PETRA JAYA, 19 Mei — Perintah Sarawak majak ngenegapka pemansang sektor agro-komoditi nengeri tu seraya chakah agi ngemuntanka pengelekai igi penyakit rabies nengah chara ti lebih agresif sereta komprehensif.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madah, industri minyak sawit Sarawak terus ngerikod prestasi ti meransang lebuh ngerikod penatai pemisi eksport sepenyampau RM5.93 bilion ungkup timpuh Januari ngagai April 2026.
Ku iya, pemansut minyak sawit mata mega niki 5.3 peratus ngagai 1.33 juta tan seraya pemansut minyak inti sawit mata niki 20.4 peratus.
“Peminta global ngagai biodiesel enggau kuasa bepelasarka bio dikearapka ulih terus ngenegapka makit minyak sawit jemah ila,” ku iya rambau nyimpul jaku iya ba Dewan Kunsil Nengeri (DUN) Sarawak sehari tu.
Ba sektor getah ku iya, Lembaga Industri Getah Sarawak (SARIB) diatu benung chakah ngidupka baru industri getah nengeri tu nengah pengawa begempungka kebun bedandang mit sereta ngena sistem nebang moden “Punching”.
Ku iya, produktiviti getah mujur ditambah ari 0.2 kilogram ngagai 1.5 kilogram sepun sepun sebulan asil ari pengawa ngena teknologi nya.
Iya mega madah, industri sagu enggau nipah terus mandangka penumbuh positif enggau eksport kanji sagu Sarawak manggai 7,000 tan metrik ti beungkus RM20 juta ungkup timpuh Januari ngagai Mac 2026.
Kelimpah ari nya, industri koko Sarawak mega nerima suntikan baru nengah agih belanja RM6.67 juta ari Perintah Besai enggau RM1 juta ari Perintah Sarawak ari baruh RMK Ke-13.
Ba pemansang ke bukai, iya madahka Sarawak mengkang bebendar mutarka isu rabies ke agi nyadi penanggul pengerai mensia mayuh di nengeri tu.
“Naka ke diatu, Sarawak udah ngerikodka 94 kes rabies mensia enggau 87 kes pemati nyengkaum empat kes pemati ba taun 2026,” ku iya.
Ku iya, bisi 311,260 dos vaksin rabies udah diberi di serata Sarawak ari taun 2017 nyentuk Mac 2026.
Nitih ku iya, perintah nagit deka meri vaksin ngagai 50,000 iku ukui taun tu dikena nyapai tikas imuniti raban ukui ti dikemendarka.
Dikena ngenegapka agi pengawa nagang penyakit rabies, perintah mega udah ngemendarka 84 pangku pengawa baru ungkup Opis Servis Veterinar (DVS) Sarawak, kelebih agi dalam aspek nagang penyakit jelu.
Iya mega ngelalau mensia mayuh ngambika lengkas berubat nyema diketup tauka digaru ukui sereta nitihka penuh prosedur berubat anti-rabies dikena nyapai tagit sifar pemati ketegal rabies manggai ba taun 2030. — RBI
#Beritalban | Ruai Berita Iban
Rinduka | Titihka | Kunsika
