BETONG, 28 April — Projek ngangkatmanah Jalai Paya Bakong enggau rentayan Debak Renggat 1 di Bagi Menua Betong udah mujur tembu kena 7 April 2026, ti nyadika pemujur ke besai dalam pengawa ngenegapka rentayan infrastruktur menua pesisir ari baruh Program Projek Rayat.
Nitihka penerang ari Opis Kereja Raya Sarawak, skop pengawa bejalaika Renggat 1 nyengkaum pengawa ngangkatmanah urung 6 kilometer jalai tanah ke udah bisi nyadi jalai bebelakin, ngaga tiga unit kutak konkrit tegap baru, kelimpah ari pengawa ngangkatka tebing jalai ba sekeda endur ke bisi kaul.
Pengawa bejalaika projek tu meri empas ke manah ngagai peranak menua nya nengah penambah tikas pengelikun, pengelantang enggau akses rentayan penyambung jalai.
Berebak enggau nya, iya mega nyukung pemansang sosio-ekonomi kandang endur ngelingi nengah chara ngenegapka akses logistik enggau mobiliti ninting hari peranak.
JKR Sarawak ngemeratka komitmen terus nentuka pemansang infrastruktur menua pesisir dipejalaika enggau sistematik sereta meri empas ke tinggi ungkup pengelantang pendiau rayat enggau pemansang nengeri ke lebih sebela. — RBI
