PETRA JAYA, 19 Mei – Sektor betanam betupi Sarawak majak mandangka prestasi ti meransang lebuh ngerikodka pemeri pukul rata RM14.8 bilion ngagai Pemansut Kasar Dalam Menua (KDNK) nengeri sepemanjai Atur Pemansang Malaysia Lumpar Ke-12 (RMK-12).
Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madah, sektor nya meri pangka urung 10.5 peratus ngagai ekonomi Sarawak, lalu nyadika iya sebengkah ari penyaup besai pengudah sektor servis, pengawa ngaga barang enggau ngelumbung.
Nitih ku iya, rega eksport betanam betupi Sarawak mega udah niki ari RM14 bilion ba taun 2020 ngagai RM20 bilion ba taun 2024, kelimpah ari ngerikodka lebih dagang sepenyampau RM16 bilion ungkup taun 2024.
“Industri sawit mengkang nyadi pemansut besai penumbuh sektor betanam betupi lebuh ngasilka eksport ti beungkus RM16.5 bilion ba taun 2024 tauka 12 peratus ari semua eksport nengeri tu,” ku iya rambau nyimpul jaku iya ba Dewan Kunsil Nengeri (DUN) Sarawak sehari tu.
Ku iya, kandang endur betanam sawit di Sarawak diatu manggai urung 1.7 juta hektar.
Ba pemansang ke bekaul, iya madahka Sarawak mengkang nyadi pengeluar lada pemadu besai di menua tu, ti meri urung 98 peratus ari semua pemansut lada Malaysia.
Ku iya, pemansut lada Sarawak diatu manggai 30,613 tan metrik enggau rega eksport RM159 juta, seraya industri dipelabaka ulih meri pangka urung RM2 bilion ninting taun ngagai ekonomi nengeri tu.
“Sepenyampau 36 buah dagang mit enggau jelan pemesai (PKS) udah mujur dikemansang Lembaga Lada Malaysia nengah Program Pemansang Keusahawanan enggau PMKS ba taun 2025 enggau penyampau asil jual sepenyampau RM34.5 juta,” ku iya nerang.
Sektor jelu tupi mega ngerikod penumbuh ke besai lebuh eksport babi idup niki ngagai 124,871 iku ke berega RM197.42 juta ba taun 2025 dibandingka enggau 56,050 iku ke berega RM56.27 juta ba taun 2020.
Ari sukut pemansang menua pesisir, perintah mujur bejalaika pengawa ngaga jalai ladang sepemanjai 8,500 kilometer, pemansang sistem parit enggau entali ai ti ngaul 3,000 hektar tanah betanam betupi sereta mega projek nyaga sungai enggau tebing tasik.
Ku iya, semua inisiatif tu meri penguntung terus ngagai lebih 30,000 iku orang bumai enggau komuniti menua pesisir di serata Sarawak.
Nitih ku iya, sektor betanam betupi deka terus ditegapka nengah pemerat ba pengawa ngetanka pemanah rampa menua, inovasyen teknologi, proses tambah nilai enggau ngerembaika makit eksport setipak enggau agenda pemansang timpuh panjai Sarawak. — RBI
#Beritalban | Ruai Berita Iban
Rinduka | Titihka | Kunsika
