SIBU, 19 Jun — Semangat beserakup, begulai enggau sepenemu entara komuniti majak ditegapka beserimbai enggau pengerami Gawai Dayak 2026 di Rumah Lawrence Radin, Sungai Pasai Bon, Sibu baru-baru tu tadi.
Tuai Rumah Lawrence Radin ba sebengkah penerang iya ngenataika pengaga ati enggau terima kasih ngagai semua sida sebilik, kaban belayan enggau temuai ti udah ngelimpangka diri nemuai ngagai rumah panjai nya nyerumba pengerami Gawai taun tu.
Kenu ku iya, penatai bala temuai ukai semina ngerichahka agi pengerami, tang mega ngenegapka kaul diri menyadi enggau semengat begulai ti nyadi tiang pemun pengelantang komuniti rumah panjai.
Iya mega besampi ngambika semua peranak Rumah Lawrence Radin seruran diberekat enggau pengerai ti manah, umur panjai, jereki ti belimpah sereta belimpah berekat enggau tuah dalam tetiap pengawa ti dipejalaika sida.
“Arapka semua bala anak seruran diau dalam pemaik, pengelantang enggau pengelantang sereta terus ngasaika penyenang enggau penyulut dalam ngemansangka genturung pendiau enggau kandang menua sida,” ku iya.
Berebak enggau nya, iya nyemetak madahka nilai begulai enggau semengat “Segulai Sejalai Sepenemuh” meseti terus ditan nyadi pelasar penegap komuniti dalam napi pemar kemaya hari sereta nentuka pesaka budaya enggau adat dijaga ungkup rebak dudi hari.
Iya mega ngenataika jaku asal bansa Iban “Entuchung baka bukit, ngebong baka langit, tampak baka pulau, lelinang baka danau, gayu guru gerai nyamai lantang senang nguan menua” ti mai reti ngarapka komuniti seruran tegap, mansang sereta ngasaika pengidup ti likun, lantang sereta lantang.
Ku iya, semengat beserakup sereta bebasaka pangan diri ti nyadi teras pengidup komuniti rumah panjai meseti terus diterenak ngambika ulih nentuka pengelantang begulai.
“Segulai Sejalai Sepenemuh,” ku iya nyemetak. — RBI
#Beritalban | Ruai Berita Iban
Rinduka | Titihka | Kunsika
