KUCHING, 28 April – Dewan Bandaraya Kuching Utara (DBKU) udah meri kelala Aplikasyen Eagle OSH Eye ba Pengerami Nyambut Minggu Pengelikun enggau Pengerai Kereja (Minggu OSH) DBKU 2026 ke diatur sehari tu.
Aplikasyen Eagle OSH Eye iya nya inisiatif matau pengelikun enggau pengerai kereja ti ngemeratka pengawa beratika enggau seruran matau ba endur gawa.
Pengerami tu dipenyadika Ts. Mohamad Faisal bin Adenan, Pemangku Direktor DBKU.
Aplikasyen tu nyadi sistem ngeripot penusah nengah chara ngiga kod QR, lalu enggau nya ngasuh pengereja pengawa DBKU ulih nyidi ulah ti enda likun, palan ti tau mai penusah enggau pengawa ti manah enggau jampat agi, betul sereta sistematik.
Kelimpah ari nya, inisiatif tu ngayanka chara inovatif DBKU dalam ngenegapka budaya ngeripot enggau nagang risiko begulai.
Berebak enggau nya, pengawa ngatur Minggu OSH DBKU 2026 nyadi kelai komitmen ti seruran ngenegapka budaya pengelikun enggau pengerai ba endur gawa, seriris enggau rambau jaku global “Good Psychosocial Working Environments: A Pathway to Thriving Workers and Strong Organization.”
Ba DBKU, pengelikun enggau pengerai kereja dipeda nyadi tanggungpengawa bekunsi ti mungkur semua renggat gerempung.
Komitmen tu ukai semina ba bau raban pengatur pengawa, tang mega begunaka penyedar, pengirau enggau kaul ti chakah ari genap iku pengereja pengawa dalam ngelala risiko sereta ngambi atur nagang enggau proaktif.
Chara tu setipak enggau pengawa DBKU ti enda ngetu nentuka setiap pengawa dipejalaika dalam kandang endur ti likun, bepengerai sereta kondusif.
Bemacham program enggau aktiviti mega bisi dipejalaika dikena nambahka penyedar enggau kaul pengereja pengawa, nyengkaum Kimpin Meri Darah, penerang penyedar, pemandang OSH enggau kuiz, pemandang Perengka Pengelikun Diri (PPE), senamrobik, pekit nyetik, pekit main dam enggau OSH Fun Walk 1,000 Singkang. -RBI
