MUKAH, 28 April — Siku lelaki peranak menua luar enggau siku indu peranak menua tu udah ditangkap polis pengudah dipelaba ngembuan dadah ba sebengkah operasyen di Jalai Lama Mukah–Balingian, kemari.

Ketuai Polis Pelilih Mukah, DSP Muhamad Rizal bin Alias ​​madah, pengawa nangkap nya digaga urung pukul 1.00 lemai kena 27 April tu tadi ari raban ari Bagi Pansik Jenayah Narkotik Indu Opis Polis Pelilih (IPD) Mukah bepelasarka penerang pemansik.

Nitihka penerang iya, maya pengawa meresa ti dipejalaika ba kandang kampung nya, dua iku saspek ke beumur 44 enggau 37 taun nya ditemu duduk ngena mutosikal sebedau saspek lelaki nya nempalungka utai ke disyaki ngagai babas ke besemak.

“Asil ari pengawa meresa nya tetemuka bungkus plastik ti terang ti ngundan bengkah kristal ti dipelabaka dadah bansa methamphetamine tauka syabu enggau pemerat kasar dipelabaka 0.63 gram,” ku iya nengah penerang berita sehari tu.

Iya mega madahka peresa ai kemi ba kededua saspek tetemuka positif amphetamine enggau methamphetamine.

Kes tu dipansik ari baruh Seksyen 12(2) enggau Seksyen 15(1)(a) Akta Dadah Berbahaya 1952.

Berebak enggau nya, keretas pansik mega udah dibuka ari baruh Seksyen 6(1)(c) Akta Imigresen 1959/63 ngagai saspek lelaki ketegal nadai ngembuan dokumen pejalai ti entas.

Nitihku DSP Muhamad Rizal, pansik tumu tetemuka kededua saspek ngaku dadah ke dirampas nya enggi seduai iya.

Sida ke gawa nyadi pekereja ladang sawit nya diatu ditan riman pengelama tiga hari nyentuk 1 Mei tu ngambika ulih mantu pengawa mansik silik agi.

Berebak enggau nya, iya ngemeratka komitmen Polis Pelilih Mukah ti terus ngemuntanka aktiviti salah guna dadah sereta nesau mensia mayuh ngenataika penerang ngagai opis bekuasa nengah talipaun 084-871222 tauka sebarang balai polis ke besemak. — RBI

KUCHING, 28 April — Indu Opis Polis Pelilih Kuching minta kerejasama mensia mayuh mantu nyidi, ngiga siku lelaki peranak menua nya ke diripotka lenyau kenyau ari 25 April tu tadi.

Ketuai Polis Pelilih Menua Kuching, ACP Alexson Naga Chabu nengah siti penerang madahka lelaki nya dikelala enggau nama Carlos Vaildon David, 26 taun, bebansa Bidayuh sereta gawa nyadi jurujual.

Nitihku iya, alamat kepenudi mansa iya nya ba lumur 25, Lot 4417, Taman Desa Permai, Jalai Dato Mohd Musa, Kota Samarahan.

“Maya pansut ari rumah, tudah dipelabaka ngena baju T chelum ke bisi ditulis ‘Switch’, betanchut tracksuit bottom chelum enggau kasut chelum jenama New Balance,” ku iya.

Ku iya nambah, mansa mega dipelabaka ngena kerita Perodua Myvi enggau lumur rejista QAQ 5824.

Berindik enggau nya, mensia mayuh ke bisi penerang pasal penunga tudah dipinta datai ke mua meri bantu nengah chara betanya ngagai Ketuai Balai Polis Sekama, Simon anak Renang ba lumur 016-8547803 tauka Palan Kawalan IPD Kuching ba lumur 082-244444.

Mensia mayuh mega dilalau ngambika enda ngaga sebarang spekulasyen ke tau ngachau pengawa mansik, tang ngambika ulih mantaika penerang ngagai piak bekuasa ngambika ulih mantu pengawa ngiga tudah enggau lengkas. — RBI

PARIS, 28 April – Delta Sarawak ti mungkur pemesai 3,112 kilometer persegi ti mandangka penyelai geologi, biodiversiti enggau pesaka asal nengeri tu nempa sejarah ba renggat antarabansa lebuh iya diaku enggau rasmi nyadi Geopark Global UNESCO.

Ari penyampau nya, 2,685 kilometer persegi iya nya darat lalu 427 kilometer persegi ngaul kandang tasik, mungkur Bagi Menua Kuching enggau sebagi ari Bagi Menua Serian.

Pengawa ngaku ti beprestij nya nyadika pemujur ti beguna dalam pengawa Sarawak ngetanka pesaka asal, seraya meransang pemansang ti meruan, dagang temuai ti betanggungjawap enggau pengelantang komuniti lokal.

Pengawa nyuaka setipikit nya diatur kena 27 April 2026 ba Indu Opis UNESCO di Paris, lalu Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh nguluka deligit Sarawak nerima pengangku nya.

Setipikit nya disuaka Ketuai Seksyen Sains Bumi enggau Geopark UNESCO, Kristof Vandenberghe.

Penyelai kandang endur tu nyata nengah sistem sungai ti kompleks, rampa menua tebing tasik enggau formasyen sedimen ti ngayanka sejarah dunya pengelama bejuta taun.

Kelimpah ari nya, geopark tu mega mungkur mayuh macham ekosistem ti beguna baka kampung bakau, paya kerapa enggau kandang endur nanga ti nyukung biodiversiti.

Berebak enggau nya, Sarawak Delta nyadi palan ungkup komuniti lokal ti kaya enggau pesaka asal, main asal enggau pun penatai pengidup ti bekaul rat enggau rampa menua, lalu enggau nya nambahka nilai penyelai kandang menua nya ari sukut sosial enggau mensia.

Pengawa ngaku tu ngayanka atur ari mayuh bengkah piak nyengkaum komuniti, ejensi perintah, pemansik enggau kaban kerejasama ti udah besaup nyaga sereta ngatur kandang endur nya enggau meruan ungkup rebak dudi hari.

Status baru tu dikearapka ulih nambahka penampak Sarawak ba renggat global, kelimpah meransang pemansang eko-dagang temuai, ngenegapka ekonomi menua tu sereta ngerembaika pelajar rampa menua.

Berebak enggau nya, iya ngenegapka penuduk Sarawak nyadi palan ekonomi gadung enggau eko-dagang temuai ti tebilang di rantau Asia Tenggara setipak enggau komitmen nengeri tu ngagai pemansang ti meruan.

Sama bisi datai Sekretari Mendam Opis Menteri Pengeraja Asal enggau Pemansang Mengeri, Datu Abdullah Julaihi, Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak, Morshidi Fredrick, Direktor Kaunsil Pengintu Kampung Sarawak, Datu Hamden Mohammad, , Ketuai Unit Geopark Opis Kampung Sarawak, Madeline George Pau, Ketuai Unit Kampung enggau Penyaga Jelu Siga, Tessy Nimos sereta Lelawati Othman ari Opis Kampung Sarawak. -RBI

MANCHESTER, 28 April — Manchester United majak semak deka masuk Liga Champions pengudah ngerikod pemenang ke beguna amat ngelaban Brentford 2-1 ba Liga Premier England di Old Trafford, tumu pagi tadi.

Dua gol ba timpuh keterubah ari Casemiro enggau Benjamin Sesko chukup dikena ngulihka semua tiga puin ungkup tim Michael Carrick, lalu enggau nya ngemesaika bida ngagai 11 puin dalam berebutka empat penuduk ke pemadu atas.

United ngepunka main enggau manah lalu nyau deka ngemasukka gol ba pun minit kedua, tang sipak Amad Diallo mujur diselamatka ba garis gol ulih Sepp van den Berg pengudah pasing ke chukup manah ari Kobbie Mainoo.

Pengujung iya peminat Red Devil nyadi richah ba minit ke-11 lebuh sepak sukut Bruno Fernandes mujur ditanduk Casemiro enggau nya nempa gol keterubah ba main nya.

Brentford angkat deka meri ngelaban, tang pemuntan ba penyerang kelebih agi ari Igor Thiago, mai empas lebuh United nambahka gol kedua ba minit ke-43.

Fernandes sekali agi nyadi arkitek enggau pas ti chun ngagai Sesko ti enggau lantang ngemasukka gol pemgudah ngelichik Nathan Collins sebedau bol enda ulih ditangkap penyaga gol Caoimhin Kelleher.

Neruska ba setengah main kedua, tim temuai majak nguji nyerang lalu nyau deka ngurangka bida nengah Dango Ouattara, tang sipak iya semina kena tiang gol.

Gol ke digiga Brentford pengujung iya datai ba minit ke-87 nengah serang Mathias Jensen ke ngagitka ati, lalu enggau nya ngidupka baru semengat sida nya nuju pengujung main.

Taja pia, United mujur ngetanka pengelebih sida taja pan napi serang ba ujung main nyengkaum sipak ke enda mujur ari Mikkel Damsgaard.

Ba pemansang ke sama, kapten United Bruno Fernandes neruska gaya ke chukup manah lebuh iya ngerikod pemantu gol ke-19 musin tu.

Penyampau nya ngasuh iya semina bulih siti bantu ba belakang rikod Liga Premier sepanjai jeman ke dikunsi Thierry Henry enggau Kevin De Bruyne.

Fernandes mega ngaga sejarah kediri lebuh iya nyadi pemain United keterubah kenyau ari Robin van Persie ke bisi ngaul diri dalam gol dalam tujuh main liga beturut-turut, kelimpah ari nyereta raban elit enggau Cristiano Ronaldo sereta Wayne Rooney dalam rikod pemeri gol ke konsisten ba Old Trafford.

Pemenang nya ngenegapka penuduk Manchester United ba penuduk raban ke pemadu atas liga lalu ngengkahka sida ba jalai ke pemadu manah dikena pulai ngagai renggat Liga Champions musin ti deka datai.

Taja pia, main ba ujung main nya bisi mandangka pengurang, lalu bisi awak dikemanahka agi ke patut diperatika tim Michael Carrick ba main ke agi tinggal tu. -RBI

KUALA LUMPUR, 27 April — Personaliti menua tu, Jennie Enggah, terus nempa pemujur ti ngemegahka ati lebuh iya dipebasa nyadi kaban panel juri ba pekit pemajik gamal antarabansa ti ngumpul penyereta ari 22 buah menua, kelimpah ari diaku sereta nerima Anugerah Dagang Temuai Glamour (Glamour Tourism Award ) ari pengatur Lumiere International.

Nitih ku iya, peneleba nya nyadi basa ke besai sereta peluang ke bisi reti dikena meri bantu ba renggat global ti ngangkatka rega pemajik, budaya enggau ngenegapka orang indu.

“Aku meri pengaga ati ke pemadu tinggi ngagai ratu ke udah dipilih nyadi pemenang, orang ke amat patut ti ngayanka elegan, pengering enggau tuju ke terang,” ku iya.

Jeni mega nerangka pengawa ngaul diri nyadi akim ungkup pekit Miss Tourism Worldwide 2026 ti ngaul 22 buah menua nyadi peneleba ti beprestij ti ngenegapka pangku pengawa orang indu dalam mayuh bengkah bidang, setipak enggau rambai jaku pekit ti ngemeratka timbang entara intelek enggau personaliti.

“Siti basa ke besai ngagai aku nyadi akim ba renggat antarabansa tu.

“Platform tu ukai semina ngerami pemajik, tang mega ngangkatka nilai budaya, intelektual enggau ngenegapka orang indu,” ku iya lebuh nerang ngagai Ruai Berita Iban.

Iya mega nyemetak madahka tema “Beauty with Intelligence, Grace with Strength” terang dipeda sepemanjai pengawa nya, lalu enggau nya ngayanka aspirasyen ngadaka indu ti kompeten sereta kompetitif ba renggat global.

Kelimpah ari nya, Jennie Enggah nerangka kesemua peneleba nya nyadi pejalai ti bisi reti, diias enggau kaul pangan sereta pengingat ti enda ulih dibeli.

“Aku amat beterima kasih ngagai tetiap kaul enggau momen ti besai reti ti ditempa sepemanjai program tu.

“Ngarapka kitai betemu baru jemah ila,” ku iya pengudah ngaul diri nyadi akim pekit Miss Tourism Worldwide di Forest City Marina Resort Johor Bahru kena Hari Enam nyin tadi.

Jennie Enggah mega meri pengaga ati ngagai pengatur sereta beterima kasih ngagai semua pesereta ari mayuh bengkah menua ti ngemujurka pengawa nya enggau besai. — RBI

MERADONG, 27 April – Indu Opis Polis Pelilih (IPD) Meradong benung chakah agi bejalaika pengawa nagang penyalah nengah atur bejalaika Operasyen Begulai ba sekeda palan angat ngelingi pelilih menua, enggau pemerat pengawa matau.

Operasyen nya betuaika Insp. Mohd Salman Zulfitri bin Sheekandar nyadi Pemesai Lapangan enggau SI Jivson anak Rockson Chin Chang nyadi Penulung Pemesai Lapangan, ngaul sepenyampau 16 iku pemesai kebukai.

Entara palan dikemeratka ba operasyen tu iya nya Jalai Kelupu, Jalai KJD, Jalai Bakong, Jalai Kilang, Taman Bintang, Taman Alomara, Jalai Tulai, Taman Paris Height, Taman Vynyrd Residen, Kampung Melayu enggau Tanjung Genting.

Kelimpah pengawa matau ngena kerita enggau pengawa meresa ngenyit, pengawa meresa ba jalai alun (SJR) mega dipejalaika ba Jalai Selidap/Meradong dikena matau pejalai tama enggau pansut ari kandang menua Bintangor.

Sepemanjai operasyen nya dipejalaika, sepenyampau 84 iku individu diperesa nyengkaum 50 iku lelaki enggau 34 iku indu, kelimpah ari pengawa meresa 72 buah perengka pengangkut ti mungkur mutosikal, kerita, van, perengka pengangkut pikap enggau lori.

Operasyen nya ngujungka enam iti saman dikeluarka ketegal mayuh macham penyalah trafik, tang nadai kes ditangkap tauka ngerampas dirikod.

Operasyen nya ngembuan tuju deka nagang sereta ngelaban penyalah baka enchuri, salah guna dadah, judi enggau aktiviti enda beradat, kelimpah ari nambahka penatai polis dikena meri pengelikun ngagai komuniti lokal.

Polis nyemetak madahka operasyen ke baka nya deka terus chakah dipejalaika ari setiap maya dikena nentuka pengelikun enggau atur mensia mayuh seruran dijaga. -RBI

SIBU, 27 April – Gerempung Veteran Soldadu Tasik Diraja Malaysia (PVTLDM) Sarawak nerima bantu belanja lebuh Sapit Menteri Besai, Datuk Seri Fadillah Yusof madahka agih belanja sepenyampau RM50,000 dikena nyukung pengawa bejalaika aktiviti pengelantang pendiau enggau pemansang karier ungkup veteran TLDM di nengeri tu.

Nampung penerang berita BERNAMA, Presiden PVTLDM, Pemesai Waran 1 (Pinchin) Unyok Dasi madah, agih belanja nya deka dikena enggau manah ungkup ngenegapka pengawa gerempung mantu raban veteran, kelebih agi ba sukut pengelantang pendiau, pengawa dagang enggau peluang kereja.

Kenu ku iya, ketiga-tiga sukut tu nyadi fokus besai gerempung dikena nentuka pengelantang enggau penerus pengidup raban veteran TLDM terus diintu.

Pekara nya entara ke dibantai ngagai Fadillah dalam aum ditu, lemai tadi, ke mega nyadi saksi sukung tegap perintah ngagai pengawa ngenegapka komuniti veteran.

“TPM mantaika sukung ngagai fokus ke dibantai kami, nyengkaum pengelantang pendiau bini enggau anak veteran ngambika sida enda dikelaung,” ku iya madah.

Ku Unyok, Fadillah mega nyukung pengawa muka mayuh agi peluang gawa ngagai veteran kelebih agi dalam sektor minyak enggau gis enggau syarat sida nempuh latih enggau kus pengelandik dikena nambahka penau sida.

Berebak enggau nya, gerempung nya mega merambu ngambika pengawa ngambi raban baru TLDM ba peranak Sarawak ditambah ari setiap maya, dikena meri mayuh agi peluang ngagai nembiak rebak baru nengeri tu nyereta soldadu tasik menua.

KUALA LUMPUR, 27 April – Sepital Kanowit ngerikod siti agi penyulut ti ngemegahka ati lebuh nerima Setipikit Tiga Bintang Standard Emas Pengatur Kuasa (EMGS) ari baruh Skim Pengatur Kuasa ASEAN (AEMAS) ba sebengkah pengerami ke diatur ba EQ Hotel Kuala Lumpur sehari tu tadi.

Anugerah nya dikenataika Syed Ibrahim bin Syed Noh, Sapit Menteri Pengeraja Asal enggau Pengelantang Rampa Menua, dikena ngaku komitmen sepital nya ti terus ngemeranka pengawa ngatur kuasa enggau efisyen sereta meruan.

Pemujur tu ngayanka pengawa begempung raban Sepital Kanowit dalam ngenegapka pengawa ngena kuasa enggau nyukung agenda pengelantang rampa menua, setipak enggau pematut ngangkatka kualiti operasyen fasiliti pengerai.

Nengah aku nya mega dipeda nyadi pengepun ngagai sepital ngambika terus ngangkatka prestasi sereta ngetanka budaya kereja ti beprestasi tinggi ba bala staf iya.

Nengah pemujur tu, Sepital Kanowit terus ngenegapka penuduk nyadi siti ari institusyen pengerai ti komited ngagai pemanah operasyen enggau pengawa ti meruan ba renggat pelilih menua. -RBI

KUCHING, 27 April — Kompleks Unit Pekara Jalai Pengarap Bukai (UNIFOR) ti dipenyadika kemari, nyadi kelai ke beguna ngagai komitmen Perintah Sarawak ngenegapka penyerakup, pengelantang entara jalai pengarap enggau pengawa merintah ti terang sereta inklusif.

Pengerami rasmi bejadika kompleks ke beungkus RM80 juta nya udah dipenyadika Premier Sarawak, YAB Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg ba Jalai Ong Tiang Swee, enggau nya mandangka aspirasyen nengeri ari baruh Strategi Pemansang Pasca COVID-19 2030 (PCDS 2030).

Nitihka penerang ari UNIFOR, pengawa muka kompleks nya dikumbai “legasyen penyerakup” enggau “lambang idup penyerakup rama, pengelantang jalai pengarap enggau semengat Segulai Sejalai” ke nyadi tulang belakang mensia mayuh Sarawak.

Penerang nya mega meri besai terima kasih ngagai Sapit Premier Sarawak ke mega Menteri ti megai tanggungpengawa ba UNIFOR, YB Datuk Amar Douglas Uggah Embas, ketegal iring iya nyadi Chairman Amanah Amal UNIFOR Sarawak (SUCT) ti udah ngemujurka projek meri empas tinggi tu nyadi nyata.

“Pengawa begulai UNIFOR begulai enggau ejensi ti bejalaika pengawa udah ngubah aspirasyen besai tu nyadi nyata ti meri pemaik ngagai semua rayat Sarawak,” ku penerang nya.

Penerang nya nambah, entara batang pematak kompleks nya iya nya ‘laluan imersif LED 15’ panel ti mandangka penyelai komuniti pengarap nyengkaum pengarap Kristian, Buddha, Tao, Hindu, Sikh enggau Baha’i.

“Pemandang digital tu ukai semina pengawa pemandang aja, tang befungsyen nyadi ripot akauntabiliti rama ti nerangka enggau silik guna belanja UNIFOR kenyau ari taun 2017 dalam pengawa ngaga sereta ngangkatmanah palan sembiang enggau sekula indu misi,” ku penerang nya.

Rambau penemuai nya, Premier Sarawak mega meri pengaga ati ngagai tikas transparensi enggau empas ke nyata ari agih belanja ke diungkupka ngagai komuniti renggat baruh.

Pengerami nya mega diias enggau bemacham pengawa mandangka main asal ti mandangka pengelantang komuniti Sarawak ti mayuh jalai pengarap, nyengkaum pengawa betabuh, ngajat enggau pengawa mandangka koir jalai pengarap.

UNIFOR dalam penerang ke sama mega meri besai terima kasih ngagai ketuai jalai pengarap, raban ke bisi pemerat enggau ejensi perintah nyengkaum Opis Kereja Raya (JKR) enggau Unit Protokol, Istiadat dan Pengurusan Acara Sarawak (UPPANS) ke udah meri kerejasama ngemujurka projek nya.

“Di Sarawak, penyelai ukai semina nyadi identiti aja, tang nyadi penegap kunsi,” ku penerang nya, lalu enggau nya ngemeratka komitmen nengeri tu terus nempa raban bansa ti likun, inklusif sereta lantang. — RBI

BINTULU, 27 April — Isu Tanah Hak Adat Bumiputera (NCR) mengkang nyadi sebengkah ari isu ti pemadu sensitif di Sarawak, ti ​​bekaul enggau hak asal komuniti Bumiputera ti udah nguan sereta ngereja tanah sida turun temurun, tang bedau nerima pengangkun undang-undang pengempu sida.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, ngerintaika proses ke enda tau enda dititihka iya nya kereja nyukat tanah meseti dipejalaika nitihka Kanun Tanah Negeri (KTN).

“Titihka kereja nyukat tanah ari baruh Seksyen 6 ungkup pengawa ngazet kandang endur komunal dulu, sebedau surat pala tanah individu dikeluarka ari baruh Seksyen 18.,” ku iya.

Iya mansutka jaku nya rambau Pengawa Nyuaka Geran MRP DUN Kemena Renggat 1 ungkup taun 2026 sepenyampau RM505,260 ngagai 32 iku penerima ba Opis Opis Betanam Betupi Bagi Menua Bintulu seharitu tadi.

Terang Rundi, Perintah Sarawak seruran ngansak bala ketuai raban bansa enggau ketuai ruang bilik ngatur pengawa berunding terus enggau Opis Tanah enggau Survei (JTS) dikena mutarka penyarut bekaul enggau tanah NCR sebedau iya balat nyadi nyentuk ngagai renggat kort.

“Penyarut ke dibai ngagai kort ukai semina makai mayuh awak enggau ungkus, tang mega nadai ruang perintah enggau pengari rayat masuk champur mutarka iya.

“Bala ketuai komuniti enggau JKKK enda patut putus pengarap minta kereja nyukat tanah. Semua kandang endur ti bisi penyarut meseti diputarka nengah chara berunding ari pun.

“Enti penyarut tu dikemendarka majak balat nyentuk ngagai renggat kort, pengawa campur tangan ari perintah enggau pengari rayat deka nyadi pekara ti enda ulih dikereja,” ku iya nambah.

Iya mega madahka transisyen ngatur operasyen kompeni nebang kayu ba kandang menua Binyo nyadika chunto begunaka jampat ngentaska garis entara menua NCR enggau terang.

“Enti nadai pengawa ngentaska garis ari sukut undang-undang, perambu pemansang jemah ila bisi risiko tejanggal, lalu hak komuniti lokal mudah kena penyarut berindik ari pengawa ngeluarka Lisin Sementara (PL) ngagai kompeni korporat. – RBI