BINTULU, 19 Mei — Pemansang Zon Dagang Bebas Bintulu (FTZ) dipeda nyadi inisiatif strategik ti ulih ngenegapka penuduk Sarawak nyadi hab industri, logistik enggau dagang serantau dalam ASEAN.
Kaban Seumur Idup Gerempung Pemansang Dayak Bintulu (BANGUN), John Sini Benang madah, pengawa ngemansangka FTZ di Bintulu ukai semina nyendiaka kandang endur insentif dagang aja, tang mega pelasar transformasyen ekonomi timpuh panjai ti ulih matak pemeranak puku antarabansa sereta nambahka daya bepekit industri menua tu.
Nitih ku iya, konsep FTZ ngemendarka barang diimport, disimpan, diproses, digaga sereta dieksport baru enggau chukai ti dikurangka, duti import enggau prosedur kastam ti efisyen agi.
Ku iya, pemansang FTZ di Bintulu amat setipak enggau penegap mengeri ke diatu, ke dikelala nyadi hab besai ungkup minyak enggau gis, eksport LNG, petrokimia, kuasa tau dikena baru, logistik palan penyangkai kapal enggau industri hiliran.
“Bintulu udah tentu ngembuan penuduk ke strategik nyadi pintu penama ngagai industri Sarawak nengah perengka guna LNG tikas dunya PETRONAS enggau rentayan palan penyangkai kapal ke tegap.
“Enggau pengerembai FTZ, Bintulu ngembuan potensial nyadi palan ngagih serantau ASEAN ke ulih matak mayuh agi kompeni multinasional enggau pemeranak puku terus ari menua luar (FDI),” ku iya ba sebengkah penerang.
Ku iya nerang, entara batang pemanah FTZ iya nya pengulih ngurangka ungkus operasyen kompeni nengah pengelepas ari chukai import, chukai nyual enggau prosedur kastam ti jampat agi.
Situasyen tu ku iya, meri pengelebih besai ngagai sektor baka petrokimia, pengawa ngaga barang, injinir, proses pemakai, tenaga gadung enggau kereban dikena ngaga rumah ngambika ulih besemekih ba makit antarabansa.
Berebak enggau nya, FTZ mega dikearapka ulih ngenegapka pangku pengawa Palan Penyangkai Kapal Bintulu nyadi hab logistik serantau nengah penambah pengawa ngatur kargo, jalai kapal antarabansa enggau integrasyen servis gudang enggau logistik moden.
“Palan strategik Bintulu ti nyambung Malaysia Timur, Brunei, Kalimantan, ASEAN enggau Asia Timur Laut meri pengelebih besai ba pengawa ngerembaika dagang antarabansa,” ku iya.
John mega nyemetak madahka pemansang FTZ deka muka mayuh agi peluang gawa ngagai peranak Sarawak ti ngaul bidang injinir, logistik, operasyen loji, pengelikun industri, kapal enggau sektor servis sukung.
Kelimpah ari nya, penumbuh industri tu mega dikearap ulih meri spillover ekonomi ngagai dagang mit enggau jelan pemesai (PKS) menua tu nengah peluang dalam bidang pengangkut, ngintu, katering, ngaga enggau servis teknikal.
Ku iya, FTZ mega beguna dalam ngenyampatka pengawa ngemayuhka ekonomi Sarawak nuju sektor ti berega tinggi baka ekonomi hidrogen, teknologi gadung, pengawa ngaga barang ti maju, logistik digital enggau industri kuasa tau dikena baru.
“Tu setipak enggau visyen timpuh panjai Sarawak nyadi ketuai ekonomi gadung enggau palan beranakka puku kuasa beresi di rantau tu,” ku iya.
Ku iya nambah, penama kompeni antarabansa ngagai FTZ deka mai pemindah teknologi, automasyen industri, sistem logistik digital enggau standard operasyen antarabansa ti ulih ngangkatka pengelandik pengereja pengawa menua tu.
Berebak enggau nya, iya nyemetak madahka pemansang FTZ meseti dipejalaika enggau meruan nengah chara meri perati ngagai pengawa nyaga rampa menua, ngaul pengereja pengawa setempat, nitihka atur Pengerai, Pengelikun, Pengelikun, Rampa Menua enggau Kualiti (HSSEQ) sereta perambu mengeri ti seimbang.
“Enti diatur enggau manah, FTZ Bintulu bisi penau nyadi siti ari hab dagang enggau industri ti pemadu beguna dalam ASEAN ti deka meri penguntung besai ngagai rayat Sarawak enggau rebak dudi hari,” ku iya. — RBI
#Beritalban | Ruai Berita Iban
Rinduka | Titihka | Kunsika
