KUCHING, 13 Mei – Sarawak meseti terus ngenegapka penuduk nyadi ketuai ekonomi baru menua nengah fokus ngagai pemansang industri beteknologi tinggi, modal mensia ti bekualiti sereta pemansang menua pesisir ti lebih seimbang sereta inklusif.
Kaban Kunsil Nengeri (ADUN) Pelagus, Wilson Nyabong Ijang madah, Sarawak diatu udah ba tikas ke tegap asil ari penegap politik, chara ngatur belanja ke bejimat sereta iring perintah nengeri ke bisi visi ari baruh iring Premier Sarawak, Datuk Patinggi Tan Sri Abang Abdul Rahman Johari Tun Openg.
Nitih ku iya, taja pan dunya betapi enggau geopolitik ti enda tentu, tekan inflasyen, pengeruga ngagai rentayan bekal global enggau ubah teknologi ti jampat, Sarawak agi mujur ngetanka rizab wang ti tegap, narit puku enggau nyerungkai industri jemah ila.
“Sarawak kemaya hari tu ukai agi semina bejaku deka ngiga penyulut aja, tang ngengkahka diri nyadi ketuai dalam ekonomi jemah ila,” ku iya lebuh bejuraika Usul Penghargaan Tuai Pemegai Menua (TYT) Negeri Sarawak ba Aum Kunsil Nengeri (DUN) Sarawak, sehari tu tadi.
Ku Wilson, pemujur Pelin Strategi Pemansang Pengudah COVID-19 2030 (PCDS 2030) diatu bepanggai ba pemanah pengawa bejalaika enggau ngenataika projek ngagai rayat, kelebih agi di menua pesisir.
Ku iya, rayat deka meda jalai alun tembu, sekula diangkatmanah, akses internet dikemanahka agi, perengka guna pengerai ditegapka sereta peluang ekonomi diasai taja pan ba kandang menua ulu.
Iya mega nyukung pengawa perintah nengeri ti deka ngaga Sarawak nyadi hab aeroangkasa, pemintar tiru (AI), teknologi satelit enggau ekonomi digital dikena ngadaka peluang kereja ti berega tinggi sereta nambahka penegap ekonomi nengeri tu.
Taja pia, iya nyemetak madahka pemansang industri ke majak ngerembai begunaka modal mensia ke bekualiti nengah pengawa ngenegapka pelajar STEM, TVET, literasyen digital enggau pemansang penau.
Berebak enggau nya, iya muji pangku pengawa Wang Turu Ekonomi Gagasan Anak Sarawak ti chakah meri kuasa ngagai raban nembiak nengah program literasyen digital, robotik, sains data enggau AI.
Wilson mega nyambut manah komitmen perintah nengeri bejalaika Skim Pelajar Tinggi Perchuma (FTES), kelebih agi dalam bidang baka injiniring, perubat, STEM enggau undang-undang.
Ngelansa pasal pemansang menua pesisir, iya nyemetak madahka bida pemansang entara mengeri enggau menua pesisir meseti terus diperatika laban perengka guna pemun baka jalai alun, jematan, bekal ai, kuasa karan enggau telekomunikasyen nyadi pengepun besai ngagai transformasyen sosio-ekonomi rayat.
Ku iya, kandang menua baka Pelagus enggau Bagi Menua Kapit agi begunaka pengawa ngemanahka rentayan komunikasyen enggau infrastruktur dikena ngangkatka tikas pengidup peranak menua nya.
Iya mega meri pengaga ati ngagai perintah Sarawak ti bejalaika Skim Karan Alternatif Menua Pesisir Sarawak (SARES) ti udah mayuh mantu komuniti menua pesisir ngulihka kuasa karan.
Taja pia, Wilson madahka sekeda isu baka penanggul bekal enggau timpuh bateri ke mimit agi begunaka perati ke berat.
Berindik enggau nya, iya meri langgur penemu ngambika perintah berundingka pengawa ngena sistem solar hibrid dalam kluster ungkup rumah panjai enggau genturung pendiau besemak nyadika chara mutarka timpuh panjai seraya nganti pengawa ngerembaika grid kuasa karan.
Kelimpah ari nya, iya mega mantaika isu servis Sarawak Energy Berhad di Kapit ti agi bepanggai ba kaunter bebayar ngena chara manual, ngujungka sekut sereta ngenusahka penguna.
Iya meri langgur penemu ngambika SEB nambahka kiosk mayar servis kediri sereta chakah agi ngena pelasar mayar digital setipak enggau agenda transformasyen digital Sarawak.
Dalam jaku ke sama, Wilson mega ngansak ngambika sebagi ari agih belanja pemansang RM6 bilion ti udah dipadahka Perintah Besai ungkup Sarawak dikena ngenyampatka pengawa nyukat kelingi Tanah Hak Adat Bansa Asal (NCR).
Nitih ku iya, pengawa nyukat tanah NCR beguna dikena nentuka penegap undang-undang, nyaga hak rayat sereta nyukung pemansang timpuh panjai komuniti menua pesisir.
Iya mega nyemetak madahka penegap politik enggau ketuai ti konsisten nyadi faktor kunsi pemujur Sarawak dalam merambu pemansang timpuh panjai sereta nambahka pengandal pemeranak puku.
“Sarawak diatu majak dipebasaka ba renggat antarabansa dalam bidang kuasa tau dikena baru, ekonomi hidrogen, pengelantang rampa menua enggau transformasyen digital,” ku iya. -RBI
#ruaiberitaiban#newsiban#beritaiban
Rindu | Titih | Kunsika
