BINTULU, 29 April — Pengawa jampat raban Opis Bomba enggau Penyah Penusah Malaysia (JBPM) ari Balai Bomba enggau Penyah Penusah (BBP) Kidurong mujur ngerara penusah angus ti ngaul sebuah lori ba kandang endur Hua Wei Machinery, lemai tadi.

Nitihka ripot ari Palan Operasyen, kangau ngenyit diterima urung pukul 5.19 lemai sebedau loceng ditebah 30 sikin udah nya.

Sebuah Tender Penyelamat Bomba (FRT) Scania enggau pasukan siku pemesai enggau empat iku raban dipindahka ngagai endur penusah nyadi, ke bepalan urung empat kilometer ari stesyen nya.

Jentera datai ba endur nya urung pukul 5.24 lemai lalu operasyen madamka api berengkah urung pukul 5.25 lemai.

Komander Operasyen, PBK I Abdullah bin Sedi madahka, penusah angus nya ngaul sebuah lori enggau dipelabaka pengerusak urung 80 peratus ba pala nya.

Raban bomba meri timbal enggau lengkas nengah chara ngerembaika batang hos sereta ngena muncung enggau pun penatai ai ari pam mekanikal dikena ngawal sereta madamka api.

Api mujur dirara dalam timpuh ke pandak sebedau dipadamka abis.

Operasyen nya mujur dijaga urung pukul 5.30 lemai lalu tembu abis pukul 5.45 lemai pengudah situasyen dientaska likun.

Nadai penusah bebadi nyawa diripotka nyadi ba penusah nya.

Sama bisi datai ba endur nya Pemesai Kanan, PBT II Rary anak Binjie.

Tim operasyen udah nya mupuk ke stesyen nya urung pukul 5.48 lemai lalu datai urung pukul 6.02 lemai.

Pemanah operasyen tu ngayanka tikas penyikap enggau profesionalisme JBPM ti tinggi dalam nentuka — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — BBP

LUBOK ANTU, 29 April — Sepenyampau 42 projek ari baruh Program Transformasyen Menua Pesisir (RTP) ungkup sitak Kunsil Nengeri (DUN) Batang Ai benung dikemata ngambika ulih dipejalai, lalu ngemeratka penyikar pengawa meri servis ngagai rayat.

Nitihka penerang ari Pemesai Tugas Khas Wat Jack Meredan, ti ngarika Kaban Kunsil Nengeri (ADUN) Batang Ai, Datuk Malcolm Mussen Lamoh madah, nyadi pekara nya udah dikerandauka ba Aum Focus Group (FG) ke diatur ba Opis Pelilih (DO) Lubok Antu.

Aum nya bechairmanka Pemesai Opis Pelilih Lubok Antu, Akoi Anak Ejau, lalu bela digulu kaban komiti ke bekaul enggau bala ketuai komuniti kandang menua nya.

Penerang nya madahka aum nya nyadi pelasar ke beguna dalam ngenegapka pengawa bejalaika pengelikun rayat, kelebih agi dikena nentuka tetiap servis ke dikenataika ngagai komuniti ulih dipejalaika enggau lebih efisyen, sistematik sereta ngasi.

Kelimpah ari nya, pengawa nya mega setipak enggau aspirasyen pemansang nengeri ari baruh Strategi Pemansang Pengudah COVID-19 2030 (PCDS 2030), ti ngemeratka pemansang inklusif enggau pengelantang rayat.

Tekala nya pengudah aum nya, sesi penemuai kereja udah diatur ngagai Opis Residen enggau Opis Opis Entali Ai enggau Parit (DID) Bagi Menua Simanggang beratika baru status pengawa bejalaika projek RTP ba kandang menua nya.

Ari penyampau 42 projek RTP ke benung dipejalaika ba taun 2026, tiga projek ari baruh kemata Opis Pengairan enggau Parit (DID), ti ngaul pengawa bekaul enggau infrastruktur parit enggau ngatur ai.

Inisiatif tu mandangka komitmen perintah ti terus ngenegapka pemansang menua pesisir kelebih agi ba kandang menua Batang Ai, dikena nentuka pengelantang pendiau rayat terus dijaga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Wat Jack Meredan

ALOR SETAR, 29 April – Polis udah mantaika siku lelaki beumur 43 taun ke dipelabaka nyamah bini iya nyentukka iya ‘gugur’, ngena taktik nagit pengereja pengawa perintah indu nyadi bini iya ngambika ulih ngidupka diri.

Ketuai Polis Pelilih Menua Kedah, Datuk Adzli Abu Shah madah, asil pansik tetemuka saspek udah kala bebini semilan kali, lalu semua bini enggau ex-bini iya nya pengereja pengawa perintah.

“Suspek diatu diperetika agi bisi tiga iku bini.Iya milih kaling ti bisi kereja tetap laban nadai pun penatai pemisi ti entap,” ku iya ba aum pengarang berita di Indu Opis Kontinjen Polis Kedah, kena seharitu tadi.

Nitihku iya, saspek mega dikelala siku individu ti jampat ringat enggau ngembuan empat rikod jenayah sebedau tu ari baruh Seksyen 325, 323, 318 enggau 506 Kanun Keseksaan.

Ba penusah ke pemadu baru, bini iya ke beumur 39 taun dipelabaka dipalu ba rumah sida di Ambangan Heights, Sungai Petani nyentuk ke iya balat bakal sereta ‘keguguran’.

“Tasat keterubah dibuka nengah Seksyen 325, tang ditukar ngagai Seksyen 326 pengudah ditemu bini iya dipalu ngena perengka baka batang besi enggau penyangkut gari plastik.

“Berindik ari penusah nya, indu nya telih ba serata tubuh, patah tulang rusuk kiba enggau kanan sereta tulang belakang, ngujungka bini iya gugur,” ku iya.

Polis mujur nangkap saspek ba sebuah rumah temuai ngelingi mengeri kena Hari Dua tu tadi, berindik ari ripot ke digaga menyadi indu nya kena 23 April enggau indu nya empu kena 26 April.

Saspek ke bisi 11 iku anak diatu ditan riman tujuh hari nyentuk 5 Mei dikena mantu pengawa mansik silik agi.

Dulu agi ari nya, kes tu viral ba media rama lebuh indu nya diripotka balat bakal, kelimpah ari madahka saspek mega enchuri barang emas enggau duit simpan urung RM50,000.

Polis mega ngentaska saspek nya individu ke sama ke bisi kaul enggau kes nyamah bini iya, Jahidah Nordin, nyentukka apin ngeleda di Larkin, Johor dalam taun 2021.

Sumber BERNAMA

#ruaiberitaiban#newsiban#beritaiban

Rindu | Titih | Kunsika

MUKAH, 29 April – Sapit Menteri Pengerai Malaysia ke mega Kaban Parlimen P213 Mukah, Dato Hajjah Hanifah Hajar Taib udah nyuaka bantu tekala nya sepenyampau RM15,000 ngagai sida ke tasah angus di Kampung Bunut, sehari tu tadi.

Ba penusah nya, dua buah rumah udah abis lengis ngujungka dua ruang bilik nadai endur diau.

Hanifah ngelawa sida ngambika ulih meresa diri empu endur penusah nyadi sereta ngelantangka ati ruang bilik ke kena penusah lalu iya deka meretika utai ke diguna sida ke tasah.

Pemeri ke bisi dibantai nyengkaum mata duit enggau barang ke diguna, lalu RM10,000 diberi ngagai sebuah ruang bilik, lalu RM5,000 agi diagih ngagai sebuah ruang bilik ke diatu diau ba rumah suwa.

Iya ngarapka bantu nya ulih ngelempungka mimit tating sida ke tasah, kelimpah ari minta mensia mayuh enggau piak ke bekaul terus datai ke mua meri sukung.

Berebak enggau nya, iya mega meri besai terima kasih ngagai semua piak ke udah mansang mantu, sekalika ari sukut fizikal, runding tauka belanja, dalam nentuka pengelantang pendiau sida terus dijaga -RBI

#ruaiberitaiban#newsiban#beritaiban

Rindu | Titih | Kunsika

MUKAH, 29 April – Dua buah rumah struktur ukai tetap di Kampung Bunut udah angus lengis ba penusah angus pagi tadi.

Nitihka penerang ari Ketuai Pemadah Palan Gerakan (PGO) Sarawak, penusah nya diripotka nyadi urung pukul 9.23 pagi, ti mungkur dua buah rumah ke angus 100 peratus.

“Taja pia, penusah angus nya nadai ngaul orang tauka bakal,” ku iya ba sebengkah penerang sehari tu tadi.

Operasyen madamka api dipejalaika ngena dua tali hos pemesai 100 kaki enggau 200 kaki, dibantu dua iti munchung enggau siti tali hos bantu enggau siti munchung ngena ai ari pam bomba enggau paip bomba ke besemak.

Nitihku iya, pengawa ngerara api mujur penuh sebedau operasyen tembu urung pukul 11.17 pagi.

Raban bomba udah nya nentuka nadai agi pun api lalu gaya nya likun bendar sebedau mulaika diri ngagai balai.

Ku iya nambah, kebuah penusah nyadi enggau anggar rega pengerugi agi dalam pansik.

#ruaiberitaiban#newsi

SIMANGGANG, 29 April – Opis Pengintu Pengelantang Pendiau Mensia Mayuh (JKM) udah ngaga ripot polis ngambi ulih dipejalaika enggau lengkas ngiga siku nembiak lelaki ke diripotka lenyau.

Penusah nya mungkur siku nembiak sekula ke beumur 12 taun ke dipelabaka ngelarika diri ari premis Sekula Primari (SK) Sri Aman urung pukul 8.40 pagi tadi.

Ketuai Polis Pelilih Sri Aman, Superintenden Dennis Bunyam madah, piak sekula jampat ngeripot penusah nya ngagai JKM enggau naka pengelengkas ambika pengelenyau nya bisi diperatika.

Nitihku iya, nembiak nya dikelala enggau nama Law Ching Sing sereta ari baruh jaga JKM sereta udah datai ngagai sekula nya ungkup proses ngerejista masuk baru.

“Pengajar sekula nya udah ngentaska penusah tu ngagai JKM ti datai ba endur nya pengudah dipadahka pasal pengelenyau nembiak nya,” ku iya nengah sebengkah penerang sehari tu tadi.

Ku iya nambah, diatu operasyen ngiga nembiak nya benung dipejalai enggau kerejasama polis, piak sekula sereta komuniti menua nya dikena nentuka nembiak nya ditemu selamat.

Mensia mayuh ke bisi penerang dipinta datai ke mua mantu pansik nengah chara ngenataika penerang ngagai balai polis ke besemak.

Sebarang penerang mega tau disalur ngagai pemesai pemansik, Sarjan Suzy nengah lumur 083-322035 tauka 011-1403 7375 dikena mantu ngenyampatka pengawa ngiga. -RBI

#ruaiberitaiban#newsiban#beritaiban

Rindu | Titih | Kunsika

SARATOK, 29 April – Pengawa ngenegapka infrastruktur pelajar menua pesisir majak ditegapka enggau pengawa bejadika Jematan Nanga Apan di Sekula Primari Ulu Kabo, sehari tu.

Pengawa ngaga jematan baru tu siti inisiatif ke berat dalam nentuka pengelikun nembiak, pengajar enggau peranak rumah panjai ke sebedau tu betapi enggau pemar meraka sungai, kelebih agi maya musin ujan enggau arus deras.

Pengawa nya udah dipenyadika Kaban Kunsil Nengeri (ADUN) Friday anak Belik, ke digulu Omar bin Haji Mahli, Awet bin Gapor, raban komuniti lokal enggau bala apai indai nembiak.

Jematan asal ba endur nya sebedau tu udah putus sereta rusak ketegal bah besai kena 19 Januari 2025, lalu ngujungka ngeruga akses ninting hari ungkup nembiak enggau peranak rumah panjai.

Pengawa ngaga baru nya udah nya dipejalaika lalu tembu penuh kena 10 Februari 2026, sebedau dikena kenyau ari 2 Mac.

Diatu, jalai ke likun sereta entap agi ulih dikena semua orang.

Dalam jaku dipansutka iya, Friday anak Belik nyemetak madahka pemansang infrastruktur baka tu beguna amat dalam nambahka akses ngagai pelajar, kelimpah ari ngerapitka bida pemansang entara kandang mengeri enggau menua pesisir.

Iya mega madahka perintah Sarawak komited nyendiaka bemacham perengkaguna pelajar enda bebayar sereta mega nyukung inisiatif ungkup nembiak dikena nentuka nadai seiku peranak Sarawak tinggal ari nerima pelajar ti bekualiti.

Ku iya nambah, pengelantang pendiau rayat kelebih agi komuniti menua pesisir deka terus diberi perati setipak enggau agenda pemansang inklusif nengeri tu.

Pengawa nya mega mandangka kerejasama rat entara perintah, opis pelajar enggau komuniti dalam nentuka perengka guna pemun terus dikemanah ungkup pengidup rebak baru dudi hari. -RBI

#ruaiberitaiban#newsiban#beritaiban

Rindu | Titih | Kunsika

LUBOK ANTU, 29 April – Projek ngangkatmanah Dewan ba Rumah Joel, San Panjai sitak Parlimen Lubok Antu udah tembu penuh sereta diserah ngagai komuniti menua nya dalam sesi nyerahka pengawa rasmi apin lama ke udah.

Projek tu dipejalaika berenggat dalam timpuh dua taun, enggau batang tuju ngangkatka perengka guna asas enggau pengelantang ungkup peranak rumah panjai nya.

Dewan ke udah diangkatmanah nya diatu ukai semina befungsyen nyadi palan gempuru enggau aktiviti komuniti, tang mega ulih endur ngatur aktiviti rekreasyen enggau lumba enggau main baka badminton.

Kaban Parlimen Lubok Antu, Roy Anggau Gingkoi, madahka projek tu sebagi ari pengawa ti seruran dipejalaika dikena ngenegapka perengka guna menua pesisir sereta ngangkatka kualiti pengidup komuniti setempat.

Iya mega ngarapka perengka guna ti disediaka ulih dikena penuh peranak menua nya nyadi palan aktiviti rama, rekreasyen enggau pemansang komuniti. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Roy Angau Gingkoi

Photo — Opis Pemansang Nengeri Bagi Pelilih Sri Aman

SIBU, 29 April — Aum koordinasyen ngatur program “Pengerami Mantar Gawai PRS 2026” udah diatur kemari lalu bechairmanka YB Dato’ Sri Doris Sophia Brodie.

Program nya diperambu deka diatur kena 23 Mei 2026 di Sibu lalu nyadi gerempung begulai Sayap Indu enggau Nembiak Parti Rakyat Sarawak (PRS).

Organisasyen tu mandangka kerejasama rat entara ketuai parti dalam ngemujurka pengerami Gawai begulai enggau bala kaban sereta komuniti setempat.

Ngangkatka rambai jaku “Berserakup Mai Pemaik, Nuju Pemansang,” pengerami taun tu ngemeratka rega penyerakup, pengering begulai enggau pengepuh nuju penyulut ti enda ngetu.

Pengerami tu dipelabaka deka matak penatai lebih 1,000 iku temuai lalu deka dirami enggau penatai Presiden PRS, YB Datuk Seri John Sikie Tayai.

Pengawa ngatur program tu dikearapka ulih ngenegapka semengat begulai sereta ngerapitka kaul entara ketuai parti enggau komuniti, setipak enggau aspirasyen ngenegapka penyerakup entara rayat pupu bansa di Sarawak beserimbai enggau pengerami Hari Gawai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Doris Sophia Brodie

MANCHESTER, 29 April – Pemain tengah Casemiro enda ulih nagang ati iya pengudah mantu Manchester United ngerikod pemenang 2-1 ngelaban Brentford ba Old Trafford, tumu pagi kilah ensanus.

Rikod ke bedau dikeluarka sebedau tu ngayanka pemain tengah Brazil ke bepeneleba nya ngendas ai mata lebuh wisel kepenudi disepu, dalam gaya ti chukup sinu enggau bala peminat.

Ba main nya, Casemiro nyadi hero lebuh iya muka gol ba pun minit ke-11 enggau siti gol ke manah, lalu enggau nya ngengkahka United ba jalai nuju pemenang.

Pemujur nya mega ngenegapka penuduk kelab nya ba penuduk lumur tiga ba taga Liga Premier England lalu diatu semak agi deka masuk Liga Champions UEFA.

Pemain beumur 34 taun nya ba semua sukut nyadi perati lebuh iya ngerikod 11 ‘tackle’, menang 16 kali mujur ngerebut bol enggau ngaga semilan ‘clearances’, nyadika iya siku aja pemain dalam dua dekad ke udah nyapai statistik nya dalam main EPL.

Penyinu Casemiro nya mega bisi kaul enggau pemutus iya ti deka ninggalka United ba ujung musin tu pengudah madahka nya dalam bulan Februari tu tadi.

Tekala nya pengudah main, iya dipeda bejalai pansut ari padang sereta diiring tempik jari ari bala peminat, sebedau pengujung iya ngendas ai mata.

“Aku udah ngena mayuh awak ba Sepanyol enggau Real Madrid lalu menang mayuh trofi.

“Tang ditu, dalam kandang beberapa musin aja ba Manchester United, aku ngasaika utai ke nyelai, chukup dalam ngasuh siku lelaki ke udah besai nyabak.

“Ba Real Madrid, menang trofi nya pekara biasa. Tang ditu, taja pan sekali menang asai ke besai baka ngangkatka trofi nya empu.

“Kaul enggau bala peminat chukup tegap nyentukka negu ati aku.,” ku iya.

Pengawa iya ke chukup manah mega ngujungka bala peminat minta iya beratika baru pemutus iya ke deka ninggalka kelab nya.

Taja pia, menijar United Michael Carrick netapka pemutus nya ke penudi.

“Nya terang amat ari kededua piak. Penerang nya mantu semua orang meretika gaya utai ke nyadi.

“Kredit ngagai iya, iya meri semua utai sereta nempa kenang besai ungkup kami,” ku Carrick. -RBI

#ruaiberitaiban#newsiban#beritaiban

Rindu | Titih | Kunsika