MIRI, 28 April – Palan Servis Parlimen P.219 Miri ngambi singkang dikena mantu rayat mantu peranak di Miri ngulihka jaku lalau bekaul undang-undang enggau enda bebayar.
Kaban Parlimen Miri, Chiew Choon Man madahka, inisiatif tu nyadi siti pengawa dikena ngenegapka rayat enggau pemereti ati ba pekara undang-undang.
Chiew ke mega Sapit Menteri Dagang Temuai, Seni enggau Main Asal madah, servis nya mungkur mayuh bengkah sukut nyengkaum pekara estet enggau wasiat, sarak enggau nyaga anak, nyuwa enggau ngempu reta tengkira, ngachau enggau ngemaruhka nama, kes jenayah mit sereta mega prosedur kort enggau dokumentasyen undang-undang.
“Servis nya deka diatur kena Hari Empat tu, berengkah ari pukul 2 ngagai 4 lemai ba palan servis nya,” ku iya.
Nitihku iya, program ke udah dipejalaika kenyau ari taun 2024 nya ngembuan tuju deka nentuka setiap renggat mensia mayuh kelebih agi raban orang ke kurang penatai pemisi bisi akses ngagai jaku lalau undang-undang profesional.
“Servis tu enda bebayar enggau penuh.Aku deka nentuka rayat kelebih agi sida ti betapi enggau penanggul belanja enda dikelaung ari minta penemu undang-undang.
“Aku meretika tating enggau penyaru ti ditapi lebuh napi penanggul undang-undang enggau enda nemu singkang ke patut diambi.
“Nengah inisiatif tu, kitai ulih mantu sida meretika hak undang-undang sida sereta meri iring keterubah ba singkang ke nangkanka nya,” ku iya ditu, sehari tu.
Taja pia, penyampau endur bisi sekat lalu mensia mayuh ke bisi ati dilalau ngaga buking tumu nengah lumur 012-8530946, bepelasarka konsep ‘first-come, first-served’.
Ngenang silik agi, iya ngarapka inisiatif nya ulih nambahka penyedar mensia mayuh pasal hak enggau tanggungpengawa sida ari baruh undang-undang.
“Undang-undang digaga dikena nyaga hak rayat.
“Nya alai, beguna amat meri kuasa ngagai mensia mayuh enggau penemu ke betul ngambika sida andal agi napi sebarang isu ke bekaul,” ku iya.
