SPAOH, 15 April — Pemesai ari Palan Servis Rayat Parlimen P.204 Betong ngulu Sesi Taklimat Program Ngemanahka Rumah Rayat Seranta Sarawak (PPRMS) Renggat 1/2026 ungkup sitak DUN N.37 Bukit Saban ti diatur ba Opis Pelilih Mit Spaoh.

Penerang nya ngembuan tuju deka meri penerang ti komprehensif pasal atur pengawa bejalaika program, kelimpah ari nentuka koordinasyen ti lebih efektif entara ejensi ti bejalaika pengawa enggau ketuai komuniti.

Pengawa tu beguna dikena nentuka bantu ngemanahka rumah ulih dikenataika enggau betul ngagai raban ke ditagit ti begunaka bantu.

Nitihka penerang ari Kaban Parlimen Betong, Dato Dr Richard Rapu, komitmen perintah ti terus bejalaika program baka PPRMS mandangka pengibuh ngagai pengelantang pendiau rayat menua pesisir, seriris enggau agenda pemansang inklusif di Sarawak.

“Program tu ukai semina mantu ngangkatka pemanah pengawa berumah, tang mega meri empas terus ngagai pengelantang pendiau penerima, kelebih agi ba komuniti ti kurang penatai pemisi di menua pesisir,” ku iya.

Sama bisi datai bala Tuai Rumah ti nerima bantu PPRMS enggau pemesai ari Palan Servis Rayat DUN N.37 Bukit Saban.

Sesi meri penerang nya bechairmanka Penguasa Pelilih Mit Spaoh, Danny Lim.

Iya mega ngenataika pengaga ati ngagai raban pengatur enggau semua orang ti bisi kaul ngemujurka sesi meri penerang nya. — RBI

MANJUNG, 15 April — Dua iku lelaki bebadi nyawa pengudah lori ke ngundan manuk ke ditepan seduai bebadi ba Kilometer 194.7 Jalai Besai Pantai Barat (WCE) nuju ke utara, pagi Hari Dua tu tadi.

Ba penusah ngenyinuka ati nya, kededua seduai diripotka tepelanting sebedau ditemu tesangkut ba baruh lori ke tepawah ba bau jalai.

Penulung Direktor Bagi Operasyen Opis Bomba enggau Penyah Penusah Malaysia (JBPM) Perak, Sabarodzi Nor Ahmad madah, Balai Bomba enggau Penyah Penusah (BBP) Sitiawan nerima kangau ngenyit pukul 10.11 pagi.

Tim tujuh iku raban enggau sebuah injin terus dianjung ngagai palan penusah nyadi ungkup operasyen nyelamat.

“Lebuh datai ba endur nya, ditemu sebuah lori ke ngundan manuk udah tekelinchir lalu tepawah.

“Dua iku mansa lelaki tepelanting pansut lalu tesepit ba tisi lori nya.”

“Opis Menteri Pengerai Malaysia (KKM) ke bisi ba endur nya ngentaska kededua bebadi nyawa ba palan penusah ke nyadi ketegal balat bakal,” ku iya ba sebengkah penerang sehari tu tadi.

Tudah ke bebadi nyawa nya dikelala siku lelaki peranak menua nya beumur 45 taun enggau siku lelaki peranak Vietnam ke beumur urung 30 taun.

Raban bomba ngena perengka khas dikena mansutka tubuh dua iku nya ke tepekul sebedau nyerah ngagai polis ngambika bejalaika pengawa nangkanka nya.

Operasyen nyelamat enggau meresi ba palan nya tembu enggau penuh urung pukul 11.32 pagi pengudah kandang endur nya dientaska likun ungkup penguna jalai besai ke bukai. — RBI

SARATOK, 15 April – Semangat kerejasama enggau begulai nyata dipeda lebuh kaban Opis Sukarelawan Malaysia (RELA) Pelilih Saratok begempung ngemujurka Program Servis RELA MADANI (KBRM): Besaup besaup ngetau padi ba kandang menua Roban, kemari.

Program nya betuaika Pemesai Opis RELA Pelilih Saratok, PgR Tengku Amir Ashraf bin Tengku Hamzah ti ngaul aktiviti ngetau padi ba sebuah umai padi ke ngembuan pemesai urung dua ekar ke diempu siku ari raban RELA nya.

Pengawa bejalaika aktiviti nyaup pangan diri ukai semina ngenyampatka proses ngetau padi mansau, tang mega ngayanka nilai mulia kerejasama ti majak ngerembai entara kaban.

Kelimpah ari nya, bala kaban mega bisi bejalaika pengawa meresi ba kandang padi dikena nentuka rampa menua seruran beresi, likun sereta ulih diatur.

Inisiatif baka tu dipeda ukai semina ulih mantu ngelempungka tating kaban ke bisi kaul, tang mega ulih ngerapitka kaul sereta nerenakka semengat beserakup dalam komuniti lokal.

Berebak enggau nya, PgR Tengku Amir Ashraf ngenataika pengaga ati enggau terima kasih ngagai semua kaban ti udah meri komitmen tinggi ngemujurka program nya.

Ku iya, ngatur program ke bansa nya seriris enggau pengawa ngenegapka penatai (Omnipresence) RELA ba genturung pendiau, kelimpah ari ngenegapka agi pangku pengawa ejensi nyadi kaling komuniti ke seruran sedia meri servis. -RBI

KUCHING, 15 — Sepenyampau 692 dos vaksin rabies oral (ORV) diberi dalam timpuh dua hari nengah pengawa bejalaika program pemungkal, nyadi singkang dikena ngerembaika bungkur imunisasyen ngelaban rabies di Sarawak.

Nitihka ripot TVS, Menteri Industri Pemakai, Komoditi enggau Pemansang Kandang Menua Sarawak, Dato Sri Stephen Rundi Utom madahka pengawa ngena ORV nyadi alternatif ti beguna ngagai chara nuchuk, kelebih agi ba pengawa betapi enggau jelu ke nadai orang ngempu.

Iya nyemetak madahka chara nya ulih nambahka pemanah pengawa meri vaksin ba kandang endur ke ngembuan penyampau ukui ke tinggi, lalu enggau nya ulih mantu pengawa nagang pengerekai igi penyakit rabies.

“Kitai deka nyadi ketuai dalam pengawa ngemunaska penyakit rabies laban kandang menua tu ngembuan penyampau ukui ke tinggi.

Pekara ke beguna amat iya nya intervensyen tumu dikena nyeliahka sebarang pemati ketegal rabies,” ku iya baka ke dipansutka TVS lebuh dikerandau ba program nyadung ORV di Taman Malihah.

Ku iya nambah, pengawa bejalaika program ORV deka terus dikerembaika bepelasarka pemanah iya dalam ngurangka kes rabies di nengeri tu.

Berebak enggau nya, Stephen Rundi Utom mega madahka penyampau ukui ba kandang menua Desa Wira, Batu Kawah enggau Taman Malihah dipelabaka manggai urung 3,000 iku, lalu enggau nya minta bungkur vaksinasyen ke lebih komprehensif.

Iya mega nyemetak madahka begunaka sukung terus ari perintah enggau gerempung ukai dikuasa perintah (NGO) dikena nentuka program tu terus dipejalai.

“Enti nadai sukung ari sida, Opis Servis Veterinar Sarawak betapi enggau penanggul suntuk orang gawa bejalaika program baka tu,” ku iya nambah baka ti diripotka TVS.

SEBANGAN, 15 April — Sapit Menteri ba Opis Premier Sarawak (Pengatur Projek ungkup Ejensi Pemansang Wilayah, Dewan Bandaraya Kuching Utara enggau Hal Ehwal Islam), Datuk Dr Abdul Rahman Junaidi neruska penemuai kereja iya ngagai palan projek kedua ti diperambu iya nya ngaga Projek Jelatung Sebangan, Bagi Menua Samarahan.

Penemuai nya mega disempulang pemesai ari Unit Perambu Ekonomi (EPU) enggau Unit Pematau Pegaga Pengawa Sarawak (SIMU), Opis Premier Sarawak.

Projek nya diperambu dikena nganti jelatunf lama ke udah digaga kenyau ari taun 1977 lalu diatu benung ngasaika pengerusak struktur.

Palan baru nya beguna amat nyadi palan penyangkai enggau ngemasi asil orang berikan sebedau dipasarka ba Pasar Sebangan.

Nitih ku iya, projek tu deka nengah proses tinda baru lalu dipelaba deka berengkah digaga ba suku ketiga taun tu, enggau Opis Kereja Raya Sarawak (JKR) Bagi Menua Samarahan nyadi ejensi ti bejalaika pengawa.

Penemuai nya ngembuan tuju deka nentuka guna infrastruktur orang berikan terus diberi perati, seraya mega ngenyampatka pengawa bejalaika projek ungkup pengelantang komuniti lokal. -RBI

LIMBANG, 15 April — Kaban Kunsil Nengeri (ADUN) Batu Danau, Dato Paulus Palu Gumbang begulai enggau bini iya, Datin Mary Sindang bejalaika penemuai meresa penembu kereja ngagai palan Projek Rumah Bujang di Rantau Kiran, ari baruh Program Pengawa Berumah Rayat Terseranta (PPRT), ditu kemari.

Penemuai nya diatur dikena beratika baru status pejalai projek ngaga rumah panjai baru sereta nentuka pengawa bejalaika iya nitihka spesifikasyen, jadual ke udah ditetapka sereta guna penerima bantu.

Inisiatif tu setipak enggau pengawa perintah ti seruran dipejalaika dalam nyendiaka perengka guna rumah ti lebih lantang, likun sereta bekualiti ngagai raban ti kurang penatai pemisi, kelebih agi di menua pesisir.

Sepemanjai penemuai nya, iya mega ngemeratka pemesai guna pengawa matau ti seruran dipejalai dikena nentuka tetiap projek pemansang dipejalaika enggau terang, efisyen sereta meri empas terus ngagai pengelantang pendiau rayat.

Projek ari baruh PPRT, nitih ku iya, ukai semina nyendiaka rumah ke manah agi, tang mega meri pangka ngagai pengawa ngangkatka tikas pengidup enggau pengelantang komuniti lokal.

Sama bisi datai rambau penemuai nya, pengari Residen Bagi Menua Limbang, Puan Ayunni binti Tamimi; pengari Pemesai Pelilih Menua Limbang, Encik Mohd Sobree bin Damit; pengari Injinir Opis Kereja Raya (JKR) Limbang, Puan Roslin Saberi; pemesai Unit Penyambung Mensia Mayuh Sarawak (UKAS), Puan Endrawati Tuah; enggau Pemesai Khas PKWR N.80 Batu Danau, Kr. Aaron Palu.

Penemuai tu mandangka komitmen perintah ti terus dalam nentuka pengawa bejalaika projek pemansang menua pesisir seruran ba jalai ti betul pulaika pemaik enggau pengelantang rayat. — RBI

KUCHING, 15 April – Peminta agih belanja tambah dikena ngenegapka pengawa nagang pengelekai igi penyakit rabies di Sarawak deka dibai ngambika diperunding perintah, nyengkaum ba pengawa mantaika bajet bulan November tu ila.

Menteri Industri Pemakai, Komoditi enggau Pemansang Kandang Menua, Dato Seri Dr Stephen Rundi Utom, madahka pengawa nya beguna amat dikena nentuka semua inisiatif nagang penyakit rabies ulih dipejalaika enggau ngasi sereta nembam agi.

“Kitai deka beratika guna tu enggau lenak sereta berandau enggau Perintah Sarawak dikena nentuka pengawa nagang rabies ulih ditegapka agi,” ku iya.

Iya madah munyi nya pengudah ngabas proses meri Vaksin Rabies Oral (ORV) ngagai ukui lelang ngelingi Dewan Serbaguna Taman Malihah, Jalai Matang, ditu sehari tu.

Nitihku iya, Sarawak majak chakah agi bejalaika pengawa dalam bidang nya taja pan betapi enggau pengurang pengereja pengawa, kelebih agi dalam operasyen nangkap ukui enggau mayau ke nadai orang ngempu sereta bejalaika vaksinasyen komprehensif.

Ku iya nerang, Opis Servis Veterinar Sarawak (DVS) diatu semina bisi 84 iku staf enti dibandingka enggau penyampau semua peminta 566 iku dikena ngerembaika operasyen di serata nengeri.

“Enggau penegap ke bisi diatu, pengawa bejalaika operasyen deka diteruska berenggat, kelebih agi ba kandang endur berisiko tinggi.

“Kitai deka terus ngangkatka pengawa ke udah bisi nyengkaum operasyen nangkap ukui lelang enggau vaksinasyen, taja pan napi sekeda penanggul,” ku iya.

Berebak enggau nya, iya nyemetak madahka chara nagang deka terus dikemerat dikena nentuka pengelekai igi penyakit rabies ulih dijaga tumu.

Ku iya, kerejasama mayuh bengkah piak nyengkaum ejensi perintah, Opis Perintah Lokal (PBT) enggau gerempung ukai dikuasa perintah (NGO) beguna amat dalam ngemujurka pengawa nya.

“Enggau sukung ari semua piak, kami andal amat pengawa tu ulih dikemanahka agi ari setiap maya,” ku iya nambah. -RBI

PADAWAN, 15 April – Siku nembiak indu beumur 14 taun diripotka lenyau pengudah dipechayaka nadai pulai ke rumah kenyau ari lemai kemari.

Nitihka ripot, Balai Polis Tapah nerima penerang bekaul enggau pengelenyau nya kena 14 April 2026 urung pukul 10.51 malam.

Nembiak ke bisi kaul enggau kes nya udah dikelala enggau nama Peggy Boon Yee Sing, bansa Cina.

Maya penusah nyadi, iya diripotka ngena baju T Pendidikan Jasmani (PK) chura biru enggau seluar treksuit chelum.

Iya kepenudi dipeda kena 14 April 2026 urung pukul 6.30 lemai ba kandang luar sekula SMK Tun Abd Razak.

Ketuai Polis Pelilih Padawan, Supt Mohd Irwan Hafiz Md Radzi, ba sebengkah penerang minta kerejasama mensia mayuh enggau sebarang penerang ngambika datai ke mua mantu pansik.

Mensia mayuh tau betanya ngagai Pemesai Pemansik BSJD, Sjn Mohd Khairul Wahab ba lumur 014-8635936 tauka Bilik Gerakan IPD Padawan ba lumur 082-862233, tauka sebarang balai polis ke besemak.

Berindik enggau nya, mensia mayuh dipinta lengkas meri penerang dikena mantu nyidi penunga nembiak nya.-RBI

KUCHING: Datuk Joseph Salang Gandum ke chukup mayuh peneleba dalam politik enggau pentadbiran udah nempa iya siku orang ke tebangkar nyengkaum kala ngiring Parti Rakyat Sarawak (PRS) sereta mangku pengawa nyadi Kaban Parlimen Julau.

Bepelasarka pekara tu, Kaunsil Besai Balai Dagang enggau Industri Dayak (DCCI) udah nyiri iya nyadi penyanding penemu khas ungkup timpuh 2026 ngagai 2029.

Kelimpah ari kala ngiring parti politik, iya mega ngembuan peneleba mangku beberapa pangku pengawa ke beguna dalam perintah, nyengkaum nyadi Sapit Menteri Luar, Sapit Menteri Kuasa, Ai enggau Penyambung enggau Sapit Menteri Pemadah, Penyambung enggau Main Asal.

Iya mega ngembuan penteba dalam sektor bank sebedau ngemeranka pengawa politik.

Presiden iya, Allan Keripin Nangkai madah, pengawa nyiri Salang nya ngayanka komitmen DCCI nguna ketuai ti bepeneleba sereta penemu strategik dalam ngenegapka pangku pengawa balai nya.

“Peneleba iya ke chukup mayuh, dedikasyen ke tinggi sereta penemu ke ulih bejalaika tanggungpengawa ke beguna dalam ngiring kaunsil nuju ngamatka visyen enggau juluk strategik, kelebih agi dalam ngemansangka pemerat komuniti dagang Dayak.

“Kitai mega ngarapka bulih penguntung ari timpai iya dalam nyukung inisiatif pemansang sosio-ekonomi ke lebih besai,” ku iya dalam penerang nya.

DCCI ti ditumbuhka dalam taun 2003 nyadi sebengkah raban ti ngemansangka aktiviti ekonomi komuniti Dayak di Sarawak. -RBI

MERADONG, 15 April — Siku lelaki peranak menua tu beumur 23 taun ditan nengah pengawa ngenyit tim Opis Tasat Jenayah Narkotik (JSJN) Indu Opis Polis Pelilih (IPD) Meradong di Batu 1, Jalai Kelupu, Bintangor, lemai kemari.

Ketuai Polis Pelilih Meradong, DSP Tansli Mering madah, pengawa datai ngenyit nya dipejalaika urung pukul 5.40 lemai ba kaki lima sebuah rumah ke nadai lumur ba kandang menua nya.

Nitihku iya, asil peresa nya tetemuka saspek bisi ngembuan stra mirah ti ngundan gumpal kristal ti dipelabaka dadah bansa methamphetamine (syabu), ti ditemu dalam beg sandik ba atas mija besemak enggau endur ngetanka saspek.

“Udah nya saspek dibai ngagai Opis Tasat Jenayah Narkotik (BSJND) Meradong ngambika atur silik agi dipejalaika.

“Asil peresa ai kemi tetemuka saspek positif amphetamine enggau methamphetamine,” ku iya ba sebengkah penerang berita.

Iya mega madah, pengawa meresa rikod ke udah tetemuka saspek bisi rikod penyalah bekaul enggau dadah.

Kes tu dipansik nengah Seksyen 12(2) Akta Dadah Berbahaya 1952 ti nyendiaka ukum mata duit enda ngelui RM100,000 tauka jil nyentuk lima taun tauka kededua ukum enti dikenuku salah.

Berebak enggau nya, Tanli Mering nyemetak madahka raban polis beratika penyalah dadah ba genturung pendiau enggau berat sereta enda belembut ba sebarang pengawa ke bansa nya.

Mensia mayuh ke bisi penerang bekaul enggau aktiviti dadah di pelilih Meradong dipinta nyalur ngagai polis nyengkaum betanya ngagai Balai Polis Bintangor nengah lumur 084-693222. -RBI