KUCHING, 22 Mei — Unit Jalai Pengarap Bukai (UNIFOR) kemari udah ngatur Aum Pra Penilaian Peminta Bantuan Sekolah Misyen Renggat 1 Taun 2026 dikena nentuka proses nisih peminta dipejalaika enggau lebih bestruktur, terang sereta efektif.

Aum ke diatur nya bechairmanka Direktor UNIFOR, Dato Georgina Apphia Ngau, lalu mungkur randau ke silik pasal peminta bantu ke dianjung sekula misyen di serata Sarawak.

Sama bisi ngulu sesi nya Sapit Direktor, Penulung Kanan Direktor enggau pemesai UNIFOR, kelimpah ari dua iku Jurukur Kuantiti ari Opis Kereja Raya (JKR) Sarawak, Ho Kim Hao enggau Basil Tajem ak John Benjamin.

Pengawa ngaul Opis Kereja Raya Sarawak nya dikena beratika baru sereta ngentaska penyampau agih belanja ke dipinta ungkup tetiap peminta sebedau Aum Penilaian ke bendar diatur.

Nitihka penerang ari UNIFOR, aum pra-penilaian beguna amat dikena nentuka tetiap peminta diperesa enggau komprehensif sereta nitihka guna pemansang ti dikemeratka institusyen pelajar ti bisi kaul.

Ungkup rikod, sepenyampau 129 buah sekula misyen di serata Sarawak ngaul diri dalam proses minta belanja ungkup taun tu.

Aum nya mega bejalaika tanggungpengawa ti beguna dalam nentuka proses ngagihka belanja dipejalaika enggau penuh, terang sereta teratur dikena nyukung guna pelajar enggau pemansang sekula misyen di Sarawak. – RBI

#ruaiberitaiban#newsiban#beritaiban

Rindu | Titih | Kunsika

MIRI, 22 Mei – Siku indu bebadi nyawa pengudah entukar ke ditepan iya tepawah ketegal aksiden kediri di Jalai Tebing Pantai, Kampung Angus, Bekenu, tumu pagi tadi.

Opis Bomba enggau Penyah Penusah Malaysia (JBPM) Sarawak nengah penerang berita madahka sida nerima kangau ngenyit bekaul enggau penusah nya urung pukul 1.17 pagi sebedau seraban bomba ari Balai Bomba enggau Penyah Penusah (BBP) Batu Niah ngesah ngagai palan penusah nyadi.

Raban bomba betuaika PBK II (TBK I) Mohd Khaider datai ba palan penusah nyadi urung pukul 1.57 pagi lalu tetemuka sebuah entukar Perodua Axia bechura mirah udah tepawah tama ngagai parit ba tisi jalai maya bejalai ari Miri nuju Bekenu.

Tudah dikelala enggau nama Juwita Aishah binti Jubliee, 22 taun, entasika bebadi ba palan penusah nyadi ulih pemesai ari Opis Menteri Pengerai Malaysia (KKM).

Nitihka ripot operasyen, iya dipelabaka tepekul dalam entukar pengudah aksiden nyadi.

Raban bomba udah nya bejalaika operasyen nyelamat nengah chara negapka entukar sebedau mujur mansutka tudah ngena prosedur operasyen standard enggau perengka pengelikun diri (PPE) ke lengkap bepelasarka S.A.V.E.R. konsep.

Tubuh tudah udah nya diserahka ngagai Opis Menteri Pengerai ngambika atur nangkanka nya dipejalaika.

Operasyen nya mujur dijaga urung pukul 2.20 pagi lalu tembu penuh pukul 2.52 pagi sebedau raban bomba mulaika diri ngagai balai nya.

Sama bisi datai ba palan penusah nya, raban Polis Trafik, Polis DiRaja Malaysia (PDRM) enggau Opis Menteri Pengerai Malaysia (KKM) mantu ngatur operasyen enggau pansik silik bekaul enggau penusah nya. – RBI

#ruaiberitaiban#newsiban#beritaiban

Rindu | Titih | Kunsika

SEBUYAU, 22 Mei — Siku deriba lori bebadi nyawa pengudah lori berat ke ditepan iya tepawah ngagai parit ke luchak ba penusah bebadi ke diri empu semak simpang Kakus/Ensika di Kampung Tebelu, Jalai Batang Lupar–Sadong, tumu pagi kemari.

Mansa dikelala enggau nama Richmond Anak Pusai, 27 taun, dientaska bebadi nyawa ba palan penusah ke nyadi pengudah dipelabaka tepekul dalam tanah luchak ba bilik deriba lori nya.

Palan Operasyen (PGO) Opis Bomba enggau Penyah Penusah (JBPM) Sarawak nerima kangau ngenyit bekaul enggau penusah nya urung pukul 7.06 pagi sebedau jentera ari Balai Bomba enggau Penyah Penusah (BBP) Simunjan enggau bantu ari BBP Asajaya dianjung ngelawa endur nya.

Komander Operasyen, PPgB Nazari Harun madah, penusah bebadi ti ngaul sebuah lori ke ngundan premix dipelabaka nyadi urung pukul 5 pagi lebuh tayar mua lori nya pechah ngujungka entukar nya enda ulih dijaga lalu tepawah tama ngagai parit ba tanah luchak.

“Gaya lori ke tenggelam sebagi dalam luchak ngasuh operasyen nyelamat mar laban mansa dipelabaka tepekul dalam bilik deriba lori nya.”

“Raban bomba bejalaika pengawa ngali luchak ti betugung ba dalam lori lalu ngulihka bantu kren enggau excavator dikena mindahka lori pansut ari parit dikena ngemudahka proses ngenansutka tudah,” ku iya.

Tudah udah nya mujur dipansutka sebedau diserah ngagai polis ngambika bejalaika atur ke silik agi.

Operasyen ke berengkah pukul 7.57 pagi nya udah dikuasa penuh urung pukul 3.35 lemai lalu tembu lima minit udah nya.

Sepenyampau 17 iku raban ngaul diri dalam operasyen nya, ti mungkur 11 iku raban ari BBP Simunjan enggau enam iku raban ari BBP Asajaya enggau aset ti mungkur Tender Penyelamat Bomba (FRT), Tender Penyelamat Bomba Lempung (LFRT) enggau sebuah entukar utiliti Hilux.

Sama bisi datai ba palan penusah nya raban Polis Diraja Malaysia (PDRM), Angkatan Penyaga Mensia Mayuh Malaysia (APM) enggau Opis Menteri Pengerai Malaysia (KKM). — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUALA LUMPUR, 22 Mei – Menteri Dagang Temuai, Seni enggau Main Asal, Dato Sri Tiong King Sing nyemetak madahka sektor dagang temuai, seni enggau main asal menua tu meseti terus nyingkang enggau proaktif, kreatif sereta berani nyerungkai chara baru dikena napi pemar ekonomi global ti majak mar.

Ku iya, industri dagang temuai ukai semina nyadi pematak ti beguna ngagai ekonomi menua, tang mega nyadi pun penatai pemisi besai ngagai mayuh orang nyengkaum raban B40, pemain industri mit enggau jelan pemesai sereta komuniti lokal.

Nitih ku iya, Malaysia mega begunaka terus ngetanka imej nyadi sebuah menua ti likun, bebasaka pangan diri sereta tebuka ngagai penyelai budaya dikena nentuka pengandal temuai antarabansa meruan tegap.

“Anang ngasuh pengandal temuai tekeruga laban nya deka meri empas ngagai ekonomi menua,” ku iya.

Iya madah munyi nya lebuh ngenataika jaku puji ngagai 257 iku penerima Anugerah Perkhidmatan Cemerlang (APC) MOTAC 2025 sereta mega 58 iku pinchin opis menteri ti dikerami ketegal jasa enggau dedikasyen sida sepemanjai servis dalam ruang bilik besai MOTAC.

Ku Tiong, pengangkun ke diberi ukai semina anugerah aja, tang lebih agi pengandal ngambika terus meri servis ke pemadu manah ngagai rayat enggau menua.

“Servis enggau dedikasyen bala kita semua nyadi pengering opis menteri tu,” ku iya.

Berebak enggau nya, iya mega nyemetak madahka tetiap program enggau inisiatif ti dipejalaika MOTAC meseti meri penguntung ke nyata ngagai rayat nengah chara muka peluang penatai pemisi, nyungkak ekonomi kandang menua sereta nentuka sektor dagang temuai menua terus meruan sereta kompetitif.

Iya mega meri besai terima kasih ngagai semua staf MOTAC ti majak bebendar gawa dalam negika sektor dagang temuai, seni, budaya enggau pesaka asal menua Malaysia ba renggat nasional enggau antarabansa. – RBI

#ruaiberitaiban#newsiban#beritaiban

Rindu | Titih | Kunsika

BETONG, 22 Mei – Kaban Parlimen Betong, Datu Dr. Richard Rapu nyemetak madahka pengerami Mantar Gawai ukai semina diatur ninting taun aja, tang mega nyadi medium ti beguna dalam ngenegapka penyerakup, basa enggau semengat begulai bemacham komuniti di menua pesisir.

Nitih ku iya, program ke bansa nya bejalaika tanggungpengawa besai dalam nyerakupka komuniti kelimpah nyaga pesaka asal enggau adat asal komuniti Dayak.

Iya madah munyi nya lebuh ngulu pengawa bejadika Program Makai Lemai Pengerami Mantar Gawai 2026 ke diatur Panel Penyanding Penemu Klinik Pengerai Nanga Mujau ti nyadi ba Rh. Isup, Nanga Mujau, Betong, malam kemari.

Ba pengerami tu, bemacham aktiviti ti ngerinduka ati mega bisi diatur sepemanjai pengerami nya nyengkaum pengawa mandangka main asal, nyuaka perais enggau chabut tikit benasit ti nerima sambut ti manah ari peranak menua nya.

Berebak enggau nya, iya mega ngenataika pengaga ati ngagai Panel Penyanding Penemu Klinik Pengerai Nanga Mujau enggau semua piak ti bebendar gawa ngemujurka program nya.

“Program baka tu mandangka semengat Beserakup Begulai Sejalai ba raban bansa lalu patut ditegapka agi dikena nentuka pengelantang rayat meruan dijaga,” ku iya.

Iya mega ngemeratka komitmen iya deka terus begulai enggau rayat dalam neruska agenda pemansang Bagi Menua Betong nuju pengelantang.

“Nentuka Sarawak ti entap, mansang sereta lantang ungkup pengidup dudi hari rayat,” ku iya. -RBI

#ruaiberitaiban#newsiban#beritaiban

Rindu | Titih | Kunsika

BINTULU, 22 Mei – Pengerami Gawai Mantar renggat Pelilih Bintulu bedau lama tu tadi nyadi pelasar beguna dalam pengawa ngenegapka penyerakup sereta ngerapitka kaul entara komuniti pupu bansa di pelilih tu.

Kaban Kunsil Nengeri (ADUN) Samalaju, Datuk Majang Renggi madah, pengerami nya digulu penyereta mensia mayuh ari bemacham penatai asal beserimbai enggau pengerami Gawai Dayak.

Nitih ku iya, pengawa ngatur program nya ngayanka semengat begulai sereta bebaik dalam komuniti di Bintulu terus tegap sereta patut ditanka.

“Pengawa ke chukup manah sereta meri pengaga ati ngagai komiti pengatur ti betuaika Opis Pelilih Bintulu laban udah ngatur program ti teratur sereta mujur baka tu,” ku iya nengah sebengkah penerang beserimbai enggau pengerami nya.

Iya mega ngenataika pengaga ati iya ngagai semua serakup, ejensi perintah, sektor peribit, gerempung ukai dikuasa perintah (NGO) enggau semua piak ti ngaul diri terus tauka enda ngemujurka pengerami nya.

Ku iya nambah, pengerami ke baka tu patut dipajakka nyadi medium dikena nyintalka kaul pangan diri, ngenegapka penyerakup sereta ngetanka pesaka asal komuniti pupu bansa di Pelilih Bintulu. – RBI

#ruaiberitaiban#newsiban#beritaiban

Rindu | Titih | Kunsika

BETONG, 21 Mei — Pengawa muka rasmi Jematan Batang Lupar I sehari tu nyadika sejarah baru dalam pemansang infrastruktur Sarawak lebuh jematan ke pemadu panjai di Malaysia meraka sungai diatu dibuka ngagai mensia mayuh, pia ku Sapit Premier Sarawak, Datuk Amar Douglas Uggah Embas.

Nitihku iya, pengawa muka jematan sepemanjai 4.84 kilometer nya kelai pemujur besai perintah nengeri ari baruh iring Premier Sarawak dalam ngamatka pemansang menua pesisir enggau ngemanahka rentayan komunikasyen rayat.

“Sehari tu hari ke chukup besejarah ngagai Sarawak. Baka ke dipadahka YAB Premier Sarawak ba Dewan Undangan Negeri (DUN) Sarawak kemari, sehari tu Jematan Batang Lupar I dibuka ngagai mensia mayuh,” ku iya.

Ku iya, jematan nya ukai semina jematan sungai pemadu panjai di Malaysia, tang mega ngayanka penau Sarawak bejalaika projek infrastruktur besai nengah belanja perintah nengeri iya empu.

“Tu siti pemujur ti amat ngemegah ati Sarawak.Projek tu dipelanja penuh Perintah Sarawak lalu mujur dipejalaika,” ku iya ti meri pengaga ati ngagai Opis Kereja Raya (JKR) Sarawak ti udah mujur nembuka projek nya.

Uggah madah, pengawa muka jematan nya mega nyadika pengujung penguna jalai alun bepanggai ba servis feri ba jalai besai tebing tasik nengeri tu.

“Ari Kuching nengah Pusa ngagai Miri, diatu nadai agi ngena feri, Feri diatu nyadi sejarah.Kitai ‘bye-bye’ ngagai feri,” ku iya.

Ku iya nambah, pengawa muka jematan nya deka meri empas ke besai ngagai pengelantang pejalai rayat laban timpuh meraka Batang Lupar diatu semina begunaka timpuh urung lima minit enti dibanding enggau urung 45 minit ngena feri sebedau tu.

Ku iya, pemansang nya mandangka komitmen perintah Gempung Parti Sarawak (GPS) dalam ngamatka semaya pemansang ngagai rayat.

“Tu semengat GPS, kami besemaya, kami ngereja lalu kami ngenataika.Siti jalai siti udah tembu, siti jematan udah siti tembu, pia mega bekal ai enggau kuasa karan.Semua nya deka ngubah gaya pemansang di Sarawak,” ku iya.

Iya mega meri besai terima kasih ngagai Premier Sarawak ketegal visyen enggau komitmen iya ti terus dalam meransang pemansang infrastruktur moden ungkup pengelantang rayat nengeri tu. – RBI

BETONG, 21 Mei – Berambaika leka jaku “Pengembara”, Pengerami Ngintu Hari Pengajar, Hari Pengereja Pengawa enggau Mantar-Gawai 2026 ti diatur ba Dewan Gemilang MRSM Betong mantaika semengat beserakup, beterima kasih.

Pekara tu dibantaika enggau kaul begulai entara peranak MRSM Betong nengah bemacham aktiviti ti ngerinduka ati ba pengerami nya.

Pengerami ke berengkah urung pukul 2.00 lemai nya bela digulu Chairman Muafakat MRSM Betong, Henry ak Jugah begulai enggau bini iya, pia mega raban pengatur kolej nya.

Entara pengawa ke bisi diatur nyengkaum pengawa macha pesan beserimbai enggau Hari Pengajar, pengawa macha jaku janji ari bala pengajar enggau staf kelimpah ari pengawa pemerindang belagu ari bala pengajar enggau staf.

Pengerami nya mega dirichah enggau gimik ngelancharka pengerami ti dibantaika Henry ak Jugah begulai enggau Sapit Prinsipal MRSM Betong.

Berebak enggau nya, pekit Kumang enggau Keling Gawai nyadi sebengkah ari batang pematak ti mujur merindang kelimpah mandangka penyelai budaya bansa Dayak.

Pia mega bisi pengawa nyuaka jaku puji ngagai bala pengajar enggau staf kelai meri terima kasih ngagai komitmen enggau dedikasyen sida dalam pengawa ngajar sereta nempa penyulut nembiak.

Pengerami nya tembu enggau pengawa nyuaka perais ngagai pemenang pekit Kumang enggau Keling Gawai.

Bela ngulu pengerami tu iya nya peranak MRSM Betong ti mungkur bala pengajar, staf ukai akademik enggau nembiak ngerichahka. – RBI

SAMARAHAN, 21 Mei – Dagang mit enggau tengan pemesai (PKS) mengkang nyadi tulang belakang pemansang sosio-ekonomi Sarawak nengah pengawa nyendiaka peluang kereja enggau pemeri ngagai komuniti.

Sapit Premier Sarawak Datuk Amar Dr.Sim Kui Hian madah, pemujur kompeni mee menua tu udah mansang ari dagang mit ngagai chap dagang antarabansa nyadi kelai transformasyen chap Sarawak, ke diatu majak dikearapka ba makit dunya.

Ku iya, pemansang kompeni Lee Fah Mee ti ditumbuhka kenyau ari taun 1955, nyata ngayanka dagang menua Sarawak bisi penau mansang ari chap biasa ngagai kelai kelai nengeri ti dipebasa.

Nya alai, ku Dr.Sim, ‘chap Sarawak’ ukai semina nyebut produk ti diasilka di nengeri tu aja, tang mega mai imej kualiti, pengetan sereta standard antarabansa.

“Mayuh kompeni asal ari Sarawak, tang ukai semua nya bepenau nyadi ‘Chap Sarawak’ ke amat ulih mai nama nengeri tu ngagai renggat dunya…diatu standard kitai iya nya standard antarabansa,” ku iya.

Iya madah munyi nya lebuh bejaku ba pengerami bejadika pampang kedua kilang Lee Fah Mee, ditu, sehari tu.

Ku iya, pemujur kompeni nya ukai semina muka kilang baru aja, tang ngayanka pengulih dagang ruang bilik peranak lokal berubah, mengkang relevan sereta tan ba selampur rebak.

Ku iya, Lee Fah Mee ti berengkah ngasilka mi rangkai urung taun 1970-an diatu udah mujur ngaduka produk nitihka peminta kemaya hari, nyengkaum ngasilka mi ‘segera’ laksa Sarawak sereta mega produk pemakai ti ngembuan identiti menua tu.

“Produk baka tu patut dikunsi enggau dunya laban makit Sarawak aja kelalu mit.Lebuh peranak Sarawak di menua luar meli produk tu, sida ukai semina bebelika pemakai aja tang mega bekunsika identiti enggau cherita Sarawak,” ku iya nambah. -RBI

BAU, 21 Mei — Bagi Pansik enggau Penerit Adat Trafik Pelilih Bau (BSPTD) majak chakah agi bejalaika pengawa matau enggau neritka atur trafik ba sekeda jalai ngelingi pelilih tu dikena nentuka pengelikun penguna jalai alun seruran ba tikas pemadu manah.

Operasyen ke dipejalaika kena Hari Empat tu tadi ari pukul 11.30 pagi nyentuk 3 lemai nya mungkur pengawa matau sereta matau pejalai trafik ba Jalai Bau-Kuching, Jalai Bau-Serikin, Jalai Bau-Batu Kawa, Jalai Bau-Lundu, Jalai Jambusan, Jalai Siniawan enggau ngelingi Pasar Bau.

Kelimpah ari matau arus trafik, raban BSPTD mega bejalaika pengawa matau nagang penusah aksiden sereta neritka atur ngagai aktiviti ‘geng’ jalai alun sepemanjai pengawa ke diberi.

Dalam operasyen nya, tiga iti saman udah dikeluarka ketegal mayuh macham penyalah trafik.

Berebak enggau nya, 20 buah entukar enggau 22 individu mega diperesa dikena nentuka nitihka atur jalai alun.

BSPTD Bau ba penerang nya nyemetak madahka sida deka terus komited bejalaika pengawa neritka atur enggau matau ti seruran dipejalai dikena nentuka pengelikun enggau pengelantang penguna jalai alun di pelilih tu. – RBI