SRI AMAN, 4 Jun – Projek ngaga atap sambung Balai Mensia Mayuh Tapang Lebat ti beungkus RM80,000 ke udah tembu dikearap ulih meri pemaik ke besai ngagai peranak menua nya nengah chara nyendiaka palan ke lebih lantang sereta kondusif ungkup bemacham aktiviti komuniti, rama enggau main asal.

Dikena beratika baru asil projek nya, Kaban Parlimen Sri Aman, Dato Sri Doris Sophia Brodie begulai enggau laki iya sereta staf Palan Servis Kaban Parlimen iya udah nemuai ngagai Tapang Lebat kena 2 Jun tu tadi.

Penemuai nya ngembuan tuju deka nentuka perengka guna ke disediaka ulih dikena enggau penuh ulih komuniti menua nya.

Ba penemuai ke sama, iya enggau raban iya mega bisi nemuai ngagai Rumah Tuai Bana beserimbai enggau pengerami Gawai Dayak kelai meri basa ngagai pesaka asal enggau main asal komuniti menua nya.

Penemuai nya meri awak ngagai iya begulai enggau bala Tuai Rumah Bana, diri sebilik sereta bala temuai ke bisi datai ngerichahka agi pengerami nya.

Sepemanjai penemuai nya ngayanka kaul rat entara bala ketuai enggau komuniti, lalu ari nya ngenegapka semengat begulai sereta beserakup entara peranak ari mayuh macham penatai.

Berebak enggau nya, Dato’ Sri Doris Sophia ngarapka semengat sepenemu, kerejasama enggau pengelantang ti nyadi pelasar penegap komuniti di kandang menua nya deka terus ditegapka dikena nentuka pengelantang, penyulut enggau pemansang ti terus ungkup selampur komuniti.

Iya mega nyemetak madahka pemansang infrastruktur enggau ngenegapka kaul rama meseti bejalai sejalai dikena nentuka pengelantang rayat ulih terus dikemanah sepemanjai maya. – RBI

LUBOK ANTU, 5 Jun — Siku orang tuai bakal pengudah aksiden ba jalai alun di Jalai Krangan Mong, Lubok Antu, ba penusah ke diripot ngagai Raban Penyaga Orang Periman Malaysia (APM) Pelilih Lubok Antu.

Nitihka penerang ari APM Lubok Antu, sida nerima kangau ngenyit bekaul enggau penusah nya sebedau sida ngesah ngagai endur nya bejalaika operasyen meri bantu.

Lebuh datai ba palan nya, raban APM tetemuka tudah gali ba tisi jalai enggau bakal tebuka ba pala enggau bakal ba jari kiba.

Tim APM terus meri perubat keterubah ngagai tudah sebedau iya dibai ngagai Klinik Pengerai Lubok Antu ngambika diperubat enggau silik agi.

APM ngelalau mensia mayuh ngambika seruran ngemeratka pengelikun lebuh nengah jalai alun lalu jampat betanya ngagai piak bekuasa nyema bisi sebarang penusah ngenyit tauka aksiden nyadi.

Operasyen meri bantu bejalai enggau lanchar sereta mujur dipejalaika nitihka prosedur operasyen ti udah ditetapka. – RBI

MERADONG, 4 Jun – Siku lelaki peranak menua tu beumur 41 taun ditan pengudah dipelabaka ngembuan dadah syabu lalu ditemu positif dadah nya nengah peresa nisih ai kemi dalam operasyen ti dipejalaika Unit Tasat Jenayah Narkotik Pelilih Meradong (BSJND).

Ketuai Polis Pelilih Meradong, DSP Tansli Mering, madahka saspek ditan seraban pemesai polis ari Indu Opis Polis Pelilih Meradong (IPD), Bagi Tasat Jenayah ba pengawa ngenyit enggau meresa ba tisi jalai di Kampung Muhibbah, Bintangor, urung pukul 4 lemai kena 3 Jun tu tadi.

Nitihku iya, asil peresa saspek tetemuka sebatang straw ti ngundan repu kristal dipelabaka methamphetamine tauka syabu ti disimpan ba kuchik kanan mua tanchut saspek.

“Udah nya saspek dibai ngagai opis BSJND Meradong ngambika atur silik agi dipejalaika. Asil peresa nisih ai kemi tetemuka saspek positif amphetamine enggau methamphetamine,” ku iya nengah penerang media sehari tu tadi.

DSP Tansli mega madah, pengawa meresa rikod ke udah tetemuka saspek nadai ngembuan sebarang rikod jenayah tauka penyalah bekaul enggau dadah sebedau tu.

Kes dipansik ari baruh Seksyen 12(3) Akta Dadah Berbahaya 1952 ketegal ngembuan dadah enggau Seksyen 15(1)(a) akta ke sama ketegal makai dadah.

Enti dikenuku salah ngereja penyalah ari baruh Seksyen 12(3) Akta Dadah Berbahaya 1952, saspek ulih diukum mata duit nyentuk RM100,000 tauka dijil enda ngelui ari lima taun tauka kededua ukum nya.

Ungkup penyalah ari baruh Seksyen 15(1)(a), pesalah ulih diukum mata duit nyentuk RM5,000 tauka dijil nyentuk dua taun.

Berebak enggau nya, DSP Tansli nyemetak madahka IPD Meradong beratika pengawa salah guna dadah enggau enda belembut ngagai sebarang individu ke bisi kaul enggau pengawa baka nya.

Iya mega minta mensia mayuh terus meri kerejasama ngagai polis nengah chara meri penerang bekaul enggau aktiviti dadah di pelilih Meradong.

Sebarang penerang tau ditanya ngagai Balai Polis Bintangor nengah lumur 084-693222. -RBI

#ruaiberitaiban#newsiban#beritaiban

Rindu | Titih | Kunsika

BETONG, 4 Jun — Pengerami Gawai Dayak Renggat Bagi Menua Betong 2026 deka richah agi enggau penatai bala Duta Miss Petite Continental Malaysia 2025 ti deka nyereta sesi Meet & Greet enggau temuai beserimbai enggau pengawa nya.

Penatai bala duta pekit tu dikearapka nyadi siti ari pematak pengerami nya, lalu enggau nya meri awak ngagai komuniti lokal enggau temuai begulai, begambar sereta bekunsika peneleba dalam gaya ti penuh semengat beserakup.

Kelimpah ari nya, bala temuai mega bepeluang meda Konsert Gawai Kaamatan ti deka diatur muak ke lemai ba Rumah Engkeranji, Layar, Betong.

Konsert tu deka mandangka bemacham pengawa main asal enggau pemerindang ti mandangka penyelai pesaka asal enggau penyelai budaya rayat di Sabah enggau Sarawak.

Pengawa ngatur program tu ukai semina dikena ngerichahka agi pengerami Gawai Dayak, tang mega nyadi pelasar ngerapitka kaul entara komuniti pupu bansa sereta ngelakuka pengaya budaya menua tu ngagai nembiak rebak baru.

Mensia mayuh dipinta datai sama bela ngerichahka agi Pengerami Gawai Dayak Renggat Bagi Menua Betong 2026 sereta ngasaika bemacham aktiviti ti ngerinduka ati ti udah diatur sepemanjai pengawa nya.

Pengerami tu dikearap terus nyadi pelasar penyerakup komuniti setipak enggau semengat Gawai ti ngemeratka ulah begulai, bebaik sereta beterima kasih. – RBI

#ruaiberitaiban#newsiban#beritaiban

Rindu | Titih | Kunsika

Miss Petite Continental Malaysia

BETONG, 4 Jun – Sapit Premier Sarawak, Datuk Amar Douglas Uggah Embas begulai enggau bini iya, Datin Amar Dato Doreen Mayang nampung penemuai Ngabang enggau Gawai Dayak 2026 ngagai beberapa buah rumah panjai ba kandang Ulu Layar, Debak, Ulu Rimbas dan Spaoh, siti pengawa dikena ngerapitka kaul sereta ngelawa komuniti menua pesisir beserimbai enggau pengerami ngintu Hari Gawai Dayak.

Penemuai nya dipunka ba rumah panjai Tuai Rumah Bantan Jerman di Sungai Langit, Ulu Layar, ti meda penatai iya disambut enggau manah peranak menua nya ti penuh enggau pengerami sereta semengat diri sebilik.

Iya udah nya nampung penemuai ngagai rumah panjai Tuai Rumah Steward Empati di Selangking, Ulu Layar. Penatai iya begulai enggau raban iya disambut manah peranak menua nya ti bela ngambi awak begulai enggau ngerami pengerami ngintu Hari Gawai Dayak. Sama bisi datai Kaban Parlimen Betong, Dato Dr Richard Rapu.

Siri ngabang ke nangkanka nya mai iya ngagai rumah panjai Tuai Rumah Denil Ranti di Menyalin Baru, Debak, sebedau nemuai ngagai rumah panjai Tuai Rumah Lembang Liang di Inar, Ulu Rimbas.

Ba tetiap endur, iya ngena awak begulai enggau peranak menua nya sereta mantaika pengaga ati iya ngagai semengat beserakup enggau kerejasama ti majak diterenak dalam komuniti.

Datuk Amar Douglas Uggah mega bisi nemuai ngagai rumah panjai Tuai Rumah Ma’le Ningka di Babu Kerangan, Debak, ke nyadi siti ari palan ngetu dalam program ngabang taun tu.

Penemuai nya meri awak ngagai iya betemu sereta begulai enggau peranak menua nya ti penuh pengerichah.

Di Spaoh, iya enggau raban iya neruska penemuai ngagai rumah panjai Bangkit Rembai Baru.

Penatai raban pengabang disambut enggau manah peranak menua nya ke sama ngintu Gawai dalam rampa ti lantang sereta lantang ati. Sama bisi nyempulang iya mega Dato Dr Richard Rapu.

Nyimpul siri penemuai nya, iya nemuai ngagai rumah panjai Tuai Rumah Ambu Liben di Suri Tengah, Debak, dikena neruska ngabang ti nyadi tradisyen beguna komuniti Dayak ninting kali Hari Gawai Dayak diintu.

Program Ngabang Gawai Dayak 2026 ukai semina nyadi pelasar dikena ngintu pengerami begulai enggau komuniti, tang mega terus nyadi medium ti efektif dalam ngerapitka kaul entara ketuai enggau rayat, kelimpah ari nerenakka semengat beserakup, pemereti ati enggau pengelantang entara komuniti ari bemacham asal penatai di Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Facebook Douglas Uggah Embas

SELANGAU, 4 Jun – Semengat beserakup enggau begulai ti nyadi pugu pengerami Gawai Dayak majak ditegapka nengah siri Program Ngabang Gawai Dayak 2026 ti dipejalaika Kaban Kunsil Nengeri (ADUN) sitak N.59 Tamin, Ir. Christopher Gira Sambang ba sitak DUN Tamin enggau Selangau.

Program ke diatur pengelama empat hari bejurut berengkah ari 1 ngagai 4 Jun tu tadi, kelai iya pansut meri tabi basa ngagai komuniti di rumah panjai, palan pengentap pendiau ketuai komuniti enggau bemacham pengawa komuniti kelai meri terima kasih sereta begulai beserimbai enggau pengerami Gawai Dayak.

Nyerumba program nya, iya nemuai ngagai Rumah Panjai Una Tuai Rumah di Nanga Duat, Rumah Panjai Gerinsa Tuai Rumah di Sungai Sebaya, Rumah Panjai Bansa Penghulu di Dangih Oya, Sekuau, Rumah Panjai Ngalai Asom Penghulu di Sekuau, Rumah Panjai Surang Jala Penghulu Re di Nanga Tajam, Rumah Panjai Julia Penghulu Tachamin di Batu Tajam, Rumah Panjai Julia Penghulu Chamin di Batu Tajam. Dijih, rumah panjai Senator Rita Sarimah Patrick Insol di Dijih, Rumah Panjai Penghulu Busang di Selangau, Rumah Panjai Dato Sidi Penghulu di Bukit Keladan, Jalai Mukah enggau rumah panjai Penghulu Thomas Jawa di Lasu, Pelugau.

Kelimpah ari nya, iya mega ngamatka sekeda tesau tambah ari komuniti menua nya nengah pengawa nemuai ngagai palan pengentap pendiau Tuan Henry Medan di Jalai Stapang enggau Rumah Panjai Tuai Rumah Rantai Ugak di Sekuau.

Dalam penemuai nya, Gira mega bisi ngulu Pengerami Melah Pinang Jeluie di Rumah Panjai Simond Tuai Rumah di Ulu Dijih enggau Pengerami Mangkong Tiang di Rumah Panjai Anthony Amit Tuai Rumah di Sungai Buloh, Selangau.

Taja tusun penemuai udah diatur tumu tang beberapa iti penemuai tambah mujur dipejalaika dikena ngamatka tesau bala komuniti ti deka ngintu Hari Gawai begulai enggau pengari rayat sida.

Nitih ku Gira, Hari Gawai ukai semina kelai pesaka enggau identiti komuniti Dayak, tang mega nyadi pelasar ke pemadu manah dikena ngerapitka kaul entara ketuai enggau rayat.

“Hari Gawai tu maya ke chukup besai reti ngagai kitai begulai nyadi siti ruang bilik ke besai.

“Aku amat beterima kasih ngagai tetiap kangau ke diterima sereta bebendar begulai enggau rayat seagi-agi gaya pekara ngemendarka.

“Tu meh awak ke pemadu manah ninga penemu enggau sada rayat terus sereta ngerapitka agi kaul ke udah lama ditanggam,” ku iya.

Iya nyemetak madah, tradisyen ngabang ke udah diturun ari serak ngagai setiap serak meseti terus ditanka laban nya medium ke beguna dalam nerenakka semengat penyerakup, bebatak asur enggau pengelantang entara komuniti pupu bansa di Sarawak.

Program Ngabang Gawai Dayak 2026 sekali agi ngayanka semengat sepenemu, beserakup enggau begulai ti majak ngerembai entara komuniti di kandang DUN Tamin enggau Selangau, senipak enggau aspirasyen Perintah Sarawak ti deka nentuka pengelantang rayat enggau pengawa ngenegapka pemansang komuniti terus.

Sama bisi nyempulang iya sepemanjai program nya, Senator Rita Sarimah Patrick Insol, Pemesai Opis Pelilih Selangau Yalin Assan, bala penghulu, kaunselor, tuai-tuai rumah sereta mega bala ketuai komuniti enggau ketuai raban bansa kandang menua nya. -RBI

#ruaiberitaiban#newsiban#beritaiban

Rindu | Titih | Kunsika

SIMANGGANG, 4 Jun — Presiden Parti Sa’ati Rayat Sarawak (SUPP), Datuk Amar Prof Dr. Sim Kui Hian nyemetak madahka penegap semengat “Sa’ati”, penyerakup kaban enggau penegap politik Sarawak nyadi batang pekara ti ngasuh parti pemadu tuai di nengeri tu terus mengkang relevan sereta tegap pengudah 67 taun.

Kenu ku iya, pengawa ngintu ulang taun penumbuh SUPP ukai semina nyadi simbolik aja, tang lebih agi ngayanka pejalai panjai pengawa parti ti udah nempuh bemacham pemar enggau penekul kenyau ari penumbuh iya.

“Bala ketuai datai lalu mupuk, tang penegap parti meruan tegap laban kaban iya ngemeratka semengat ‘Sa’ati’ ke udah nyadi pun pengawa SUPP ngelama tu,” ku iya lebuh bejaku ba Pengerami Ngitauka Menira beserimbai enggau Pengerami Ngintu Genap Taun Ke-67 SUPP Pampang Simanggang ditu seharitu tadi.

Iya mega nyemetak madahka penegap politik ke diasaika Sarawak kemaya hari tu udah muka ruang ngagai pengawa beranakka puku ari menua luar sereta ngenegapka penuduk nengeri tu dalam minta hak ari baruh Sempekat Malaysia 1963.

Dr Sim madahka, Sarawak udah berengkah nempa ubah besai sepengudah Gempung Parti Sarawak (GPS) ditumbuhka pengudah pengelabuh Barisan Nasional (BN) ba Pengawa Bepilih Besai Ke-14, lalu GPS ngangkatka menua tu bepelasarka rambai jaku “Sarawak First, Utamakan Sarawak” ke nyadi pekara pemun dalam ngatur menua.

Iya mega ngingatka tanggungpengawa niang Pehin Sri Adenan Satem ti bebendar ngetanka hak Sarawak lalu terus ditampung Premier Sarawak, Datuk Patinggi Tan Sri Abang Abdul Rahman Zohari Openg ti mujur ngengkahka nengeri tu ba rintai mua pemansang kuasa tau dikena baru enggau ekonomi digital.

Dulu agi ari nya, Dr Sim udah bejadika pengawa ngitauk menira parti “Sa’ati”, ti nyadi pengerami ngintu genap 67 taun SUPP di Simanggang.

Pengerami nya dipunka enggau pengawa ngitauka Jalur Gemilang ari Chairman SUPP Pampang Simanggang, Datuk Francis Harden Hollis lalu ditangkan enggau pengawa ngitang tambai Menua Sarawak ari Chairman Indu SUPP Pusat, Kho Teck Wan.

Pengudah tembu pengerami nya, urung 500 iku kaban SUPP ari pampang Simanggang, Pantu, Lingga enggau Engkilili nyebut rambai jaku “Sa’ati” tiga kali, betuaika presiden parti nya empu nyadika kelai penaluk enggau semengat gawa ungkup rayat.

Dulu agi, dalam jaku pengelalu Datuk Francis Harden ngenataika pengaga ati iya ngagai semua kaban parti ke bisi datai sereta terus meri sukung ke tegap ngagai pengawa SUPP di kandang menua Sri Aman.

Pengerami nya mega dirichah enggau pengawa nyuaka chek Projek Mit Menua Pesisir (MRP) ari Francis Harden ngagai 28 bengkah gerempung ba sitak DUN N.32 Simanggang ti ngaul penyampau agih belanja sepenyampau RM89,000.

Sama bisi datai Chairman SUPP Pampang Pantu Kapitan Liew Shan Boo, Chairman SUPP Pampang Lingga Waterkiller James Junit, Chairman Raban Nembiak SUPP Pampang Simanggang Wong Yii Hong, Chairman Indu SUPP Pampang Simanggang Kapitan Ling Siew Hung, Chairman Indu Parti Sa’ati Rayat Sarawak (SUPP) Pampang Lingga Lansing Bansi enggau Chairman SUPP Pampang Engkilili Kua Jack Seng. – RBI

Dr Sim Kui Hian

#ruaiberitaiban#newsiban#beritaiban

Rindu | Titih | Kunsika

KUCHING, 4 Jun – Opis Kereja Raya (JKR) Sarawak nyangkal jaku viral ti madahka Jematan Batang Lupar 1 deka ditutup baru ngagai penguna jalai alun berengkah 7 Jun 2026.

Nitihka penerang ari JKR Sarawak, penerang ti dikerembaika ba media rama nya enda amat lalu jematan nya deka terus dibuka ungkup guna mensia mayuh baka selama.

Taja pia, JKR madahka agi bisi sekeda kereja mit benung dipejalaika ba kandang ngelingi jematan dikena nembuka perengka guna sereta nentuka sukut pengelikun ba tikas ke pemadu manah.

Berindik enggau nya, penguna jalai alun dilalau ngambika seruran nitihka atur pengelikun enggau papan tanda ke udah disedia lebuh nengah kandang endur nya.

Mensia mayuh mega dipinta ngulihka penerang ke tulin semina nengah jalai komunikasyen rasmi JKR Sarawak dikena nyeliahka saru penemu ketegal pengerembai penerang ke enda betul.

JKR Sarawak mega ngingatka penguna ngambika enda arapka sebarang penerang ti enda dientaska, kelebih agi ti ngaul perengka guna infrastruktur mensia mayuh enggau pengelikun penguna jalai alun. – RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 4 Jun — Kaul rat entara Malaysia enggau Jipun ke udah lama ditempa meseti terus ditegap bepelasarka pengandal, integriti enggau bebasaka pangan diri dikena nentuka kerejasama strategik entara kededua menua tu terus ngerembai sereta meri pemaik ngagai rebak dudi hari.

Sapit Menteri Besai, Datuk Seri Fadillah Yusof madah, kaul ti meruan entara menua enda ulih semina bepanggai ba sempekat tauka kunterik aja, tang lebih agi meseti disukung enggau pengarap ti tegap entara semua piak.

Nitih ku iya, kunterik nyangka ulih ngetanka kerejasama, tang pengarap nyadi batang pekara ti nentuka kaul nya mengkang meruan sereta terus ngerembai dalam timpuh ke panjai.

Iya madah munyi nya lebuh ngenataika jaku kunsi lalu udah nya bejadika Forum Undang-undang enggau Dagang Malaysia–Jipun 2026 enggau pengawa ngelancharka kerejasama strategik entara RDS Advocates & Solicitors enggau Anderson Mori & Tomotsune ditu sehari tu.

Forum tu ngempuruka bala ketuai industri, komuniti dagang enggau pemekuh undang-undang ari Malaysia enggau Jipun berandauka bemacham peluang kerejasama ti bisi potensial ngenegapka kaul ekonomi, dagang enggau beranakka puku entara kededua menua.

Dalam jaku iya, Fadillah mega nyemetak madahka Jipun mengkang nyadi sebagi ari kaban strategik Malaysia ke pemadu beguna kenyau ari pengawa bejalaika Polisi Pandang Ke Timur, enggau pemeri ke besai ukai semina dalam tukuh beranakka puku enggau pemindah teknologi, tang mega nengah pengawa nanam nilai disiplin, inovasyen enggau komitmen timpuh panjai ke udah mantu pemansang menua nya.

Ku iya, dalam dunya ti betapi enggau geopolitik ti enda tentu, pemar rentayan bekal global, transisyen kuasa enggau transformasyen digital ti jampat, Malaysia tetap komited nyendiaka rampa dagang ti entap, terang sereta mesra pemeranak puku.

“Perintah MADANI deka terus ngenegapka daya besemekih menua nengah atur pengawa ti manah, pengelantang bejalaika pengawa dagang enggau pemansang ekonomi ti inklusif sereta meruan,” ku iya.

Berebak enggau nya, iya meda potensial besai dikena ngerembaika kerejasama Malaysia-Jepun dalam sektor strategik nyengkaum kuasa tau dikena baru, teknologi gadung, pemintar tiru (AI), infrastruktur digital enggau pengawa ngaga barang beteknologi tinggi.

Lebuh nyimpul jaku iya, Fadillah mantaika pengandal iya jemah ila deka lebih manah ngagai menua enggau gerempung ti berani nempa pengarap, ngenegapka kerejasama sereta nyingkang ke mua enggau chara kolektif ari ti semina meri reaksyen ngagai ubah.

Iya ngarapka kaul rat entara Malaysia enggau Jipun deka terus ditegapka agi dikena nempa pengelantang ti meruan agi, tan sereta meri penguntung ngagai rayat kededua menua ungkup rebak dudi. – RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 4 Jun – Dua bengkah tanah berenyang ti lemi diripotka nyadi di Sabah enggau Sarawak kena 2 Jun tu tadi, enggau getar diasai ba sekeda endur besemak enggau palan penusah nyadi, nitihka penerang ari Opis Meteorologi Malaysia (MET Malaysia).

Ketuai Direktor MET Malaysia, Dr Mohd Hisham Mohd Anip madah, tanah berenyang keterubah enggau magnitud 2.9 nyadi di Ranau, Sabah pukul 10.36 pagi enggau penalam 10 kilometer.

Nitihku iya, tanah berenyang nya bepalan ba latitud 6.07 darjah Utara enggau longitud 116.58 darjah Timur, seraya tanah berenyang mega diasaika ba sekeda kandang endur ngelingi Kundasang, Ranau enggau Kota Belud.

Ba hari ke sama, siti agi tanah berenyang lemi enggau magnitud 2.9 enggau penalam 10 kilometer dirikod ba kandang menua Mambong, Sarawak urung pukul 10.33 malam.

Tanah berenyang nya bepalan ba latitud 1.32 darjah Utara enggau longitud 110.39 darjah Timur, enggau getar mega diripotka diasaika ba sekeda kandang endur ngelingi Samarahan enggau Serian.

Taja pia, MET Malaysia nerangka mensia mayuh enda ibuh irau laban kededua tanah berenyang nya ngembuan magnitud ti lemi sereta enda ngeruga pengelikun mensia mayuh.

Ku iya, piak iya deka terus matau gaya menua tu lalu deka ngeluarka gerah ari setiap maya enti bisi pengerambai baru nyadi.

Mensia mayuh dilalau ngulihka penerang ke tulin pasal gaya hari enggau tanah berenyang nengah aplikasyen myCuaca, laman web rasmi enggau saluran media rama rasmi MET Malaysia, kelimpah ari betanya ngagai Talian Hotline 1300-22-1638 ungkup tanya ke silik agi. – RBI

#ruaiberitaiban#newsiban#beritaiban

Rindu | Titih | Kunsika