KUCHING, 15 — Sepenyampau 692 dos vaksin rabies oral (ORV) diberi dalam timpuh dua hari nengah pengawa bejalaika program pemungkal, nyadi singkang dikena ngerembaika bungkur imunisasyen ngelaban rabies di Sarawak.
Nitihka ripot TVS, Menteri Industri Pemakai, Komoditi enggau Pemansang Kandang Menua Sarawak, Dato Sri Stephen Rundi Utom madahka pengawa ngena ORV nyadi alternatif ti beguna ngagai chara nuchuk, kelebih agi ba pengawa betapi enggau jelu ke nadai orang ngempu.
Iya nyemetak madahka chara nya ulih nambahka pemanah pengawa meri vaksin ba kandang endur ke ngembuan penyampau ukui ke tinggi, lalu enggau nya ulih mantu pengawa nagang pengerekai igi penyakit rabies.
“Kitai deka nyadi ketuai dalam pengawa ngemunaska penyakit rabies laban kandang menua tu ngembuan penyampau ukui ke tinggi.
Pekara ke beguna amat iya nya intervensyen tumu dikena nyeliahka sebarang pemati ketegal rabies,” ku iya baka ke dipansutka TVS lebuh dikerandau ba program nyadung ORV di Taman Malihah.
Ku iya nambah, pengawa bejalaika program ORV deka terus dikerembaika bepelasarka pemanah iya dalam ngurangka kes rabies di nengeri tu.
Berebak enggau nya, Stephen Rundi Utom mega madahka penyampau ukui ba kandang menua Desa Wira, Batu Kawah enggau Taman Malihah dipelabaka manggai urung 3,000 iku, lalu enggau nya minta bungkur vaksinasyen ke lebih komprehensif.
Iya mega nyemetak madahka begunaka sukung terus ari perintah enggau gerempung ukai dikuasa perintah (NGO) dikena nentuka program tu terus dipejalai.
“Enti nadai sukung ari sida, Opis Servis Veterinar Sarawak betapi enggau penanggul suntuk orang gawa bejalaika program baka tu,” ku iya nambah baka ti diripotka TVS.
