BATU NIAH, 28 Mei — Perintah Sarawak benung merambu pemansang tiga kandang mengeri baru iya nya Nyalau, Suai enggau Tukau ba kandang menua Niah-Ulu Suai, Kemena nyadi siti singkang strategik dikena ngenegapka pemansang pelilih menua sereta nyungkak penumbuh ekonomi kandang menua.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madah, perambu nya setipak enggau penuduk strategik kandang menua Niah-Ulu Suai ke bepalan entara dua palan pemansang besai nengeri tu iya nya Miri enggau Bintulu.
Iya madah munyi nya lebuh ngenataika jaku khas nyadi temuai dipebasa ba pengerami Mantar Gawai Dayak 2026 ke diatur Gerempung Tuai Raban Bansa Ulu Suai (PKKKUS) enggau Komiti Penduduk Iban (JKPI) Zon Niah Kemena di Balai Mensia Mayuh Batu Niah, kena Hari Tiga tu tadi.
“Bintulu majak mansang, Miri majak mansang, kitai ba tengah. Kitai mega patut mansang,” ku iya.
Nitih ku iya, pengawa ngemansangka sitak tumpuk pendiau baru nya begunaka sukung iya nya ngangkatka status Niah-Ulu Suai nyadi pelilih penuh dikena ngenyampatka pengawa bejalaika projek pemansang sereta ngenegapka sistem pentadbiran di sitak nya.
Ku iya nambah, perambu ngangkatmanah kandang endur nya udah dikenataika Residen Miri, Tuan Galong anak Luang, lalu nerima sukung penuh ari iya ngambika dibai ngagai renggat Kabinet Sarawak.
Dr.Rundi mega nyemetak madahka inisiatif pemansang nya sebagi ari agenda pemansang kandang menua ari baruh iring Menteri Besai Sarawak ti ngemeratka pemansang menua pesisir enggau dalam menua nengah chara inklusif, sebela sereta meruan.
Ku iya, pengawa bejalaika projek tumpuk pendiau baru nya dikearap ulih muka mayuh agi peluang ekonomi, ngemanahka perengkaguna infrastruktur sereta ngenegapka pengelantang pendiau rayat ba kandang menua Niah-Ulu Suai jemah ila. — RBI
#Beritalban | Ruai Berita Iban
Rinduka | Titihka | Kunsika
