CYBERJAYA, 15 April — Suruhanjaya Komunikasyen enggau Multimedia Malaysia (SKMM) udah ngerikod penerang ari siku individu ke dipelaba ngerembaika berita pelesu bekaul enggau dawa bekal urung 329,000 tong minyak diesel ngagai Filipina.

MCMC dalam siti penerang madahka piak bekuasa udah ngentaska minyak diesel nya enggi Vitol, lalu ukai enggi PETRONAS tauka Perintah Malaysia.

Nitihka penerang, kereban komunikasyen ke dipelabaka dikena ngangkatka isi nya mega dirampas dikena mantu pengawa mansik.

Naka 14 April (Hari Dua) tu tadi, sepenyampau 47 iti keretas pansik udah dibuka bekaul enggau pengerembai berita pelesu bekaul enggau krisis kuasa global ba pelasar media rama enggau media digital, berindik ari penyarut ke nyadi di Asia Barat.

Semua kes nya agi benung dipansik enggau silik agi.

Entara isi pelesu ti udah viral nyengkaum dawa ti madahka rega minyak udah niki jauh ngelui ari ti dipadahka ke bendar, chukai karan udah niki, kapal Malaysia di Selat Hormuz udah mayar tol ngagai Iran, pengawa nyendiaka subsidi BUDI95 ngagai rayat Singapura, enggau pengawa nganjung 329 tong diesel diempu Vitol ti dipadahka diempu menua Malaysia.

Pansik dipejalai ari baruh Seksyen 233 Akta Komunikasyen enggau Multimedia 1998 (Akta 588), ti nyendiaka ukum maksimum RM500,000 tauka jil nyentuk dua taun tauka kededua ukum enti ditemu salah.

MCMC nyemetak madahka sida beratika enggau berat sebarang pengawa salah guna platform digital ti ngembuan tuju deka ngelimpangka mensia mayuh, nengah pengawa ngerembaika penerang ti enda betul, lalu atur ti terit deka dipejalaika ngagai sebarang piak ti ngelanggar undang-undang. -RBI

SARIKEI, 15 April — Tiga iku nembiak indu bakal ba penusah aksiden jalai alun (KJR) ti mungkur sebuah mutosikal ba mua KPSU Sarikei, malam kemari.

Ba penusah nya, mutosikal ke ditepan sida iya dipelabaka enda ensayar sebedau tepawah ngagai parit ba palan penusah nyadi.

Berindik ari penusah nya sereta nitihka penerang Raban Penyaga Orang Periman (APM) Sarikei, ketiga-tiga sida diripotka bakal ba sekeda bagi tubuh nyengkaum kaki, jari enggau mulut.

Raban penyelamat ke datai ba palan penusah nyadi meri perubat keterubah sebedau mai semua sida ke sepital ngena ambulan ngambika diperubat enggau silik agi. -RBI

SIMANGGANG, 15 April — Pejalai ari Kuching ke Simanggang semina begunaka timpuh 1 jam 15 minit enti jalai baru entara kededua endur tu udah tembu ila, ku Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg.

Garis tu ti berengkah ari Jematan Sejingkat nengah Samarahan terus ngagai Simunjan nyentuk ke Simanggang naka penyauh 142 KM ngena kerita enggau pengelaju 90 KM sejam, deka nyadi nyata enti dibanding enggau diatu 2 jam 30 minit nengah Pan Borneo.

“Kebendar iya, Jematan Batang Lupar 2, Jematan Lingga ti deka nyambung terus Simanggang ngagai Kuching deka meri pemaik ngagai pemansang enggau peluang ekonomi di kandang menua ngelingi,” ku iya.

Iya madah munyi nya lebuh bejadika Aum Ekonomi DUN Lingga 2026 ke diatur ba Dewan Sivik Sri Aman kena Hari Minggu tu tadi.

Ku iya nambah, tebing ai ke diatu deka disambung ngagai tebing ai baru niki ngagai Jematan Batang Lupar II lalu deka disempulang enggau pengawa ngaga Dewan Suarah ke baru, moden agi sereta ikonik kelimpah ari pemansang kandang endur “pesaka” enggau ekonomi baru ditu enggau ngelingi.

Forum dua hari diatur Gerempung Anak Migran Sri Aman enggau Palan Servis DUN N28 Lingga berengkah ari 11-12 April 2026 digulu penyereta ari mayuh bengkah pupu bansa enggau pengawa dagang di Pelilih Lingga enggau Sri Aman.

Batang tuju forum tu dikena meri kelala ngagai ekonomi digital, tenaga gadung, dagang ti meruan, kelimpah ari nambahka pemereti ati ba standard sijil halal enggau peluang dagang, nyambung raban nembiak enggau institusyen TVET ungkup peluang latih kereja sereta nyendiaka peluang kerejasama entara ejensi perintah, komuniti enggau pengemeran industri.

Datuk Patinggi Abang Haji Johari ngenataika jaku terima kasih enggau pengaga ati ngagai raban pengatur enggau bala penyereta ke bisi datai lalu arap bendar nya ulih nangkup juluk pengatur pengawa.

Sama bisi datai sereta ngenataika jaku pengelalu iya nya Kaban Kunsil Nengeri (ADUN) Lingga ke mega Penyanding Penemu Forum, Dayang Norazah Awg Sohor.

Sama bisi datai Dato Sri Haji Julaihi Bin Nanawi, Menteri Perengka Guna enggau Telekomunikasyen Sarawak, Dato Sri Dr Wan Lizozman bin Wan Umar, Sekretari Pekara Wang Sarawak, Dato Sri Dr Abdullah bin Zaidell, Sapit Sekretari Perintah Sarawak, Dato Sri Sophia Brodie, Ahli Parlimen P.202 Sri Aman, Kaban Kunsil Nengeri (ADUN) enggau Datu Haji Kameri Bin Affendi, Chairman Anak Perantau Simanggang. — RBI

KUCHING, 15 April — Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg udah nerima penemuai basa ari Sapit Menteri Besai, Dato’ Seri Dr. Ahmad Zahid bin Hamidi dalam aum ke diatur ba Sri Pertiwi, Petra Jaya, lemai kemari.

Aum nya diatur enggau tuju nyerahka nota nyerahka rasmi pengawa bejalaika Projek Bekal Ai Menua Pesisir (BALB) ari Opis Menteri Pemansang Menua Pesisir enggau Kandang Menua (KKDW) ngagai perintah Sarawak, ti ​​nyadi singkang ti beguna dalam ngenegapka pengawa nyendiaka perengka guna asas kandang menua pesisir enggau kandang menua Sarawak ngagai rayat.

Dato’ Seri Dr. Ahmad Zahid ke datai di Kuching kemari, benung di nengeri tu dalam penemuai kereja rasmi ti ngemeratka pengawa bejalaika enggau koordinasyen projek pemansang infrastruktur.

Sebedau aum enggau Premier Sarawak, iya nyadi chairman Aum Koordinasyen Pengatur Pejalai Projek Bekal Ai Menua Pesisir (BALB) Begulai enggau Perintah Sarawak kena pagi.

Aum nya ngembuan tuju deka nentuka pengawa bejalaika projek nya ulih dipejalai sereta dikoordinasyen enggau lebih efektif, lalu ari nya ulih ngenyampatka pengawa nganjung bekal ai beresi ngagai rayat.

Sama bisi ngulu aum nya Sapit Premier Sarawak, Datuk Amar Douglas Uggah Embas, Menteri Perengka Guna enggau Telekomunikasyen, Dato Sri Haji Julaihi bin Haji Narawi, Sapit Menteri Pemansang Menua Pesisir enggau Kandang Menua, Sarawak Hajah Rubiah binti Wang enggau Sekretari Perintah Sarawak, Datuk Amar Haji Mohamad Abu Bakar bin Marzuki. — RBI

KUCHING, 15 April — Premier Sarawak, Datuk Patinggi Tan Sri Abang Abdul Rahman Zohari Tun Abang Haji Openg madahka pengawa ngerembaika kapasiti industri nengeri tu majak ditegapka nengah pengawa ngemansangka Taman Perindustrian Samalaju 2.

Nitihku iya, inisiatif nya disukung tagit Sarawak ti deka nyapai kapasiti kuasa 10 gigawatt (GW) manggai ba taun 2030 lalu nambah ngagai 15GW manggai ba taun 2035.

Abang Johari mega nerangka, Palan Penyangkai Kapal Bintulu deka terus bejalaika tanggungpengawa ti beguna dalam transisyen Sarawak nuju ngagai kuasa beresi, berindik ari penuduk iya nyadi pintu penama eksport besai menua ungkup gis asli cecair.

“Sarawak mega chakah ngemansangka sektor hidrogen, ammonia enggau kuasa tau dikena baru dalam pengawa deka ngengkahka nengeri tu nyadi pemain kuasa global ti kompetitif,” ku iya.

Berebak enggau nya, iya nyambut manah kerejasama strategik ti ngaul kaban antarabansa enggau menua tu baka Shanghai International Port Group, Sarawak Petchem enggau Brooke Holdings, nyengkaum perambu ngemansangka hab halal.

Berebak enggau nya, iya nyemetak madahka palan penyangkai kapal jemah ila patut ngemeranka digitalisasyen enggau automasyen dikena nentuka pengawa ti engkeman, kelimpah ngansak Palan Penyangkai Kapal Bintulu ngenegapka pengawa ngena teknologi pintar enggau operasyen ti dipejalai ngena data.

Iya mega nerangka pengawa mindahka kuasa pengatur Palan Penyangkai Kapal Bintulu ngagai perintah Sarawak nyadi pemujur ke besai reti ti deka ngasuh ulih setipak enggau manah agi enggau pemerat pemansang nengeri.

Nengah penumbuh Kaunsil Penyangkai Kapal Sarawak, operasyen palan penyangkai kapal di Kuching, Miri, Tanjung Manis enggau Sibu deka digaga nengah langkar ke lebih bestruktur.

Ngelansa pasal pemansang dunya, Abang Johari madah, penyarut geopolitik ti ngeruga rentayan bekal kuasa begunaka chara ti lebih tegap sereta ngemayuhka pun penatai.

Berindik enggau nya, iya madahka Sarawak diatu benung ngenegapka rentayan rega gis, ngenyampatka pengawa ngena kuasa tau dikena baru sereta bejalaika atur dikena ngurangka empas ungkus ke majak niki ngagai rayat.

“Dalam konteks tu, Palan Penyangkai Kapal Bintulu ukai semina palan penyangkai kapal aja, tang nyadi aset strategik dikena nentuka Sarawak terus kompetitif sereta tan,” ku iya.

Iya mega ngemeratka komitmen perintah nengeri terus nyukung pemansang Palan Penyangkai Kapal Bintulu ngambika besemekih nyadi raban penyangkai kapal ti pintar, gadung sereta ulih besemekih ba renggat global dalam timpuh tiga dekad ti deka datai.

Sama bisi datai Sapit Premier Sarawak, Datuk Amar Douglas Uggah Embas enggau Datin Amar Dato Doreen Mayang, sereta mega Datuk Amar Prof Dr.Sim Kui Hian.

Sama bisi datai Speaker Dewan Undangan Negeri Sarawak, Tan Sri Datuk Amar Mohamad Asfia Awang Nasar enggau Datin Amar Dato Hajah Fatimah Mohd Iskandar, Sekretari Perintah Nengeri Sarawak ke mega Chairman Palan Penyangkai Kapal Bintulu, Datuk Amar Haji Mohamad Abu Bakar Marzuki enggau Datin Amar Dato Hajah Baduyah Bujang, Presiden ke mega Ketuai Pegawai Eksekutif Kumpulan Bintulu Port Holdings Berhad, Dato Ruslan Abdul Ghani enggau Datin Dayang Hapipahton Abang Abdillah, sereta anak Premier Sarawak, Puan Dayang Norjihan Abang Zohari. -RBI

SIBU, 15 April — Pengawa Bebaris Meri Puji Panglima 1 Divisyen (1 Div) udah diatur ba Kem Junaco Park kena Hari Satu, 13 Apr 2026 tu tadi.

Pengawa bebaris tu diatur beserimbai enggau belidar gawa Panglima 1 Div ngagai Mk AB mangku pengawa nyadi Ketuai Staf.

Kontinjen ungkup pengawa bebaris meri puji ngagai Panglima 1 Div betuaika Leftenan Kolonel Mohd Izwan bin Ramli, Pemesai Pemerintah Batalion Ke-20, Rejimen Melayu Diraja (20 RAMD).

Tekala nya pengudah pengawa bebaris meri puji, pengawa nya disambung enggau pengawa makai lemai sereta nyuaka tepa pengingat. — RBI

KUCHING, 15 April — Perintah Sarawak benung mansik pemansang rentayan kereta api gadung ti nyambung Bintulu, Kidurong enggau Samalaju dikena ngenegapka logistik industri sereta nentuka penumbuh ekonomi nengeri tu meruan sereta ulih besemekih.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Openg madah, pansik diatu benung dipejalaika ungkup perambu jalai kereta api ti nyambung Palan Penyangkai Kapal Bintulu enggau Palan Penyangkai Kapal Samalaju, lalu enggau nya numbuhka rangkaian “tiga satelit” ungkup pemindah barang enggau pesinjir ti lebih efisyen ngena teknologi ti meruan.

Nitihku iya, pemansang rentayan kereta api deka nambahka penyambung, ngelengkaska rentayan bekal sereta nyukung agenda logistik gadung setipak enggau strategi pemansang Sarawak.

Iya madah munyi nya lebuh bejadika pengerami ngintu genap 30 taun Bintulu Port Holdings Berhad ditumbuhka ba Hotel Sheraton, ditu.

Abang Johari nambah, perambu sistem kereta api nya deka nangkup pemansang industri ti jampat di Samalaju kelimpah ari ngenegapka pangku pengawa Bintulu nyadi pintu penama ekonomi besai, kelebih agi nyukung industri kuasa enggau berat.

Seriris enggau pengawa bejalaika Strategi Pemansang Pengudah COVID-19 2030 (PCDS 2030), iya nyemetak madahka infrastruktur pengangkut ti efisyen sereta meruan beguna amat ba pengawa narit puku sereta nentuka daya besemekih nengeri tu dalam timpuh ke panjai.

Ari sukut pemansang industri, iya madahka Zon Bibas Samalaju ngembuan potensial nyadi pematak penatai puku baru sereta ngenegapka aktiviti ili.

“Zon bibas ti ditusun enggau manah ukai semina meri insentif, tang begunaka pengawa ngaga ekosistem ti penuh ti ngangkatka inovasyen, efisyen enggau penumbuh industri timpuh panjai,” ku iya. -RBI

PAKAN, 14 April – Gerempung Raban Pakan (GRP) deka ngantur Pengerami Makai Lemai beserimbai enggau Mantar Gawai Dayak kena 9 Mei 2026 tu ila.

Chairman GRP, Jerenang Jawa madahka pengawa tu mega ngembuan tuju ungkup begigaka belanja dikena gerempung nya bejalaika aktiviti mantu komuniti di Pakan.

“Asil ari aum raban komiti GRP empai lama ke udah, kami besetuju ngatur pengerami makai lemai diumbaka mega dikena kitai mantar pengerami Gawai Dayak.

“Asil ari program nya ila, dikena kami (GRP) bejalaika aktiviti mantu komuniti di Pakan lalu tu senipak enggau misyen sereta juluk GRP ditumbuhka kenyau ari taun 2016 suba,” ku iya madah.

Ba pengerami nya ku Jerenang, bela diatur iya nya pengawa nyuaka insentif pelajar ngagai anak raban GRP ke mujur ba tikas Sijil Pelajaran Malaysia (SPM), Sijil Tinggi Pelajaran Malaysia (STPM) sereta sida ke mujur ke nampung pelajar ngagai tikas ke tinggi agi.

“Nya alai kami begunaka belanja dikena meri semangat ngagai anak-anak kitai ke mujur ba sekula, lalu ngarapka bantu nengah isentif tu ila ulih nyadika pematak ngagai komuniti Pakan mujur ba pengawa besekula,” terang Jerenang.

Kelimpah ari nya mega ku iya, pengawa chabut tikit benasip mega bisi diatur lalu nyuaka pemeri tanda kenang ngagai raban GRP ungkup ngaku jasa sida sepemanjai mantu ngangkat gerempung tu.

Bekaul rega mija, Jerenang madahka rega sebuah mija iya nya RM600 lalu diatu pengawa meli mija udah tau berengkah diatur.

Ngagai sapa deka meli mija tauka deka nemu penerang ke silik agi, tau betanya ngagai Jerenang ba lumur telepon 014-3713875, Johny Banyang 013-8944828, Thomas Jain 013-8068408, Jetif Sikos 019-8277587 enggau Stephen Fung Kok Fah 019-8381631. -RBI

KUALA LUMPUR, 14 April — Opis Menteri Wang Malaysia nyemetak madahka dawa ti udah viral ba media rama bekaul enggau rega diesel ti didawa niki nya enda amat sereta nadai pelasar.

Berindik enggau nya, mensia mayuh dilalau ngambika enda mudah tekuing runding enggau sebarang penerang ti enda dientaska sereta ngetuka pengawa ngerembaika berita pelesu ti tau ngasuh mensia mayuh saru penemu.

Opis Menteri mega ngemeratka pemesai guna meresa fakta nengah sumber rasmi sebedau bekunsika sebarang penerang ba pelasar media rama.

Mensia mayuh diperansang meresa ngagai jalai komunikasyen rasmi perintah dikena ngulihka penerang ke betul, tulin sereta pemadu baru bekaul enggau rega minyak.

Opis Menteri Wang Malaysia tetap komited nentuka semua penerang bekaul enggau rega minyak dibantai enggau terang, betul sereta bekuasa ungkup pengelantang rayat. — RBI

KUCHING, 14 April – UNIFOR udah ngatur Woksyop Ubah enggau Ngemanahka Garis Lalau ke Udah Bisi Ngatur enggau Ngemeranka Bantu Wang Turu ngagai rumah sembiang jalai pengarap bukai enggau sekula misyen di Kuching, sehari tu.

Woksyop tu dipejalaika nyadi pengawa dikena ngenegapka sistem nganjung bantu ngambika lebih efisyen, teratur sereta efektif nitihka guna kemaya hari tu.

Berebak enggau nya, iya mega ngemeratka relevansi, inklusif enggau guna garis lalau ngambika setipak enggau realiti sereta utai ke diguna ba renggat baruh.

Pengawa bejalaika woksyop tu mega setipak enggau tesau Datuk Amar Sekretari Perintah Nengeri Sarawak ti ngerintaika chara 3R iya nya Revisit, Rethink enggau Recharge dalam pengawa ngenegapka sistem meri servis perintah ngambika lebih dinamik sereta responsif ngagai rayat.

Entara batang pekara ti dikerandau iya nya begunaka agih belanja ti bekaul enggau pengawa ngatur pendam ungkup jalai pengarap bukai.

Iya nyengkaum nyendiaka infrastruktur pemun baka jalai, pagar pengelikun, perengka guna sukung enggau pengawa ngintu, kelimpah ari perengka guna begunan krematorium ke lebih teratur sereta engkeman.

Ungkup sekula misyen, fokus randau mega ngemeratka pengawa nyendiaka kereban enggau perengka guna belajar ti bekaul, dikena nyukung pemansang minat enggau potensial nembiak, kelebih agi dalam bidang Sains, Teknologi, Injiniring enggau Matematik (STEM).

UNIFOR ngemeratka komitmen iya ti seruran dikena nentuka tetiap bantu belanja ti disalur dipejalaika enggau terang, lurus sereta akauntabiliti, lalu enggau nya meri empas positif sereta penguntung ti komprehensif ngagai komuniti. -RBI