KUCHING, 9 Mei – Pengerami Ngintu Gawai Kaamatan Begulai Ke-17 Balai Dagang enggau Industri Dayak (DCCI) enggau -Balai Dagang enggau Industri Kadazandusun (KCCI) 2026 deka diatur nengah Pengerami Makai Lemai Gala kena 28 Jun tu ba Amity Venue, UNIFOR Kuching, ke diperambu deka dipenyadika Premier Sarawak, Datuk Patinggi Tan Sri Abang Johari Tun Abang Openg.

Program ke diatur begulai DCCI enggau KCCI nya dipeda nyadi pelasar beguna dikena ngenegapka kerejasama ekonomi enggau rentayan dagang entara komuniti asal Sarawak enggau Sabah, kelimpah ari ngangkatka identiti Gawai-Kaamatan nyadi identiti budaya ungkup pemansang ekonomi Borneo.

Presiden DCCI, Allan Keripin Nangkai madah, program nya ukai semina pengerami budaya aja, tang mega nyadi pelasar strategik dikena ngenegapka komuniti dagang sereta ngerembaika kerejasama ekonomi entara pelilih menua.

Nitihku iya, pengawa tu ngemeratka pemansang dagang mit enggau jelan pemesai (PKS) ti diempu komuniti asal, ngerembaika akses ngagai pengawa dagang enggau pekara belanja, ngenegapka randau polisi ekonomi enggau negika pesaka asal nyadi pengerembai ekonomi kreatif.

“Program tu lebih ari semina pengerami main asal aja laban nyadi pelasar strategik dikena ngenegapka dagang komuniti asal, nempa kerejasama entara sitak menua sereta nyadika pesaka asal nyadi pematak pemansang ekonomi,” ku iya.

Iya madah munyi nya ba aum pengarang berita Pengerami Gawai Kaamatan Begulai Ke-17 DCCI-KCCI 2026 ke diatur ba Dayak Chamber Tower kena Hari Lima tu tadi.

Nengah rambai jaku “Honoring Tradition, Shaping The Future”, program dua hari berunggu berengkah 27 Jun tu dikearapka ulih ngempuruka bemacham elemen budaya, dagang, pemansang orang dagang enggau kaul dagang dalam pengawa ngenegapka ekonomi komuniti asal di Pulau Borneo.

Sama bisi datai Chairman Pengatur Pengerami Gawai Kaamatan DCCI-KCCI Ke-17, Kilat Beriak, begulai enggau ketuai DCCI enggau KCCI. -RBI

Gambar UKAS

#ruaiberitaiban#newsiban#beritaiban

Rindu | Titih | Kunsika

KUCHING, 9 Mei – Gerempung Bansa Dayak Bidayuh (DBNA) terus ngetanka identiti komuniti Bidayuh di mengeri tu kenyau ari ditumbuhka dalam taun 1955, nyengkaum ngetanka hak ngempu tanah indu opis ke ngembuan pemesai 2.45 ekar di Kuching taja pan nerima peluang ke mai penguntung enti dijual.

Presiden iya, Datuk Ik Pahon Joyik madah, pemutus ketuai sebedau tu ngetanka tanah nya ngayanka komitmen DBNA nentuka komuniti Bidayuh bisi identiti enggau penuduk diri empu di mengeri Kuching.

“Enti tanah tu dijual, nyangka kitai udah nyadi jutawan. Tang bala ketuai ke dulu ari tu madahka enda, laban kami meseti bisi identiti Bidayuh di mengeri Kuching,” ku iya lebuh bejaku ba pengerami makai lemai beserimbai enggau Aum Pengari Tiga Taun Sekali (TGA) DBNA Ke-11 di Dewan Mayuh Guna Indu Opis DBNA, malam kemari.

Berebak enggau nya, iya nyemetak madahka DBNA deka terus nentuka komuniti Bidayuh bejalaika tanggungpengawa beguna dalam agenda pemansang Sarawak nengah Strategi Pemansang Pengudah COVID-19 2030 (PCDS 2030).

Ik Pahon mega ngingatka pasal pemar rama kemaya hari nyengkaum judi online, aktiviti nginjau duit nadai pemendar, salah guna dadah enggau nembiak ti badu besekula ti ku iya begunaka perati semua piak.

“Kitai patut terus bejalaika tanggungpengawa ke bisi reti dalam mutarka isu tu,” ku iya.

Ba pemansang ke sama, iya madahka DBNA terus ngenegapka pengering enggau penyereta komuniti Bidayuh lebuh penyampau pampang iya nambah ari 21 ngagai 24 kenyau ari TGA ba taun 2023.

Ku iya, tiga pampang baru ke mujur ditumbuhka iya nya Muara Tuang, Tebedu enggau Batang Kedup, lalu Tiang Bekap ke bisi datai nyadi pemerati ba TGA sekali tu disadang nyadi pampang rasmi ke-25 maya TGA ke deka datai.

“Ba TGA ke-12, kitai engka meda 25 pampang dientaska bisi datai begulai,” ku iya.

Nitih ku Ik Pahon, pemansang nya mandangka pengandal enggau sukung komuniti Bidayuh ti terus ngagai pangku pengawa DBNA nyadi sebuah gerempung ti nyerakupka komuniti di serata Sarawak.

Ku iya, aum renggat pampang ke diatur ari bulan Februari ngagai Mac taun tu mega ngayanka ubah ke manah ba struktur ketuai gerempung enggau mayuh agi raban nembiak datai mangku pengawa begulai enggau ketuai.

“Kitai meda ubah ti amat meransang ba renggat komiti enggau gempung rebak tuai enggau biak ti sanggup megai tanggungpengawa sereta meri servis ngagai komuniti,” ku iya.

Ku iya nambah, pemansang nya beguna dalam nentuka penerus pengawa nyadi ketuai DBNA jemah ila.

“Orang baka kitai nyangka patut meri awak ngagai nembiak rebak baru,” ku iya. -RBI

#ruaiberitaiban#newsiban#beritaiban

Rindu | Titih | Kunsika

KANOWIT, 8 Mei — Pengawa ngatur Pesta Main Asal Kanowit (KCF) Siri 1 ba taun 2026 nyadi inisiatif keterubah ti ngemeratka pengawa ngintu sereta ngenegapka adat enggau pesaka asal menua tu.

Menteri Penyerakup Menua, Dato Sri Aaron Ago Dagang madahka kelimpah ari nyungkak pemansang sosio-ekonomi komuniti nengah penyereta orang dagang menua tu, produk menua tu enggau pengawa ngelakuka produk menua tu mega nyadika pelasar pematak temuai.

Pekara nya dipadahka Aaron ke mega Kaban Parlimen Kanowit lebuh Pengerami Bejadika Pengerami Main Asal Kanowit (KCF) Siri 1 taun 2026 ke diatur ba Tebing Ai Kanowit.

Kelimpah ari nya, iya madahka pengerami tu mega nyadi pelasar ke beguna dalam ngenegapka semengat penyerakup entara komuniti pupu bansa, kelimpah ari ngenegapka kaul rama ba renggat pun menua, kelebih agi ba kandang menua Kanowit enggau serata nengeri Sarawak.

Enggau nya pengawa ngatur pengerami tu ngayanka komitmen perintah ti terus ngenegapka agenda penyerakup bansa setipak enggau aspirasyen Malaysia MADANI ti ngemeratka nilai bebasaka pangan diri, pengelantang enggau pengelikun komuniti pupu bansa.

Ku iya, Sarawak majak ngenegapka penuduk iya nyadi siti ari pelilih menua ke pemadu jampat mansang di Malaysia sereta diaku nyadi model pemansang inklusif ke mujur bepelasarka penyerakup, begulai rayat enggau pengelantang entara pupu bansa.

Kenu ku Aaron, penegap Sarawak ba penyelai pupu bansa enggau budaya ti nyadi pelasar penumbuh raban bansa ti lantang, tegap sereta beserakup.

Iya mega ngenang pasal asil Indeks Penyerakup Menua (IPNas) 2025 ti mandangka Sarawak ngerikod skor pemadu tinggi ba renggat menua, iya nya 0.791.

“Pemujur tu ngayanka penyelai ukai penekul, tang nyadi pengepun ngagai penyerakup, penegap rama enggau pemansang ti meruan,” ku iya. — RBI

#ruaiberitaiban#newsiban#beritaiban

Rindu | Titih | Kunsika

BETONG, 8 Mei — Kaban Parlimen Lubok Antu YB Roy Angau Anak Gingkoi bisi datai bejadika Pengerami Nasih Tanah Projek Ngaga Baru Bangunan Repuk ba Sekolah Kebangsaan Nanga Enteban ti diatur Opis Kereja Raya (JKR) Sarawak nengah Bahagian Betong.

Pengerami tu nyadika pemungkal rasmi bejalaika projek ari baruh inisiatif Sekula Repuk 2.0 ti ngemeratka pengawa ngangkatmanah sereta ngaga baru perengka guna pelajar di menua pesisir.

Inisiatif tu ngembuan tuju deka nentuka nembiak bisi akses ngagai rampa belajar ti likun agi, nyamai agi sereta kondusif.

Dalam jaku iya, YB Roy Angau nyemetak madahka pengawa nyediaka infrastruktur pelajar ti lengkap sereta bekualiti nya siti aspek ti beguna dalam ngenegapka sistem pelajar menua, kelebih agi ngagai nembiak di menua pesisir enggau menua ulu.

Iya mega andal projek tu deka meri empas positif ba pengawa ngangkatka prestasi akademik sereta ngemansangka ulah nembiak.

Projek ngaga baru tu nyengkaum sekeda komponen besai nyengkaum blok pentadbiran enggau akademik baru, buding nembiak, dewan makai, kuarters pengajar enggau perengka guna sukung bukai ti deka meri penguntung ti komprehensif ngagai komuniti sekula.

Nyadi ejensi ti bejalaika projek, Opis Kereja Raya Bagi Menua Betong deka nentuka pengawa bejalaika projek nya bejalai enggau lanchar, nitihka spesifikasyen teknikal sereta tembu nitihka timpuh ti udah ditetapka.

Pengerami nya mega meri besai terima kasih ngagai semua piak ti bisi kaul enggau komitmen sereta kerejasama ti terus ngemujurka projek ti meri empas tinggi tu, ti dikearapka ulih mai pemaik besai ngagai komuniti setempat sereta ngenegapka pemansang pelajar di kandang menua Betong. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUALA LUMPUR, 8 Mei – Kaban Kunsil Nengeri (ADUN) Ba’kelalan, Baru Bian udah ngaga peminta madamka saman ti digaga Parti Keadilan Rakyat (PKR) ngagai iya, ti minta bayar ganti rugi sepenyampau RM10 juta ketegal didawa ngelanggar syarat bon lebuh iya ningkilka diri ari parti nya ba PRU1412.

Notis peminta nya difail nengah Tetuan YH Teh & Quek kena 6hb April tu tadi enggau dalih Kort Tinggi Malaya di Semenanjung Malaysia nadai kuasa mendingka kes nya laban pun pengawa nya nyadi di Sarawak.

Kort netapka 20 Mei endur ngatur kes ba mua Akim Kort Tinggi Roslan Mat Nor.

Dalam peminta nya, Baru Bian ke mega kala nyadi Kaban Parlimen Selangau madahka diri nyain bon nya di Kuching kena 25 April 2018 lalu kaul iya enggau PKR semina fokus ngagai Sarawak aja.

“Pengawa plaintif (PKR) ngagai aku, taja pan dibuktika amat, nadai nyadi di Semenanjung Malaysia. Peminta nya nyadi di Sarawak,” ku iya dalam peminta nya.

Baru Bian entara 16 ex-Kaban Parlimen enggau Kaban Kunsil Nengeri (ADUN) ke disaman Sekretari Besai PKR Datuk Dr Fuziah Salleh ngarika PKR ketegal dituduh ngelanggar penetap bon RM10 juta ke disain enggau parti nya.

Sama bisi disebut nyadi defendan iya nya Datuk Kamarudin Jaffar, Datuk Mansor Othman, Datuk Mohd Rashid Hasnon, Datuk Seri Saifuddin Abdullah enggau Datuk Seri R. Santhara Kumar.

Kelimpah ari nya, Abdul Yunus Jamhari, Datuk Azman Nasrudin, Dr Afif Bahardin, Chong Fat Full, Daroyah Alwi, Haniza Mohamed Talha, Muhammad Hilman Idham, Muhammad Jailani Khamis, Robert Ling Kui Ee enggau Zulkifli Ibrahim mega dipadah nyadi defendan.

Dalam saman ke digaga kediri kena 19 enggau 27 Februari tu tadi, PKR ngumbai ari baruh klausa operatif bon nya, tetiap defendan setuju mayar parti nya RM10 juta dalam timpuh tujuh hari pengudah sebarang pengawa nyadi nyengkaum defendan ngelengka parti, nyereta parti politik bukai ke dipilih nyadi pengari bebas tauka.

Plaintif madahka diri udah nganjung nama tiap iku defendan nyadi chalun bediri minta pilih ba Pengawa Bepilih Besai Ke-14 lalu mujur menang ba sekeda penuduk parlimen enggau nengeri, udah nya numbuhka Perintah Besai enggau sekeda perintah nengeri.

“Taja pia, kena 24 Februari 2020, tiap iku defendan badu nyadi kaban parti pengudah dipilih ngena menira parti. Sida mega mantaika sukung ngagai gempung politik kelimpah ari PKR,” ku PKR dalam penerang tuntut nya.

PKR madahka kena 11 Mac 2020 parti nya mutuska deka ngetuka kaban tiap iku defendan enggau kuasa tekala nya lalu setipikit kena 16 Mac 2020 dikeluarka dikena ngesahka kaban tiap iku defendan udah diketuka lalu minta tiap iku defendan mayar bon penyampau juta tang sida enda mujur.

Disalin ari BERNAMA

#ruaiberitaiban#newsiban#beritaiban

Rindu | Titih | Kunsika

KUCHING, 8 Mei — Aum Komiti Teknikal Nyaga Kualiti Ai Irup (KMAM) Bil 1/2026 udah diatur sehari tu ba Opis Pengerai Nengeri Sarawak, bechairmanka Direktor Pengerai Nengeri Sarawak YBrs. Veronica Lugah,

Aum tu ngempuruka mayuh bengkah ejensi teknikal enggau bekaul nyadi pelasar koordinasyen bersepadu dalam pengawa ngenegapka pengawa ngatur enggau matau kualiti ai ungkup bekal ai ke udah diperubat di Nengeri Sarawak.

Entara ejensi ke bisi datai iya nya Opis Pengerai Nengeri Sarawak, JKN Bagi Gigi Sarawak, Opis Menteri Pengerai Malaysia (Bagi Perkhidmatan Kejuruteraan), Opis Kimia Malaysia (Sarawak, Sibu enggau Bintulu), Opis Menteri Perengkaguna enggau Telekomunikasyen Sarawak, Opis Bekal Ai Menua Pesisir (JBALB), Opis Rampa Menua, Sarawak Water Bhd sereta ejensi bukai ke bekaul.

Aum tu nyadi pelasar ti beguna dalam ngatur pengawa entara ejensi ti bekaul dikena nentuka kualiti ai ti udah diperubat di nengeri tu seruran ba tikas ti likun sereta nitihka standard ti udah ditetapka.

Entara batang tuju aum nya dikena berandauka pemujur ke diatu ba kualiti bekal ai ke udah diberesi di Sarawak, meresa isu teknikal enggau pemar, sereta ngenegapka atur ngemanahka agi ba sukut pengawa matau enggau nagang kualiti ai.

Aum nya mega ngemeratka pengawa ngenegapka kerejasama strategik entara ejensi, nyengkaum pengawa bejalaika enggau matau Program Fluoridasi dikena nentuka pemanah sereta nitihka standard ti udah ditetapka.

Kelimpah ari nya, aum nya mega netapka kuing enggau pengawa ti nangkanka nya dikena nentuka penerus bekal ai beresi ti likun, bekualiti sereta terus ngagai rayat Sarawak.

Randau mega ngemeratka pengawa ti seruran dipejalaika dalam ngangkatka tikas nitihka standard kualiti ai, ngenegapka aspek matau teknikal enggau ngatur pengawa entara semua piak.

Ba pengujung randau nya, semua kaban komiti ngenataika pengaga ati ngagai semua pengari ejensi ke bisi datai ketegal komitmen enggau kerejasama sida.

Dikearapka semua penemu, langgur penemu enggau pemutus ti dijapai ulih ngenegapka agi kualiti ngenataika servis ai beresi ungkup pengelantang rayat Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BAU, 8 Mei — Kaban Parlimen Puncak Borneo, Datuk Willie Mongin meransang raban veteran ke beumur 60 taun ke atas ngerejista diri nyadi kaban Palan Aktiviti Orang Tuai (PAWE) Puncak Borneo ngambika sida ulih terus chakah nyereta mayuh bengkah program pengelantang pendiau komuniti enggau pengawa rama.

Dalam jaku dipansutka iya, Willie mega minta raban veteran ngambika seruran nyaga pengerai tubuh enggau runding dikena nentuka pengelantang sida begulai enggau diri sebilik sereta komuniti seruran dijaga.

Iya madah munyi nya lebuh ngulu Program Jejak Veteran enggau Bini-bini bala Veteran ke diatur Gerempung Veteran Soldadu Malaysia (PVATM) Pampang Bau ungkup Zon Serembu ke nyadi ba Dewan Simombu, Kampung Sogoh, ditu, sehari tu.

Ba program nya, Willie Mongin bisi nyuaka agih belanja sukung ngagai PVATM Pampang Bau dikena mantu bejalaika aktiviti ninting taun gerempung kelimpah ngenegapka agi pengawa nyukung veteran enggau balu veteran, kelebih agi ba kandang menua Bau.

Program tu nyadi pelasar beguna dalam meri basa ngagai jasa enggau pengawa raban soldadu ke suba ti udah gawa berambunka nyawa ngetanka pengelantang menua. -RBI

#newsiban#ruaiberitaiban#beritaiban

Rindu | Titih | Kunsika

MARUDI, 8 Mei — Siku lelaki dikeirauka kena serang baya maya nginti ba Sungai Ridan, Marudi, lemai kemari udah ditemu.

Nitihka penerang ari Raban Penyaga Orang Periman Malaysia (APM) Marudi, Palan Kawalan Operasyen (PKOD) Pelilih Marudi nerima kangau ngenyit ari Polis DiRaja Malaysia (PDRM) urung pukul 8.54 pagi tadi bekaul enggau kes orang lenyau ba kandang sungai nya.

Randau keterubah enggau PDRM sereta Opis Bomba enggau Penyah Penusah Malaysia (JBPM) tetemuka penusah nya dipelabaka nyadi entara pukul 3.30 enggau pukul 4 lemai kena 7 Mei 2026 lebuh tudah benung nginti di Sungai Ridan.

Berindik ari ripot ke diterima, tim operasyen ngiga enggau nyelamat (SAR) APM udah dianjung ngagai endur penusah nyadi enggau kerejasama PDRM sereta JBPM bejalaika operasyen ngiga.

Operasyen nyidi berengkah urung pukul 9.14 pagi enggau radius ngiga dua kilometer ari palan penusah nyadi ti ngaul raban ari sekeda ejensi penyelamat.

Urung pukul 10.52 pagi, sekeda perengka tubuh tudah ditemu nyengkaum jari kiba, kaki kiba enggau pala mansa.

Berebak enggau nya, urung pukul 12.14 tengah hari, kaki kanan mansa nadai tumbit ditemu urung tiga kilometer ari palan penusah nyadi sebedau dianjung polis ngagai sepital ngambika atur silik agi dipejalaika.

Pengudah operasyen nya tembu, raban APM Op SAR mulaika diri ngagai PKOD Marudi.

Berebak enggau nya, APM ngelalau mensia mayuh ngambika seruran bejejimat sereta bejejaga lebuh bejalaika aktiviti ba kandang sungai ti dikelala nyadi palan baya sereta seruran ngasika atur piak bekuasa ungkup pengelikun begulai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MIRI, 8 Mei — Sepenyampau 20 iku anak mit ke ada seharitu diintu beserimbai enggau pengerami ngintu Hari Palang Merah Dunya enggau Bulan Sabit Merah nengah penemuai khas ngagai Sepital Miri, lemai tu tadi.

Penemuai nya diatur Bulan Sabit Merah Malaysia Pampang Miri lalu dipenyadi Datin Sri Kong Shui Lin, bini Menteri Perengka Pengangkut Sarawak, Dato Sri Lee Kim Shin.

Program tu diatur dikena ngerami anak mit ke ada ba haribulan pengerami Hari Palang Merah Sedunya enggau Bulan Sabit Merah, kelimpah ari nerenakka semengat sayau enggau pengibuh ngagai bala indai enggau anak mit ke benung nerima perubat ba sepital nya.

Ari penyampau semua anak mit ke ada kena 8 Mei tu tadi, bisi 11 iku anak mit lelaki lalu semilan iku anak mit indu.

Hari Palang Merah enggau Bulan Sabit Merah Sedunya diintu kena 8 Mei ninting taun dikena ngingatka ulang taun pengada pemungkal ‘gerakan kemanusiaan’ antarabansa, Henry Dunant.

Sepital Miri mega ngenataika pengaga ati ngagai Bulan Sabit Merah Malaysia Pampang Miri ketegal penemuai nya.

Sama bisi datai rambau penemuai nya, Direktor Sepital Miri, Dr Jack Wong Siew Yu. – RBI

#newsiban#ruaiberitaiban#beritaiban

Rindu | Titih | Kunsika

KANOWIT, 8 Mei – Pengerami Mantaika Main Asal Kanowit (KCF) ulih dipajakka nyadi pengerami ninting taun ba renggat pelilih menua berindik ari sambut ti chukup ransing diterima ari komuniti menua nya.

Nitihku Menteri Penyerakup, Dato Sri Aaron Ago Dagang, KCF keterubah iya diatur ba pelilih menua tu bisi penau nyadi batang produk dagang temuai Sarawak nengah penyelai budaya bemacham bansa ti dibantaika ba selampur organisasyen iya.

“Pengerami ke diatur pengelama dua minggu tu ukai semina nyadi sebengkah pengerami ke dianti-anti peranak menua Kanowit, tang mega deka matak penatai temuai ari dalam enggau luar menua tu.

“Aku meretika pengerami tu sebengkah aktiviti ti chukup richah sereta seruran dianti semua peranak Pelilih Kanowit.

“Kitai ngarapka program ke bansa tu, nengah kaul media ke luas, ulih nyadi produk dagang temuai ke besai ungkup temuai ke nemuai ngagai Malaysia, kelebih agi Sarawak, ngambika ulih meda penyelai budaya kitai ditu,” ku iya lebuh bejaku ba pengerami bejadika pengerami nya ditu, sehari tu tadi.

Iya ke mega Kaban Parlimen Kanowit madah, opis menteri iya seruran meri perati ngatur program enggau elemen penyerakup laban ulih ngempuruka rayat ari bemacham etnik, jalai pengarap enggau bansa dalam gaya ti lantang.

“Pengerami tu nyata ngayanka komuniti pupu bansa ulih mujur bejalaika bemacham aktiviti ba selampur organisasyen enggau nadai penanggul,” ku iya.

Ku Aaron nambah, pengerami nya mega nyadi pengerami bejadika pengerami Hari Gawai ti deka diintu kena 1 Jun tu ila.

Beserimbai enggau program tu mega bisi nyuaka perais ngagai pemenang Niti Daun Parade 1.0 beserimbai enggau KCF, ke alai Opis Pelajar Pelilih Menua Kanowit (PPD) teulihka gelar champion, lalu ditangkanka Polis DiRaja Malaysia (PDRM) Kanowit ba penuduk lumur dua lalu Balai Bomba enggau Penyah Penusah (BBP) Kanowit ba penuduk lumur tiga.

Sama bisi datai Kaban Kunsil Nengeri (ADUN) Ngemah, Anyi Jana, ADUN Machan, Allan Siden Gramong enggau Pemesai Pelilih Menua Kanowit Cerisologo Sabut. -RBI

#newsiban#ruaiberitaiban#beritaiban

Rindu | Titih | Kunsika