SIBU, 9 Mei — Sepenyampau 1,300 iku pesereta nyereta Program Brisk Walk 2.0 (BW2.0) ke diatur Ejensi Anti Dadah Kebangsaan (AADK) Pelilih Sibu enggau kerejasama Komiti SKUAD Anti Dadah Pelilih Sibu, ba Dataran Terendak, Taman Tasik Permai, pagi tadi.

Berambai jaku “Singkang Bepengerai, Komuniti Bibas Dadah”, program tu ngembuan tuju deka nerenakka pengawa idup bepengerai ba komuniti, kelimpah ari ngenegapka pengawa nagang salah guna dadah nengah chara bepelasarka komuniti ti lebih lantang sereta meruan.

Pengerami ngelancharka pejalai kaki penyauh dua kilometer nya udah dipenyadi Kaunsilor Majlis Perbandaran Sibu, Michelle Law Wan Ling, urung pukul 6.30 pagi.

Sama bisi datai Ketuai AADK Pelilih Menua Sibu, Azimah Marsid; Chairman JK SKUAD, Raden Khairulzaman Raden Bustari; Ketuai Kaunsil Pengelikun Menua (Majlis Keselamatan Negara) Pampang Sibu, Nur Syahirah Samsul; enggau Pemesai Pentadbiran Opis Residen Bagi Menua Sibu, Macgyver Boi.

Sepemanjai program nya, aktiviti ngagihka pamphlet penyedar anti-dadah mega dipejalaika nengah inisiatif PESADA ari kaban SKUAD Anti-Dadah, ti mega dibantu enggau penatai khas ari raban ‘Finalis Mrs of Malaysia-Borneo 2026’ dalam pengawa ngerembaika komuniti enggau penyereta ngagai pengawa nganjung.

Berebak enggau nya, Kaunsil Pengelikun Menua mega bisi madahka pengawa ngatur Pekit Video Kreatif beserimbai enggau Bulan Pengelikun Menua ti nyendiaka perais besai RM1,500 enggau peluang masuk Grand Finale.

Program tu mega disukung mayuh bengkah piak nyengkaum Sapit JK SKUAD, Mohamad Mostapha Lasot; Pengarah Negeri Mrs Malaysia-Borneo, Sharon Frederick Asu; Penerbit Lagu “Panggau Buluh Pengerindu”, Lembat Imban (Embat Lala); sereta Chairperson Gerempung Pengarang Berita Sibu, Florence Nervyn, begulai enggau raban pengereja pengawa AADK enggau JK SKUAD.

Pengawa ngatur Program Brisk Walk 2.0 dipeda udah mujur nyapai juluk ngenegapka penyedar mensia mayuh senentang penusah dadah, seraya mega meransang kaul komuniti dalam aktiviti ti bepengerai sereta meri penguntung. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LIMBANG, 9 Mei — Inisiatif Kaunsil Pelilih Limbang ti meri kelala konsep “Pesta Tanpa Sampah” sepemanjai pengawa ngatur program nya nerima puji ari Sekretari Politik ba Opis Premier Sarawak Pandang Semat.

Iya ti ngarika Menteri Penyerakup Menua, Dato Sri Aaron Ago Dagang madahka inisiatif nya dianggap nyadi singkang proaktif dalam nambahka penyedar mensia mayuh ba pengawa nyaga rampa menua, ngurangka pengawa ngena plastik sekali guna enggau chara pemeresi ti meruan agi.

Kenu ku iya, chara tu setipak enggau aspirasyen Malaysia MADANI ti ngemeratka pemansang inklusif, meruan sereta bepalan ba pengelantang pendiau rayat.

Iya mansutka jaku lebih bejadika Pengerami Nangguhka Bazar Gawai Medamit Agro-Tamu Limbang 2026.

Ngelansa pasal pemar ke nyadi diatu, iya nyemetak madahka pemesai guna ngenegapka ekonomi rayat ba renggat baruh berindik ari gaya ekonomi dunya ke enda tentu, ungkus pengidup ke majak niki sereta pemar pengelikun pemakai.

Perintah Besai ku iya, terus ngemeratka pemansang sektor betanam betupi enggau industri pemakai nengah bemacham inisiatif, bantu enggau program pemansang orang dagang dikena nentuka pengelikun pemakai menua terus dijaga.

“Pengerami Bazar Gawai Medamit Agro-Tamu Limbang 2026 diatur tu, kelai pemujur program ke diatur bepelasarka ekonomi rayat enggau pengawa ngenegapka komuniti menua pesisir di pelilih menua tu.

“Aku ngarika YB Menteri, meri besai terima kasih ngagai Komiti Tamu Medamit Limbang enggau Kaunsil Pelilih Limbang ketegal pemujur pengawa ngatur program manner enggau efektif,” ku iya.

Nitihku iya, pengawa ngatur Bazaar Gawai Agro-Tamu Medamit ukai semina nyadi pelasar dikena ngerami budaya enggau main asal komuniti lokal, tang mega nyadi pengepun ngenegapka ekonomi komuniti nengah penyereta orang dagang mit, pekebun, orang betupi enggau pedagang tamu.

Iya mega ngenataika pengaga ati ngagai genap 10 taun penumbuh Tamu Medamit Limbang, ti dipadahka nyadi siti pemujur ti chukup besai asil ari komitmen enggau kerejasama ti enda ngetu ari komuniti menua nya dalam ngemansangka ekonomi kandang menua Medamit.

Berebak enggau nya, Perintah Sarawak nengah Strategi Pemansang Pasca COVID-19 2030 (PCDS 2030) mega ngenegapka agenda pemansang menua pesisir nyengkaum transformasyen betanam betupi moden, ekonomi digital enggau nambahka penatai pemisi rayat.

“Projek Jalai Penyambung Sarawak-Sabah Fasa 2 (SSLR2) ti mungkur kandang menua Limbang mega laban ulih ngemanahka rentayan komunikasyen, nyungkak aktiviti ekonomi sereta muka mayuh agi peluang ngagai komuniti menua nya,” ku iya.

Iya mega ngenataika pengaga ati ngagai semengat penyerakup ti dipandangka komuniti pupu bansa sepemanjai program nya, ti dianggap nyadi kelai penegap ke bendar Sarawak dalam penyelai budaya enggau jalai pengarap.

Pengerami Gawai ku iya, ukai semina pengerami budaya aja, tang nyadi kelai terima kasih, begulai sereta beterima kasih ngagai asil pengawa komuniti. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 9 Mei — Serakup Graduet Dayak Sarawak (SDGA) meri pengaga ati sereta puji ngagai Dr Florianna Lendai Anak Michael Mulok ke udah nerima Anugerah Perkhidmatan Cemerlang (APC) 2025 beserimbai enggau Majlis Anugerah Cemerlang UNIMAS (MAGU) 2026.

Nengah penerang dikunsika SDGA madahka pemujur nya nyadi pengangkun ti besai reti ngagai dedikasyen enggau komitmen Dr Florianna dalam bidang pelajar enggau pemansang modal mensia di Sarawak.

“Dr Florianna ti mega ex-Sapit Presiden gerempung tu udah bejalaika tanggungpengawa ke beguna dalam ngenegapka pengari graduet Dayak, ngangkatka pemansang profesyenal enggau ngenegapka pengawa nyadi ketuai bepelasarka komuniti.

“Pemujur iya ukai semina pekara ti dikemegahka diri empu aja, tang mega mandangka penambah pemeri raban profesyenal enggau pelajar Dayak dalam nempa modal mensia enggau penau Sarawak jemah ila,” ku penerang nya.

SDGA mega nerangka pemujur nya nyadika kelai enggau nilai pengeliat ati, dedikasyen sereta komitmen tinggi ti dikembuan Dr Florianna sepemanjai pengawa iya.

Gerempung nya mega ngambi jaku peransang Dr Florianna, “Kereja enggau pengerindu. Lebuh nuan ngepunka sesebengkah pengawa, tembuka enggau manah lalu anang ngereja iya setengah jalai.”

Berebak enggau nya, SDGA ngarapka pengawa ngaku nya ulih meri inspirasyen ngagai mayuh agi raban nembiak Dayak enggau graduet Sarawak ngambika terus nampung penyulut dalam pelajar, servis profesional enggau nyadi ketuai, seraya terus komited meri bantu ngagai pemansang komuniti enggau nengeri Sarawak. -RBI

#ruaiberitaiban#newsiban#beritaiban

Rindu | Titih | Kunsika

Kredit sumber, grafik — Sarawak Dayak Graduates Association

LIMBANG, 9 Mei — Perintah udah ngungkupka semak RM100,000 ungkup kereja nyeruri infrastruktur enggau perengkaguna ba Sekolah Kebangsaan (SK) Lubok Tekurok, berindik ari isu tanah tusur enggau ampuh bah ti benung ngeruga pengelikun enggau pengelantang kandang sekula.

Menteri Pelajar, Fadhlina Sidek madah, isu nya dikelala maya penemuai ‘Tindak Susul Parlimen’ ngagai sekula nya, lebuh iya empu dibai meresa empas ari tanah tusur ba tebing sungai ti meri empas terus ngagai kandang sekula nya.

“SK Lubok Tekurok ke dilawa kami maya program Tindak Susul Parlimen lemai kemari betapi enggau isu bekaul enggau tanah tusur sereta ampuh bah ti ngasuh sekula nya enda kondusif.

“Aku minta atur dipejalaika enggau lengkas dikena mutarka isu ke udah nyadi,” ku iya.

Nitih ku iya, agih belanja ke diungkup nya dikena nentuka kereja ngintu ulih dipejalaika enggau lengkas ungkup pengelikun nembiak, pengajar enggau semua staf sekula.

Berebak enggau nya, SK Lubok Tekurok mega benung diperunding ungkup chara mutarka pekara nya dalam timpuh ke panjai nyengkaum perambu mindah ngagai endur ke baru, likun agi sereta engkeman agi, nyema gaya nya begunaka nya.

“Kitai naka ulih gawa ungkup bala nembiak, pengajar enggau semua peranak SK Lubok Tekurok,” ku iya nambah.

Perintah deka terus mansik isu tu enggau komprehensif enggau ejensi ti bekaul dikena nentuka atur mutarka penanggul ti diambi nya meruan sereta efektif. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Fadhlina Sidek

KUCHING, 9 Mei — Sepenyampau empat Rang Undang-Undang (RUU) deka dibantai ba Aum Keterubah Penggal Kelima Aum Kunsil Nengeri (DUN) Sarawak Ke-19 ti diperambu deka diatur kena 11 ngagai 20 Mei 2026 ba Kompleks DUN Sarawak.

Speaker DUN Sarawak, Tan Sri Datuk Amar Mohamad Asfia Awang Nassar madah, pengawa mantaika rang undang-undang perintah ulih menteri ke megai tanggungpengawa deka dipejalaika kena 12 enggau 14 Mei 2026.

Nitihku iya, empat rang undang-undang ti deka dibantaika iya nya Rang Undang-Undang Bekalan Tambah (2025) 2026, Rang Undang-undang Bekalan Tambah (2026) 2026, Rang Undang-Undang Kaunsil Padi enggau Beras Sarawak 2026 enggau Rang Undang-Undang Kaunsil Pemansang Ekonomi Sarawak (Ubah) 2026.

Aum DUN tu dikearapka deka ngemeratka agenda pemansang nengeri, ngenegapka ekonomi enggau pengawa perintah ti enda ngetu dalam meri kuasa ngagai pengelantang pendiau rayat Sarawak.

Premier Sarawak, Datuk Patinggi Tan Sri Abang Abdul Rahman Johari Abang Openg sehari tu mega bisi ngulu Aum Pra Kaunsil enggau Supreme Kaunsil Parti Pesaka Bumiputera Bersatu (PBB) beserimbai enggau sesi ke diatur ba Indu Opis PBB, Jalai Bako, ditu.

Sama bisi datai Sapit Premier Sarawak, Datuk Amar Douglas Uggah Embas, Datuk Awang Tengah Ali Hasan enggau Datuk Amar Sim Kui Hian, sereta bala menteri kabinet, menteri muda enggau Kaban Kunsil Nengeri (ADUN) Sarawak. -RBI

#ruaiberitaiban#newsiban#beritaiban

Rindu | Titih | Kunsika

BINTANGOR, 9 Mei – Siku lelaki peranak Bangladesh bebadi nyawa pengudah dipechayaka kena lantak lori ba sebengkah penusah bebadi jalai alun di Jalai Serdeng semak simpang Kampung Jaluh Baru, pagi tadi.

Ketuai Polis Pelilih Meradong, DSP Tansli Mering madah, penusah nyadi urung pukul 8.50 pagi lalu mungkur sebuah lori enggau siku orang ke bejalai kaki.

Tudah dikelala enggau nama Md Fazlur Rahman, 40, ke gawa nyadi pekereja ngaga jematan, dientaska bebadi ba palan penusah nyadi ketegal balat bakal ba pala.

Nitihku iya, pansik tumu tetemuka lori nya benung bejalai ari tunga Semop nuju Sibu sebedau datai ba palan penusah ke nyadi lebuh tudah ke ba tisi kiba jalai nya dipelabaka ngenyit ngelayang jalai.

“Ketegal takah ti semak, deriba lori enda sempat nyeliahka diri ari ngelantak tudah,” ku iya nengah penerang media sehari tu tadi.

Tubuh tudah udah dianjung ngagai Sepital Sarikei ngambika diperesa tasat.

Ku iya nambah, Kedutaan Bangladesh udah dipadah pasal penusah nya, seraya menijar SACC Engineering Sdn Bhd mega bisi datai ngagai balai polis mantu pekara enggau pansik ke silik agi.

Kes tu dipansik ari baruh Seksyen 41(1) Akta Pengangkutan Jalan 1987 lalu pansik silik agi dipejalaika.

Berebak enggau nya, raban polis ngelalau mensia mayuh ngambika seruran ngasika atur jalai alun, deriba enggau bejimat sereta nemu gaya rampa menua dikena nyeliahka sebarang penusah ke enda dikedekaka nyadi.-RBI

#ruaiberitaiban#newsiban#beritaiban

Rindu | Titih | Kunsika

KUCHING, 9 Mei — Parti Pesaka Bumiputera Bersatu (PBB) majak nyerenih strategi organisasyen parti nengah pengawa ngatur Konvensyen PBB Sarawak ti ngaul empat zon besai ti diperambu deka nyadi berengkah ari bulan Julai ngagai September taun tu.

Pekara tu dipadahka Sekretari Besai PBB Dato Sri Alexander Nanta Linggi ke mega Kaban Parlimen Kapit nengah penerang berita pengudah ngulu Aum Kaunsil Tertinggi PBB Sarawak ba Indu Opis PBB, Jalai Bako, sehari tu tadi.

Nitihku iya, konvensyen nya deka ngaul Zon Selatan, Zon Betong, Zon Tengah enggau Zon Utara lalu deka nyadi pelasar beguna dalam ngenegapka pengawa parti ba renggat baruh.

“Konvensyen tu deka nyadi pelasar ti beguna dikena ngenegapka agi pengawa parti ba renggat baruh, ngelengkaska kuing organisasyen sereta nentuka PBB terus nyikap diri napi rampa politik ke diatu enggau jemah ila,” ku iya.

Ku iya, pengawa ngatur konvensyen nya ngayanka komitmen parti ti terus ngenegapka penyerakup dalam, kelimpah ari nentuka organisasyen nya seruran relevan sereta tegap dalam napi pemar politik jemah ila.

Ku iya nambah, haribulan bejalaika pengawa enggau rambai jaku rasmi konvensyen nya deka ditukuka pengudah aum koordinasyen ti diperambu deka diatur dalam timpuh ke semak.

Dalam penerang ke sama, iya ngarapka pengawa nya deka terus ngenegapka komitmen enggau kuing PBB ungkup penegap politik, penyulut enggau pengelantang rayat Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BETONG, 9 Mei – Pengelikun ba Palan Belelak enggau Ngetu (R&R) Jelukong deka dipatau 24 jam sehari dikena nentuka gaya ti likun, teratur sereta kondusif ngagai bala temuai lebuh maya udah berengkah beroperasyen.

Nitihka penerang ari Opis Kereja Raya (JKR) Sarawak, R&R Jelukong ba Jalai Besai Pan Borneo semak Engkilili pengudah Simanggang dipelaba berengkah beoperasyen penuh kena 15 Mei tu.

JKR Sarawak mega madahka, sekeda bansal mega udah berengkah beoperasyen ba skala mit nyadika pemungkal dikena meri peluang ngagai penguna jalai besai ngasaika perengkaguna enggau lantang ba R&R Jelukong.

Sehari tu, Direktor Opis Kereja Raya (JKR) Sarawak, Dr.Cassidy Morris, bejalaika pengawa meresa penyikap operasyen bansal pemakai enggau kedai ba R&R nya.

“Penemuai tu ngembuan tuju deka beratika baru tikas penyedia perengka guna sereta nentuka semua sukut operasyen dalam gaya ke manah sebedau pengawa muka penuh diperambu berengkah kena 15 Mei 2026,” ku penerang nya.

Kelimpah ari nya, pengawa meresi enggau ngintu kandang endur nya mega benung chakah dipejalaika ti ngaul perengka guna jamban, surau enggau kandang ngelingi dikena nentuka pengelantang penguna seruran ba tikas ke pemadu manah. -RBI

#ruaiberitaiban#newsiban#beritaiban

Rindu | Titih | Kunsika

MIRI, 9 Mei — Perambu ngaga Jematan Marina siti ari inisiatif ti beguna dalam ngenegapka penyambung kandang menua Miri enggau kandang ngelingi nya, kelimpah ari nyukung pemansang mengeri ti lebih moden sereta meruan.

Pengudah tembu ila, projek tu dikearapka ulih meri empas positif ngagai mobiliti peranak menua, nyungkak penumbuh ekonomi kandang menua sereta ngangkatka pengelantang pendiau rayat nengah pengawa nyendiaka infrastruktur moden, likun sereta bekualiti.

Pekara tu dibantaika Opis Kereja Raya (JKR) Sarawak Bagi Menua Miri pengudah ngatur sesi ‘Kick-Off Meeting’ ungkup projek Perambu Ngaga Jematan Marina, Bagi Menua Miri.

Pengawa tu nyadi singkang pemungkal ngatur pengawa bejalaika projek infrastruktur strategik ti deka ngenegapka rentayan perengka pengangkut di bagi menua nya.

Sesi nya diatur ba Bilik Aum Ringkat 7, Menara 2, JKR Bagi Menua Miri lalu bechairmanka Injinir Bagi Menua Miri, Ir. Stephen Ung Neng Hui.

Sama bisi datai pengari tim perunding, kunteriktor enggau ejensi bekaul ti bisi kaul terus bejalaika projek nya.

Aum nya betuju nentuka koordinasyen keterubah projek ulih dipejalaika enggau komprehensif mungkur skop kereja, perambu teknikal, taga bejalaika, spesifikasyen, peminta palan enggau komitmen semua piak ti bekaul.

Nengah sesi nya, JKR Sarawak mega ngemeratka pemesai guna kerejasama begulai entara ejensi, konsultan enggau kunteriktor dikena nentuka projek nya dipejalaika enggau sistematik, efisyen, enggau kualiti sereta dalam timpuh ke udah ditetapka.

Setipak enggau aspirasyen “We Build For You”, JKR Sarawak tetap komited ngenegapka agenda pemansang infrastruktur nengeri tu nengah pengawa bejalaika projek ti meri empas tinggi ungkup penyulut enggau pengelantang rayat Sarawak. -RBI

Gambar semina pengias aja

#ruaiberitaiban#newsiban#beritaiban

Rindu | Titih | Kunsika

SONG, 9 Mei — Peranak di Rh Clement Nanga Manap Batu udah nerima bantu bekal ai beresi ari Opis Pengintu Pengelantang Raban Bansa (JKM) Pelilih Song, Bagi Menua Kapit berindik ari penanggul bekal ai ti nuntung peranak rumah panjai nya, ditu kemari.

Bantu nya dikenataika asil ari pengawa jampat JKM dalam mantu ngelempungka penusah ke ditapi peranak, lalu enggau nya nentuka pekara ke diguna komuniti terus diintu.

Chairman Komiti Pemansang enggau Pengelikun Genturung Pendiau (JKKK) Rh Clement Nanga Manap Batu ngenataika pengaga ati enggau terima kasih ngagai pemesai enggau staf JKM Pelilih Song enggau Bagi Menua Kapit ketegal pengibuh enggau kerejasama ngatur pengawa nyuaka bantu nya.

Bela diberi puji iya nya komitmen Sekretari JKKK, Puan Jacqueline Mak Jang enggau Tukang Wang JKKK, Encik Bayang ti sama-sama mantu proses peminta bantu ai irup ungkup peranak ti kena bungkur.

Berebak enggau nya, semengat kerejasama enggau besaup ti dipandangka peranak rumah panjai nyadung bekal ai mega mandangka penyerakup enggau ulah besaup dalam komuniti.

Dikearapka bantu ke diberi nya ulih mantu peranak neruska aktiviti ninting hari seraya isu bekal ai diputar penuh piak ke bekaul. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — JKKK Rh Clement, Manap Batu, Btg Rajang, Song