KUCHING, 28 April — Opis Kereja Raya (JKR) Sarawak bebendar nentuka pengawa bejalaika kereja ngangkatmanah enggau ngemanahka palan lumba enggau main batang nengeri tu tembu nitihka timpuh dikena nyikap diri napi Lumba enggau Main SEA 2027.
Pekara nya dipadahka Direktor Kereja Raya Sarawak, Datu Adj. Prof. Ir. Ts. Gs. Br. PMr. Dr. Cassidy anak Morris, lebuh ngenataika penerang pasal pejalai projek beserimbai enggau penemuai kereja Yang Berhormat Menteri Nembiak enggau Lumba Dr. Mohammed Taufiq bin Johari, ke mega ngabas penyikap perengka guna lumba enggau main nengeri tu ungkup lumba enggau main ke beprestij nya.
Nitih ku iya, projek ngangkatmanah enggau ngemanahka Stadium Sarawak diatu bejalai enggau lanchar nitihka pelin lalu dipelaba tembu penuh ba bulan Januari 2027.
Skop pengawa mungkur mayuh macham komponen besai nyengkaum pengawa arkitek, nukar atap, ngemanahka struktur kelimpah ari ngemanahka perengka guna endur duduk enggau rampa menua.
Berebak enggau nya, projek ngangkatmanah enggau ngemanahka Stadium Perpaduan disadang tembu dalam bulan Februari 2027, lalu enggau nya nembuka penyikap Sarawak dalam nyendiaka perengkaguna betikas antarabansa ungkup Lumba enggau Main SEA 2027.
JKR Sarawak ngemeratka komitmen sida ti seruran dikena nentuka tetiap pengawa bejalaika projek dikemata enggau silik ari sukut kualiti, pengelikun enggau nitihka jadual, dikena nentuka tikas nyikap diri ti optimum sebedau Lumba enggau Main. — RBI
