BAU, 21 Mei — Siki lelaki peranak menua tu beumur 27 taun bebadi nyawa ba penusah aksiden ba jalai alun ke mungkur sebuah mutosikal ba Kilometer 2.5 Jalai Bau-Kuching semak simpang Kampung Buso, tumu pagi tadi.

Ketuai Polis Pelilih Bau, Supt Mohd Haide A. Rahman madah, polis nerima ripot penusah nya urung pukul 6.50 pagi.

Nitihku iya, pansik tumu tetemuka tudah dipelabaka nepan mutosikal ari tunga Bau nuju kandang menua Siniawan sebedau mutosikal ke ditepan iya lalu tepawah ngagai tisi kanan jalai alun.

“Tudah udah nya dipelabaka ngelantak tiang Telekom sebedau dientaska bebadi ba palan penusah nyadi ulih raban perubat,” ku iya nengah penerang media sehari tu tadi.

Ku iya, gaya jalai alun maya penusah nya nyadi diripotka lurus, dua “hala” sereta jalai rangkai kelimpah ari gaya hari ke manah.

Tubuh tudah udah dibai ngagai Unit Forensik Sepital Bau ngambika dipejalaika enggau proses beputung tasat.

Diatu kes nya benung dipansik ari baruh Seksyen 41(1) Akta Pengangkutan Jalan 1987.

Berindik enggau nya, polis ngelalau semua penguna jalai alun ngambika seruran deriba sereta nepan enggau bejimat, ngasika tikas pengelaju ke udah ditetapka sereta nentuka tikas pengelelak enggau pengelikun diri dalam gaya ke manah dikena nyeliahka sebarang penusah ke enda dikedekaka nyadi.

Mensia mayuh ke bisi penerang bekaul enggau penusah nya dipinta datai ke mua mantu tasat nengah chara ngaga kaul enggau Balai Polis Trafik IPD Bau. – RBI

SAMARAHAN, 21 Mei — Pengawa muka Jematan Batang Lupar No.1 enggau rasmi nyadi bukti komitmen Perintah Sarawak ti terus ngenegapka rentayan infrastruktur moden dikena nyungkak pemansang ekonomi enggau ngangkatka pengelantang pendiau rayat, ku Sapit Premier Datuk Amar Douglas Uggah Embas.

Ku iya, projek ikonik nya ukai semina nyambung Sebuyau enggau Triso aja, tang mega deka nyadi pematak besai ngagai penumbuh sosio-ekonomi, kelebih agi di menua pesisir enggau menua ulu sungai.

“Jematan tu kelai pengeran perintah nentuka rayat ngasaika perengka guna komunikasyen ke manah agi, likun sereta efisyen agi, lalu enggau nya muka mayuh agi peluang pemansang,” ku iya lebuh bejaku maya Pengerami Bejadika Jematan Batang Lupar No.1 ditu, sehari tu tadi.

Nitihku Douglas, pengawa ngaga jematan nya dikearapka ulih ngurangka timpuh pejalai enggau jauh kelimpah ari ngangkatka pemanah logistik enggau sistem pengangkut ba kandang endur ke bisi kaul.

Ku iya, projek ti meri empas tinggi nya mega dipechaya ulih nyungkak sektor ekonomi, betanam betupi enggau dagang temuai di Sebuyau, Triso enggau kandang menua besemak nengah akses ti lanchar sereta moden.

Jematan Batang Lupar No.1 ti digaga ari baruh Pakej D2B: Perambu Ngaga enggau Nembuka Jematan Batang Lupar 1, Bagi Menua Samarahan/Betong deka nyadi jematan pemadu panjai meraka sungai di Malaysia enti udah tembu penuh ila.

Projek ke beungkus RM848.7 juta nya mungkur pengawa ngaga jematan sepemanjai 4.844 kilometer nitihka standard JKR R5 enggau dua lurung sepiak, kelimpah ari ngembuan tali kabel besai sepemanjai 598.8 meter.

Jematan nya mega ngembuan ruang pemesai 250 meter enggau peninggi 26 meter dikena ngemudahka pejalai kapal, lalu enggau nya ulih ngenegapka sistem pengangkut ba koridor tebing tasik Sarawak.

Pengerami bejadi nya mega mandangka komitmen Perintah Sarawak ti deka terus bejalaika projek infrastruktur transformasyen ti ulih nyungkak pemansang pelilih menua sereta ngangkatka kualiti pengidup rayat ba selampur alai.

Sama bisi datai iya nya Dato Sri Haji Julaihi bin Haji Narawi, Menteri Perengka Guna enggau Telekomunikasyen Sarawak, ADUN Beting Maro Dato Haji Razaili bin Haji Gapor, ADUN Lingga Dayang Noorazah Awang Sohor, Direktor Opis Kereja Raya Sarawak Datu Dr.Cassidy anak Morris, Residen Bagi Menua Betong, Datu Richard anak Michael Abunawas.- RBI

SEBUYAU, Mei 21 – Siku deriba lori bebadi pengudah entukar ke ngundan premix ke dikena iya tepawah ngagai parit di Kampung Tebeluk, Jalai Batang Lupar-Sadong, semak Sebuyau tumu pagi tadi.

Palan Operasyen Opis Bomba enggau Penyah Penusah Malaysia (JBPM) Sarawak madah, ba penusah ke nyadi urung pukul 5 pagi nya, tudah ke beumur 27 taun dientaska bebadi pengudah dipelabaka tepekul ba tumpuk luchak ba dalam lori nya.

Opis bomba madahka, sida nerima kangau ngenyit bekaul enggau penusah nya urung pukul 7.06 pagi sebedau raban ari Balai Bomba enggau Penyah Penusah (BBP) Simunjan enggau bantu ari BBP Asajaya ngesah ngagai endur nya.

“Komander operasyen ngeripotka penusah bebadi nya ngaul sebuah lori ti ngundan premix.

“Penerang keterubah ari polis tetemuka tayar mua lori nya dipelabaka meletup ngujungka entukar nya ensayar sebedau tepawah ngagai parit ke luchak,” ku iya nengah siti penerang sehari tu tadi.

Nitihku iya, operasyen nyelamat nya dipejalaika nengah chara nyangkul tumpuk luchak ba dalam lori nya, kelimpah ari ngena bantu kren enggau kubi dikena mansutka lori nya ari parit.

Ku iya, pengawa nya dikena ngemuntangka pengawa mansutka tudah ke tepekul.

“Tudah mujur dipansut sebedau diserah ngagai polis ngambika atur ke bukai dipejalaika,” ku iya.

Operasyen nya betuaika Ketuai BBP Simunjan, PPgB Nazari Harun tembu enggau penuh urung pukul 3.40 lemai.

Sama bisi datai ba endur nya, Polis DiRaja Malaysia (PDRM), Raban Penyaga Orang Periman Malaysia (APM) enggau Opis Menteri Pengerai Malaysia (KKM). – RBI

BETONG, 21 Mei — Pengawa jampat siku pemesai Raban Penyaga Orang Periman (APM) Malaysia mujur mantu tiga orang ba penusah akisden jalai alun ti ngaul sebuah van enggau sebuah kerita Perodua Bezza di Jalai P-Turn Simpang Pusa, sehari tu tadi.

Pemesai APM Pelilih Menua Betong, Kapten (PA) Mohamad Noor Ini, dipadahka tetemuka penusah nya tekala nya pengudah ngulu pengerami bejadi Jematan Triso, Maludam sebedau tekala nya ngaga kangau enggau APM Debak minta bantu.

Seraya nganti ambulans datai, iya bejalaika pengawa meri perubat keterubah ngagai tiga iku sida ke bakal dalam penusah nya.

Mansa keterubah iya nya siku lelaki ke udah besai ke bakal tebuka ba pala, lalu mansa kedua, siku indu ke udah besai, bakal ba jari enggau jari. Siku agi mansa indu semina bakal mimit aja.

Lebuh datai ba palan nya, raban APM Debak bejalaika pengawa meresa keterubah nyengkaum Rapid Body Survey (RBS) sebedau neruska pengawa berubat ngenyit ba palan penusah nyadi.

Semua mansa udah nya dianjung ngagai Klinik Debak ngambika diperubat enggau silik agi.

Berebak enggau nya, APM Malaysia ngelalau penguna jalai alun seruran bejimat sereta ngasika atur jalai alun dikena nyeliahka penusah bebadi. -RBI

SAMARAHAN, 21 Mei — Raban Penyaga Mensia Mayuh Malaysia (APM) Samarahan mujur bejalaika operasyen nangkap siku ular sawa batik pemanjai urung empat meter ke ditemu ba kandang manuk di Pangkalan Kuap, Kota Samarahan.

Nitihka penerang operasyen, APM Samarahan nerima kangau ngenyit ari mensia mayuh sebedau ngerapitka Skuad Bravo ngelawa endur penusah nya nyadi.

Lebuh datai ba endur nya, raban ke bejalaika pengawa terus bejalaika pengawa nyidi, sebedau mujur nangkap reptilia nya ngena teknik nyepit enggau chara ke dikuasa sereta likun.

Operasyen nya dipejalaika enggau lanchar nadai sebarang penusah ke enda dikedekaka nyadi, lalu nadai sebarang bakal diripotka ngaul mensia mayuh tauka raban ke bejalaika pengawa.

Pengudah mujur ditangkap, ular sawa nya diserah ngagai piak bekuasa bekaul ngambika atur silik agi dipejalaika, seraya kandang endur penusah nyadi dientaska likun.

Operasyen tu dipejalaika raban Angkatan Pertahanan Awam Malaysia enggau kerejasama Unit Perhubungan Awam dan Dokumentasi APM Samarahan.

APM ngelalau mensia mayuh ngambika seruran bejejaga enggau penatai jelu siga kelebih agi ba kandang endur diau enggau premis jelu tupi, lalu lengkas betanya ngagai piak bekuasa nyema bisi sebarang penusah ngenyit nyadi.

Mensia mayuh tau betanya ngagai talipaun penusah ngenyit APM Samarahan ba lumur 082-672999 tauka 999 minta bantu lengkas. — RBI

KUCHING, 21 Mei 21 — Premier Sarawak Datuk Patinggi Tan Sri (Dr) Abang Abdul Rahman Johari Openg kemari nguluka inisiatif ngelakuka produk agro-pemakai menua tu nengah pengawa ngelancharka Kimpin Makai Mayuh Agi Buah Menua enggau Program Ngasai Beras ke diatur ba premis Dewan Undangan Nengeri (DUN) Sarawak.

Pengawa nya diatur tekala nya pengudah tembu nutup Aum Keterubah Penggal Kelima Dewan Undangan Negeri Sarawak Ke-19 nyadi sebagi ari pengawa perintah Sarawak ti seruran dipejalaika dikena ngenegapka sektor agro-pemakai sereta ngangkatka penyedar mensia mayuh sentang pemesai guna nyukung produk menua tu.

Kimpin Makai Mayuh Agi Buah Menua tu diatur dikena meri penyedar ngagai pemesai guna makai buah menua tu ti dikelala ngembuan nutrisi ti tinggi.

Kelimpah ari nya, kimpin tu mega ngembuan tuju deka ngelakuka buah menua tu ngagai komuniti nengah sukung enggau kaul bala ketuai di Sarawak.

Program tu mega meri awak ngagai bala temuai, Kaban Kunsil Nengeri enggau pengereja pengawa perintah nyereta sesi ngasai bemacham bansa beras enggau buah menua tu ti bisi dipandangka sepemanjai program nya.

Program tu diatur Opis Betanam Betupi Sarawak lalu dipejalaika nengah kerejasama mayuh bengkah ejensi enggau gerempung ti bekaul enggau sektor betanam betupi enggau agro-pemakai nyengkaum Opis Menteri Industri Pemakai, Komoditi enggau Pemansang Wilayah Sarawak (M-FICORD), Opis Servis Veterinar Sarawak, Kaunsil Penyatuan dan Pemulihan Tanah Sarawak, Kaunsil Pemansang Tanah Sarawak, Kaunsil Industri Getah Sarawak, Opis Parit enggau Entali Ai Sarawak, Lembaga Pembangunan Sago enggau Nipah, Pertubuhan Peladang Negeri Sarawak, Lembaga Industri Nanas Malaysia, Lembaga Koko, Lembaga Pemasaran Pertanian Perintah Besai (FAMA).

Inisiatif tu setipak enggau komitmen perintah Sarawak ti deka ngenegapka agenda pengelikun pemakai, ngerembaika makit produk betanam betupi menua tu sereta nyungkak penatai pemisi orang dagang sektor agro-pemakai di nengeri tu. — RBI

MERADONG, 20 Mei — Dua iku lelaki peranak menua tu udah ditan Tim Petugas Indu Opis Polis Pelilih (IPD) Meradong dalam operasyen “Ops Tapis” di kandang menua Bintangor pengudah dipelaba bisi kaul enggau aktiviti salah guna dadah.

Ketuai Polis Pelilih Meradong, DSP Tansli Mering madah, dua iku saspek ke beumur 42 enggau 31 taun nya ditan urung pukul 7.55 lemai Hari Tiga tu tadi lebuh raban polis benung bejalaika operasyen nagang penyalah enggau dadah di pelilih nya.

Nitihku iya, asil peresa ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka kedua-dua saspek positif amphetamine enggau methamphetamine.

“Meresa baru rikod ke udah tetemuka kedua-dua saspek nadai ngembuan sebarang rikod jenayah tauka penyalah bekaul enggau dadah,” ku iya ba sebengkah penerang sehari tu.

Ku iya, kes tu dipansik nengah Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui ari RM5,000 tauka jil nyentuk dua taun, nyema dikenuku salah.

Berebak enggau nya, polis nyemetak madahka sida enda belembut ba sebarang aktiviti salah guna dadah di pelilih Meradong lalu beratika penusah nya enggau berat ngagai komuniti.

Mensia mayuh ti bisi penerang bekaul enggau aktiviti dadah dipinta ngenataika penerang nya ngagai polis nengah lumur Balai Polis Bintangor ba lumur 084-693222. -RBI

PAKAN, 21 Mei – Pelilih Julau majak ngayanka pengulih diri nyadi siti ari sitak ke pemadu nyulut dalam pengawa lumba enggau main di Bagi Menua Sarikei lebuh mayuh nembiak ngarika pelilih nya konsisten ngerikod pemutus ke pemadu manah ba tetiap pekit ke dipasuk sida.

Chairman Kaunsil Industri Kayu Ramu Malaysia (MTIB), Datuk Larry Sng Wei Shien madah, pemujur ti seruran dijapai atlit ari Julau enggau Pakan mandangka nembiak menua pesisir ngembuan potensial ke besai nyulut dalam lumba enggau main taja pan betapi enggau pengurang perengka guna enti dibandingka enggau kandang mengeri.

Kenu ku Kaban Parlimen Julau nya, nembiak ari Pelilih Julau sigi enda pulai enggau jari puang maya bepekit, enggau nya ngayanka bakat enggau semengat tinggi ti dikembuan atlit menua pesisir.

Iya madah munyi nya lebuh ngulu Pengerami Lumba enggau Main (MSSR) ba Stadium Pakan, kemari.

Ku iya, taja pan Opis Menteri Nembiak, Lumba enggau Main (KBS) udah ngaga mayuh bengkah palan lumba enggau main di kandang mengeri, tang gaya tu enda kala ngelemika ati raban nembiak menua pesisir ngambika terus nyulut dalam lumba enggau main.

Ambika banding, Larry bechuntoka pemujur pelanda nasional Watson Nyambek enggau penerejun nasional Dato Pandelela Rinong, ti asal ari menua pesisir tang udah mujur nempa nama diri ba renggat ke pemadu tinggi berindik ari penau enggau pengepuh sida.

Ku iya nambah, perengka guna lumba enggau main ti meruan ditambah enggau pengerindu sereta penau bala atlit ulih mai pemujur ngagai semua atlit.

Iya mega ngarapka Opis Menteri Nembiak, Lumba enggau Main terus ngemansang sereta nambahka perengkaguna lumba enggau main di menua pesisir ngambika ulih ngadaka mayuh agi atlit ke bekualiti ungkup menua jemah ila. -RBI

KUCHING, 21 Mei – Perintah Sarawak majak ngenegapka pengawa ngentas sereta nyaga hak tanah Hak Adat Bumiputera (NCR) lebuh 110,815 lot individu mujur disukat ungkup tuju ngeluarka surat pala tanah ari baruh Seksyen 18 Kanun Tanah Sarawak (KTN) taun tu.

Sapit Premier Sarawak ke mega Menteri Kedua Pengeraja Asal enggau Pemansang Mengeri, Datuk Amar Awang Tengah Ali Hasan madah, pengawa nyukat nya ngaul pemesai tanah NCR sepenyampau 132,414 hektar tauka 327,261 ekar tanah NCR di serata Sarawak.

Nitih ku iya, perintah nengeri berengkah ngemeratka pengawa nyukat lot individu kenyau ari taun 2017 pengudah kandang tanah NCR digazet nyadi Rizab Komunal Bumiputera (Betanam Betupi) ari baruh Seksyen 6 Kanun Tanah Sarawak.

“Atur tu dipejalai ngambika surat pala tanah ulih diberi ngagai pengempu ke patut, lalu enggau nya meri jamin lebih teratur sereta entas ngempu tanah,” ku iya lebuh ngenataika jaku penutup opis menteri iya ba Dewan Undangan Negeri (DUN) Sarawak di Kuching, kemari.

Ku iya, naka ke diatu sepenyampau 1,233,192 hektar tauka 3,047,217 ekar tanah NCR udah mujur disukat perimeter nengah Program Nyukat Tanah NCR Inisiatif Baru ti udah dipejalaika kenyau ari bulan Oktober 2010.

Ari penyampau nya, 966,440 hektar tauka 2,388,073 ekar udah digazet nyadi Rizab Komunal Bumiputera (Betanam Betupi) ari baruh Seksyen 6 Kanun Tanah Sarawak.

Ku iya nambah, Perintah Sarawak seruran komited ngaku sereta ngetanka hak rayat ba tanah NCR ke entas setipak enggau penetap undang-undang tanah ke udah bisi.

Dikena ngenyampatka proses nyukat enggau ngeluarka surat pala tanah, iya nesau pengempu tanah enggau orang ke nuntut meri kerejasama penuh lebuh kereja nyukat nya dipejalaika.

“Orang ke nuntut tanah enda tau enda bisi maya kereja nyukat, kelai enggau terang garis entara tanah sereta nyeliahka penyarut bekaul enggau nuntut ngambika proses nyukat ulih dipejalaika enggau lanchar agi,” ku iya.

Iya mega nyemetak madahka kerejasama semua Kaban Kunsil Nengeri (ADUN) beguna amat dikena nentuka pengawa nyukat lot individu lanchar dipejalaika di serata Sarawak.

Berebak enggau nya, perintah nengeri deka terus neruska program nyukat tanah NCR nengah chara nyendiaka agih belanja ke chukup kelimpah ari ngena belanja ke diterima ari Perintah Besai.

Ngelansa pasal pemansang ba kandang menua DUN Opar, iya madahka bisi 1,411 surat pala tanah ungkup guna betanam betupi udah mujur direjista lalu udah sedia disua ngagai penerima ke patut.

Kelimpah ari nya, nengah Program Kampung Tradisional, bisi 413 surat pala tanah ke guna endur diau mega udah mujur direjista naka ke diatu.

Berindik enggau nya, iya minta kandang endur ke bedau disukat nganjung peminta rasmi ke penuh enggau pelin adan ngagai Opis Bekuasa Tanah enggau Survei Bagi Menua Kuching ngambika proses nyukat ulih dipejalaika enggau lebih komprehensif sereta sistematik. -RBI

SEBUYAU, 20 Mei – Pengawa masang enggau pengatur sistem lampu ba Jematan Batang Lupar benung chakah dipejalaika nyadi sebagi ari pengawa nyendiaka diri ke penudi sebedau pengawa muka jematan nya enggau rasmi pagila.

Pengawa ngelekatka lampu ba sepemanjai struktur jematan nya ukai semina betuju ngangkatka pengelikun penguna jalai alun maya malam hari, tang mega mantaika pemanah tanda menua baru ti udah nyadi kelai pemansang infrastruktur moden di Sarawak.

Jematan Batang Lupar ti nyambung Sebuyau enggau Triso dikearap nyadi pemangkin besai dikena nambahka penyambung rentayan jalai tebing pantai, lalu enggau nya ngemuntangka pejalai mensia mayuh sereta meransang penumbuh ekonomi menua tu.

Nengah penembu sistem lampu nya, jematan nya deka tampak agi tampak kelebih agi maya malam hari, lalu enggau nya nyadi ikon baru ungkup pemansang kandang menua pesisir Sarawak. — RBI