MARUDI, 7 Jun – Siku lelaki dikeirauka lemas pengudah diripotka lenyau maya mandi di Sungai Baram semak Kampung Long Miri, Baram, kena lemai Hari Enam tu tadi.
Mansa dikelala enggau nama Maxwell Laing Michael, 37, peranak Kayan dipelabaka lemas pengudah nyemerai ngagai tengah sungai sebedau enda mujur mansutka diri baru.
Nitihka penerang ari Palan Operasyen (PGO) Opis Bomba enggau Penyah Penusah Malaysia (JBPM) Sarawak, sida nerima kangau ngenyit bekaul enggau penusah nya urung pukul 12.30 tengah malam tadi (Hari Minggu) sebedau operasyen ngiga enggau nyelamat (SAR) dilanchar raban ari Balai Bomba enggau Penyah Penusah (BBP) Marudi.
Panglima Operasyen, PBK I Kebing Ngau madah, ba hari keterubah operasyen SAR ngemeratka pengawa meresa atas ai dalam radius urung tiga kilometer ili Sungai Baram ari palan alai iya dipelabaka lemas.
“Operasyen tu mega dibantu dua iku raban Polis Diraja Malaysia (PDRM) ari Long Lama enggau 20 iku peranak rumah panjai ti ngena empat buah perau ngemesaika kandang endur begiga,” ku iya.
Raban bomba ke bejalai nempuh penyauh 183 kilometer datai ba endur nya urung pukul 2.40 lemai sebedau berengkah bejalaika operasyen nyidi.
Taja pia, nyentuk operasyen diketuka pukul 5 lemai, tudah agi bedau ditemu.
Operasyen SAR deka ditampung baru pagila enggau tim penyelamat bemalam ba Kampung Daleh Long Pelutan dikena ngemudahka pengawa ngiga iya.
Nitihka penerang ari bini tudah, Susana Asong, 30 taun, penusah nyadi urung pukul 3.30 lemai Hari Enam tu tadi lebuh tudah benung mandi di Sungai Baram semak Kampung Long Lama begulai enggau sida sebilik.
Ku iya, tudah nyemerai ngagai tengah sungai sebedau dipeda tegapai-gapai lalu udah nya iya enda ayan.
Penusah nya mega dipeda bini tudah, bala anak enggau urung 15 iku peranak rumah panjai ke bisi ba endur nya.
Operasyen SAR ngaul tiga iku kaban BBP Marudi enggau bantu sebuah kerita pikap Triton, kelimpah ari sukung ari polis enggau peranak rumah panjai setempat.
Piak bekuasa deka neruska operasyen ngiga nyentukka mansa ditemu. – RBI
#ruaiberitaiban#newsiban#beritaiban
Rindu | Titih | Kunsika
