Peranak asal Kapit, Tenttina John udah mai basa ngagai nengeri tu lebuh iya dichiri nyadi Mrs of Malaysia Borneo 2026, lalu enggau nya ngayanka orang indu kelebih agi indai orang bisi penau nyapai pemujur ke nyulut enggau enda ngelengkaka tanggungpengawa sida ngagai diri sebilik.
Berebak enggau nya, Ruai Berita Iban ngenataika pengaga ati ketegal pengangkun iya dalam nyeratan pengawa iya ba pekit nya.
Tentina madahka pejalai nuju pemujur diisi enggau bemacham pemar, pengawa, belajar enggau peneleba ti berega ti deka dikeingat sepemanjai umur.
Kenu ku iya, pemenang ke dijapai nya ukai semina bekaul enggau gelar enggau jumpang aja, tang nyadi kelai pengeliat, penetap enggau pengarap ati ke alai genap iku indu bisi peluang neruska mimpi sida.
“Ba belakang jumpang tu, bisi dua iku anak mit ti nyadika pun pengering aku ninting hari.
“Pemenang tu ukai semina bekaul enggau gelar Mrs. Malaysia Borneo 2026 aja, tang ngayanka siku indu ngembuan gelar indai ulih neruska mimpi iya enggau enda ngelalaika tanggungpengawa enggau penyayau ngagai diri sebilik,” ku iya.
Ku iya, tiap ai mata, pengawa ti bebendar, penanggul lelak enggau sampi ke ditengah iya sepemanjai pejalai nya pengujung iya meri asil enggau maya ke amat bisi reti dalam pengidup iya.
Tenttina mega nyemetak madahka pemenang nya ukai semina diempu iya aja, tang asil ari sukung tegap ari sida sebilik, bala bakih, penyukung enggau semua piak ti seruran meri peransang enggau pengarap ngagai iya.
“Aku nyerahka pemenang tu kelebih agi ngagai kami sebilik, bala anak enggau semua sida ti enda ngetu pechayaka aku. Pemujur tu diempu kitai semua,” ku iya lebuh dirandau Ruai Berita Iban.
Iya mega meri besai terima kasih ngagai pengatur, akim, kru, penaja enggau semua finalis ti nyadika pekit tu nyadi peneleba ti chukup besai reti.
Nyadi pemegai gelar Mrs. Malaysia Borneo 2026, Tenttina besemaya deka megai pengandal nya enggau penuh tanggungpengawa, integriti sereta temegah ati nyadi pengari indu Borneo.
Kenu ku iya, pemenang nya ukai pengujung pejalai ke udah ditengah iya, tang nyadi pemungkal tanggungpengawa ke besai agi nyadi peransang ngagai indu bukai ngambika berani bemimpi, pechayaka pengulih diri sereta bebendar ngamatka juluk ati diri.
“Ari Kapit ngagai renggat Mrs. Malaysia Borneo 2026, mimpi pengujung iya nyadi nyata. “Dream it. Believe it. Achieve it,”,” ku iya.
Pemujur Tenttina ukai semina dikemegahka komuniti Kapit enggau Sarawak aja, tang mega mandangka pengulih orang indu Borneo manchar ba panggau ke tinggi agi sereta nyadi kelai ngenegapka orang indu, penegap institusyen ruang bilik enggau semengat terus negika penyulut.
Mrs of Malaysia Borneo 2026 iya nya pekit ari baruh iring Direktor Nengeri Puan Anysia Sharon ke ngembuan lisin ari Mrs of Malaysia. – RBI
#ruaiberitaiban#newsiban#beritaiban
Rindu | Titih | Kunsika
