BETONG, 19 Jun – Bala indu ti bisi ati bepekit dipinta nyereta Pekit Ratu Kebaya Indai Urang beserimbai enggau pengerami Ngiling Tikai Gawai Dayak 2026 renggat Bagi Menua Betong ti diperambu deka diatur kena 4 Julai 2026 tu.
Program nya deka diatur urung pukul 6.30 lemai ba Dewan SJKC Min Syn Saratok lalu disadang nyadi siti ari pengerami ti ngerindang pengerami nutup musim Gawai di sitak nya.
Pengatur pengawa madahka pekit tu tebuka ngagai raban indu ke beumur 25 taun ke atas ke nyadi indai orang iya nya indu ke udah belak sereta ngembuan status indai.
Penyereta mega khas ungkup peranak kandang menua Betong, Saratok enggau Kabong sereta mega peranak menua Malaysia.
Penyereta dipinta ngena baju kebaya tradisional tauka moden enggau gamal ti bebasa, kemas sereta ngayanka identiti budaya. Setiap iku penyereta mega diberi ruang endur ngaga sesi bejalai enggau sesi mantaika diri.
Ari sukut perais, pemenang lumur satu deka mai pulai perais mata duit RM1,000, lalu lumur dua nerima perais mata duit RM700 enggau lumur tiga RM500.
Kelimpah ari nya, tujuh perais sagu ati beungkus RM100 siku mega deka disediaka.
Bala pengatur mega udah netapka penyereta semina ungkup 10 iku penyereta keterubah, lalu pemenang edisyen pekit ke udah enda dikemendarka ngambi bagi baru.
Haribulan penutup ngambi bagi ditetapka kena 1 Julai 2026 tauka tumu agi enti penyampau letak tubuh ngambi bagi udah dijapai.
Mensia mayuh ti bisi ati tau betanya ngagai sekretariat pekit ngambika nemu penerang silik sereta ngerejista diri. -RBI
#ruaiberitaiban#newsiban#beritaiban
Rindu | Titih | Kunsika
