BAU, 7 Jun – Pengawa Bejalai Gawai ke diatur Gerempung Bansa Asal Singai (PAAS) nengah kerejasama Komiti Pemansang enggau Pengelikun Genturung Pendiau (JKKK) beserimbai enggau Karnival Budaya Singai 2026 di Kampung Barieng kemari nyadi lambang penyerakup enggau pengeransing aki ini komuniti Bidayuh kelebih agi etnik Singai.
Kaban Kunsil Nengeri (ADUN) Tasik Biru, Datuk Henry Harry Jinep madah, program nya ukai semina pengerami aja, tang mega nyadi pelasar ke beguna dikena ngingatka rebak diatu pasal pemar enggau penusah ke ditapi rebak ke dulu dalam nempa pengidup enggau identiti komuniti sida.
“Pengawa bejalai tu mandangka budaya, pesaka enggau penatai asal komuniti kitai ngagai mensia mayuh.
“Berebak enggau nya, iya ngingatka kitai senentang pemar ke udah ditengah komuniti kitai ngulihka penyulut ke diasai kitai sehari tu,” ku iya.
Sepenyampau lapan kontinjen ngambi bagi ba pengawa bejalai ti berengkah ari balai kampung nya sebedau tembu ba Rumah Panjai 10 Pintu, sebengkah kelai besejarah Kampung Barieng ti udah nyadi ikon kampung nya urung 200 taun ke udah.
Pengawa bejalai ti mandangka pekayan asal, pemerindang budaya enggau elemen pesaka komuniti Bidayuh Singai mujur narit ati peranak menua nya enggau temuai ke bisi datai ngerichahka Karnival Budaya Singai 2026.
Program tu mega nyadi medium ti beguna dalam pengawa ngetan sereta ngenegapka identiti budaya komuniti Bidayuh ngambika ulih ditampung rebak dudi hari, kelimpah ari meri kelala penyelai adat enggau main asal Singai ngagai komuniti luar.
Karnival Budaya Singai 2026 dipeda nyadi inisiatif ti seruran dipejalai dalam ngetanka pesaka budaya menua tu sereta ngenegapka semengat beserakup enggau begulai entara komuniti menua tu. – RBI
#ruaiberitaiban#newsiban#beritaiban
Rindu | Titih | Kunsika
