MIRI, 8 Jun — Serakup Kayan Sarawak (PKS) benung chakah nyikap diri ngatur Aum Besai Pengari Tiga Taun Sekali (TGM) 2026 ti diperambu deka diatur kena 4 Julai tu ba Hotel Dynasty, Miri.
Presiden PKS ke mega Kaban Kunsil Nengeri (ADUN) Telang Usan, Datuk Dennis Ngau madah, pekara nya entara batang agenda ke dikerandau ba Aum Biasa Komiti Tetinggi Pusat (CEC) Kedua ungkup taun 2026 ke diatur lemai tu tadi.
Nitih ku iya, TGM tu dikearapka nyadi pelasar beguna endur berandauka kuing gerempung kelimpah ngenegapka agi pangku pengawa PKS dalam nyaga pemerat komuniti Kayan di Sarawak.
Ku iya, naka ke diatu, PKS udah mujur numbuhka lapan pampang di serata nengeri enggau penyampau kaban semak 3,000 iku.
Berebak enggau nya, pengawa chakah agi dipejalaika dikena numbuhka pampang baru di Long Lama, Tubau enggau Kanowit dikena ngerembaika agi kuing gerempung nya.
Dalam penerang iya, Dennis mega nyemetak madahka PKS enda ngemendarka pengawa numbuhka pampang ba renggat rumah panjai laban tetiap rumah panjai ngembuan sistem pentadbiran enggau ketuai kediri empu ti ditusun sereta diaku Perintah Sarawak.
Ku iya, PKS deka terus bekerejasama rat enggau Ketuai Komuniti enggau Ketuai Kaum sereta mega komiti rumah panjai Kayan dikena nentuka penyerakup komuniti terus ditegap sereta pemansang komuniti ulih dipejalaika enggau efektif.
Kelimpah ari nya, iya madahka perambu numbuhka pampang PKS di Kota Kinabalu, Johor Bahru enggau Kuala Lumpur deka dibantaika ba TGM ti deka datai ngambika diperunding sereta dikemendarka bala pengari.
“Enti perambu tu dikemendarka, peminta deka dikenataika ngagai Opis Pengerejista Gerempung Malaysia (ROS) ngambika dikemendarka enggau rasmi,” ku iya.
Iya mega madahka Sapit Menteri Perengka Guna enggau Telekomunikasyen Sarawak, Datuk Liwan Lagang deka dikangau nyadi temuai dipebasa bejadika aum besai nya.
Pengudah aum nya, raban CEC PKS mega bisi nemuai ngagai Galeri Etnik Orang Ulu di Begunan FORUM meda palan pemandang ti deka mandangka sejarah, pesaka asal enggau pejalai pengidup komuniti Kayan di Sarawak.
Ku Dennis, iya ngarapka semua perambu ke udah dilangkar ulih dipejalaika enggau lanchar dikena ngenegapka agi pangku pengawa Gerempung Kayan Sarawak nyadi pelasar pengawa nyerakup, ngintu pesaka asal sereta ngemansangka komuniti Kayan di nengeri tu. — RBI
