ISTANBUL, 7 Jun — Littoral Mission Ship Batch 2 (LMSB2) Soldadu Tasik Diraja Malaysia (TLDM) diberi nama enggau rasmi “Raja Laut” ba pengerami meri nama enggau ngelancharka kapal ke diatur ba Palan Kapal Istanbul, Turkiye, sehari tu.
Nitihka penerang ba Facebook rasmi TLDM, pengerami besejarah nya dikemataka Kepten Yang Dipertua TLDM, Duli Yang Maha Mulia Sultan Selangor Sultan Sharafuddin Idris Shah
Alhaj, lalu pengerami ngelancharka nya dipenyadika Duli Yang Maha Mulia Tengku Permaisuri Selangor, Tengku Permaisuri Hajah Norashikin ke mega Royal Sponsor di Istanbul Shipyard.
Ba penerang nya madahka deligit sida disambut Panglima Tentera Laut, Laksamana Tan Sri (Dr.) Zulhelmy bin Ithnain enggau Ketuai Sekretari Opis Pengelikin Menua, Datuk Lokman Hakim bin Ali.
Dalam penerang nya, TLDM nerangka nama “Raja Laut” dipilih dikena ngingatka siku orang ti tinggi pangkat sereta pentadbir ti bisi visi ari Selangor ba ujung abad ke-19 ti mayuh nyaup pemansang tumu Kuala Lumpur.
Raja Laut nya anak kedua ari Sultan Muhammad Shah (Sultan Selangor ketiga) ari peturun Bugis Opu Daeng Chelak.
Nitihka penerang TLDM, gelar “Laut” diberi istana laban iya ada maya indai iya belayar ba tasik semak Lukut.
Raja Laut mega dikeingatka nyadi Penghulu Kuala Lumpur ke suba ti bejalaika tanggungpengawa ti beguna amat dalam nempa pelasar urbanisasi moden nengah penumbuh Lembaga Sanitasi Kuala Lumpur dalam taun 1890 enggau pengawa mantaika pelajar jaku Melayu vernakular keterubah di indu nengeri.
TLDM mega madahka pengawa ngena nama siku orang ke besejarah ngagai aset strategik soldadu tasik nyadi kelai pemerani enggau basa ke tinggi ngagai identiti maritim menua tu.
Penatai kapal LMSB2 “Raja Laut” dikearapka ulih ngenegapka agi pengulih operasyen enggau penyedia armada TLDM dalam ngetanka pengelikun, kedaulatan enggau pemerat kandang tasik menua tu.
Pengerami nya nyadi siti agi pemujur ke beguna dalam pengawa ngemodenka aset pertahanan maritim menua tu, lalu enggau nya ngayanka komitmen TLDM ke terus ngenegapka penau armada sida nitihka guna pengelikun ke diatu enggau jemah ila. — RBI
