KUCHING, 6 Jun — Institusyen pelajar ke diempu Perintah Sarawak iya nya Kolej Universiti i-CATS diatu udah rasmi diangkat nyadi universiti penuh pengudah nangkup peminta ke udah ditetapka Opis Menteri Pelajar Tinggi (KPT).
Premier Sarawak Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg madah, pemutus nya udah dipadahka ngagai Perintah Sarawak lalu nyadi siti agi pemujur ke besai reti dalam pengawa ngenegapka pemansang modal mensia nengeri tu.
Nitih ku iya, pengangkun nya deka meri semengat baru ngagai sektor pelajar tinggi Sarawak ke diatu bisi dua buah universiti diempu perintah nengeri.
“Perintah Sarawak udah nerima pemutus ari Opis Menteri Pelajar Tinggi ke alai Perintah Besai udah ngaga pemutus ngangkatka i-CATS ti udah nangkup peminta nyadi universiti penuh.
“Tentu iya meri mayuh pengaga ati ngagai Sarawak laban kitai bisi dua buah universiti ke diempu Perintah Sarawak iya nya Universiti Teknologi Sarawak (UTS) di Sibu lalu diatu i-CATS nyadi universiti penuh,” ku iya.
Iya madah munyi nya lebuh dikerandau media pengudah bejadika Sarawak Career and Training Fair (SCaT Fair) 2026 di Hikmah Exchange Event Centre (HEEC) ditu sehari tu tadi.
Ku Abang Johari, i-CATS bejalaika tanggungpengawa ti beguna dalam ngadaka pengereja pengawa ti bepengelandik tinggi, kelebih agi dalam bidang teknologi ti nyadi tulang belakang ekonomi Sarawak jemah ila.
Ku iya, universiti nya mega bisi nyendiaka program bekaul enggau aeroangkasa nengah pengawa numbuhka fakulti pakar dalam bidang nya.
“Universiti tu mega bekaul enggau teknologi. Kitai udah numbuhka fakulti aeroangkasa lalu sida udah bisi staf pengajar kediri empu.
“Sida mega bekerejasama enggau Universiti Teknikal Istanbul sereta universiti menua tu nyengkaum UKM (Universiti Kebangsaan Malaysia) lalu udah nyendiaka kus aeroangkasa berengkah taun tu,” ku iya.
Berebak enggau nya, iya madahka Perintah Sarawak mega merambu deka ngemansangka kampus baru i-CATS di Trombol enggau penyampau ungkus dianggarka RM400 juta.
Nitih ku iya, projek nya deka dipejalaika berenggat lalu deka mungkur perengka guna akademik enggau asrama nembiak.
Ku iya, pemansang kampus baru nya deka nyendiaka palan belajar ti lebih kondusif dikena nyukung penumbuh i-CATS nyadi sebuah universiti penuh sereta nangkup guna pengereja pengawa bepengelandik Sarawak jemah ila. — RBI
#Beritalban | Ruai Berita Iban
Rinduka | Titihka | Kunsika
Sumber, photo — SarawakK
