MIRI, Mei 18 — Pekit Keling Iban enggau Belawan Orang Ulu ukai semina pekit atas panggau aja, tang nyadi kelai identiti, pemerani enggau pesaka asal komuniti Dayak ti enda tau enda terus ditan sereta ditampung ngagai nembiak rebak baru.
Kaban Kunsil Nengeri (ADUN) sitak Lubok Antu, Roy Angau Gingkoi madah, pekit nya mandangka penegap budaya komuniti Sarawak ti mayuh pupu bansa lalu udah nyadi kelai nyadi ketuai, identiti enggau temegah ati komuniti Dayak kenyau ari rebak.
Iya madah munyi nya lebuh iya bisi datai nyadi temuai dipebasa bejadika Pekit Keling Iban / Belawan Orang Ulu beserimbai enggau Bazar Gawai Dayak & Pesta Etnobudaya Renggat Sarawak 2026 ba Palan Bazar Gawai Dayak, Permyjaya.
Kenu ku iya, pesaka budaya enda ulih dikemendarka enda dikeingatka, tang lebih agi begunaka pengawa dijaga nengah pelajar, ngaul komuniti sereta terus mantaika ngagai raban nembiak ngambika sida terus ngelala asal, adat enggau pun budaya diri empu.
Ku iya, program bepelasarka budaya baka tu mega ulih nyadi medium ke pemadu manah dalam ngenegapka penyerakup komuniti kelimpah ari ngelakuka penyelai budaya Dayak ngagai komuniti luar enggau temuai.
Pekit tu bisi nyendiaka perais ke mai penguntung nyengkaum mata duit, trofi, jumpang enggau setipikit penyereta ngagai pemenang enggau penyereta ke ngambi bagi.
Iya mega meri besai terima kasih ngagai raban pengatur, Serakup Dayak Miri (DAM), semua ejensi ke bisi kaul enggau pengawa nya, penyereta enggau bala temuai ke udah bebendar ngemujurka program nya. -RBI
#ruaiberitaiban#newsiban#beritaiban
Rindu | Titih | Kunsika
