JULAU, 7 Jun – Kaul rat entara tuai rumah, ketuai raban bansa enggau pengari rayat patut terus ditegapka dikena nentuka tetiap guna enggau agenda pemansang komuniti ulih dikenataika sereta dipejalaika enggau lebih efektif.
Chairman Kaunsil Industri Kayu Ramu Malaysia (MTIB), Datuk Larry Sng Wei Shien madah, kerejasama ke manah entara ketuai renggat baruh enggau pengari rayat beguna amat laban ngemendarka penerang ke betul bekaul enggau guna rayat dikenataika ngagai piak ke bekaul ungkup pengawa nangkan nya.
Kenu ku iya, nengah komunikasyen ti enda betul sereta kaul ti tegap, bemacham peminta enggau perambu pemansang ulih dibantaika enggau lebih teratur, lalu ari nya ulih ngenyampatka pengawa bejalaika projek enggau bantu ti diguna komuniti.
“Pengari rayat begunaka penerang ke betul ari tuai rumah enggau ketuai raban bansa ngambika ulih meretika utai ke amat diguna rayat.
“Enti nadai penerang enggau peminta ti dikenataika ketuai raban bansa, tusah opis bekuasa beratika sereta bejalaika projek pemansang ke patut,” ku iya.
Iya madah munyi nya lebuh nampung siri Pejalai Ngabang Beserimbai Enggau Gawai Dayak 2026 ti mungkur beberapa buah rumah panjai di kandang menua Julau enggau Pakan.
Berebak enggau nya, Larry mega ngingatka komuniti ngambika enda berumban ngumbai pengari rayat enda ibuhka pemansang kandang menua sida.
Tang kebendari iya, Larry madahka pemansang begunaka kerejasama ari semua piak nyengkaum bala ketuai komuniti ti bejalaika tanggungpengawa ngenataika peneka enggau aspirasyen peranak ngagai piak ti bekaul.
Iya nyemetak madahka pengari rayat, ketuai genturung pendiau enggau peranak genturung pendiau begunaka tanggungpengawa begulai dalam matau pengawa bejalaika projek enggau inisiatif pemansang ngambika penguntung ke dikenataika nya amat meri empas ngagai komuniti lokal.
“Semangat kerejasama, pemereti ati enggau bekunsika tanggungpengawa nyadi pelasar ti beguna dalam ngenegapka pemansang komuniti sereta ngangkatka pengelantang pendiau rayat,” ku iya nambah.
Nyerumba program Ngabang Gawai nya, Larry bepeluang nemuai ngagai empat buah rumah panjai iya nya Rumah Andi di Lubuk Besai, Rumah Rinya di Jagoi Pakan, Rumah Selunsin di Sungai Maram enggau Rumah Walter Ahap di Lempa Antu betemu sereta begulai enggau peranak menua nya.
Ba atur pengawa nya mega, iya bisi nyuaka pemeri ngagai sekeda Komiti Pemansang enggau Pengelikun Genturung Pendiau (JKKK) enggau Biro Indu rumah panjai ke bisi kaul, ti mungkur sepenyampau RM84,500 dikena nyukung aktiviti komuniti enggau pemansang komuniti setempat.
Antara penerima iya nya JKKK Rumah Andi Lubuk Besai,Biro Indu Rh Andi, Biro Indu Rh Sinong, JKKK Rh Rinya, Biro Indu Rh Rinya, JKKK Rh Selunsin Sg Maram, JKKK Rh Walter Ahap, Biro Indu Rh Walter enggau Biro Indu Rh Berayun Tugong.
Pemeri nya ngayanka komitmen iya ti seruran meri kuasa ngagai komuniti menua pesisir sereta nentuka pengelantang pendiau rayat terus nyadi pemerat setipak enggau semengat MADANI Malaysia. – RBI
#ruaiberitaiban#newsiban#beritaiban
Rindu | Titih | Kunsika
