BAU, 3 Jun – Siku lelaki peranak menua tu ke beumur 42 taun nyadi mansa ‘diemba’ pengudah dipejal siku individu ke enda dikelala deka ngerembaika gambar peribadi iya nengah media rama.
Ketuai Polis Pelilih Bau, P/Supt. Mohd. Haide A. Rahman, madahka polis bisi nerima ripot bekaul enggau kes nya kena 31 Mei urung pukul 11.30 malam ke nyadi ba Kampung Sibulung, Bau.
Nitihku iya, tudah ditelefon saspek nengah aplikasyen WhatsApp ngena lumur telefon ke enda dikelala.
Saspek udah nya nganjung beberapa iti gambar peribadi tudah ti dipelaba diulih ari media rama nyengkaum gambar ti ngaul utai sensitif.
“Saspek udah nya ngemba deka ngerembaika gambar nya ba media rama nyema tudah enda tetangkupka peminta bayar,” ku iya nengah penerang media sehari tu tadi.
Ku iya, ketegal nangika gambar nya deka dikerembaika ngagai mensia mayuh, tudah ngaga dua transaksyen bayar sepenyampau RM230 ngagai akaun e-dompet enggi siku individu ke enda dikelala.
Kes nya diatu benung dipansik ari baruh Seksyen 384 Kanun Keseksaan ketegal pengawa pejal minta duit.
Berindik enggau nya, Mohd. Haide ngelalau mensia mayuh ngambika seruran bejejaga ari sebarang kangau tauka mesej ari lumur ke enda dikelala, kelebih agi ti bekaul enggau jaku ngemba sereta minta duit.
Ku iya, mensia mayuh mega dilalau anang mudah bekunsi tauka nyimpan kereban diri ba pelasar media rama ti tau disalahguna piak ti nadai tanggungpengawa.
“Enti nerima jaku emba baka nya, anang ngaga sebarang bayar. Simpan semua bukti randau nya lalu lengkas ngeripot ngagai polis ngambika atur ke bukai ulih dipejalaika,” ku iya nyemetak.
Iya mega madahka pansik agi dipejalai lalu pengawa ngiga saspek benung dipejalai. – RBI
#ruaiberitaiban#newsiban#beritaiban
Rindu | Titih | Kunsika
