika MA63 enda ulih ditangguh agi.

“Hak Sabah enggau Sarawak baka ke udah ditulis dalam MA63 enggau Konstitusyen Perintah Besai meseti dipejalaika enggau penuh pengelurus ati sereta komitmen,” ku iya nengah sebengkah penerang sehari tu.

Iya nyemetak madahka Raban Nembiak PRS mengkang pro-Malaysia, tang berebak enggau nya bepegai tegap ba prinsip “MA63 dikenuluka”.

“Ngamatka hak Sabah enggau Sarawak enda ngelemika Perintah Besai, tang lebih agi ngenegapka penyerakup enggau pelasar penumbuh Malaysia,” ku iya.

Berindik enggau nya, Raban Nembiak PRS ngansak Perintah Besai enggau semua Kaban Parlimen ngenyampatka pengawa ngemendarka penambah 17 sitak baru DUN Sarawak sereta bejalaika pengawa meresa enggau komprehensif agih sitak parlimen ungkup Sabah enggau Sarawak senutuk enggau Konstitusyen Perintah Besai enggau semengat MA63. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 5 Julai — Malam Budaya Kelab Nembiak Asal Bukit Saban (KAABS) 2026 nyadi pelasar ke beguna dalam nyerakupka raban nembiak Bukit Saban ke diau di Kuching, kelimpah ari ngerapitka kaul pangan diri, nerenakka semengat begulai, beserakup sereta nentuka adat enggau budaya asal diteruska generasyen jemah ila.

Pengawa ti berambaika leka jaku “Celebrating Culture, Unity and Friendship” nya mega nyadi pelasar dikena ngenegapka penyerakup komuniti Dayak sereta penyambung rayat enggau ketuai nengeri, kelimpah muka ruang interaksyen dua piak bekaul enggau polisi enggau inisiatif pemansang Perintah Sarawak.

Sapit Premier Sarawak Datuk Amar Douglas Uggah Embas ke mega Kaban Kunsil Nengeri (ADUN) N.37 Bukit Saban, madah, program ti bepelasarka budaya baka tu ukai semina ngangkatka identiti enggau pesaka asal komuniti Dayak, tang mega bejalaika tanggungpengawa ke berat dalam ngenegapka kaul rama enggau penyerakup komuniti.

Iya madah munyi nya lebuh bejadika Malam Main Asal KAABS 2026 ti udah diatur ba sebengkah Hotel tebilang di Kuching, ditu malam kemari.

Nitih ku iya, ngatur aktiviti main asal mega nyadi pelasar beguna dalam ngenegapka identiti raban nembiak sereta ngerapitka kaul diri sebilik entara komuniti Bukit Saban ke ba luar kandang menua nya.

Berebak enggau nya, iya nyemetak madahka raban nembiak meseti ngerebut peluang ke disediaka nengah Strategi Pemansang Pengudah COVID-19 2030 (PCDS 2030), kelebih agi dalam bidang pelajar, pengawa dagang, ekonomi digital, tenaga gadung, pemansang pemintar tiru (AI) enggau modal mensia.

“Raban nembiak nyadi reta pemadu berega Sarawak. Sida patut ngerebut peluang ti disediaka perintah dikena ngangkatka penemu, pengelandik enggau daya besemekih sida, laban kuing nengeri tu jemah ila bepanggai ba penyereta rebak baru ti chakah,” ku iya.

Ngenang sukut pemansang di Bukit Saban, Uggah madahka Perintah Sarawak terus ngemeratka pemansang infrastruktur enggau ekonomi, nyengkaum pengawa ngenegapka potensial Bukit Sadok nyadi palan dagang temuai bepelasarka sejarah enggau pesaka asal.

Iya mega madahka Jematan Sungai Paku udah tembu digaga lalu deka dipenyadika ujung bulan Julai, lalu ari nya ulih ngemanahka agi rentayan penyambung jalai sereta nyungkak aktiviti ekonomi kandang menua.

Kelimpah ari nya, Perintah Sarawak udah ngemendarka agih belanja sepenyampau RM25 juta dikena ngangkatmanah Jalai Ulu Rimbas ti nyadi pengawa ti enda ngetu dikena ngenegapka perengkaguna infrastruktur ba sitak nya.

Uggah mega nerangka sepenyampau RM1.5 bilion udah diungkupka dikena bejalaika mayuh bengkah projek ari baruh Ejensi Pemansang Bagi Menua Betong (BDDA), enggau tetiap sitak Kunsil Nengeri (DUN) di Bagi Menua Betong nerima urung RM200 juta ungkup pengawa bejalaika projek pemansang rayat.

Ba sektor ekonomi menua pesisir, urung RM9 juta udah diungkupka ungkup projek betanam betupi di Bukit Saban nyengkaum nanam sawit enggau lada dikena nyungkak penatai pemisi ruang bilik peranak menua nya.

“Batang fokus Perintah GPS iya nya ngenegapka ekonomi rayat sereta nyungkak penatai pemisi ruang bilik.”

“Bemacham inisiatif udah disediaka lalu rayat diperansang ngerebut peluang ke bisi disediaka,” ku iya.

Iya mega ngelalau KAABS terus bejalaika tanggungpengawa enggau chakah dalam ngatur program pemansang nembiak ti mungkur pekara pelajar, lumba enggau main, pengawa dagang enggau nempa ulah dikena ngadaka rebak ti kompetitif sereta sedia ngiring Sarawak jemah ila.

Pengerami makai lemai nya mega dirichah enggau pengawa mandangka main asal Iban ari ASADIA enggau GOAS, mandangka seni, budaya enggau pesaka asal komuniti Dayak ke nyelai ngagai bala ke bisi datai.

Pengawa ngatur Malam Budaya KAABS 2026 sekali agi ngayanka pangku pengawa nyadi pelasar penyerakup raban nembiak di Bukit Saban di Kuching, kelimpah ari ngenegapka identiti budaya, ngetanka pesaka asal sereta nerenakka semengat begulai entara komuniti. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTANGOR, 5 Julai — Polis deka terus chakah agi bejalaika operasyen ngelaban aktiviti lumba enggau ngubah mutosikal nadai pemendar ninting ujung minggu enggau hari besai dikena nentuka pengelikun penguna jalai alun di pelilih Meradong.

Ketuai Polis Pelilih Meradong, DSP Tansli Mering madahka, piak iya beratika aktiviti samseng jalai alun enggau berat laban ukai semina ngeruga orang ke nepan kerita, tang mega ngeruga pengelikun penguna jalai alun bukai.

Nitih ku iya, dalam Op Mutosikal ti dipejalaika ba kandang menua Batu 8, Jalai KJD, Bintangor tumu pagi Hari Minggu tu tadi, sepenyampau 17 iti saman dikeluarka, seraya lima buah mutosikal udah dirampas.

Operasyen ke berengkah ari pukul 12 tengah malam nyentuk pukul 3 pagi nya dipejalaika dikena ngelaban aktiviti lumba enggau ngubah mutosikal enggau chara belalai, kelimpah ari nentuka deriba nitihka undang-undang enggau spesifikasyen perengka pengangkut ke udah ditetapka.

Entara penyalah ke ditemu iya nya nadai lisin deriba, ijus ke diubah, nadai cheremin tisi, lumur rejista enda nitihka spesifikasyen, struktur perengka pengangkut ke udah diubah enggau Lisin Perengka Pengangkut Bemotor (LKM) ke udah abis timpuh.

Lima buah mutosikal mega dirampas ari baruh Seksyen 60 Akta Pengangkutan Jalan 1987 ngambika atur ke bukai dipejalaika.

Berebak enggau nya, Tansli ngingatka bala apai indai ngambika matau pemindah anak sida kelebih agi maya malam hari dikena nyeliahka sida ngereja pengawa ti enda manah ke ulah tauka ngelanggar undang-undang.

Apai indai mega dilalau nentuka anak sida enda ngubah mutosikal sida, kelebih agi bekenaka ijus ti inggar ti tau ngachau pengelantang komuniti menua nya.

Iya nyemetak madahka operasyen ke baka nya deka terus dipejalai enda ngetu ninting ujung minggu enggau hari besai dikena nentuka sereta nitihka undang-undang jalai alun lalu dikena ngelaban aktiviti lumba enggau ngubah mutosikal ke enda beradat. – RBI

#ruaiberitaiban#newsiban#beritaiban

Rindu | Titih | Kunsika

MERADONG, 5 Julai — Siku lelaki peranak menua tu beumur 26 taun ditan pengudah dipelaba bisi kaul enggau aktiviti dadah nengah Operasyen Saringan Khas Sarawak di pelilih Bintangor, kena Hari Satu tu tadi.

Ketuai Polis Pelilih Meradong, DSP Tansli Mering madah, saspek ditan urung pukul 12.35 tengah hari ulih Pasukan Petugas Indu Opis Polis Pelilih (IPD) Meradong ke benung bejalaika operasyen nya.

Nitihku iya, saspek udah nya dibai ngagai IPD Meradong ngambika atur silik agi dipejalaika.

“Asil peresa ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka saspek positif amphetamine enggau methamphetamine,” ku iya ba sebengkah penerang.

Pengawa meresa baru rikod ke udah tetemuka saspek nadai ngembuan sebarang rikod jenayah tauka penyalah bekaul enggau dadah.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui RM5,000 tauka jil enda ngelui dua taun enti dikenuku salah.

Tansli nyemetak madahka IPD Meradong beratika pengawa salah guna dadah ba genturung pendiau enggau berat lalu enda belembut ba aktiviti nya.

Iya mega minta komuniti terus meri kerejasama ngagai polis nengah chara meri sebarang penerang bekaul enggau aktiviti dadah di pelilih Meradong.

Penerang tau dikenataika ngagai Balai Polis Bintangor nengah lumur 084-693222. – RBI

#ruaiberitaiban#newsiban#beritaiban

Rindu | Titih | Kunsika

SARATOK, 5 Julai — Olivia Minda Anak Boobi dipadu nyadi Champion Pekit Ratu Kebaya Indai Urang beserimbai enggau Pengerami Ngiling Tikai Bagi Menua Betong 2026 pengudah mujur ngalahka semilan iku penyereta bukai ke bela enggau bepekit ba pekit nya, ditu kemari.

Pengerami ti richah nya nyadi saksi pekit penuh semengat entara pesereta ti mandangka pemanah enggau penyelai ngena baju kebaya ti nyadi kelai pesaka asal komuniti Sarawak.

Gelar lumur dua diempu Jesica Mai Anak Geraman, lalu lumur tiga dipenggi Noor Suzilawani Binti Suhaili.

Semua pesereta udah ngayanka komitmen, pengandal enggau ulah lumba enggau main ke tinggi sepemanjai pekit nya.

Pengawa ngakim pesereta dipejalaika panel akim profesional bepelasarka kriteria ke udah ditetapka, nyengkaum gamal, pengarap diri enggau pengangkun ngagai pekayan asal ke dipandangka.

Jabatan KEMAS Saratok ti nyadi pengatur pengawa meri besai terima kasih ngagai Komiti Ngiling Tikai Bagi Menua Betong 2026 ketegal pengandal ti diberi bejalaika pekit tu kedua kali.

Pengandal tu amat dipebasaka lalu nyadi pelasar ngagai pengawa KEMAS ti terus ngenegapka program pemansang komuniti ti bepelasarka seni, budaya enggau pesaka asal.

Pengerindu mega diberi ngagai semua piak ti bisi kaul nyengkaum komiti pengatur, panel akim, penaja, staf enggau penyukung ti bisi datai ngerichahka agi pengawa nya, lalu enggau nya ngemujurka program nya.

Pengawa ngatur pekit tu dipeda udah mujur nyapai juluk dalam negika seni, budaya enggau pesaka komuniti Sarawak, kelebih agi pengawa ngena kebaya nyadi identiti enggau temegah ati bekunsi.

Edisyen pekit taun tu mega digulu semilan iku penyereta bukai ke sama besai iya nya Nancy Anak Bujang @ Nurfaizah Abdullah, Venessa Anak Bujang, Hamidah Binti Abdullah @ Margaret ak Ujai, Rose Anak Bujang Johari, Noorliana Binti Nordin, Azelina Binti Binti Masi Nordin enggau Noora.

Pengerami pekit mega bisi digulu temuai dipebasa Kaban Kunsil Nengeri (ADUN) Krian YB Friday Belik. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SRI AMAN, 5 Julai – Kaban Kunsil Nengeri (ADUN) Bukit Begunan, Datuk Mong Dagang udah ngemendarka agih belanja RM10,000 ngagai Komiti Pemansang enggau Pengelikun Genturung Pendiau (JKKK) Rumah Clement sereta RM4,000 ngagai Biro Indu Rumah Clement.

Ku iya, tu bukti Perintah Sarawak dikemudi Gempung Parti Sarawak (GPS) majak ngemeratka pemansang modal mensia enggau peranak menua pesisir nentuka pengelantang ulih diasai semua.

Iya nyebut pekara nya ba Program Tuai Begulai enggau Rayat di Rumah Clement, Selanjan Angkong, ditu Hari Enam tu tadi.

Ku tandu iya, pengawa nya dipejalai nengah mayuh inisiatif ke ngemeratka pelajar, latih pengelandik enggau ngangkatka tikas idup rayat.

Berebak enggau nya, iya madahka Perintah Sarawak mega ngemeratka pemansang infrastruktur baka jalai alun, bekal kuasa karan enggau ai beresi dikena ngedutka takah pemansang entara mengeri enggau menua pesisir.

“Perintah nengeri naka ulih nentuka peranak menua pesisir enda tinggak, ari meri mayuh agi peluang nambah penemu, pengelandik enggau ekonomi,” ku iya.

Ku iya, tuju pengawa nya nentuka pengelantang ulih diasai ke semua rayat. – RBI

#ruaiberitaiban#newsiban#beritaiban

Rindu | Titih | Kunsika

KAPIT, 5 Julai — Program ‘Jelajah Jom Sedia’ Indu PRS 2026 ke diatur Gerakan Indu, Biro Pelajar Indu Parti Rayat Sarawak (PRS) nyadi inisiatif strategik dikena ngenegapka semengat berjuang organisasyen sereta nambahka penyendia raban Indu Sarawak nengah jentera PRS.

Program tu udah berengkah ba Zon Tengah ti ngaul kandang menua Kapit, Kanowit enggau Tamin, nyadi pelasar ti beguna dikena ngerapitka kaul, ngatur pengawa sereta nyerakupka kuing bala indu parti.

Pengerami bejadika program nya dipenyadika Ketuai Indu Parti Rayat Sarawak (PRS) YB Dato’ Sri Doris Sophia Brodie, ke mega Kaban Parlimen P202 Sri Aman.

Program tu udah nyadi kena 4 Julai 2026 (Hari Enam), pukul 11.00 pagi, ba Balai Mensia Mayuh Kampung Muhibbah, Bletah, Kapit.

Dalam jaku dipansutka iya, iya ngemeratka pemesai guna raban indu dalam ngenegapka penegap organisasyen parti enggau pangku pengawa sida nyadi penyaup besai ngagai rampa politik ke diatu.

Ku iya, Orang Indu PRS meseti seruran nyikap diri, beserakup sereta seruran komited dalam ngenegapka pengawa bejuang, meri kuasa ngagai parti sereta seruran nyukung agenda pemansang Sarawak.

Program tu mega ngemeratka pangku pengawa orang indu nyadi raban pengundi ti beguna di Sarawak, ti ​​ulih nyadi penentu ba tetiap pengawa bepilih enti digerakka enggau chara teratur sereta beserakup.

“Orang indu nyadi tulang belakang penegap parti. Lebuh orang indu beserakup, bedisiplin sereta komited, sida ulih nyadi pelasar besai pemujur bejuangka parti ba semua renggat,” nyadi siti ari batang pekara ti dikemeratka dalam program nya.

‘Jelajah Jom Sedia’ Indu PRS 2026 deka diteruska ngagai Zon Utara ti mungkur kandang menua Belaga, Murum, Kakus enggau Samalaju, sebedau ngerembai ngagai zon bukai di serata Sarawak dalam pengawa ngenegapka pejalai raban indu renggat baruh parti nya.

Program tu dikearap ulih terus meransang semengat bejuang, ngenegapka organisasyen sereta nentuka Indu PRS seruran nyikap diri, teratur sereta liat ati napi pemar politik kemaya hari, kelebih agi sebedau Pengawa Bepilih Nengeri (PRN) enggau Pengawa Bepilih Besai (PRU) ti deka datai.

Rambai jaku program, “Beserakup Mai Pengelantang Nuju Pemansang” mandangka semengat beserakup, sepenemu enggau aspirasyen nuju penyulut ti enda ngetu ba raban Indu PRS di serata Sarawak.

Sama bisi ngulu program tu Kaban Kunsil Nengeri (ADUN) Baleh Nicholas Kudi Jantai enggau ADUN Pelagus Wilson Nyabong Ijang — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SELANGAU, 4 Julai — Penyelai budaya enggau pemanah basa komuniti Iban majak narit ati temuai antarabansa lebuh seraban temuai ari menua China nemuai ngagai Rumah Dennis, Amang Ulu ngasaika kediri empu pengidup, adat enggau pesaka komuniti rumah panjai nya.

Penemuai nya meri awak ngagai bala temuai ngasaika peneleba main asal nengah pemakai asal, pengawa mandangka main asal enggau muzik Iban ti disediaka komuniti menua nya.

Lebih ari semina nemuai aja, program tu mega nyadi pelasar betukar budaya ti meri kelala identiti penyelai komuniti Iban ngagai temuai ari menua luar.

Pemujur pengerami nya asil ari kerejasama rat ari selampur komuniti Rumah Dennis ti besaup nyendiaka diri, nyengkaum bebelika barang ke diguna, nyendiaka pemakai asal, ngias rumah panjai sereta ngemujurka pengawa mandangka budaya.

Semangat bekunsi pemerat, bekunsika pengawa nyata bendar dipeda lebuh genap iku raban komuniti bejalaika tanggungpengawa diri empu dikena nentuka temuai ulih ngasaika pengawa enggau penulin pengawa nerima temuai komuniti rumah panjai.

Komiti Pemansang enggau Pengelikun Genturung Pendiau (JKKK) Rumah Dennis netapka penemuai nya nyadi peneleba ti besai reti dalam pengawa ngetanka adat enggau main asal, kelimpah ari mantaika pesaka asal Iban ngagai serata dunya.

Komuniti Rumah Dennis mega meri besai terima kasih ngagai semua piak ti udah mantu enggau komitmen ngemujurka penemuai nya.

Pengawa baka tu ukai semina mantu nentuka pesaka asal Iban terus idup sereta diturunka ngagai rebak dudi hari, tang mega bisi potensial ngenegapka penuduk rumah panjai nyadi palan dagang temuai budaya ti meri peneleba ti tulin ngagai temuai antarabansa. – RBI

#ruaiberitaiban#newsiban#beritaiban

Rindu | Titih | Kunsika

SARIKEI, 5 Julai — Tiga iku lelaki bebadi nyawa nyengkaum siku tepelanting ari kerita, ba penusah aksiden ti ngaul dua buah kerita ba P-Turn 1-41B, Jalai Besai Pan Borneo Sarikei-Sibu, malam Hari Enam tu tadi.

Siku agi lelaki beumur 40 taun ke deriba kerita pikap single-cab diripotka bakal mimit.

Niang dikelala enggau nama Vincent Engan Tula, 33 taun, Stevenson Sigau Ujang anak Satin, 20 enggau Muhammad Saerozi, 41 taun, peranak menua Indonesia.

Balai Bomba enggau Penyah Penusah (BBP) Sarikei nerima kangau ngenyit urung pukul 8.31 malam sebedau Raban Timbal Operasyen (PKO) datai lalu berengkah beoperasyen urung pukul 8.48 malam.

Komander Operasyen, PBK II Dingat Ngadi madah, penusah aksiden nya mungkur sebuah pikap double cap enggau tiga iku mansa enggau sebuah single cap dikena siku deriba.

Nitihka penerang iya, siku ari mansa ke dalam kerita double cab nya tepelanting pansut, lalu dua iku ke bukai tepekul dalam kerita nya.

Raban bomba udah nya ngena perengka penyelamat khas mansutka dua iku mansa ke tepekul nya.

Ketiga-tiga mansa ke dalam kerita double cab nya dientaska bebadi ba palan penusah nyadi ulih tim perubat Opis Menteri Pengerai Malaysia (KKM), lalu deriba single cab tunggal nya semina bakal mimit aja.

Operasyen nya ngaul semilan iku kaban BBP Sarikei enggau bantu 13 iku raban Polis Diraja Malaysia (PDRM), enam iku raban Angkatan Penyaga Orang Periman Malaysia (APM) enggau dua iku raban KKM.

Raban bomba mega bejalaika pengawa meresi bekau penusah aksiden nya sebedau operasyen tembu enggau penuh urung pukul 10.55 malam. – RBI

#ruaiberitaiban#newsiban#beritaiban

Rindu | Titih | Kunsika

PAKAN, 5 Julai — Sepenyampau 32 Ketuai Komuniti enggau Ketuai Raban Bansa (KMKK) ari Ulu Julau ngenukuka komitmen enggau penegap runding sida deka terus nyukung iring Tan Sri William Mawan Ikom dalam nentuka penerus agenda pemansang, kelebih agi di menua pesisir enggau menua ulu.

Penemu tu dibantaika dalam aum begulai lebuh nemuai basa ngagai Mawan ba opis iya kena 29 Jun tu tadi, betuaika Penghulu Dandan Anak Bujang.

Rambau aum nya, raban KMKK mega bisi mantaika sukung sida ngarapka Mawan dichalunka ngetanka penuduk ari Gempung Parti Sarawak (GPS) ba pengawa bediri minta pilih penuduk Kunsil Nengeri (DUN) N.47 Pakan.

Sida mega mantaika pengandal ngagai iring iya neruska agenda pemansang sereta nyaga pemerat komuniti di kandang menua nya.

Nitih ku Penghulu Dandan, penemuai nya nyadi manifestasyen sukung renggat baruh, pia mega pengawa ngerapitka kaul ketuai komuniti enggau ketuai renggat atas.

Ku iya, komitmen enggau penegap runding ti dibantaika nya mandangka bala ketuai komuniti besetuju deka neruska iring ari Mawan, setipak enggau aspirasyen pemansang terus di kandang menua Pakan.

Penemuai nya diatur dalam pengelantang, atur enggau disiplin, lalu enggau nya mandangka sepenemu enggau semengat begulai entara bala ketuai komuniti Ulu Julau. – RBI

#ruaiberitaiban#newsiban#beritaiban

Rindu | Titih | Kunsika