ENGKILILI, 8 Jun – Parti Progresif Demokratik (PDP) nandu baru komitmen sida deka ngetanka semua lapan penuduk ke diarika parti nya ba pengawa bepilih ti deka datai, enggau pengarap penegap sesebengkah parti nya ba pengulih sida gawa ke rayat lalu ukai semina bepanggai ba tradisyen aja.
Presiden PDP, Datuk Seri Tiong King Sing madah, parti nya deka terus ngenegapka sukung rayat nengah rikod servis, bebendar gawa enggau komitmen ti seruran mai pemansang ngagai komuniti.
“Ba PDP, penegap sesebengkah parti ukai bepanggai ba sejarah tauka tradisyen aja, tang ba pengulih meri servis, gawa bebendar sereta terus ngulihka pengarap rayat,” ku iya lebuh bejaku ba Pengerami Makai Lemai Komuniti Engkilili beserimbai enggau pengerami Hari Gawai Dayak 2026.
Berindik enggau nya, iya nesau semua kaban enggau penyukung parti ngambika seruran beserakup, taluk sereta meri komitmen penuh dikena nentuka agenda pengawa enggau pemansang parti ungkup rayat ulih diteruska jemah ila.
Nitih ku iya, penyerakup entara kaban parti enggau komuniti nyadi pekara ke berat dalam nentuka penegap politik enggau penerus pengawa pemansang ba kandang endur ke diarika PDP.
Ba pengawa ke sama, Tiong mega ngenataika pengaga ati iya ngagai komuniti Engkilili ti terus ngetanka semangat beserakup enggau kerejasama dalam komuniti.
Ku iya, pengerami Gawai Dayak ukai semina pengerami ninting taun aja, tang nyadi pesaka asal ti mandangka identiti komuniti Dayak sereta patut ditan sereta dipeturun ngagai rebak dudi hari.
“Gawai tu maya begempuru enggau diri sebilik sereta kaban belayan, kelimpah ari nyadi pelasar dikena beratika budaya, adat enggau nilai ti nempa identiti komuniti Dayak,” ku iya.
Berebak enggau nya, iya meda DUN Engkilili ngembuan potensial ke besai nyadi palan dagang temuai bepelasarka budaya enggau rampa menua.
Ku iya, penyelai budaya Iban, pemisi rumah panjai asal, pemanah sungai enggau pengaya rampa menua ngasuh kandang menua nya ngembuan pemanah kediri empu ti ulih matak mayuh agi temuai datai.
“Potensial ke dikembuan Engkilili ukai semina dikemegahka komuniti menua nya aja, tang mega ulih meri pangka ngagai penumbuh ekonomi nengah pemansang sektor dagang temuai enggau industri ke bekaul,” ku iya. – RBI
#ruaiberitaiban#newsiban#beritaiban
Rindu | Titih. | Kunsika
