BINTULU, 28 April — Sepenyampau 15 buah rumah suwa beteres (konkrit) ba kandang Rumah Suwa Nana Katering, Jalai Seberkas, Samalaju udah dituntung penusah angus ke nyadi kemari urung tengah hari.
Ba penusah nya, beberapa buah rumah kayu mega angus lengis lebuh api nyerarai enggau jampat ngagai struktur genturung pendiau ke besemak.
Api dipelabaka nyerarai enggau jampat ketegal gaya hari ti angat enggau angin ti balat bepuput maya penusah nya nyadi.
Tim Balai Bomba enggau Penyelamat (BBP) Kidurong ngesah ngagai endur nya lebuh nerima kangau ngenyit bejalaika operasyen madamka api sereta beratika pengelikun kandang endur ke kena penusah nya.
Operasyen nya mega ngaul pengawa meresa enggau silik struktur begunan ke angus nya.
Nitihka penerang ari Ketuai Balai Bomba enggau Penyah Penusah PBT II Kidurong Rary anak Binjie, semua orang ke diau ba 15 buah rumah ke bisi kaul nya mungkur peranak ke beumur entara dua ngagai 70 taun mujur ngelarika diri.
“Tebal agi bekaul penusah nya ruang bilik ke diau ba endur nya, lalu maya penusah nya nyadi, mayuh dipelabaka ba rumah sida,” ku iya.
Naka ke diatu, nadai penusah bebadi nyawa diripotka nyadi, tang semua peranak ba genturung nya udah pindah ketegal penusah angus nya.
Berindik ari penusah nya, Gerempung Orang Dagang Kiosk Sarawak Bintulu (GUKS) udah mansang ke mua meri bantu enggau lengkas dalam tukuh bekal pemakai enggau barang dapur ngagai semua ruang bilik ti tasah.
Ungkup penerang GUKS betuaika Puan Jonika Kinggua enggau raban iya, Puan Martina Wong, Puan Valerie Rose, Puan Mang Helen, Puan Angela Jali, Puan Annie Angga, Puan Christina Gelian enggau Cik Biebie.
Entara barang bantu ke diagih nyengkaum beras, kupi, telu, gula, mee segera, kereban bebasu, ruti enggau gari ti dikena ngelempungka tating penusah ke ditapi sida ke tasah.
Pengawa nyuaka bantu nya dipejalaika kena sehari tu tadi (28 April 2026) urung pukul 3.00 lemai ba palan rumah suwa ke bisi kaul di Bintulu nya.
GUKS mega ngenataika pengaga ati ngagai semua kaban gerempung nya, kelebih agi Kaban Komiti (AJK) ti bisi enggau ngatur sereta mensia mayuh ti bisi bekaul pengawa meri bantu ngagai sida ti tasah angus.
Piak bekuasa bekaul diatu benung bejalaika pansik ke silik dikena ngelala kebuah kebendar penusah nya nyadi. — RBI
