KUCHING, 8 Jun — Lebih 200 iku penyereta ari mayuh bengkah penteba nyereta Pekit Golf Gawai ti nyediaka perais sepenyampau lebih RM200,000 lalu nyadika pekit golf komuniti ti pemadu beprestij sereta mai penguntung di Sarawak.

Pekit ke deka diatur ba sekeda endur ngelingi mengeri Kuching kena Hari Enam tu mega bisi nyendiaka bemacham perais ke narit ati nyengkaum perengka pengangkut ngena kuasa karan nyadi perais besai ngagai penyereta ke benasit manah.

Penaung Pekit Golf Gawai, Tan Sri William Mawan Ikom madah, timbal ke manah ke diterima nyata ngayanka main golf majak teulihka pengerembai ba raban bansa sereta ngembuan potensial nyadi medium ke efektif dikena ngerapitka kaul rama.

Nitihku Kaban Kunsil Nengeri (ADUN) Pakan nya, pekit nya ngempuruka lebih 200 iku pemain ti deka bepekit dalam lapan kategori.

“Penyereta ti meransang tu mandangka pengerindu komuniti ba main golf majak nambah.Tu ukai semina nyadi bidang pekit bepengerai, tang mega pelasar dikena ngerapitka kaul sereta ngerembaika kaul bakih,” ku iya ba aum pengarang berita beserimbai enggau Pekit Golf Gawai ditu.

Ku iya, main golf ukai semina aktiviti rekreasyen aja, tang ulih nyadi pelasar nyerakupka komuniti pupu bansa, nyengkaum komuniti Dayak enggau bansa bukai nengah semengat lumba enggau main sereta penyerakup ti diterenak sepemanjai pekit nya diatur.

“Aku ngarapka pekit tu ulih terus ngerapitka kaul entara pemyereta sereta nyadi manifestasi semengat ngelaban, penetap ati enggau nilai positif ke ulih diteladan,” ku iya.

Mawan mega ngarapka Pekit Golf Gawai tu ulih diteruska nyadi pengerami ninting taun ti ukai semina ngangkatka gaya pengidup bepengerai, tang mega ngerapitka penyerakup enggau kaul entara komuniti di serata Sarawak. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 8 Jun – AirBorneo⁠ madahka sekeda penerebai bilun ke destinasyen di Sabah enggau Sarawak udah laun sereta dikinsil kenyau ari 5 Jun tu tadi ketegal sekeda bilun kompeni nya benung bejalaika kereja ngintu enggau teknikal.

Dalam penerang sehari tu, kompeni penerebai bilun nya nerangka, pengawa ngeruga taga penerebai bilun nya ketegal gempung sekeda pekara nyengkaum peminta ngemanahka teknikal ti enda diperambu, pengawa ngintu ninting hari ti seruran dipejalaika kelimpah ari peminta operasyen enggau ngatur jam pengawa kru.

Nitihka penerang ari AirBorneo, pengelikun pesinjir enggau kru mengkang dikemeratka ba tetiap pemutus operasyen ke diambi.

“Sebarang bilun ti begunaka perati teknikal deka dipansutka sementara ari servis nyadika atur bejimat nyentukka tim injinir puas ati ungkup pengelikun bejalaika beoperasyen baru,” ku penerang nya.

AirBorneo mega madahka, sekeda bilun diatu benung diseruri enggau ngemanahka serentak, ti ​​nyekat sementara kapasiti armada operasyen kompeni nya.

Bala pesinjir dilalau ngambika nyikap diri enggau ubah taga penerebai bilun ke tau nyadi, laun tauka dikinsil dalam kandang beberapa hari ti deka datai laban bilun ke kena empas nya berenggat-renggat dipulaika baru ngagai servis.

Dikena ngurangka penusah, kompeni penerebai bilun nya ngansak semua pesinjir ke bisi perambu pejalai dalam timpuh ke semak ngambika meresa status penerebai bilun sida sebedau nuju padang bilun.

Nitihka penerang ari AirBorneo mega, tim sida benung gawa sepemanjai maya dikena ngurangka pengawa ngachau sereta ngatur jalai baru pesinjir ke kena empas ngagai penerebai bilun alternatif ke pemadu tumu ke bisi.

“Komitmen kami iya nya deka mulaika penuh taga penerebai bilun enggau naka pengelengkas enggau nadai ngeruga pengelikun,” ku iya.

Pesinjir ke kena empas benung dikangau terus kompeni penerebai bilun lalu ulih ngulihka penerang pemadu baru, bantu tauka ngatur baru penerebai bilun nengah palan servis penguna AirBorneo.

AirBorneo mega meri besai terima kasih ngagai penyabar enggau pemereti ati pesinjir sekumbang timpuh operasyen tejanggal tu lalu nandu baru komitmen sida deka terus nyendiaka servis penerebai bilun ti likun sereta ulih dikearapka ba rantau tu. – RBI

#ruaiberitaiban#newsiban#beritaiban

Rindu | Titih | Kunsika

MIRI, 9 Jun — Penusah bebadi ba jalai alun ti mungkur dua buah entukar pacuan empat roda udah nyadi ba Jalai Suai–Niah, jalai Pan Borneo Bintulu–Miri, nuju ngagai Miri, ditu kemari.

Perengka pengangkut ke bisi kaul iya nya sebuah kerita Hilux chura chelum ke mai tiga iku penumpang (dua iku indu enggau siku lelaki) enggau sebuah kerita Hilux chura pirak ke mai empat iku penumpang (dua iku lelaki enggau dua iku indu).

Nitihka penerang ari piak bomba ti bejalaika pengawa matau enggau ‘size-up’ ba palan nya, semua mansa ke bakal dibai ngagai klinik besemak lalu nadai operasyen nyelamat diguna ba palan nya.

Komander operasyen nya madah, siku lelaki enggau siku indu ari kerita Hilux chura chelum nya dibai ngena ambulans klinik Suai ngagai Klinik Batu Niah, lalu siku lelaki enggau siku indu ari kerita Hilux chura pirak nya dibai ngena ambulans klinik Niah ngagai Klinik Batu Niah.

Piak bekuasa ngelalau penguna jalai alun ngambika bejimat deriba, kelebih agi ba jalai Pan Borneo ke sekut. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — BBP Batu Niah

MIRI, 9 Jun — Sebuah rumah setengah tetap dua ringkat ba Lot 2125, Jalai Palma 4, Taman Permaisuri Indah, RPR Batu 6, angus lengis ketegal penusah angus tumu pagi tadi.

Taja pia, kedua-dua orang ke nguan rumah nya ke diri menyadi mujur ngelarika diri lalu nadai bakal.

Nitihka ripot ari Opis Bomba enggau Penyah Penusah Malaysia (JBPM), Balai Bomba enggau Penyah Penusah (BBP) Sentral Miri nerima kangau ngenyit bekaul enggau penusah nya urung pukul 4.00 pagi.

Tim Charlie udah nya berumban ngelawa endur nya mai Tender Penyelamat Bomba (FRT) enggau sebuah entukar Unit Servis Penyelamat Perubat Penusah Ngenyit (EMRS), datai ba endur nya urung 10 minit udah nya.

Lebuh datai ba endur nya, raban bomba tetemuka penusah angus nya ngaul sebuah rumah struktur setengah tetap dua ringkat enggau pemesai dipelabaka 30 x 30 kaki persegi ti udah angus lengis.

Operasyen madamka api tekala nya dipejalaika ngena siti hos bantu enggau siti batang ai pemanjai 100 kaki enggau dua munchung, lalu pun penatai ai diulih ari paip bomba ke besemak.

Asil ari pengawa jampat raban bomba, api mujur dirara urung pukul 4.30 pagi sebedau api mujur dirara abis.

Operasyen nya tembu urung pukul 5.53 pagi pengudah diperesa silik tetemuka nadai agi pun api ke tau ngidupka api nya baru lalu gaya nya dientaska likun.

Operasyen nya mungkur tujuh iku raban bomba ari BBP Miri Sentral ti betuaika PBK I Abdul Rahman nyadi penyelia operasyen, seraya Ketuai Stesyen BBP Miri Sentral, PKPgB Nicholas Belulin mega bisi ngelawa ngagai palan nya matau operasyen nya.

Sama bisi datai ba endur nya, tujuh iku raban Polis DiRaja Malaysia (PDRM) enggau dua iku raban Sarawak Energy Berhad (SEB) mantu nentuka pengelikun kandang endur penusah nya nyadi.

Kebuah penusah angus nya nyadi enggau penyampau pengerugi agi dipansik piak bekuasa. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

DALAT, 8 Jun — Perengka guna pelajar ti lengkap sereta bekualiti bejalaika tanggungpengawa ti beguna dalam nempa rampa belajar ti kondusif ungkup nembiak, pengajar enggau semua staf sekula.

Menteri Kereja Raya, Dato Sri Alexander Nanta Linggi madah, tetiap projek ngaga sekula ke mujur tembu ukai semina pemansang fizikal aja, tang mega mai reti ke besai ngagai komuniti pelajar menua nya.

“Tetiap fasiliti sekula ke udah tembu mai reti ke besai ngagai nembiak, pengajar enggau apai indai.

Ba SMK Dalat enggau SMK Semop, dikearapka perengka guna baru tu ulih nyendiaka rampa belajar ti lebih lantang, likun sereta kondusif ngagai staf sekula,” ku iya.

Iya madah munyi nya lebuh bejadika Pengerami Nyerahka Projek Penembu 2-dalam-1 ti ngaul Pengawa Ngaga Begunan Penganti enggau 18 Bilik Kelas di SMK Dalat enggau Pengawa Ngaga Begunan Baru enggau 12 Bilik Kelas enggau perengka guna ke bekaul di SMK Semop, Daro.

Nitihku iya, kededua projek enggi Opis Menteri Pelajar Malaysia (KPM) dipejalaika Opis Kereja Raya (JKR) Malaysia nengah Tim Projek Khas 2 enggau penyampau rega ngelui RM37.7 juta.

Ku iya, projek di SMK Dalat ti beungkus RM27.19 juta nya nyengkaum pengawa ngaga blok akademik ti bisi 18 buah kelas, bengkel, makmal, bilik ngatur pengawa, Bilik Operasyen Skim Pinjau Bup Teks (SPBT), kantin, surau, rumah jaga, utiliti enggau sistem ai kamah, palan ngengkah kerita sereta palan bisi atap.

Berebak enggau nya, projek ba SMK Semop ti beungkus RM10.56 juta, nyendiaka 12 buah kelas baru begulai enggau mayuh macham perengka guna sukung nyengkaum perengkaguna ti mesra OKU baka jamban khas, palan paking enggau ramp dikena nentuka akses pelajar ti lebih inklusif.

Alexander mega madahka kededua projek nya mujur ditembuka 164 hari dulu ari timpuh ke udah ditetapka enggau nadai sebarang ‘Extension of Time’ (EOT), lalu enggau nya ngayanka penyikar bejalaika projek perintah.

“Ke berat agi, projek tu mujur tembu 164 hari dulu ari timpuh ke udah ditetapka enggau nadai Extension of Time tauka EOT.

Kededua projek tu mega ngena chara moden baka Building Information Modeling (BIM) enggau Industrialized Building System (IBS), setipak enggau pengeransing nentuka projek perintah dipejalai enggau kualiti, atur sereta efisyen ke manah agi,” ku iya.

Ku iya, ngena teknologi ngaga rumah moden nyata ngayanka komitmen perintah dalam nentuka pemansang infrastruktur pelajar menua terus ditegapka, lalu enggau nya nyendiaka perengka guna belajar ti bekualiti agi ungkup pemaik rebak dudi hari. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SIBU, 8 Jun — Sepenyampau 19 iku peranak ari tiga buah ruang bilik diatu nadai sebarang utai pengudah struktur sementara dua ringkat ke diuan sida angus lengis ba penusah angus di Kampung Jeriah Abang Ramli, Jalai Oya, ditu, kemari.

Taja pia, semua mansa diripotka udah bejalaika pengawa enggau jampat ngelarika diri lalu nadai bakal ba tubuh diripotka.

Ketuai Zon 4 Sibu Opis Pengerara Api enggau Penyah Penusah Malaysia (JBPM) Sarawak, Penguasa Kanan Bomba I Andy Alie, madahka piak iya bisi nerima kangau ngenyit bekaul enggau penusah nya urung pukul 11.30 pagi.

Berindik ari ripot nya, dua Tim Timbal Operasyen (PKO) ari Balai Bomba enggau Penyah Penusah (BBP) Sibu Jaya enggau Balai Bomba enggau Penyah Penusah Sungai Merah udah dianjung ngagai palan penusah nyadi.

Operasyen ngerara api nya mungkur sepenyampau 14 iku raban begulai enggau logistik injin pengerara api.

Lebuh datai ba endur nya, raban penyelamat tetemuka api benung mau, nganguska rumah dua ringkat nya, tang pengawa jampat raban bomba mujur nagang api ari nyerarai ngagai premis ke besemak.

Penerang keterubah ti digumpul ba palan penusah nyadi tetemuka api dipelabaka bepun sereta nyerarai ari belakang dapur rumah nya sebedau nyerarai ngagai struktur besai begunan nya.

Pun penusah angus ke bendar enggau anggar penyampau rega pengerugi reta tengkira enggi ketetiga ruang bilik ke bisi kaul agi dipansik. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — IKBM

DALAT, 8 Jun – Penembu dua projek besai infrastruktur pelajar di Sarawak dipechaya ulih ngangkatka pengelantang enggau kualiti pelajar nembiak, kelimpah ari nyendiaka rampa ti lebih kondusif ngagai staf sekula.

Menteri Kereja Raya, Dato Seri Alexander Nanta Linggi madah, tetiap fasiliti sekula ke mujur ditembuka ukai semina pemansang fizikal aja, tang mega mai reti ke besai ngagai nembiak, pengajar enggau apai indai dalam pengawa deka ngadaka rebak ti bepenemu sereta ulih besemekih.

Iya madah munyi nya lebuh bejadika Pengerami Nyerahka Projek Penembu 2-dalam-1 ti mungkur Pengawa Ngaga Begunan Penganti ungkup 18 Bilik Kelas di SMK Dalat enggau Pengawa Ngaga Begunan Baru ungkup 12 Bilik Kelas enggau Perengkaguna Bekaul di SMK Semop, Daro.

Nitihku iya, kedua-dua projek enggi Opis Menteri Pelajar Malaysia (KPM) dipejalaika Opis Kereja Raya (JKR) Malaysia nengah Tim Projek Khas 2 enggau penyampau rega ngelui RM37.7 juta.

Ungkup SMK Dalat, projek ke beungkus RM27.19 juta nya mungkur pengawa ngaga blok akademik ke mungkur 18 buah kelas, woksop, makmal, bilik pengatur pengawa, Bilik Operasyen Skim Pinjau Bup Teks (SPBT), kantin, surau, rumah jaga, utiliti enggau sistem ai kamah ke bisi tutup, palan endur entepan kerita ke bisi perabung.

Berebak enggau nya, projek ba SMK Semop ti beungkus RM10.56 juta nyendiaka 12 buah kelas baru ti penuh enggau bemacham perengkaguna sukung nyengkaum perengkaguna ti engkeman ungkup OKU baka jamban khas, palan endur entepan entukar enggau tanju.

Kedua-dua projek nya mujur ditembuka 164 hari dulu ari timpuh ke udah ditetapka enggau nadai sebarang pengawa ngelanjarka timpuh (Extension of Time/EOT), lalu enggau nya ngayanka penyikar pengawa bejalaika projek perintah.

Ku iya nambah, pengawa ngena teknologi moden baka Pemodelan Maklumat Begunan (BIM) enggau Sistem Begunan Berindustri (IBS) mega mantu nentuka pengawa ngaga begunan dipejalaika enggau lebih bekualiti, sistematik sereta efisyen.

Ba pengawa ke sama, iya meri besai terima kasih ngagai Opis Menteri Pelajar Malaysia ketegal pengandal ke diberi ngagai JKR Malaysia, kelimpah ari meri puji ngagai komitmen Tim Projek Khas JKR Malaysia 2, Bagi JKR HOPT enggau HODT, kunteriktor Welfield Services Sdn. Bhd enggau KSB Global Sdn. Bhd., tim perunding profesyenal enggau semua piak ti bisi kaul ngemujurka projek nya.

Kelai sukung ngagai pemansang pelajar, iya mega bisi madahka deka meri bantu penyampau RM20,000 ngagai Gerempung Apai Indai Pengajar (PIBG) ungkup setiap sekula nya.

Iya ngarapka perengkaguna ti disediaka ulih dikena enggau penuh sereta dijaga enggau manah ngambika ulih ngadaka rebak baru Sarawak ti bepenemu, ngembuan ulah ti manah sereta ulih nyaup pemansang nengeri enggau menua jemah ila. -RBI

#ruaiberitaiban#newsiban#beritaiban

Rindu | Titih | Kunsika

LAWAS, 8 Jun – Projek Jematan Ikonik Menua Lawas ke nyadi siti ari pematak besai pemansang infrastruktur di utara Sarawak diatu udah nyapai penyulut fizikal 97.27 peratus lalu dipelaba tembu penuh kena bulan September 2026.

Sapit Premier Sarawak ke mega Chairman Ejensi Pemansang Wilayah Utara (NRDA), Datuk Amar Awang Tengah Ali Hasan ngabas kediri empu pejalai projek nya rambau nemuai ngagai palan endur ngulihka penerang ke pemadu baru bekaul enggau status pengawa bejalaika projek nya.

Nitihka penerang projek, kereja ngaga diatu fokus ngagai pengawa masang sistem mekanikal enggau karan (M&E) sereta struktur jematan.

Proses nyambung struktur jematan nya mega udah mujur tembu, lalu enggau nya nyadika pemujur ke beguna ba renggat ngaga.

Ke bendar, projek nya diatu urung semilan peratus dulu ari timpuh ke udah ditetapka, ti ngayanka bejalaika pengawa enggau lanchar sereta komitmen tinggi semua piak ke bekaul.

Pengudah tembu ila, jematan ke ngembuan pemanjai 642 meter ke meraka Batang Lawas deka nyadi tanda baru di pelilih Lawas enggau langkar ikonik ke bisi ngayanka lengkung menara, kabel gantung enggau lampu LED ke diias.

Kelimpah ari ngemanahka rampa mengeri, jematan nya dipelaba ulih meri empas ke besai ngagai mobiliti peranak nengah chara ngurangka timpuh pejalai meraka sungai sereta nyendiaka jalai ke muntang agi entara Jalai Pulau Salam di utara enggau Kampung Ladang Baru di selatan mengeri Lawas.

Sama bisi datai maya penemuai nya, Kaban Parlimen Lawas, Datuk Henry Sum Agong, Sekretari Politik Premier Sarawak, Awangku Jinal Abedin, Direktor Kandang Menua NRDA, Ubaidillah Abdul Latip, Pemesai Pelilih Lawas, Ladin Atok, Pengari Opis Residen Limbang, Jeanly Marten, Sekretari Kaunsil Pelilih Lawas, Zulkipli Sahari sereta mega pengari ejensi ke bekaul.

Projek ti meri empas tinggi tu dipeda ukai semina ulih ngenegapka rentayan komunikasyen di Lawas, tang mega nyadi kelai penyulut enggau transformasyen pemansang ti benung chakah dipejalaika ari baruh agenda pemansang pelilih menua utara Sarawak. – RBI

#ruaiberitaiban#newsiban#beritaiban

Rindu | Titih | Kunsik

SONG, 8 Jun — Kaban Kunsil Nengeri (ADUN) Katibas, YB Lidam Assan sehari tu bejalaika penemuai kereja beratika pejalai sekeda projek pemansang ke benung dipejalaika diatu ba kandang menua Song nyadi sebagi ari nentuka pengawa bejalaika projek nitihka timpuh sereta meri penguntung ngagai rayat.

Entara palan ke dilawa iya nya palan endur ngaga Dataran Dabai Song, Jungle Produce Market Song, kelimpah ari Pengawa Ngaga Baru Selapat Sungai Kong Leng Teng enggau Semanjai Tebing Sungai Kampung Gelam.

Nitih ku Lidam, ketiga-tiga projek nya nyadi inisiatif ti beguna ti ukai semina ngemanahka perengka guna mensia mayuh enggau pengelikun peranak, tang mega ulih meri pangka ngagai transformasyen rampa pemansang enggau imej Pelilih Song nyadi palan penumbuh ti lebih progresif sereta kompetitif.

“Projek-projek tu deka meri empas positif ngagai pengelantang pendiau komuniti besemak nengah pengawa nyendiaka perengka guna ke menyana agi, nambahka aktiviti ekonomi enggau rampa menua ke kondusif agi ungkup peranak,” ku iya.

Rambau penemuai nya, iya mega ngelimpangka awak betemu enggau orang dagang di Tamu Song ti bejualka bemacham produk betanam betupi enggau menua tu nyadika pun penatai pemisi diri sebilik.

Iya nerangka sektor dagang mit enggau aktiviti ekonomi komuniti nyadi eleman beguna dalam ngenegapka ekonomi menua pesisir.

Lidam mega meri besai terima kasih ngagai semua ejensi teknikal ti bisi kaul enggau pengawa merambu sereta bejalaika projek nya ketegal komitmen enggau kerejasama ti terus nyendiaka perengka guna enggau infrastruktur ti nangkup guna rayat.

Iya ngarapka pengawa bejalaika projek nya ulih ditembuka nitihka timpuh ke udah ditetapka ngambika pengelantang nya ulih diasaika peranak menua nya dalam timpuh ke semak, enggau nya nyukung agenda pemansang ke enda ngetu di kandang menua Song enggau Katibas. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MIRI, 8 Jun – Sarawak Water nyangkal notis bekal ai tejanggal ke diatu benung viral ba sekeda raban WhatsApp enggau pelasar media rama sehari tu seraya nyemetak madahka penerang nya enda betul, enda dientas sereta ukai dipansutka kompeni utiliti.

Nengah penerang berita sehari tu, Sarawak Water madahka notis ke dikerembaika nya mega nadai kaul enggau gaya bekal ai di Miri diatu.

Nitihka nya, kereja ngemanah ti udah ditetapka ti ngaul paip besai ba Batu 7, Jalai Miri-Bintulu semina deka dipejalaika kena 10 Jun lalu ukai baka ti dipadah dalam notis enda entas nya.

“Sebarang penerang rasmi bekaul enggau bejalaika pengawa nyengkaum kandang endur ke kena empas, timpuh bekal ai tejanggal enggau atur bantu ungkup penguna, semina deka dipadah nengah jalai komunikasyen rasmi Sarawak Water,” ku penerang nya.

Berindik enggau nya, mensia mayuh dilalau anang bekunsi tauka ngerembaika penerang ke enda entas dikena nyeliahka saru penemu enggau pengirau ati bala penguna.

Sarawak Water mega nyemetak madahka sida beratika enggau berat pengawa ngerembaika penerang ti bula tauka enda betul ti tau ngasuh mensia mayuh saru sereta ngeruga pengandal penguna ngagai servis bekal ai.

Nitihka penerang nya, atur ke patut nyengkaum ngeripot ngagai opis bekuasa tau dipejalaika ngagai sebarang individu tauka piak ke ditemu nyadung penerang ke enda betul.

Mensia mayuh mega dilalau ngambika seruran bemalin ngagai jalai komunikasyen rasmi Sarawak Water dikena ngulihka penerang ke tulin, betul sereta pemadu baru bekaul enggau servis bekal ai.

Sarawak Water madahka sida deka terus meri penerang ngagai penguna ari setiap maya nyema bisi pemansang bukai bekaul enggau pekara nya. – RBI

Sumber kredit TVS

#ruaiberitaiban#newsiban#beritaiban

Rindu | Titih | Kunsika