KAPIT, 3 Jun – Menteri Kereja Raya, Dato Sri Alexander Nanta Linggi nyemetak madahka semengat penyerakup enggau pengelantang ti seruran diterenak entara komuniti rumah panjai nyadi batang penegap, penyulut enggau pengelantang rayat di Sarawak.
Nitih ku iya, rega penyerakup ke dipeturun ari setiap serak komuniti Dayak meseti terus ditanka taja pan napi ubah jeman enggau trend moden ke jampat mansang.
“Gaya ke dipeda kitai ba rumah panjai tu mandangka penegap ke bendar komuniti Sarawak, penyerakup, pengelantang enggau semengat bebasaka pangan diri nya meseti terus dikemeran laban nya nyadi pelasar pemansang enggau pengelantang ke diasai kitai sehari tu,” ku iya.
Iya madah munyi nya lebuh ngulu pengerami Gawai Dayak di Rh Peter, Tatai Emas Amang malam ensanus ti meda semua peranak rumah panjai nya begempuru dalam gaya ti penuh enggau pengaga ati sereta semengat diri sebilik.
Nanta mega nyemetak madahka nilai penyerakup ti dikemeranka rayat Sarawak setipak enggau aspirasyen Perintah Sarawak enggau Perintah Besai dalam nentuka pemansang ulih dipejalaika belama ungkup pemaik rayat.
Berebak enggau nya, iya nyamin pemansang di Bagi Menua Kapit deka terus nyadi pekara ti dikemeratka perintah, kelebih agi dalam nentuka kandang menua ulu enda tinggal ari arus pemansang.
Ku iya, kaul rat entara rayat enggau perintah ngemendarka bemacham agenda pemansang dipejalaika enggau ngasi agi dikena nyungkak tikas pengidup komuniti.
Iya madah, kenyau ari taun 2022 nyentuk ke taun tu, lebih RM2.1 bilion udah diagih ungkup pengawa bejalaika mayuh macham projek pemansang di Bagi Menua Kapit ti ngaul infrastruktur, perengka guna pemun sereta mega projek ti meri penguntung terus ngagai rayat.
“Agih belanja ke besai tu ngayanka komitmen perintah nentuka pemansang ke sebela sereta inklusif ulih diasaika semua renggat mensia mayuh, nyengkaum sida ke diau ba kandang menua ulu,” ku iya.
Ku iya nambah, pengawa ti enda ngetu nya mega mandangka komitmen Gempung Parti Sarawak (GPS) dalam ngetanka hak, pemerat enggau pengidup dudi hari rayat Sarawak.
Ba pengawa nya mega, iya meri besai terima kasih ngagai bala Tuai Rumah, komiti pengatur enggau semua rayat Rh Peter ketegal sambut ke chukup manah ti diberi beserimbai enggau pengerami Gawai Dayak taun tu. -RBI
#ruaiberitaiban#newsiban#beritaiban
Rindu | Titih | Kunsika
