BAKUN, 19 Jun – Kerejasama strategik entara Opis Menteri Pengerai Malaysia (KKM) enggau Sarawak Energy Berhad (SEB) ba pengawa ngaga Klinik Pengerai Bakun-Murum nyadi siti singkang ke besai dalam ngenegapka akses ngagai servis pengerai ke manah agi, kelebih agi ungkup komuniti di kandang menua Bakun enggau Murum.
Sapit Menteri Digital, Datuk Ugak Kumbong madah, pengawa bejalaika projek nya dikearap ulih meri pangka ke besai ngagai komuniti lokal sereta nyukung pengawa perintah ngemanahka perengkaguna pengerai di kandang menua ulu.
Iya madah munyi nya lebuh ngulu Pengerami Nyain Sempekat Pemereti Ati (MoU) Ngaga Klinik Pengerai Bakun-Murum entara KKM enggau SEB ti dipenyadika Menteri Pengerai, Datuk Seri Dr Dzulkefly Ahmad.
MoU nya disain Sekretari Besai Opis Menteri Pengerai Malaysia, Datuk Seri Hj. Hasnol Zam Zam Bin Hj. Ahmad begulai enggau Ketuai Pemesai Eksekutif SEB Power Sdn. Bhd. enggau Ir. Bunyak Lunyong ngarika Sarawak Energy.
Sama bisi datai Sapit Menteri Perengka Guna enggau Telekomunikasyen Sarawak, Datuk Liwan Lagang enggau Kaban Kunsil Nengeri (ADUN) Murum, Kennedy Chukpai Ugon.
Ugak mega ngarapka pengawa bejalaika projek tu bejalai enggau lanchar sereta nyadi pengepun ngangkatka pengelantang pendiau komuniti nengah pengawa nyendiaka servis pengerai ti lebih komprehensif sereta muntang diulih. – RBI
#ruaiberitaiban#newsiban#beritaiban
Rindu | Titih | Kunsika
