KUCHING, 21 Jun – Pengerami Ngiling Bidai ke nyadi kelai nutup musin pengerami Gawai udah mujur diatur raban Terabai Menua Pampang Kuching ba Dewan DBNA, Kuching, malam Hari Enam tu tadi.

Pengerami tu ngempuruka kaban serakup, temuai dipebasa, temuai enggau raban dalam gaya ti penuh enggau pemanah ati, lalu enggau nya ngerapitka kaul komuniti seraya ngetanka adat pesaka enggau main asal komuniti.

Pengerami ke berengkah urung pukul 6.30 lemai nya diisi enggau mayuh macham pengawa nyengkaum penatai temuai dipebasa, macha sampi, belagu Lagu Kebangsaan enggau Lagu Menua sereta mega pengawa pemerindang bejadi.

Bela nyuraka pengerami nya, jaku pengelalu ari Chairman Terabai Menua Pampang Kuching, jaku ari pengari Gerempung HQ Terabai Menua, mandangka ‘slideshow’ enggau pengerami makai lemai ti nyadi ruang dikena ngerapitka kaul entara kaban enggau temuai.

Pengerami nya mega nyadi saksi pengawa nyuaka tepa pengingat enggau setipikit basa kelai meri basa ngagai sida ke udah nyaup ngemujurka program nya.

Pengerami ditambah enggau pengawa pemerindang rasmi ari DVFM Live Band & 2 Man’s Show kelimpah ari penatai artis temuai Eisner Nala ti merindang bala mayuh sepemanjai malam sebedau tembu enggau sesi begambar begulai.

Nengah rambai jaku “Bersama Kita Erat, Budaya Dijulang, Warisan Dipelihara”, pengawa tu mandangka pengangkun Terabai Menua nentuka adat enggau main asal komuniti nya terus diintu sereta dipeturun ngagai rebak dudi hari. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 21 Jun – Pengerami ngintu Hari Gawai Dayak Renggat Sarawak 2026 majak dirichah enggau pengawa ngatur program bejalai “Niti Daun” ti ngempuruka bemacham etnik Dayak ari serata Sarawak dalam gaya ti penuh enggau chura, penyerakup enggau semengat begulai.

Nitihku Sapit Premier Sarawak, Datuk Amar Prof Dr Sim Kui Hian, pengawa bejalai nya siti ari pengerami Gawai lebuh komuniti Dayak nyengkaum bansa Iban, Bidayuh, Orang Ulu enggau bemacham bansa bukai begempung mantaika penyelai budaya diri empu nengah pekayan asal, muzik enggau pemerindang budaya semua peranak Sarawak ngambika ulih dikunsika.

Ku iya, sepenyampau 114 kontinjen ari serata menua Sarawak ngambi bagi ba pengawa nya ti dipenyadika enggau rasmi sereta betuaika Premier Sarawak, Datuk Patinggi Tan Sri Abang Johari Tun Openg.

“Pengawa bejalai tu mandangka semengat ke bendar nempa bansa Sarawak bepelasarka penyerakup, solidariti enggau bebasaka pangan diri entara komuniti pupu bansa,” ku iya.

Berebak enggau nya, iya meri besai terima kasih ngagai komuniti Iban ke nyadi pengatur besai Hari Gawai Dayak 2026 ketegal komitmen enggau pengawa sida bebulan-bulan ngemujurka kesemua pengerami nya, ke diatu nyau deka tembu enggau semina tinggal siti agi pengerami makai lemai rasmi.

Datuk Amar Prof Dr Sim mega ngenataika pengaga ati ngagai semua pemenang enggau selampur kontinjen ti ngambi bagi ketegal komitmen tinggi mandangka pekayan asal ti pemadu manah sereta ngias perengka pengangkut bebaris taja pan gaya hari ti mayuh pemar.

“Enti taun nyin tadi pengerami nya diatur dalam ujan, sekali tu bala penyereta napi gaya hari ke balat angat, tang semengat ke dipandangka semua kontinjen nya nyelai,” ku iya.

Iya nerangka penyereta ke mayuh ari mayuh bengkah gerempung, raban main asal enggau komuniti ari serata Sarawak nyadika chunto ke nyata penegap identiti enggau pesaka main asal nengeri tu ti terus dijaga sereta diintu begulai. – RBI

#ruaiberitaiban#newsiban#beritaiban

Rindu | Titih | Kunsika

KAPIT, 21 Jun – Program Ngiling Bidai ukai semina ngelaika pengujung pengerami Gawai Dayak aja, tang mega nyadi pelasar beguna dikena ngerapitka kaul diri sebilik, nerenakka penyerakup komuniti sereta nerenakka semengat pengibuh ba komuniti.

Menteri Kereja Raya, Dato Seri Alexander Nanta Linggi madah, Pengerami Ngiling Bidai nyadi siti kenang ti mai reti dalam komuniti begulai beterima kasih ngagai berekat enggau jereki ti diasaika sepemanjai taun, kelimpah ari ngerami rega begulai ti nyadi penegap pugu komuniti Sarawak.

Nitihku iya, program Ngiling Bidai ti diatur begulai enggau Gerempung Pengimport enggau Pengeluar Perengka Pengangkut Melayu Malaysia (PEKEMA) Sarawak mega dirichah enggau pengawa nyuaka pemeri ngagai raban ti begunaka bantu, lalu enggau nya mandangka semengat besaup pangan diri ti patut ditegapka agi.

“Ba aku, tu meh reti ke bendar sesebengkah pengerami. Iya ukai semina bekaul enggau adat enggau main asal aja, tang mega bekaul enggau pengibuh ngagai kaban mensia.

“Tetiap pemeri ke diberi nyangka dipeda mit, tang ngagai penerima, iya mai reti ke besai sereta bisi pengelantang mimit dalam pengidup sida ninting hari,” ku iya.

Iya mega meri besai terima kasih ngagai PEKEMA Sarawak ti seruran komited dalam bejalaika tanggungpengawa rama korporat (CSR) sereta ngemeranka pengawa mantu komuniti nengah mayuh macham inisiatif pengelantang pendiau.

Ku iya, komuniti dagang baka PEKEMA nyata ngayanka pemujur ekonomi ukai semina disukat nengah penguntung aja, tang mega ulih disalin ngagai servis pengasih enggau pemeri ti meri penguntung ngagai rayat.

Berebak enggau nya, Nanta madahka Sarawak chukup betuah laban ngembuan ketuai ti seruran ngemeratka pemansang ekonomi enggau pengelantang rayat, lalu enggau nya nempa gaya ti entap sereta kondusif ungkup penumbuh nengeri tu.

Iya andal kerejasama rat entara perintah, sektor peribit enggau komuniti ulih ngenegapka ekonomi Sarawak sereta nentuka asil pemansang ulih diasaika rayat enggau komprehensif agi.

“Lebuh perintah, sektor peribit enggau komuniti mindah begulai, kitai ukai semina ulih nempa ekonomi ti lebih lantang, tang mega nentuka mayuh agi orang bulih penguntung ari penyulut ti dijapai,” ku iya. – RBI

#ruaiberitaiban#newsiban#beritaiban

Rindu | Titih | Kunsika

MERADONG, 20 Jun – Siku indu peranak menua tu beumur 30 taun ditan tim Pasukan Petugas Indu Opis Polis Pelilih (IPD) Meradong pengudah ditemu positif dadah dalam operasyen khas Ops Tapis.

Ketuai Polis Pelilih Meradong, DSP Tansli Mering madah, saspek ditan urung pukul 9.15 malam kena 18 Jun tu tadi ba kandang pelilih Bintangor ketegal dipelabaka bisi kaul enggau aktiviti salah guna dadah sebedau dibai ngagai IPD Meradong ngambika atur silik agi dipejalaika.

Nitihku iya, asil pengawa meresa ai kemi keterubah ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka saspek positif amphetamine enggau methamphetamine.

“Meresa baru rikod ke udah tetemuka saspek nadai ngembuan sebarang rikod jenayah sebedau tu tauka penyalah bekaul enggau dadah,” ku iya ba sebengkah penerang.

Ku iya, kes nya dipansik nengah Seksyen 15(1)(a) Akta Dadah Berbahaya 1952 ketegal salah guna dadah ti tau mai penusah ngagai tubuh diri empu.

Enti ditemu salah, saspek ulih diukum enda ngelui ari RM5,000 tauka dijil nyentuk dua taun.

Berebak enggau nya, DSP Tansli nyemetak madahka polis beratika penyalah bekaul enggau dadah enggau berat sereta enda belembut enggau sebarang individu ke bisi kaul enggau pengawa baka nya.

Berindik enggau nya, mensia mayuh ke bisi penerang bekaul enggau aktiviti salah guna dadah di pelilih Meradong dipinta ngenataika penerang ngagai polis nengah chara betanya ngagai Balai Polis Bintangor ba lumur 084-693222 dikena mantu pengawa ngemuntanka penyalah dadah di kandang menua nya. – RBI

#ruaiberitaiban#newsiban#beritaiban

Rindu | Titih | Kunsika

BALAI RINGIN, 20 Jun – Gerempung Main Asal Dayak Sarawak (PEMADAS) begulai enggau Dayak Bukit Kelingkang (DBK) Pampang Melikin udah ngerikod pemujur ti ngemegah ati nyereta Hari Seni enggau Main Asal Gawai Dayak Balai Ringin 2026, lalu enggau nya meri basa ngagai nama gerempung nya ba renggat nengeri enggau raban bansa Dayak.

Ba pekit nya, PEMADAS mujur bulih Lumur Dua ba kategori Ngajat Pekit nengah pemerindang Ngajat Ngelalu Temuai, lalu DBK Pampang Melikin teulihka penuduk lumur tiga nengah pemerindang Ajat Batang Rajang.

Ungkup kategori Solo Ngajat, kededua serakup nya mega ngerikod pemujur ke nyulut enggau pemutus champion Solo Lelaki, Penuduk Dua Solo Lelaki enggau Penuduk Dua Solo Indu.

Pengajar Ngajat Korea Musit madahka pemujur tu mandangka tikas komitmen, disiplin enggau pengangkun ati ti tinggi ba bala penyereta ngagai seni main asal komuniti Dayak, iya nya pesaka asal ti patut dijaga sereta dikemeran.

“Pengawa ti enda ngetu ari bala jurulatih, penyereta enggau penyukung mega nyadi faktor ti beguna dikena nentuka pengawa pemerindang nyapai tikas ti ngemegahka ati sepemanjai pekit,” ku iya.

PEMADAS enggau DBK Pampang Melikin ba penerang begulai ngenataika pengaga ati ke pemadu tinggi ngagai semua piak ke bisi kaul sereta ngemeratka komitmen sida deka terus ngenegapka seni enggau budaya Dayak ngambika seruran relevan sereta dipeturun ngagai rebak dudi hari.

Pemujur tu dikearap ulih nyadi pematak ngagai nembiak rebak baru terus ngangkatka maruah adat, budaya enggau identiti komuniti Dayak di Sarawak.

Chairman PEMADAS Ali Singka ba penerang iya ngenataika pengaga ati ngagai bala ka udah bulih penuduk dalam pekit ngajat ba Balai Ringin.

“Baka bala ke enda bulih penuduk,anang putus pengarap.Semua bala kita udah ngaga naka pemanah peda aku” ku iya.

Ali Singka meri besai terima kasih ngagai bala apai Indai nyukung pengawa bala anak kitai dayak.

“Ditu mega aku meri besai terima kasih ngagai bala ke udah enggau aku Niti daun 2026. Aku ngarap ka bala kitai sama begerempung ngatur pengawa ke baka tu.

“Anang malu ngaku diri empu Anak Dayak. Enti ukai kitai sapa agi. Enti enda diatu kemaya agi” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 20 Jun — Pengawa Bejalai Niti Daun beserimbai enggau Pengerami Gawai Dayak Sarawak 2026 ukai semina nyadi panggau endur mandangka pengaya pesaka asal komuniti Dayak, tang mega meri pangka ngagai pengawa ngenegapka penyerakup enggau pengelantang rayat Malaysia.

Sapit Premier Sarawak, Datuk Amar Douglas Uggah Embas madah, penyereta 114 tim ke mungkur 99 kontinjen enggau 15 buah perengka pengangkut ke diias enggau main asal nyata ngayanka komitmen komuniti Dayak ari serata Sarawak dalam ngetan sereta mantaika identiti budaya enggau pesaka asal sida empu.

Nitihku iya, edisyen tu mega meda penyereta beberapa pupu raban bansa ke jarang dikemeratka baka Remun enggau Tagal, lalu enggau nya meri awak ngagai rayat Malaysia ngelala penyelai budaya ke bisi ditemu di Sarawak.

“Kitai mandangka baka ni bansa Dayak ti ditumbuhka ari bemacham etnik ari serata Sarawak begempung sereta bekerejasama ngemujurka program tu.

“Sida tu datai ari kandang menua ke jauh baka Lawas enggau Miri lalu sanggup ngelimpangka awak mantaika main asal asal diri empu.

“Tu mai reti ke besai ngagai komuniti Malaysia,” ku iya lebuh dikerandau media pengudah pengawa bejalai Niti Daun di Kuching Waterfront sehari tu tadi.

Ku iya, perintah Sarawak ngarapka rayat Malaysia terus beterima kasihka pemeri komuniti Dayak dalam ngenegapka penyerakup, pengelantang enggau pengelikun menua nengah pengawa nyaga pesaka asal ti diturun ari setiap serak.

Berebak enggau nya, Kampung Gumbang mansutka diri nyadi champian ba kategori Perengka Pengangkut Hias Budaya Pemadu Manah ba Pekit Niti Daun 2026.

Ungkup kategori Kontinjen Orang Ulu Pemadu Manah, gelar champian diempu Serakup Indu Kayan Sarawak, lalu Gerempung Bidayuh Nasional (DBNA) Pampang Samarahan dipadu nyadi champian Kontinjen Bidayuh Pemadu Manah.

Kelab Nembiak Warisan Kreatif Taman Samarindah mega bulih gelar champian kategori Kontinjen Iban Pemadu Manah.

Pengawa ngatur Niti Daun ti nyadi sebengkah ari batang pengerami Pengerami Gawai Dayak Sarawak ninting taun terus mandangka pengaya budaya komuniti Dayak enggau semengat begulai ti nyadi pelasar pengelantang komuniti pupu bansa di nengeri tu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MIRI, 20 Jun — Pengawa bejalaika Projek Jalai 3M2L (Miri–Marudi–Mulu enggau Long Panai–Long Lama) enggau Projek Jalai Penyambung Sarawak-Sabah (SSLR) dikearap nyadi pematak besai ngagai pemansang sosio-ekonomi di kandang menua Baram enggau utara Sarawak.

Nitihka penerang ke dikunsi nengah Facebook Angel Kelly, pemansang projek nya ke udah lama dianti peranak Baram mandangka penyulut ke chukup meransang sereta disadang tembu nitihka timpuh ungkup pemaik komuniti di serata kandang menua Miri, Marudi, Mulu enggau Long Lama.

Projek 3M2L ti dipelaba beungkus urung RM3.8 bilion mungkur pengawa ngaga lebih 140 kilometer jalai baru, beberapa jematan besai enggau rentayan jalai ti nyambung Miri, Marudi, Mulu, Long Panai enggau Long Lama.

Enti udah tembu penuh ila, projek nya dikearapka ulih nyendiaka rentayan perengka pengangkut ti lebih lantang, likun sereta efisyen ungkup peranak menua tu, lalu ari nya ulih ngurangka timpuh pejalai entara Miri, Marudi enggau Mulu sereta ngemudahka pemindah peranak, temuai enggau aktiviti dagang.

Penerang nya mega bisi nyebut akses ke manah agi ngagai palan dagang temuai ke tebilang baka Taman Negara Gunung Mulu dikearap ulih nyungkak agi sektor dagang temuai ba kandang menua nya.

Berebak enggau nya, Projek Jalai Penyambung Sarawak-Sabah (SSLR) ti nyambung Sarawak enggau Sabah nengah kandang menua ulu mega bejalaika tanggungpengawa ti beguna dalam ngenegapka rentayan jalai alun, kelimpah ari muka peluang baru dalam sektor dagang, beranakka puku enggau pemansang komuniti menua pesisir.

Perengka guna infrastruktur ke manah agi mega dikearapka ulih nambahka aktiviti ekonomi peranak menua tu, kelebih agi dalam sektor betanam betupi, kebun dandang besai, dagang temuai enggau dagang mit enggau jelan pemesai (PKS).

Kelimpah ari nya, akses ke muntang agi ngagai makit deka ngemendarka asil betanam betupi enggau produk menua tu ulih dipasar enggau lebih efisyen sereta ngena ungkus ke baruh agi.

Nitihka penerang nya, penguntung pemadu besai ke deka diasaika komuniti Baram iya nya pemanah kualiti pengidup nengah akses ke manah agi ngagai pelajar, servis pengerai, perengka guna perintah enggau peluang gawa ke lebih luas.

Pengawa bejalaika kededua projek strategik nya mandangka komitmen Perintah Sarawak ti terus nentuka pemansang ti lebih setimbang sereta inklusif, kelebih agi di menua pesisir enggau kandang menua ulu ti nyadi kedap ti beguna amat ba penyulut nengeri tu.

Nengah pengawa bejalaika Projek 3M2L enggau SSLR, Baram diatu ba jalai ke tegap deka mansutka diri nyadi siti ari kandang endur penumbuh strategik baru di Sarawak. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 19 Jun – Kejiranan Mesra (KJM) Santubong terus komited ngenegapka komuniti menua nya nengah pengawa ngatur program “Nelusur Pantai, Nelusur Pesaka enggau Ngiga Reta Bumi Sarawak enggau bejalai belubah udah nyadi bedau lama ke udah.

Program nya diatur nyadi sebengkah ari inisiatif nerenakka gaya pengidup bepengerai seraya ngangkatka penyedar komuniti senentang pemesai guna ngintu pesaka sejarah, budaya enggau asal ke ditemu ba kandang menua Santubong.

Nengah aktiviti bejalai belubah tauka ‘briskwalk’ nya, bala penyereta bepeluang mansik palan besejarah ngelingi Kampung Santubong sereta mansik enggau silik penyelai pesaka asal menua nya ke nyadi kelai sereta temegah ati komuniti menua nya.

Kelimpah ari meri penerang ngagai rega sejarah enggau reta tengkira asal, program tu mega meransang pengawa rekreasyen ti bepengerai ba peranak, lalu enggau nya nyukung pengawa nempa komuniti ti regas sereta lantang.

Program tu mega nyadi pelasar dikena ngerapitka kaul, nerenakka semengat besemak sereta nanam asai tanggungpengawa bekunsi dalam pengawa ngintu pesaka asal enggau rampa menua ungkup rebak dudi hari.

Program tu dipejalaika nengah kerejasama Komiti Pemansang enggau Pengelikun Genturung Pendiau (JKKK), Amanah Ikhtiar Malaysia (AIM), Biro Indu enggau Gerempung Indai Tunggal Santubong (PITSA) ti bekerejasama ngemujurka aktiviti ti meri empas positif ngagai komuniti.

KJM Santubong ngarapka pengawa ngatur program baka tu ulih dipajakka jemah ila dikena ngangkatka gaya pengidup bepengerai, ngenegapka penyerakup komuniti sereta ngelakuka pemanah rampa menua asal enggau pesaka sejarah Santubong ngagai komuniti ke lebih besai. -RBI

#ruaiberitaiban#newsiban#beritaiban

Rindu | Titih | Kunsika

SARATOK, 19 Jun – Raban orang ti rinduka pengawa nyumpit asal ari serata Sarawak ditesau nyereta Pekit Nyumpit Tebuka Sarawak Beserimbai enggau Pengerami Ngiling Bidai 2026 Pelilih Saratok ti diperambu deka diatur kena 4 Julai 2026 ba Dewan Tebuka Saratok.

Pekit ti berambaika leka jaku “Mujur Mansang Segulai Sejalai” deka berengkah tumu pukul 8.00 pagi lalu dikearapka ulih ngempuruka penyereta bemacham renggat umur dikena ngangkat sereta negika pesaka asal komuniti Dayak, kelebih agi seni nyumpit ti nyadi kelai pengelandik asal ti diturunka serak ngagai serak ke baru.

Pengatur udah nyendiaka kategori indu tunggal ti ngaul penyauh 40 kaki, 50 kaki enggau 60 kaki, lalu kategori lelaki tunggal deka dipekitka ba penyauh 70 kaki, 80 kaki enggau 90 kaki.

Dikena nambahka pengeransing pengerami tu, piak pengatur bisi meri perais dalam tukuh trofi, midul enggau mata duit ngagai pemenang.

Champion ungkup kedua-dua kategori lelaki enggau indu deka mai pulai perais mata duit RM400 enggau trofi, lalu lumur dua deka nerima perais mata duit RM300 enggau trofi, lalu lumur tiga deka nerima perais mata duit RM200 enggau trofi.

Penyereta ke bulih lumur empat ngagai lima deka nerima perais mata duit RM30 enggau midul, lalu sida ke bulih lumur enam ngagai sepuluh deka nerima perais mata duit RM20 enggau midul.

Bayar masuk pekit ditetapka RM30 siku, enggau semua kategori dipejalaika dalam siti renggat aja lalu pemekit ke bulih puin ke pemadu tinggi deka dichiri nyadi pemenang.

Mensia mayuh ke bisi ati deka nyereta pekit tu tau ngulihka penerang silik nengah lumur CR Julius ba lumur 019-8553734 tauka Augustine Duncan ba lumur 014-5911191.

Pekit tu ukai semina betuju deka nyerungkai penau baru dalam main asal nyumpit, tang mega nyadi pelasar dikena ngenegapka penyerakup komuniti sereta ngetanka pesaka main asal Sarawak ngambika seruran relevan sereta dikerinduka rebak dudi hari. – RBI

#ruaiberitaiban#newsiban#beritaiban

Rindu | Titih | Kunsika

PASIR MAS, 19 Jun — Raban Pertahanan Awam Malaysia (APM) Pasir Mas mujur nangkap siku ular sawa batik ti ngembuan pemerat urung 15 kilogram enggau pemanjai 2.5 meter dalam operasyen khas di Kampung Chetok, ditu, pagi kemari.

Nitihka penerang operasyen, APM nerima kangau ngenyit ari TMRC sebedau tim empat iku raban dianjung ngagai endur nya ngena ambulans pacuan empat roda (CD215).

Operasyen ti diklasifikasyen ari baruh kes KMU-CD706 berengkah pukul 8.26 pagi lalu mujur tembu urung pukul 9.06 pagi.

Asil ari pengawa jampat raban ke bisi kaul, siku ular sawa batik mujur ditangkap enggau likun nadai sebarang penusah ke enda manah nyadi.

Kes nya dientaska udah mujur diputarka, lalu enggau nya ulih nyeliahka sebarang penusah ke tau ngeruga pengelikun peranak menua nya.

APM mega ngelalau mensia mayuh ngambika lengkas betanya ngagai piak bekuasa enti sema sida betemu enggau jelu bisa tauka jelu siga ke bisi potensial tau mai penusah, kelimpah ari nyeliahka sebarang pengawa ke tau ngeruga pengelikun diri empu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika