SIBU, 10 Mei – Projek demo plot padi teknologi moden pemesai lapan ekar deka dikemansang ba Rh. Unjah, Sungai Melangan nyadi pengeransing ngenegapka pengelikun pemakai sereta nambahka pemansut padi menua tu di Sarawak.

Pengawa nasih tanah projek nya udah dipenyadika Direktor Betanam Betupi Sarawak, Dominic Chunggat ti deka dipejalaika Borneo Agritech Sdn. Bhd. bekerejasama enggau sekeda kaban strategik.

Projek demo plot nya deka digaga ba tanah ke dipenggi peranak Rh. Rumah panjai Unjah lalu deka nyadi sebagi ari pansik pengelama tiga taun ti mungkur sekeda bansa padi ti bisi potensial dikemansang nengah chara komersial jemah ila.

Kelimpah ari nya, kandang endur betanamka padi deka ngena teknologi enggau infrastruktur betanam betupi ke pemadu baru ke udah dikelala engkeman dipejalaika di Sarawak dikena nambahka pengulih sereta produktiviti pengawa betanam betupi.

Pansik tu mega beguna dalam beratika potensial pemansang pengawa nanam padi bedandang besai di nengeri tu, lalu enggau nya ulih mantu pengawa perintah ngenegapka pengelikun bekal pemakai sereta ngurangka bepanggai ba import padi.

Pengawa bejalaika projek tu ngaul kerejasama entara Borneo Agritech Sdn. Bhd., Universiti Malaya, Opis Betanam Betupi Sarawak enggau komuniti peranak Rh. Unjah.

Nengah gempung pengelandik ari sektor perintah, institusyen pelajar enggau sektor peribit, dikearapka projek tu ulih meri penguntung ke besai ngagai komuniti lokal, kelebih agi dalam nambahka asil padi peranak menua nya, ke tebal agi agi betanamka padi umao ngena chara tradisional.

Sama bisi datai iya nya Direktor Urusan Borneo Agritech Sdn. Bhd.Bayang Ringkat, Ketuai Penulung Direktor Bagi Padi enggau Gandum Jafaruddin, Pemesai Betanam Betupi Bagi Menua Sibu Andrew Iling, Pemesai Nguasa Pelilih Sibu Jonathan Sambang sereta pemesai ari Opis Betanam Betupi Bagi Menua enggau Pelilih Sibu. -RBI

#ruaiberitaiban#newsiban#beritaiban

Rindu | Titih | Kunsika

SPAOH, 10 Mei — Pengerami Makai Lemai Mantar Gawai Dayak Gerempung Tuai Rumah (GTR) Rimbas Ulu Debak 2026 udah diatur richah ba Balai Mensia Mayuh Spaoh malam ensanus, mandangka semengat beserakup sereta begulai enggau komuniti pupu bansa di kandang menua nya.

Pengerami nya dipenyadika Sapit Premier Sarawak Datuk Amar Douglas Uggah Embas ke mega Menteri Wang enggau Ekonomi Baru II, Menteri Infrastruktur enggau Pemansang Palan Penyangkai Kapal sereta Kaban Kunsil Nengeri (ADUN) Bukit Saban.

Penatai bala ketuai komuniti, temuai ti dikangau sereta peranak menua nya ngerichahka agi pengerami Gawai Dayak ti nyadi kelai pengelantang, penyerakup enggau pesaka asal komuniti Dayak di Sarawak.

Nengah penerang iya, Uggah meri besai terima kasih ngagai semua komiti pengatur ketegal komitmen, kerejasama enggau dedikasyen sida dalam nentuka pengerami diatur enggau lanchar, teratur sereta penuh enggau pengeransing.

Iya mega meri besai terima kasih ngagai semua temuai enggau komuniti ke bisi datai ketegal sukung enggau semengat sepenemu ti dipandangka sepemanjai program nya.

“Sama-sama meh kitai neruska pemansang Bagi Menua Betong. Betong nuju pengelantang enggau pengelikun dalam penyelai,” ku iya.

Berebak enggau nya, Kaban Parlimen Betong, Dato Dr Richard Rapu @ Aman Begri madah, pengerami nya ukai semina nyadi pelasar dikena ngerami penatai Hari Gawai, tang mega ngemeranka pengawa ngerapitka kaul pangan diri sereta semengat beserakup entara komuniti pupu bansa di nengeri tu.

Iya mega meri tabi puji ngagai komiti pengatur pengerami laban udah mujur ngatur pengerami nya.

“Arapka semengat beserakup, sepenemu enggau ulah menyadi terus ditegapka ungkup pengelantang begulai,” ku iya.

Pengawa nya tembu enggau sampi “Gayu Guru, Gerai Nyamai” ti nyadi kelai pengelantang, pengelikun enggau penyerakup rayat Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SARATOK, 10 Mei — Pengerami Makai Lemai Mantar Gawai Dayak Renggat Pelilih Menua Saratok 2026 udah diatur enggau richah enggau penatai beribu iku temuai ari mayuh bengkah kandang menua ba Dewan SJKC Min Syn Saratok, malam kemari.

Pengerami ke diatur begulai SDNU enggau SIDS Saratok nerima sambut ke chukup meransang lebuh 115 buah mija diisi temuai ari serata Saratok enggau kandang menua besemak nyengkaum Sibu, Pakan, Julau, Sarikei, Roban enggau Betong.

Kaban Kunsil Nengeri (ADUN) Krian, Friday Belik madah, pengawa ke berambaika leka jaku “Segulai Sejalai Nuju Pemansang” ukai semina nyadi kelai pengerami nyerumba Hari Gawai, tang mega nyadi pelasar beguna dalam ngenegapka penyerakup, semengat begulai enggau pengelantang komuniti Dayak.

Dalam jaku bejadika pengerami nya, iya ngemeratka lima batang pekara ti patut diambi nyadika lalau beserimbai enggau pengerami Hari Gawai taun tu.

Kenu ku iya, komuniti meseti seruran meretika sereta belajar ari pemujur ke udah dijapai ba taun ke udah, kelimpah meri terima kasih ngagai Tuhan atas semua pemujur enggau berekat ke diulih.

Iya mega netapka pengerami Gawai nyadi pelasar pemadu manah dikena mantaika pesaka budaya, pekayan asal sereta dikena nerenakka semengat bekerejasama entara komuniti.

“Pengerami tu mega patut nyadi ruang dikena ngenegapka penyerakup, kerejasama enggau semengat bebasa dalam raban bansa ti mayuh macham,” ku iya.

Berebak enggau nya, iya nesau komuniti ngambika terus nambahka komitmen enggau pengepuh dalam napi pemar ekonomi dunya enggau chara ti positif, kreatif sereta tan.

Pengerami nya mega diias enggau pekit final Pekit Kumang Gawai Saratok 2026 ke alai lima finalis mandangka pekayan asal diri nyadi pengerami pengerami nya.

Berebak enggau nya, Friday mega ngenataika pengaga ati enggau pengaga ati ngagai SDNU enggau SIDS Saratok laban udah mujur ngatur pengawa nya enggau lanchar sereta enggau naka pengeransing.

Sama bisi datai Chairman SDNU Saratok, Encik Jeti Kumpai Endawie; Chairman SIDS Saratok ke mega Chairman Gawai 2026, Puan Sita Ingka; Prof Dato Dr Spencer Empading enggau bini iya; Chairman SDNU Sibu ke mega Sapit Presiden Kanan SDNU Nasional, Chambai Lindong; Penguasa Tanah enggau Survei Bagi Menua Betong, TPr. Morris Nayup; Pemesai Pentadbiran Pelilih Mit Roban, Encik Steve Miller; Pemanca Thomas Lamit; Ketuai raban bansa enggau ketuai komuniti (KMKK), kaunselor. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Friday Belik Official

SARIKEI, 10 Mei — Pengerami Mantar Gawai Dayak 2026 ke diatur Gerempung Tuai Rumah (GTR) Bagi Menua Sarikei nyadi pelasar ke tegap dalam ngenegapka penyerakup komuniti sereta ngetanka pesaka main asal Dayak sebedau pengerami Hari Gawai ke deka datai.

Kaban Parlimen Sarikei, Dato Sri Huang Tiong Sii madah, pengerami nya ukai semina pengawa asal dikena nyambut musim pengerami, tang mai reti ke besai agi dalam nerenakka semengat begulai sereta bebasaka pangan diri entara komuniti pupu bansa enggau rebak baru.

Kenu ku iya, pengerami Gawai nyadi kelai meri terima kasih ngagai asil ketau kelimpah ari nyadi pelasar dikena ngenegapka identiti enggau pesaka asal komuniti Dayak.

“Pengerami tu diatur kelai nyambut pengerami Gawai ti deka datai ungkup komuniti Dayak.

“Iya ukai semina ngingatka pengawa ngetau, tang mega nyadi ruang endur kitai ngemeratka pesaka sereta nerenakka rega penyerakup dalam komuniti,” ku iya lebuh bejadika Pengerami Makai Lemai Beserimbai enggau Pengerami Mantar Gawai Dayak 2026 kena Hari Lima tu tadi.

Iya mega nyemetak madahka raban nembiak megai tanggungpengawa ti beguna dalam nentuka budaya enggau adat asal komuniti Dayak terus dijaga sereta ditampung rebak dudi hari.

Ku iya, raban nembiak rebak baru ukai semina patut temegah ati enggau identiti sereta pesaka aki ini sida, tang mega patut mansang ke mua nyadi penyaga enggau pelasar penerus budaya komuniti.

Berebak enggau nya, iya mega meri besai terima kasih ngagai semua piak ke udah meri bantu sereta ngemujurka pengawa nya nyengkaum bala temuai ke bisi datai ngerichahka agi pengerami nya.

Iya mega ngena awak nya meri Selamat Hari Gawai ngagai selampur komuniti Dayak enggau pengarap pengerami tu deka mai penyenang, pengerai enggau pengelantang ngagai semua ruang bilik.

“Selamat Hari Gawai, Gayu Guru Gerai Nyamai, Lantang Senang Nguan Menua,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — YB Dato’ Sri Huang Tiong Sii

BETONG, 10 Mei – Projek ngaga jalai alun baru ari Rumah Panjai Maja ngagai Penurin dipeda meri empas ke besai ngagai peranak menua nya nengah rentayan komunikasyen ke manah agi sereta perengka guna pejalai ke likun sereta lantang agi.

Nitihka penerang ke dikunsi nengah Facebook South Asia Growth r, projek nya ukai semina deka ngangkatka akses komuniti menua pesisir, tang mega deka disikap ngena sistem lampu jalai alun ke ngena kuasa solar dikena nentuka lampu ke lebih entap, kelebih agi ba kandang endur ke bisi penanggul infrastruktur bekal kuasa karan.

Kompeni nya mega meri besai terima kasih ngagai Opis Kereja Raya Sarawak ketegal pengandal sereta peluang ke diberi ngaul diri bejalaika projek pemansang nya.

“Ba SAG, kami mengkang komited nyendiaka chara mutarka penanggul ti praktikal sereta meruan ti ulih meri bida ke bendar ngagai komuniti ba renggat baruh,” ku penerang nya.

Inisiatif ngena lampu jalai solar LED mega dipeda seriris enggau pengawa ngenegapka pemansang ti meruan sereta ngangkatka pengelikun penguna jalai alun di menua pesisir Sarawak. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 10 Mei — Menteri Kereja Raya, Dato Sri Alexander Nanta Linggi meri tanda iya bedau sedia ninggalka dunya politik enggau penuh lebuh iya mantaika pengingin deka neruska pengawa iya ba renggat Kunsil Nengeri (DUN) Sarawak.

Kenu ku iya, enti diberi awak sereta berekat ketuai parti, iya sedia nampung servis ba renggat nengeri, kelebih agi ba sitak DUN ngelingi Kapit.

Dulu agi ari tu, Kaban Parlimen Kapit nya meri tanda iya deka mutuska jeman nyadi ketuai ba penuduk Parlimen Kapit ba Pengawa Bepilih Besai (PRU) ti deka datai.

“Ya, nyangka udah datai maya iya aku nyerah ngagai sida ke biak.

“Aku udah dalam Parlimen nyau deka manggai 30 taun. Enti bisi peluang enggau sitak DUN baru, aku mega deka terus gawa ba renggat nengeri,” ku iya.

Penerang nya tekala nya matak perati mensia mayuh lebuh iya enggau tebuka mantaika pengingin ati iya deka meri peluang ngagai rebak baru ngambi tangkup pengawa nyadi ketuai ba kandang menua nya.

Penerang nya dipeda nyadi kelai tumu ubah besai ba rampa politik di Kapit pengudah iya nyadi Kaban Parlimen bagi menua nya kenyau ari taun 1999.

Pemansang nya diatu udah nyungkak spekulasyen bekaul enggau peluang ubah ketuai besai di Kapit, nyengkaum sapa chalun ke bisi potensial nganti ke deka dibantaika Parti Pesaka Bumiputera Bersatu (PBB) enggau Gempung Parti Sarawak (GPS) ba PRU ke deka datai.

Alexander Nanta siku ari ketuai kanan Sarawak ti pemadu bepeneleba ba renggat Perintah Besai sereta kala mangku sekeda portfolio kabinet ti beguna sebedau dipadu nyadi Menteri Kereja Raya Malaysia.-RBI

#ruaiberitaiban#newsiban#beritaiban

Rindu | Titih | Kunsika

SIBU, 10 Mei – Siti kangau ngenyit diterima Opis Bomba enggau Penyah Penusah Malaysia (JBPM) urung pukul 9.49 malam tadi madahka penusah bebadi balat nyadi ti mungkur sebuah kerita pikap empat taya enggau sebuah kerita MPV ba Kilometer 17.7 Jalai Sibu-Selangau, Jalai Besai Pan Borneo.

Berindik ari ripot nya, seraban bomba ari Balai Bomba enggau Penyah Penusah (BBP) Sungai Merah berumban ngesah ngagai endur nya bejalaika operasyen nyelamat.

Lebuh datai ba endur nya, raban penyelamat tetemuka sebuah kerita Perodua Aruz MPV tebalit enggau siku indu tuai tepekul ba penuduk pesinjir ba mua.

Tudah ke beumur 66 taun ditemu enda nemu diri sebedau dientaska bebadi ba palan penusah ke nyadi ulih pemesai perubat ari Opis Menteri Pengerai Malaysia (KKM).

Pengari Palan Gerakan JBPM Sarawak madah, dua iku agi pesinjir dalam MPV nya bakal seraya deriba selamat enggau nadai sebarang bakal.

Semua sida dalam entukar nya beumur entara 56 ngagai 76 taun.

Ku iya, deriba lelaki enggau tiga iku penumpang indu entukar pikap empat taya nya mega diripotka selamat sereta nadai bakal.

Raban bomba udah nya ngena perengka hidraulik mansutka tudah ke tepekul sebedau tubuh iya diserah ngagai polis ngambika bejalaika pengawa nangkanka nya.

Operasyen nyelamat enggau kereja meresi ba endur nya tembu pukul 11.14 malam. -RBI

#ruaiberitaiban#newsiban#beritaiban

Rindu | Titih | Kunsika

BETONG, 10 Mei – Orang indu dikearapka terus mansang sereta bediri setikas enggau orang lelaki ba pengawa nempa pelajar sereta ngenegapka ekonomi ruang bilik.

Nitihku Datin Rosemary Wong ke ngarika Kaban Kunsil Nengeri (ADUN) Layar Datuk Gerald Rentap Jabu, orang indu kelebih agi di menua pesisir patut bejalaika tanggungpengawa ti beguna amat dalam pemansang mensia mayuh enggau penumbuh institusyen ruang bilik ti tegap sereta kompetitif.

“Orang indu kemaya hari tu ukai semina nyadi tulang belakang ruang bilik aja, tang mega mayuh mantu dalam bidang pelajar, pengawa dagang enggau pemansang komuniti,” ku iya.

Rosemary ngenataika jaku tu ba Pengerami Merarau Beserimbai enggau Pengerami Ngintu Jubli Perak Sarakup Indu Gensurai Layar ke udah diatur ba Rumah Edward Anding, Gensurai Betong kemari.

Pengerami ti beprestij nya mega nyadi saksi timbal ti chukup meransang ati lebuh 92 mija temuai ti ngaul pengari rumah panjai ari serata sitak DUN N.36 Layar datai ngerichahka agi pengerami nya.

Program tu mega nyadika pelasar ngerapitka kaul entara komuniti rumah panjai seraya meri basa ngagai pangku pengawa orang indu dalam raban bansa.

Sama ngerichahka pengawa nya bemacham pengawa pemerindang enggau pengawa komuniti dalam gaya ti penuh enggau pengerami sereta semengat begulai. -RBI

Kredit BetongXcess

#ruaiberitaiban#newsiban#beritaiban

Rindu | Titih | Kunsika

SPAOH, 9 Mei — Perintah Sarawak terus komited ngenegapka pemansang pelajar menua pesisir lebuh sepenyampau RM268,600 diungkupka ngagai Gerempung Tiong Hua Spaoh enggau lapan buah institusyen pelajar di kandang menua Spaoh dikena ngemanahka perengka guna belajar, bejalaika program modal ICT enggau STEM nembiak.

Pemeri nya dibantaika Sapit Premier Sarawak, Menteri Wang enggau Ekonomi Baru II Datuk Amar Douglas Uggah Embas ke mega Menteri Infrastruktur enggau Pemansang Palan Penyangkai Kapal, ba Pengerami Nyuaka Chek ke diatur ba PAWE Bukit Saban, sehari tu tadi.

Pengawa nyuaka bantu nya sebagi ari pengawa bejalaika inisiatif PACU (Pemansang Infrastruktur Sekula) ti ngemeratka pengawa ngenegapka sektor pelajar, kelebih agi di menua pesisir.

Entara penerima bantu tu iya nya Gerempung Tiong Hua Spaoh enggau lapan buah sekula iya nya

SK Penom, SK Paku Central, SK Suri, SJK(C) Chung Hua Spaoh, SK St. John Nanga Tiga, SK Nanga Gayau, SK Spaoh enggau SMK Spaoh.

Ari penyampau bantu nya, sepenyampau RM70,000 diungkupka khas ungkup pengawa nyendiaka kereban bacha enggau bup belajar ngagai tujuh buah sekula primari dalam pengawa ngenegapka akses pelajar enggau ngangkatka kualiti pelajar nembiak.

Kepala Pengajar Sekula Primari (SK) Nanga Gayau, Stanley Matthew Kalong Dandan madah, bantu ke diterima nya deka dikena penuh bejalaika program bekaul ICT enggau STEM dikena ngemansangka potensial nembiak sereta ngangkatka kompetensi pengajar.

Kenu ku iya, pengeransing nya mega ulih nambahka penyikap nembiak napi pemar dunya moden ti majak bepelasarka teknologi enggau inovasyen.

Berebak enggau nya, Kepala Pengajar SK Spaoh, Edie Rahmat Salleh nerangka pemeri nya nyadi sukung ke signifikan dalam ngenegapka perengka guna sekula ke udah bisi, nyengkaum ungkup pengawa bejalaika lumba enggau main, aktiviti kokurikulum enggau pemansang ulah nembiak.

Ku iya, bantu nya ngasuh sekula ulih merambu sereta bejalaika program pemansang nembiak ke lebih komprehensif, bestruktur sereta meri empas ke tinggi.

Inisiatif nya mandangka komitmen Perintah Sarawak ti terus ngenegapka pemansang pelajar menua pesisir nuju ngadaka rebak ti holistik, kompetitif sereta kompetitif setipak enggau aspirasyen pemansang nengeri. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LIMBANG, 9 Mei – Pengerami Pra Nangguhka Bazaar Agro Gawai Medamit 2026 ngemeratka agenda penyerakup enggau pemansang ekonomi komuniti lebuh Sapit Chairman Komiti, Clarence Ringgit ngenataika jaku sebedau pengerami nutup rasmi.

Program ke diatur Komiti Temuai Medamit Limbang begulai enggau Kaunsil Pelilih Menua Limbang ngempuruka komuniti menua nya, orang dagang, ejensi perintah enggau temuai pupu bansa dalam gaya pengelantang enggau pemanah ati.

Dalam jaku dipansutka iya, Clarence Ringgit meri besai terima kasih ngagai semua piak ke bisi kaul nyengkaum bala temuai dipebasa, ejensi perintah, orang dagang enggau komuniti menua nya ke udah meri sukung tegap ngemujurka pengerami dua hari berunggu nya.

Iya mega meri besai terima kasih ngagai pengari Menteri Penyerakup Menua, YB Datuk Aaron Ago Dagang ti diarika Tuan Pandang Semat, Sekretari Politik Menteri Premier Sarawak, Datuk Patinggi Tan Sri Abang Johari Tun Openg, laban udah datai sereta nyukung program nya.

Nitih ku iya, pengawa ngatur Bazaar Gawai Agro Medamit 2026 ukai semina nyadi pelasar aktiviti ekonomi aja, tang mega bejalaika tanggungpengawa ke berat dalam ngenegapka kaul entara komuniti pupu bansa sereta nerenakka kerejasama entara Perintah Besai, Perintah Nengeri enggau autoriti lokal (PBT).

“Program baka tu nyadi pelasar ke beguna dalam ngenegapka penyerakup komuniti sereta nerenakka semengat bebatak asur enggau kerejasama setipak enggau aspirasyen Segulai Sejalai ti mai reti seriris sereta sejalai,” ku iya.

Clarence Ringgit mega ngemeratka komiti pengatur pengawa nyadi penyambung entara sada renggat baruh enggau perintah, kelebih agi ngenataika aspirasyen enggau utai ke diguna komuniti setempat enggau lebih efektif.

Ari sukut ekonomi, iya nyemetak madahka penyereta pedagang mit enggau orang dagang menua tu udah meri empas positif ngagai ekonomi menua tu, setipak enggau pengawa ngenegapka komuniti menua pesisir.

Iya mega ngelaluka kerejasama ti terus ari mayuh bengkah ejensi perintah nyengkaum Kaunsil Pelilih Limbang dalam nentuka program baka tu ulih diteruska enggau manah agi jemah ila.

Pengerami nya mega bisi negu aspirasyen penyerakup bansa ti ditegapka nengah mayuh bengkah inisiatif ari baruh Opis Menteri Penyerakup Menua ti betuaika Aaron Ago Dagang, setipak enggau agenda MADANI Malaysia.

Lebuh nyimpul jaku iya, Mr.Clarence minta semua piak terus ngemeranka semengat begulai sereta nyaga pemeresi sepemanjai pengawa nya nengah chara bejalaika kimpin “Pesta tanpa Sampah”

Pengerami nya udah nya ditampung enggau pengawa rasmi nangguh sereta mandangka main asal ti mandangka penyelai budaya komuniti di DUN Batu Danau, lalu enggau nya ngelaika pemujur Bazaar Gawai Agro Medamit 2026. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika